مقارنه بين حراره البنادق

[مدمن مررقوق]

السلام عليكم


حي الله اهل مكشات جيناكم بموضوع عن حراره البنادق


اول شي بقول لكم التجارب اللي سويتها ببندقي وبندق خويي

والهدف موحد جالون الزيت ابو 4 لتر الحديد والمسافه 40 خطوه
والفشق ارسي اسود 6 على 36




البندق الاولى بلجيك 30 انش رميها بارد اخترقت من قدام 21 حلبيه فقط ومن الخلف ولا حلبيه




الثانيه ام حبه ام كلتش امريكيه 32 انش والفشق ارسي اسود اخترقت من قدام 64 حلبيه ومن الخلف 3 حلبيات (احر بندق من هالبنادق)



الثالثه فرانشي 30 انش تشوك 1 جربت فيها نوعين الاول ارسي اسود اخترقت من قدام 48 حلبيه ومن الخلف 3 حلبيات

والنوع الثاني بي & بي 6 على 36 اخضر اخترقت البندق من قدام 83 حلبيه ومن الخلف 8 حلبيات




كنت ابي اجرب البي & بي على ام كلتش بس خربت فيها قطعه وتفصيلها عند الهدف مع اصلاح السبرنق حق الضراب 900 ريال بعد الخصم على قولته وتركتها بدون تصليح


ابي كل واحد يطرح لنا تجربته من نفس المسافه (40 خطوه عاديه) وفشق 6 على 36 وجالون ابو 4 لتر (شل)

نبي نخلي الموضوع مرجع لحراره البنادق واصرف من اننا نروح مع بعض

[انسيابي]

الله يعطيك العافيه على هالتجربه
بس ياليت تفيدناا بالصوور

وشاكر لك

[مدمن مررقوق]

ابعيد التجربه الثالثه الخميس الجاي وابوثقها بالصور

اما البلجيك بيعت وام كلتش خربت

[Azez1433]

الله يعطيك العافية

[ابوعاشة]

اخوي الجركل فاضي ولا فيه موية

[الخديوى]

ابو عاشه يكون فاضي

[شمالي و الهوا غربي]

انا اشوف انك ظلمت البلجيك في هالمقارنه
اولا البليجك قديمه ’ وام كلتش والفرنشي من النوع الجديد.ولايقارنن بالبجيك لان عامل الحداثة غير متوفر.
وبعدين ميزة البلجيك الاولى هي تنظيم الحلبي والسرعة’والبلجيك مشهود لها لاتقارن باي بندق اخرى
بس هذي يمكن ان في ماصورتها شي او بعض اجزائها خربانه.
واخيرا المفروض ان تكون المقارنة بين امهات خمس مع بعض وبدون اضافات تشوك ضيق وتشك وسط , ويكون عامل الحداثة مثل بعض.
وعلى كذا تكون المقارنة عادلة

ملاحظة
معلومة مهمة حطوها بروسكم وهي = رمي البواريد ماهو واحد’ وهي نفس الشركة و الماصورة نفس الطول"

تحياتي

[اقوى الرجال]

الله يعطيك الف عافيه

[مدمن مررقوق]

اخوي الجركل فاضي ولا فيه موية

مثل ما قال الخديوي جزاه الله خير يكون فاضي


انا اشوف انك ظلمت البلجيك في هالمقارنه
اولا البليجك قديمه ’ وام كلتش والفرنشي من النوع الجديد.ولايقارنن بالبجيك لان عامل الحداثة غير متوفر.
وبعدين ميزة البلجيك الاولى هي تنظيم الحلبي والسرعة’والبلجيك مشهود لها لاتقارن باي بندق اخرى
بس هذي يمكن ان في ماصورتها شي او بعض اجزائها خربانه.
واخيرا المفروض ان تكون المقارنة بين امهات خمس مع بعض وبدون اضافات تشوك ضيق وتشك وسط , ويكون عامل الحداثة مثل بعض.
وعلى كذا تكون المقارنة عادله

