أسباب قلة الحباري ؟؟؟!!! [الأرشيف]

عناز

01/08/2006, 09:55 PM

بدات هذه الايام مع قرب ظهور نجم سهيل استعدادت المولعين بالقنص للموسم الجديد وكثرت مقابلاتهم واجتماعاتهم اللي يدور طير او جهاز طيور او جيب الخ... ولكن هناك بعض الاخوان يكررون بسوالفهم ان الحباري خلصت وما هي مثل اول ... انا في الحقيقه اخالف هالاخوان بعض الشيء هو صحيح ان الحباري قلت عن اول ... ولكن اجزم ان هناك حباري تعبر اراضينا اثناء الهجره تستاهل من يعنى لها ... صحيح ان بعض الاخوان قبل خمس سنوات على سبيل المثال كان يصيد عشر حباري بالموسم ويتمنى لو انه صاد نصفهن العام الماضي ولكن بسبب كثرة القنوص صار الواحد مايصيد مثل اول وصاروا يقولون مابه صيد وانا أقول الصيد موجود ويحتاج بعد توفيق الله الى صبر وتحمل وقليل من الحظ واذا ماتوفقنا بالصيد جلسه حول الضو تسوى شىء كثير و(يدري مجرب واكثر الناس غادي) آمل منكم سرعة الردود لاني مشتاق لقرائتها وسلامتكم....... عنـــــــــــــــــــــــاز

المري

01/08/2006, 10:19 PM

عزالله انك انك صادق

زاد الماء على الطحين.. وزادو القنوص على الحباري..

بس الله يرزقهم وويوفقهم يارب

انا اذكر لقيت 14 حبارى عام 95 صدت 11 وراحت 3

ومن عقبها صيدي في نفصان .. وذلك بسبب اخوان شماء اقصرو علينا العنوه وريحونا من كثرة الدواج..

كل محل تلقى في جرة ربع سارحين قدامك ماعاد تدري وين اتروح , عود للبيت وكسب الراحة..

عسى الله يرزق القنوص لهذا العام.. ويوفقهم ويعطيهم النية المباركة

وشكرا اخوي عناز

اخوك - المري

قلب شاهين

02/08/2006, 12:57 AM

السلام عليكم ,,,,

اي والله انك صادق ،،

الحبارى موجوده والصقارين كثيرين بالمره وعشان كذا يقولون مافي حبارى ،،

يقولك الشاعر ابن حثلين :

الطير نزل والحباري قليله ** والعين ملت من عيون القرايب

وانا اقول الي يبي الحبارى يروح جنوب عرعر عند رفحا وحزم الجلاميد هذيك المناطق تلاقي فيها جوووول من الحباري ،،

وشكرا ،،

ابوالجازي

02/08/2006, 02:02 AM

السلام عليكم
يامرحبابك ياعناز انااشهد ان الحباري قليله بالسنين التاليه واليوم كنا نتناقش انا وبعض الربع عن الموضوع وبعض الربع كنه وده يعتزل المقناص اذكر عام 1409 قنصنا سبوع بالجندليه ولقينا 18 حبارى وهالسنين خابر ياعناز 22 يوم بالشمال يوم ابو عوجان ودرب البل ما شفنا الا اللي طيرت بالليل

الصيد قل وبهذلتنا المشاوير== ماعاد نلقى للحباري جراير
من يوم كل الناس صاروا صقاقير== واذا لقينا الخرب نلقاه طاير
وسلامتكم

مغرم مقناص

02/08/2006, 05:18 AM

واذا ماتوفقنا بالصيد جلسه حول الضو تسوى شىء كثير

عز الله صدقت وهذه هي الطربه الفعليه طبعا مع الصيد

اخوي عناز اعتقد ان سبب ندرة الصيد في وقتنا الحالي وخاصة الحباري هو قيام بعض من لديهم القدره بالقنص في موطنها

والصيد فيها صيدا جائرا وهذا هو من أهم الاسباب الرئيسيه

..

الباهي

02/08/2006, 03:00 PM

هلا بك اخوي عناز والاخوه المشاركين

لا يخفى على كل قانص قل الحباري من سنه الى سنه باعداد كبيره

ولا يخفى عليكم قله الحياري بشكل كبير وخاصه بالسنوات الثلاث الاخيره

كثره القنوص بشكل كبير وكثره الصيد الجائر وصار هالايام كلن صقار وكلن عنده طير

والسبب الثاني ماتتعرض له الحباري من الصيد الجائر في موطنها وهنا الخطر الكبير

والسبب الاخير واللي زاد الطين بله نفوق اعداد كبيره من الحباري بسبب السم الموضوع في

