سؤال لأهل المخالفات (فشيييييله)

[kharshoum]

السلام عليكم ورحمة الله وبركاته

إخواني بغيت أسأل بالنسبة للمخالفات البحريه كيف طريقتها أنا كنت طالع أول أمس ومريت من منطقه محظوره عند المينا الصناعي بسبب لخبطه الجي بي إس وقلت اختصر الطريق فغلطت المهم حسيت اني ماشي غلط ورجعت بس مسكوني حرس الحدود قالي دكتور وتلخبط في الخرايط :D:D:D طبعا انا جديد على بحر الدمام و كتب في دفتر التراخيص مخالفه مرور من منطقه محظوره وخلاني بعد ما بين لي الطرق والاحداثيات يعطيه العافيه وكان انسان محترم فعلا وذوق جدا في معاملته ورجعت الدمام شافها حق الترخيص وقالي ماعندك مشكله منت أول واحد في أي وقت بغيت تطلع عادي تعال رخص واطلع الله يستر عليك سألته طيب كيف المخالفه الحين قالي باقي بنردلك خبر فمدري وش الطريقه وس بيصير ياليت لو واحد عنده خلفيه ينور طريقنا

[baracuda]

عوافي يا رجل ما من احد الا ويخطي
وانشالله خير ما تحمل هم ،

[qwahmad]

الله يعينك يا رجال يمكن تروح للتحقيق اسئله بسيطه ليش عابر في المنطقه من وين راجع وطبعاا دفترك يحكم انت جديد في البحر او لا وبعدين على حسب الظابط ان كان طيب يمشيك والا بتدفع 1000 او 2000 او 500 على حسب الظابط الله يعينك يا رجال

[kharshoum]

بيض الله وجيهكم و الله يعين طيب ولين يطلبوني للتحقيق اطلع عادي في أي وقت ولا ممنوع لين أخلص المشكله هذي

[ربان الخليج]

لا تخرشون الرجال 0الدعوى تساهيل دامهم فكوك وفكوا الطراد معناها موضوعك خالص ومايستاهل 0احتمال تعهد او انذار0

[سكن حبك سكن]

سهلات ان شاءلله.

[kharshoum]

امين يارب شكرا لكم الله ييسر الامور ويسترها عالجميع

[عاشق البحرE]

عليكم السلام أخوي kharshoum ...

بالنسبه للمخالفات البحريه الله يكفيك شرها تبدأ من 1000 الى 5000 ريال على حسب نوع المخالفه .. و بالذات في بحر الدمام عندهم تشدد غيرب و كنك مسوي جريمه ...

بس لا تتخوف بالنسبه لك .. انت شخص منسي دام قالك المقوله المشهووره : (( احنا بنرد عليك)) .. يعني انساها .. و اذا عطووك دفاتر الطراد و التصريح و تقدر تبحر هذا أكيد ما فيها شيئ .. لان المخالفات البحريه اذا جاتك مجرد ما ترجع الفرضه تنمسك دفاترك و يتوقف الطراد الى ما حد تراجعهم ..

صارت لي قصه مع حرس الحدود انا من اهل الدمام بس طرادي في الجبيل و ما افكر اجيبه للدمام ابد .. القصه طال عمرك كنت مره اللفح قريب من منصه حفه و ما كنت قريب حيل منها يعني تبعد عني أكثر من 500 متر .. بس عيال الحلال ما قصروا مسكوني و فتشوا الطراد بطريقه غبيه و غير اخلاقيه و كني سارق او مهرب .. و بعدها حرورا لي مخالفه المفروض تسديدها 5000 ريال ( الصيد عند المنصات أرامكو السعوديه )) مع اني كنت بعيد عنها .. و اول ما رجعت الفرضه ( فرضه الدفي) الا و العسكري قال لي خل طرادك على جنب و جيب الدفاتر و تصرح النزول و راجع مركز حرس الحدود الدفي للتحقيق يوم السبت .. و جيتهم يوم السبت و دخلت للتحقيق عند الضابط ابو وليد ((بيض الله وجهه)) و كثر الله من أمثاله .. حقق معي و كان جد متساهل و لين ... و قال لي انتبه لاتقرب من المنصات .. و عطاني اوراقي و بدون تعهد و لا شيئ .. و قال لي يمكن نطلبك مره ثانيه و اخذوا رقم جوالي .. و هذي السالفه لها 9 شهور و بالعربي انتهت و ما ظنيت بطلبوني مره ثانيه .. و انا تقريبا ادخل البحر اسبوعيا ..


معليش طولت عليك و عليكم بس ترا سالفتك انتهت و لو بتصلون عليك بتروح و بعطونك تبيه فقط ...

و نصيحه مني لا تقرب من الأماكن الممنوعه و على قوله المثل ( امش عدل يحتار فيك عدوك و صديقك) ..

[kharshoum]

ريحتو قلبي الله يريح قلوبكم ويكفيكو كل شر ويحفظكو اخواني ماقصرتو بيض الله وجيهكم

[بحري نجد]

هذا كله من أرامكو حسبي الله عليهم, تشدد أمني ماله أي سنع , حجروا مناطق الصيد في الخليج كلها وإياكم أحد يقرب بس من مناطقهم

أشوف المقاطع الأجنبية كلها صيد عند المنصات ولا عندهم أي مشكلة قانونية, لكن أرامكو قالبة الدعوة عندنا, كأن الواحد بطراده بيجي ويسحب من بترولهم وغازهم :\

[bo.nasser]

هل يوجد على جي بي اس مايدل على انها اماكن محظوره

[kharshoum]

اخوي بحري نجد صدقت وأغلب افلامهم يكون بعيد عن قواعد المنصات حوالي 20 متر ويحدق عندها ومحد يتكلم معاهم وبالنسبه لبوناصر مو مبين عالجي بس إس انها اماكن محظوره هو يقولك ابتعد عن الممرات المائيه لاتوقف فيها مرور فقط والمنشئات البتروليه والمواني تبعد عنها حوالي 5 ميل بحري وتبعد عن الشواطي حوالي 50 متر والمشكله عندي الجي بي إس لو بتنقل من مكان لمكان على الاحداثيات يرسمها خط مستقيم بين الاحداثيات وممكن الخط هذا يكون متقاطع مع منطقه ممنوع المرور فيها ومدري صراحه هي مشكله عندي في الخرايط ولا كل الاخرايط كذا !

[accentkool]

ان شاء الله امورك سهالات دام مامسكو اوراق الطراد مع بداية رجوعك