قصتي مع الصيد

[صياد بالسيف]

بسم الله الرحمن الرحيم

السلام عليكم ورحمة الله وبركاته..
قصتي مع الصيد بدأت يوم كنت صغير . كنت أروح مع الوالد الله يطول بعمره وأخوياه للبحر . وكانوا أول يصيدون بالخيط لا سناره ولا شي. كان الوالد يسويلي خيط بلد وميدارين ويحطلي الجيم (الطعم) ويقط لي الخيط والله وكيلكم ما أصيد شي:D ومع مرور الوقت صرت أتعلم منه كيف أسوي الخيط وأرقعه وكيف أقط الخيط بطريقة صحيحة ومتى الوقت الجيد للصيد ووين أماكن الصيد الجيده ومع الخبره بدأت أتفوق على الوالد :D ولما كبرت تعرفت على ربع راعيين بحر وصيد من المعارف والأقارب . شفتهم يصيدون بسناره قالوا لي ليه ما تجربها أحسن من الخيط قلت يالربع ما أعرف لها قالوا بسيطه نعلمك وصرت أتعلم . كل مره رميتي ما تتعدى المترين :D ومع الممارسه قدرت أرمي لمسافات جيده واشتريت لي سناره 3.8 متر وقوة البكرة 6000 غشيم :D . بس انها جيده وصرت أصيد فيها كميات..
هذي قصتي مع الصيد . الصيد يا إخوان يجي بالخبره والتحصيل. ولازم تتعرف على صيادين يعطونك من خبرتهم. والصياد لازم يجرب الطرق الجديده للصيد أنا كنت رافض فكرة السنارة لكن بعد التجربة عرفت أنها ممتازه وسهلة.
هذا ما عندي وشكرا..

[مجنون عجلان]

ما شاء الله صياد وابن صياد الله يوفقك ونشوف التقارير الجميله والصيد
الحلو نورت انت وسيفك تقبل مروري اخوك ابو محمد

[baracuda]

شكرا لك على سردك للتجربة
اتمنى ا يوجد موضوع مثبت يتبادل فيه الاعضاء قصصهم مع بدايات الصيد

شكرا

[majid2]

اخوي يعطيك العافية انا احب الصيد بالجلب او الخيط لكن ياليت تعلمني ايش افضل طريقة لرمي الخيط بحيث اني اذا رميت الخيط بعيد يروح , انا اللي اسويه اني اطلع كمية كبيرة من الخيط و اخليها بجانبي على الارض ثم ارمي لكن بعد عدة رميات الخيط يتعقد , هل هناك طريقة افضل ؟ وجزاك الله خير

[سعدالطاير]

مشكور اخوي
صياد بالسيف
والله يبارك لك في الوالد
انا الوالد الله يرحمةكان بحار بس ترك المهنة الله يرحمة اول ماجينا للدنيا
بس عشق البحر والصيد كان ملازمني من الصغر اخذت من الوالد الله يرحمه اشياء كثيرة مفيدة
ويبقى البحر عشقي من الصغر
تحياتي لك

[صياد بالسيف]

شكرا على المرور أتمنى أنه يتثبت الموضوع الله يرحم موتانا وموتاكم وجميع موتى المسلمين ..
بالنسبة لك أخ ماجد استخدم الخيط اللي يجي ملفوف بخشبه اللي فيها قرنين لما تفل الخيط فله شوي وحط أول الخيط عند السيف وحط له نيشان عشان ما تضيعه وبعدين فل الخيط يمين النيشان لا تفل الخيط واجد و وبعدين قدم متر وروح يسار الخيط متر وفل الخيط مثل الخطوه الأولى يعني لا تكوم الخيط بمكان واحد ولا تفل كل الخيط تقريبا ثلاث أرباع الخيط ولما تخلص اركز الخشبه في الرمل يعني راح تكون بعيده عن السيف من 3 إلى 4 أمتار.
نجي لطريقة رمي الخيط: امسك الخيط كل ما طولت الخيط كان أفضل لكن لا تطوله واجد لأنك ما راح تقدر تلوح فيه.
وبعدين ابدأ بالتلويح وأنت تلوح رح تحس بلحظة هي أفضل لحظة لرمي الخيط حاول تنتعه وأنت تلوح من لقدام والتلويح يكون بشكل مايل شوي ومع التدريب رح تكون محترف وبالنسبه لما تسحب الخيط سحبه وأنت تتحرك لليمين أو اليسار يعني لاتوقف وتسحب علشان لا يتكوم الخيط بمكان واحد أرجو أني وصلت الفكره وأي خدمه أنا جاهز تحياتي.

[ابوفيصل123]

الصيد متعه للي يهواها
اتمني لك التوفيق

[majid2]

جزاك الله خير ما قصرت وصلت الفكرة و إن شاء الله اجربها

[صياد بالسيف]

العفو أنا بالخدمه بس حسيت أني ما وصلت الفكرة لأن الشرح بالكلام ما ينفع..

[accentkool]

ماشاء الله عليك
تعلمت وصرت صياد خبير بارك الله فيك
وخلينا نشوف لك تقارير وطلعات ورينا صيدك

[Rabtor F-22]

جميل ان نذكر بداياتنا في هواياتنا

بل إن الأجمل هو ان نذكر لمن كان الفضل أو السبب في تعلمها

أشكرك أخي صياد بالسيف على هذا الطرح الجميل

وأتمنى لك كل التوفيق

[صياد بالسيف]

جميل ان نذكر بداياتنا في هواياتنا

بل إن الأجمل هو ان نذكر لمن كان الفضل أو السبب في تعلمها

أشكرك أخي صياد بالسيف على هذا الطرح الجميل

وأتمنى لك كل التوفيق

فعلا الفضل كله لله أولا ثم اللي كانوا قبلنا لازم نتعلم منهم لأنهم هم أهل الخبره


وبالنسبه للطلعات والتقارير أبشروا بها لنا طلعة قبل عيد الأضحى رح نتحفكم فيها إن شاء الله

[سكن حبك سكن]

تجربة رائعة.

[سوالف]

ذكريات جميله
والاجمل أن تنتج منها خبره تفيدك وتفيد غيرك

والله يجزاك خير

[majid2]

الخشبه والسيف و النيشان بصراحة ما فهمتها لكن فهمت الفكرة العامة انك تطلع كمية من الخيط وتحاول تحافظ عليها من انها تتعقد و تثبت بداية الخيط عشان لا يروح (واعذرني اذا كان فهمي خطأ)
لكن انا استخدم الطاره الدائرية و اطلع كمية من الخيط على جنب و امسك الطارة بيد و ارمي بيد
عموما ما ودي اكثر عليك انا مع الوقت باتقنها ان شاء الله اما فكرتك فممكن توضحها برسمه بسيطه توضح كيف يكون امتداد الخيط و اما الرمي فما يحتاج
وجزاك الله الف خير

[صياد بالسيف]

http://up.arab-x.com/May12/iuu03499.jpg


هذي صوره السيف (الشاطئ) الخشبة موضحه بالصورة اللي ينلف عليها الخيط النيشان تحطه عند البلد (الثقاله) علشان ما تضيع الخيط لازم تباعد بين كوام الخيط من متر إلى متر ونص..

[majid2]

يعطيك ألف عافيه كذا وضحت الصورة. أن شاء الله أجربها

Sent from my BlackBerry 9300 using Tapatalk