المزارع في ايران وباكستان قبل فتره

هدا اللي عندي

وتقبلو تحياتي
اخوكم
الباهي

ذيب البر

02/08/2006, 03:49 PM

هلاااااااااااااااااااا بك عناز

انا اقول اسباب قلة الحبارى مهيب كثرة الصقاقير والصقاقير الي تشوفهم لو تدبلهم مرتين ما انقرضت الحبارى

الحبارى لو يفكها الله من الي يروحون لها في ديارها ويقنصونها بسرف او يجيبونها بالكراتين للشيوخ

تحياااااااااااااااااااااااااااااااااااتي

أبو شعلان

02/08/2006, 04:11 PM

بسم الله الرحمن الرحيم

مشكور اخوي عناز ولايهونون الربع

أنا أقول إن الحباري على هجرتها وعلى حسب أراضيها اللي تبدأ منها الهجره إذا جاها وسم بدري تقل هجرة الحبارى من أراضيها وإذا ماجاهم الوسمي تجيك واجده عسى الله يجيبها .
كان يسولف علينا واحد من الربع يقول عام 1407 هـ كل الموسم ماصدنا إلا 3 حباري وعام 1413 هـ يقول ماصدنا إلا 5 حباري يقول كانت هجرة الحبارى في هالسنتين قليله جداً . أما السنين الباقيه مالك عن 3 أو 4 حباري كل خميس وجمعه .
أما في هالسنين التاليه أتوقع كثرة القوانيص هي السبب الثاني .

ملاحظه : حتى الحمام غلا من تالي اللهم ياكافي

عموماً مشكور أخوي عناز على طرحك لهذا الموضوع

,,,,,,,,,,,,,,,,,,,,,,, وتقبل تحياتي ,,,,,,,,,,,,,,,,,,,,,,,,
:j

أبو شعلان

02/08/2006, 04:14 PM

ولايهونون اللي يقنصون بالخارج

الصراحه شفنا لهم صور يقطعن القلب الله يهديهم

مارشال

03/08/2006, 02:01 AM

السلام عليكم

.............. وجهة نظري ..............

لو سبب قلة شوفنا للحباري في المقناص هو كثرة القنوص كان اذا مالقينا الحباري اقل شي نلقا جرايرها ونسمع علومها !!!

لكن الحباري بشكل عام اقل من السنين الماضية بسبب:

1- الصيد الجائر في مواطن الحباري مثل العراق وباكستان وايران

2- تجارة الحباري, اللي تشبك وتهرب للسعودية بعد من اهم الأسباب , وقد سمعت بنفسي من احد التجار اللي يشترون ويبيعون الحباري انه في مقناص 1425 ( قبل العام ) دخل السعودية عن طريق منفذ البحرين 4000 حبارى, وشرى منهن 2000 حبارى على دفعات ( وهذا كلام موثق ) حتى ولو انه يضايق الكثير......

لاتنسى ان اغلب القوانيص كانو يلقون في خميس وجمعة 3-5 حباري ولاتسمع عن احد مفلس من الصيد لكن العام واللي قبله اكثر اللي تاخذ علومهم مفلسين من الصيد ومن الجراير بعد, (هم واللي حولهم في الجهاز)!!!

وتقبلوا سلامي

فتى الشماليه

03/08/2006, 02:31 AM

عزالله انك انك صادق

زاد الماء على الطحين.. وزادو القنوص على الحباري..

بس الله يرزقهم وويوفقهم يارب

انا اذكر لقيت 14 حبارى عام 95 صدت 11 وراحت 3

ومن عقبها صيدي في نفصان .. وذلك بسبب اخوان شماء اقصرو علينا العنوه وريحونا من كثرة الدواج..

كل محل تلقى في جرة ربع سارحين قدامك ماعاد تدري وين اتروح , عود للبيت وكسب الراحة..

عسى الله يرزق القنوص لهذا العام.. ويوفقهم ويعطيهم النية المباركة

وشكرا اخوي عناز

ابوجرحين

03/08/2006, 04:57 AM

يعطيك العافيه ياخوي عناز على الموضوع الجيد
وكلامك صحيح مثل ماتفضلت
كثرة القناصين وفيها الشغله حظ
وتوفيق من الله
والله يرزفنا هالسنه بالصيد الطيب انشاالله

وشكرااااااا
اخووكــ
ابوجرحين

البحارى

03/08/2006, 12:37 PM

السلام عليكم اشكرك اخويا عنازعلى الموضوع المتير الاهتمام ولكن احنا عندنا فى ليبيا والحمد الله الحباره كتيره بشكل ماتصورش احنا فى كل طلعه نشوفو احباره بالعشره ولكن مانصيدها كلها نصيد منها اربعه اوتلاته ونترك الباقى لرحله اخرى وتانيا بسبب عدم كترة الصقارين فى ليبيا فاهنالك نسبه مايقارب 50 فى المئه من يمارس هواية الصقور وتالتا بسبب وسعه الصحراء فالدلك توجد الحباره بكتره عندنا واخويا الفيتو هو رايح على ليبيا وشايف الحباره بكتره وقانص منها وارجو ان يكون متابع معنا الموضوع ومشكوووورين

