تكفووووووووون أفزعوا لي . رجة السفاري مالقيت لها حل .

[K.S.A.A]

السلام عليكم ورحمة الله وبركاته


ياشباب فزعتكم تكفوووووووووووون


كما في العنوان عندي سفاري موديل 99 يرج رجة غير طبيعيه


وسبق وأن طرحت الموضوع في رمضان وأشار علي بعض الأخوان ببعض الحلول


وتم إصلاحها في السياره وراحت الرجه ولكن للأسف رجعت من جديد وأقوى بعد


المهم زبدة الموضوع :


الرجه تجي لما أضرب مطب صناعي أو مطب صغير أو حفره
وانا ع خط وتكون سرعة السياره من 100 وفوق . يرج الموتر كله أحسبه بيتفكك .


بعض الإصلاحات اللي تم عملها بالسياره :
1- غيرت مساعد الدركسون جديد
2- الأكواع للذراع الخلفي اللي ورى الدفرنس الأمامي.
3- مذراع المساعد غيرته جديد.
4- تم تغيير رمان الركبه جديد ( مع عدم وجود الورد اللي أشار إاليها بعض المهندسين )
5- فحص رمان العكس والصوف الأماميه والتشحيم كااااامل .
6- تم تغيير جلب الشدادات ( الرباطات ) اللي تمسك الدفرنس الأمامي وأصلي بعد .
7- تم فحص الجنوط , والجنوط 100%
8- رصصت الكفرات ترصيص أرضي ولانفع بعدها بدلت الكفرات اللي خلف لأمام واللي أمام للخلف وبرضوا مافي فايده .


وألحين تكفووووووووون دلوني على حل واللي يرحم والديكم لأني والله كرهت السياره .


الله يجزاكم خير الجزاء

[SHUGE]

ممكن يكون صليب العمود ممكن يكون منه لا ينع فحصة للتأكيد والله العالم

[العطاوي a511]

دبل مساعد الدركسون المشكله منه وليست بالاشياء اللي غيرتها الله يعينك

[ssemmess]

إذا كانت تحدث عند سرعة معينة فهي من الجنوط مثلا عندما تكون السرعة من 90-100 أو من 100- 110 وهكذا
أما أذا كانت بشكل مستمر مهما كانت السرعة فالعمود كاملا يحتاج إلى خرط وهي تحدث بسبب الدخول في مناطق جبلية أو رملية بدون إستخدام الدبل.

[قناص2000]

وانا اخوك اذا الموتر يرج كله هذا سبب عمود الكردان رصصه وان شاء الله يضبط وتاكد من الصليب مره وحده

[ABU-SARAH]

جرب فك العامود حق الدبل يمكن يكون منه

[sgl2002]

لا ياخوان العمود ماله دخل

العمود اذا كان خربان فالرجه ماتروح ملازمه له


والرجال يقول اذا ضرب مطب يرج

العمود ماله دخل عندك

[على رمشي تمشي]

طيب كراسي المكينة شيك عليه - او عندك حدى الصلبان ماهو مضبوط

[K.S.A.A]

مشكورين على التفاعل ولكن عمود كردان سليم والصليبات ممتازه والرجه مو منه متأكد 100%
مثل ماقال واحد من الأخوان أذا العمود فيه شيء فالرجه تجي من يوم تتحرك السياره لحد ماتوقف.

لكن ياخوي العطاوي مساعد الدركسون جديد يعني واحد مايكفي . والرجه تحدث عند جميع السرعات .

[sa-z71]

اذكر مع احد الشباب باترول اذا ضربنا مطب قعد ينفض
مافيه شي ماغيره مساعد دركسون وترصيص ارضي ووو...
وبالأخير قاله شخص غير العمود اللي راكب فيه مساعد الدركسون
والصراحه غالي الأصلي ب700 وشوي وركبنا تجاري ب350 وراحت الرجه
لكن على كلام اللي نصحنا التجاري سنه وتطلع مشكلته

جرب خذ حق موتر شخص تعرفه قبل لا تخسر
واذا غيرته عطنا النتائج

والله يعينك

[ls1.5700]

شيك على الدوده يمكن يكون فيها فضاوه

[K.S.A.A]

أخوي sa-z71 الله يعطيك العافيه انا غير العمود اللي تقول جديد تجاري لان الأصلي مثل ماقلت انت غالي.

والدوده ماشيكت عليها بس هل معقول تكون منها ؟؟؟

[ALKKKK]

مافية مشكله الا لها حل

وانشاء الله مشكلتك بصيطه

بس ياليت تعلمنا اذا انحلت مشكلتك لكي يستفيد منها باقي الاعضاء

لاتصير مثل بعض الاعضاء يطرح المشكلة واذا انحلت مشكلتة ما ندري وش صار معه

[علي سلامه]

المشكله صارت مع الوالد قبل كذا وطلع الدفرنس شيك عليه

[K.S.A.A]

الله يطرحنا في الحل إن شاء الله
وأبشروا بس تنحل مشكلة موتري وأعلمكم .

الدفرنس ممتاز مافيه شيء .