ملاحظة
معلومة مهمة حطوها بروسكم وهي = رمي البواريد ماهو واحد’ وهي نفس الشركة و الماصورة نفس الطول"

تحياتي

اخوي انا قايل باول الموضوع هالبلجيك فيها بلا لا حراره ولا نظم واكيد قديمه من الاولات
وهي 30 انش ماهيب 32 انش وتم بيعها



الله يعطيك الف عافيه

الله يعافيك منور الموضوع يذيبان

[مدمن مررقوق]

وين راعين امهات خمس يحطون تجاربهم

[ابو تركي 500]

مشكور ع الموضوع واناد سويت نفس التجربه بس الشوزن وحده والاختلاف بالفشق وعلى مسافة 45 خطوه ولو ان الخطى تختلف من شخص لاخر والله اعلم .

[مدمن مررقوق]

ابو تركي لا هنت وش الشوزن ووش هو الفشق وكم حلبيه خرقت الجالون من ورا

[نجف]

انا معي روسيه ماصوره الظاهر فرنسيه

رميت من اربعين خطوه. على نفس الجالون حق الزيت

اللي اخترقنه من قدام. 68 ومن ورا 23.
الفشق كاكا 36/6
وابعيد التجربه. الخميس انشاء الله. للتوثيق بالصور

[مدمن مررقوق]

ابطلع بكره واوثق التجربه الاخيره بالصور ان شاء الله

[شاهين12]

هلابك اخوي مدمن مرقوق .
الله يعطيك العافيه على التجربه
البلجيك هذي اتوقع فيها مشكله او شي ،وثانيا عندك القياس لوكان بالمتر كان افضل .
لان 40 خطوة ماتعدى 30 متر ويمكن اقل بعد وهذي مسافه رمي قريبه ومن شخص لشخص تختلف الحسبه
،كد حسبتها بالمتر وحسبت بالخطوه ،
فيه فرق الخطوه كثيره بالعدد والمتر اقل ,40خطوه ارمي بالبلجيك طوله 30انش بــ 7،5 ظغط 32GR تخترق
مايحتاج 36GRوعندك الجالون لاتعتمد عليه الا بالمسافه البعيده لانه خفيف.

تحياتي لك .

[مدمن مررقوق]

هلا اخوي شاهين
حسبتها بالخطوه العاديه للمشي لانها عمليه اكثر اما بالمتر فيختلف تقدير المسافه من شخص الى آخر

انا بعت هالبلجيك هبلت بي دفعت على تصليحها ما يقارب 600 ريال في 3 شهور ! والبلا ليتها تستاهل وحاره لكن ابرد من رميها ما شفت وقارنتها ببلجيك كروم وبعد الممقارنه بعتها براس مالها

[مدمن مررقوق]

السلام عليكم



هذول الجوالين (على بعد 40 خطوه ) والتصوير من الجوال الزوم على الآخر

http://im27.gulfup.com/92Nm1.jpg


وهنا تتضح الرميه الاولى ب b&p 36/6

http://im27.gulfup.com/Htra2.jpg


وهنا النتيجه,, وعدد الحلبي مذكور ومحدد على كل حلبيه بالصوره

http://im27.gulfup.com/kr7e3.jpg


ومن الخلف

http://im27.gulfup.com/Qw9B4.jpg


اما بالفشق الثاني ارسي اسود 36/6

http://im27.gulfup.com/G2GC5.jpg


44 حلبيه !

ومن الخلف


http://im27.gulfup.com/ud896.jpg

[فيضة بن سويلم]

التجربة الاخيره وضحت لنا المسافه ونوع الفشق ولكن انوع البندقيه ؟؟؟ مجهول..

من خلال تجربتك الاولى يتضح ان الفرنشي رميه حار ولا شرايك..

الله لا يهينك لو تكرمت بما انك تمتلك فرانشي يا ليت تسوي تجربه بينه وبين السوبر او البلجيك لو تكرمت

لاني ناوي اشتري فرانشي بس بالنسبه لي اجهل ا في هذه البندق

ولك جزيل الشكر