الروض1

06/08/2006, 06:01 PM

لاماعد به حباري وين دور حباري القناصه اكثر من الحباري والله انك تعاف البر يوم تشوف المشفح تخاوط في ها البران
اول والله وقت الهجره انك ياجيت الروض او الفيضه غير تطيرلك جول حباري لاكن هالحين الله المستعان الى يرب طيرام يروح
للبلاد الي ماتعرف القنص يلقاهن ملابيد ولا هنيا في جزيرتنا العربيه الله المستعان والله انك تعاف الصيد ودروبه يوم تشوف تصرافات بعض القناصه .........قضو عليها بالصيد الجائر ماهوصيد بشر صيد انتقام وصيد اهبال ما يبي يترك شي مره صغير كبير كله مصيود......مانلوم الدول يوم تسوي محميات.....ودمت سالمين
القنص بالراكاده***والتسرع جهاله

اطيب الود والاحترام اخي عنازلك مني

مفنود

09/08/2006, 03:17 PM

السلام عليكم وانا عندي نضره في الموضوع ولاكن قالوها الشباب صحيح انا في ناس يسافرون بلاد الحباري ويقنصون ولاكن القنص عندهم مثل الاعبه صار في الخارج يعني يمكن 30 ريال بيقنصون في اليوم 90 حباري او 60 وهذا السبب الي خله الحباره تنقص وهم جالسين هناك شهرين او ثلاث اشهر يعني 30 ريال اتسدهم والله 15 حباره بس يبون يسون اسكور لي الطير والله طيري قنص 100 حباره هذا الي يبونه ولا همهم شي واكبر دليل انا الكراوين ماختلفن اين بكثره

مفنود

09/08/2006, 03:24 PM

اخوي عناااااااااااااااز ما اضن انه كثرت الصقارين في البلاد ياثر على القنص لانك بتسمع الي يقنصون في البلاد هم الي ياثرون في الخارج الي يقنصور برع البلاد هذا اكيد او يعني يمكن المرض بعد محد يعلم ولاكن انا اضن من الي يسافرون خارج البلاد وسمحولي

ابو عايد

10/08/2006, 05:48 PM

السلام عليكم

الصيد الجائر في مواطن الحباري مثل العراق وباكستان وايران

الرياني

11/08/2006, 06:16 PM

أول الكلام. السلام عليكم ورحمه الله وبركاته

أشكرك أخوي عناز على طرح هذا الموضوع

أما بالنسبه لقل الحبارى عندنا في الخليج ...السبب الاول من كثر قنوصها الي يعنون لها في السنين العشر الي قد زلت

أخوي عناز لو حسبت حمله من ثلاثين موتر .. وكل موتر فيه أقل الأيمان طيرين وكل طير منكافه من الصيد عشرين حبارى

هاذي تقريبن حول ألف ومتين حبارى وبعض الصقاقير الله يهداهم الي طيورهم قاطعه في الصيد مايرد طيره الا وهو صايدبه من فوق

الاربعين حبارى على الأقل في روسيا والعراق .. وماننسى ياخوي عناز أن بعض الحملات تماري بكثر صيد حملتها والسبب الثاني

في قله الحبارى وضع السم لها في المناطق الزراعيه في بلادها وهذا الي يخلي هجرتها قليله وانا ملاحظ ان اولت العام والعام قلت

الحملات الي تظهر لها من بعد ماظهر مرض انفلونزا الطيور وهذا شي طيب في الوقت الحالي منها يمديها تكاثربكثره ومنها بجيك

لفوتها قويه ..

رضوان

11/08/2006, 08:23 PM

السلام عليكم
مشكور خوي ومنورررررررررررررررررر

الباهي

11/08/2006, 10:38 PM

رضوان تقول الحباري عندكم واجد

ابي اقنص لمده نصف يوم فقط عندكم

غـــشـــام

17/08/2006, 06:55 PM

عزالله انك انك صادق

زاد الماء على الطحين.. وزادو القنوص على الحباري..

بس الله يرزقهم وويوفقهم يارب

انا اذكر لقيت 14 حبارى عام 95 صدت 11 وراحت 3

ومن عقبها صيدي في نفصان .. وذلك بسبب اخوان شماء اقصرو علينا العنوه وريحونا من كثرة الدواج..

كل محل تلقى في جرة ربع سارحين قدامك ماعاد تدري وين اتروح , عود للبيت وكسب الراحة..

عسى الله يرزق القنوص لهذا العام.. ويوفقهم ويعطيهم النية المباركة

وشكرا اخوي عناز