واحد من الشباب أخذ الموتر اليوم وراح عليه مشوار جهة القصيم ويقول فيه ورشه متخصصه في عنيزه
وبيمر عليها وهو متأكد أنه راح يلاقي الحل هناك . أنتظره لما يرجع ونشوف , والله يسهل جميع الأمور .

[hamido]

انا كان معي باترول وحصلت لي نفس مشكلتك وديته كذا ميزان ماعرفله الين جيت ميزان قالي يبي كبس اذرعه والحمدلله من يوم كبسهن راحت الرجه

[خوة نشامي]

موفق باذن الله

[مطرح البكار]

كانت عندي رجه مع المطب والفرامل طلعة الهوبات عندي منمسحه

غيرتها ولا عد جات الموتر باترول ربع

[K.S.A.A]

الله يجزاكم خير
لكن ياأخوي hamide الأذرعه عندي 100% . أول ياليت توضح أي أذرعه تقصد بالضبط .
أخوي خوة نشامى . الله يوفقك وأخوانا المسلمين مشكور على دعواتك.

أخوي مطرح البكار الهوبات ممتازه ومعروف رجة الفرامل من الهوبات . موتري يرج مع المطب فقط .

[رِجم]

غير مساعد الدركسون وركب استرالي تلقاه بالرمايه سعره 395 لونه اصفر وبيفرق معك الموتر 180 درجه ورجة الدركسون اللي من عيون القطط او المطبات بتروح

[banshy2009]

كانت عندي نفس المشكله , ابد بكفر السواق, ارفعه بعفريته و امسك الكفر من تحت واليد الثانيه من فوق وابد حرك فوق وتحت اكثر من 3,4 مرات ملاحضه (يتم التحريك بقوه وشده )اذا لاحضت فيه فضاوه يعني يبيلك تشد على البيرنق (رمان) حق عامود الدفرنس, ملاحضه لاتشد عليه واجد اذا حصلت الكفر يلعب بمجرد ما توقف الصاموله اربط مسمار التامين بعدين سونفس الاختبار مع الكفر الثاني
وان شاء الله تلقى المشكله

[المغترب9]

ان كانه يرج بعد كل مطب وفي الخط مايرج فاالمشكله من رمان الدفرنس غيره او فيه ورشه بالخرج يوزنه ويحط ورد نحاس ويضبط واي خدمه انا مستعد

[رعد الفيافي]

فيه حلول كثيرة لكن من رأيي انك تروح لميكانيكي او ورشة ممتازة او العضيب
المهم وتخلي المهندس يطلعه لك بالضبط لأنه أسباب الرج واااااااجدة وكلن وموتره فياليت تختصر على نفسك وتوفر قروشك..
وللمعلومية الباترول لا تبدل جميع القطع في السيارة كامله يبقى فيه رجه بسيطه وهذي الطرب فيه ^_^
فوسع صدرك وارضى بالموتر..
الله ييسر امورك :)

[NissaN 1990]

دبل مساعد الدركسون يكلفك 250 ريال مع التركيب وحده بوحده

[قناص الدبدبة]

غير مساعد الدركسون وركب استرالي تلقاه بالرمايه سعره 395 لونه اصفر وبيفرق معك الموتر 180 درجه ورجة الدركسون اللي من عيون القطط او المطبات بتروح

عز الله ماشرت عليه هالمساعد صار سعره بالرمايه 420 ريال
وهو صراحه مايستاهل ريال خرطي كان عندي رجه زي ماذكر صاحب
الموضوع وركبت هالمساعد الاصفر وزادت الرجه اكثر من قبل
وفكيته وشريت مساعد الدركسون حق الوكاله وابشركم ضبط معي
بفضل الله وبفضل مساعد الوكاله
ولاكن بعطيك رقم هندي بصناعية الموسى اللي قبال حراج بن قاسم
وهالهندي خبره برجة الباترول وهذا رقمه وان شاء الله تدعولي
0559317505 اسمه شهاب واتمنى اني افدتكم

[hamido]

الاذرعه الي ماسكات بذراع التوازن الطويل ورحت لكذا ميزان ولا طلعهن انزل حركهن بيدك تلقاهن يتحركن بخفه يعني يبن كبس او جديد

[K.S.A.A]

الله يعطيكم العافيه ياشباب على المشاركه والأهتمام . لكن ياشباب انا موضح في الموضوع أن الرمانات ممتازه
رمانات الركبه غيرها جديده وأصلي . وفحصت رمان العكس وممتاز وأنا شاد عليه قبل فتره .

سبق وأن رفعت الموتر من أمام وحركت الكفرات أنا والمهندس ولافيه أي فضاوه ( قسم بالله قهررر )
الأذرعه جديده ومساعد الدركسون جديد والرجه هي هي ماخفت ولا شي . والرجه تكون على الخط أذا ضربت مطب صغير أو حفره أو شيء أو أذا مشيت على خط مقشور أو خط مندمر من التريلات .

