مشورتكم في مشكلتي مع شركة نجم

[ملاذ الصمت]

السلام عليكم ،،

بالامس صدمني واحد راعي جيب شروكي من الصدام الخلفي وانا سيارتي 2012 وهو يقول انه في واحد حده علي وهج اللي حده

وجت شركة نجم وقالهم هالكلام وقال موظف نجم ان الغلط عاللي هج وهرب قلت طيب مانعرف له لا رقم لوحة ولا شي قال اجل الله يعوضكم ،،

الحين انا مالي علاقة باللي حده وصدمه ،، انا هذا صدمني من الخلف ومعه تامين يصلح لي سيارتي

موظف الشركة يقولي تبغاني اظلم شركة التامين ؟ هذي امانة ،،


ابي رايكم ومشورتكم ووش الحل اللي ممكن اسويه

وشكرا

[aziz ali]

المفروض على راعي الشروكي حده ولا ماحدة

[ملاذ الصمت]

شكرا لك عزيزي ابو علي


انا كلمت موظف نجم وقلت له انا مشكلتي مع راعي الشروكي هو اللي صادمني

والرجال معه تامين

لكن انا اسال كيف الطريقة اللي اعترض فيها على نجم واخذ حقي

[FORD1969]

الغلط على راعي الشرووووووووووووووووووكي مايبيلها دكتور لايهمونك


ونجم مر عليهم انت وراعي الشروكي وخذو حقكم

اطلبو اعادة تقرير للحادث

وقلهم اللي حده من يجيبه اوباما مثلا


الله يعوض عليك اهم شي السلامه والعوض من الله

[ملاذ الصمت]

يعني اعترض عند شركة نجم .. لاني دخلت موقعهم لقيت هياط ونزاهة ومدري وشهو

[.أبوعبدالله.]

إذا أعترضت عليه - في المرور الإعتراض حسب علمي -

قل :

أنا مشكلتي مع راعي الشيروكي

ومشكلة راعي الشيروكي مع اللي هج


يعني أنا مالي علاقة مع اللي هج


وبعدين وش يدريني أنه صادق أنه محدود ؟؟!!


المهم تمسك بأن علاقتك مع راعي الشيروكي فقط

لا يربطونك مع اللي هج عشان ما تضيع معهم


راعي الشيروكي هو اللي مشكلته مع اللي هج مهوب أنت



والحمد لله على السلامة ... والله ينصرك عليهم

[ملاذ الصمت]

هذا اللي صار معي وقلت للي باشر الحالة
..

هو اخر شي يقول انت عقب يومين قدم اعتراض عالتقرير ..

[قنآاص محترف]

راجع شركة نجم وقدم اعتراضك عندهم واذا تم قبول اعتراضك اطلب منهم تثمين السياره عن طريق الورش ورئيس المعارض واذا وصلت الى رئيس المعارض اطلب شخص يقالوه ابوزياد واشرح له موضوعك ترى الرجال حقاني - تراه في معارض النسيم@

[ملاذ الصمت]

قناص يعطيك العااافية ماقصرت

الكلام هل نظاما معي حق او لا

[قنآاص محترف]

أشوف معك حق رح غدآ لابوزياد واشوف انه هو يفيدك اكثر رحله غدآ - سلام

[ابو محمد السهلي]

المفروض تطرد نجم وانت في موقع الحادث -----وتحتري المرور ------

[قناص مزاجي]

اخي العزيز


شركة نجم متعامله مع شركات التأمين هذا اولاً


حتى لايقمون بدفع قيمة اصلاح سياراتك كامله لك .


هم قالو لك هذا الكــــــــــــــــلام فقط لجس نبضك وهم يعرفون اننا كسولين في المراجعات الحكوميه .


انت قل لهم انك سوف تقدم بهم شكوى حتى لو تصل اى خادم الحرمين الشريفين

وسوف تطالبهم بتعويض التاخير لان


الحق معك 100% لان الذي حد لم يصدمك والذي صدمك موجود وهوا خصمك والمسؤل عن الحادث


لذالك اخي العزيز ارفع شكوى لمدير مرور الرياض


واذا لم تجد استجابه منه ارفع الشكوى الى وزير الداخليه مباشره


وخذ حقك غصب مو برضى شركات التامين على كيفهم حطو الخطأ

[هويدي]

حسب نظام المرور طالما مافيه احتكاك مع الطرف الثالث " فالطرف الثالث ماله دخل "

مثال : لو حدك واحد ـ لا سمح الله ـ ودخلت في بقاله ـ اللي حدك ماله دخل طالما انك ما حكيته او صدمته

انشب في حلوقهم ولا تخلي حقك والله يكون بعونك