لكن يا أخوي المغترب الورشه اللي في الخرج وينها فيه ؟؟

وأخوي حجاب بيض الله وجهك أنت وجميع الاخوان . وراح أتصل ع الهندي

[ابومتعب7541]

اخوي انا كان عندي نفس المشكله في باترول ربع موديل 91 وطلعلي الشيب في راسي من الرجه وما احد عرفها وفي مره مريت ورشه في الجنوب عند واحد سوداني وقالي المشكله من ذراع الشاص الي يثبت الدفرنس الأمامي في الشاص يوجد له جلده من فوق عند الشاص كانت علبة الدركسون تهرب عليه زيت وانقطعت الجلده حقت الذراع وفكيته ورحت شريتله جلدة سسته حقت هايلوكس ووديتها المخرطه كبسولي الجلده في الذراع ورحت ركبته وراحت الرجه للأبد والحمد لله . الذراع يركب في الشاص تحت علبة الدركسون التحتيه . واذا مافهمت شرحي هذا رقمي دق علي وافهمك . طبعا بعد اذن الأداره 0533387787

[سراي-01]

السلام عليكم ,,,,, مر على ميزان الباديه في الصناعيه القديمه ,,,, ان شاء الله بيحلون مشكلتك ,, واحد من الشباب معه باترول 99 بابين sgl قبل حول شهرين موتره كان يرج رجه قويه مره ,,, راح لهم وضبطوا موتره ,,,, وحالياً موتره طرب راح عليه مكه ورجع بعد التضبيط ومعه اهله ويقول الحمد لله زالت المشكله نهائياً ,,, اذا تبي رقمه ابشر اكلم الرجال وآخذه منه ...... الله ييسر امرك .

[K.S.A.A]

الله يبيض وجهيكم جميع ويجزاكم خير الجزاء

أبشركم ولله الحمد والفضل والمنه الموتر ضبط والله يجزاه خير اللي أخذه وراح فيه للقصيم وصلحه هناك.

لكن المشكله هي أن الورشه تحتفظ بالسر . لأنهم شرطوا عليه ينزل الموتر الصباح ويجي ياخذه العصر

وحاول يعرف وش السبب حاول ولكن الورشه رافضه البوح بالسر . والورشه في عنيزه وإذا تحبون أذك أسمها

ذكرته إذا إدارة المنتدى موافقه . والموتر ألحين 100% والله يكفيني شره ,

حتى مالاحظت أختلاف كبير في الموتر سوا أن لفة الدركسون صارت أثقل شوي من قبل .

وقفت الموتر ع الحفره وناظرت تحت السياره ولاحصلت تغييرات إضافيه .

وأعيد وأكرر بيض الله وجيهكم جميعاً على تفاعلكم .

[ALKKKK]

اول شي نبارك لك تصليح السيارة
كم كلف عليك تصليح السيارة وياليت تشوف تحت مساعد الدركسون غيروه ولا مسامير الرمانات مفكوكه بتشوفها واضحة ولا الاذرعة بتشوف اثار الفك عليها ياليت توضح

[المسروحي]

ماشاء الله تبارك الله
والله إنك فرحتني......
ياليت تذكرلي أسم الورشه أو ترسله لي عالخاص

[محمد بن حمد]

رح الى ميزان البادية في الصناعية القديمة بالرياض وينهون الرجة انشاء الله ودعواتك

[K.S.A.A]

الله يبارك فيكم ويجزاكم خير الجزاء

بالنسبه للسعر فصاحبي حلف وأقسم من الحساب الله يغنيه وياكم ويكثر خيره وخيركم ولاعلمني كم التكلفه يشهد الله .

الورشه في صناعية عنيزه وعلى توصيف صاحبي لأني ماأعرف عنيزه

يقول في الصناعيه اللي وأنت طالع من عنيزه تبي الزلفي تجيك ورشه من ضمن الورش أسمها ( ورشة النجيبان )

فيها هندي اسمه طارق وجيييد بالحييييييل ..

أتمنى أنني قدمت مايفيد الجميع .

[yousef1410]

السلام عليكم ..
مبارك عليك والحمد لله قبل كل شيء ..
تتمة للموضوع ويمكن يستفيد الجميع من حالتين صارت معي ومع ابن عمي ويمكن تفسر لنا شيء كثير ..
الأولى مع ابن عمي كان في ورشة وجاء شخص يشتكي من الرجة الشديدة بالسيارة قال له الميكانيكي خل السيارة عندنا وتعال بالليل .. يقول ابن عمي كنت جالس بعيد وأشوف الميكانيكي قال للعامل عنده اطلع للمغسلة وغسل السيارة من تحت بستم وتعال . يقول نزلت راسي من بعيد أشوف السيارة ولقيت فيها طين كثير متعلق بالسيارة وكان الطين هو السبب بالرجة بس الميكانيكي ما يبي الرجال يعرف المشكلة .
الثانية معي أنا شخصياً كانت عندي رجة بالسيارة بعد سرعة 80 وترج السيارة بشدة حتى تحس إن السيارة كلها بتتفكك رصصت الكفرات ولا فيه مشكلة فيها .. بالأخير لقينا صواميل العمود اللي تشبكه بالدفرنس ناقصة مسمار واحد شكل الميكانيكي ناسيه ركبنا المسمار وراحت الرجة .