شريت شيروكي وبلشت ( شروكي متعب )

[القلب المحروم]

السلام عليكم وبعد
شريت من اسبوع شيروكي ربع قير عادي 2000 والغريب طبلونه بس انبير السرعه والبنزين ((وانا جديد على عالم الجيوب بس ظروف العمل والتعيين الجديد في البر ))



والاشياء اللي قالي الفحص كثيرة واهمها :


1- انه يبي له دزق كلتش وصعب تعشيقه ولازم تنزل قير وتغير كرسي اذا نزل:mad:
2- الحرارة نار :f حتى ابفتح كبوته مره ماقدرت ومدري وش الحل فيها ناس قالو لي سوباروا وبلف مرسدس وحساس كابرس (( وقالي واحد ركب انبير فكيف اركبه ))
3- وش أفضل زيت مكينه لاني ودي اغيره وهل للدبل زيت
4- والمكيف مايشتغل مادري وش سالفته
5- تنديه من صوفه المكينه الخلفيه ودوة الدركسون ( خفيف ) هل ابادر بها او اصبر


وأشياء اخرى بس ذكرت المهم
هل تعرفون لي ورشة تضبط لي ذولي الاشياء بالرياض
لاني امشي فيه يوميا 130كم رايح ومثلها جاي =260 ومنها 40 كم بر:s


ساعدوني تكفون وكم تكلف الاشياء كلها مع القطع والشغل النظيف


انتظركم اخوكم القلب المحروم ( ********** ) بعد إذن الادارة




وشكرا

[sgl2002]

الاول لازم تغير دزق وكلتش

الثاني اول شي صلح انبير الحرارة اولا ثم شف الى كم توصل ، ان كان للنص فهذي طبيعيه بالشروكي واذا تتعدى فشيك اولا ع الرديتر وبلف الحرارة وطرمبة الماء ثم بعدها اذا بتركب مراوح او اي شي ثاني فبكيفك لكن تاكد مما قلت لك

الثالث افضل زيت الترا سفن وزيت الدبل والقير لا تغيره وانما زوده اذا هو ناقص

الرابع التنديه انا اقول زود زيتها كل مانقص واذا جاء لك وقت صلبح تهريب الدودة عن الطائر بالصناعية القديمة

[القلب المحروم]

ماقصرت بس كم تكلفة اشغالي (( قطع وشغل يد ))

[صياد الجبل]

اقول بيعه وطق لك موتر ثاني

جيب ربع يانيسان ياتويوتا ..وانصحك بالنظيف

افضل واقوى واصبر واجود

والاختيار لك

[الإستراتيجي]

الخط في طعوس ونفود ولا ما يحتاج دبل إن كان ما يحتاج

خذ لك هايلوكس ولا ددسن من موديلات حليوة بين 2004 و منها وأفضل الددسن أريح لك في الخط

[manaf]

اخوي انا استخدم الشروكي من عام ١٩٩٨ الى اليوم مرت علي انواع الشروكيات الشروكي لاصار نضيف يسوا ١٠٠ جيب يبغالك شغلات متوسطة ماني بقايل خفيفة عشان مايقولون يبالغ ويطلع فلتة هذا رقمي بعد اذن الادارة واي استفسار انا حاضر **********

[القلب المحروم]

الخط في طعوس ونفود ولا ما يحتاج دبل إن كان ما يحتاج

خذ لك هايلوكس ولا ددسن من موديلات حليوة بين 2004 و منها وأفضل الددسن أريح لك في الخط

لا فيه صياهد ونفود ترقى وتنزل ممن 4 تقريبا والباقي مطانيج

[.أبوعبدالرحمن]

ينقل للقسم المناسب

وكذلك يمنع كتابة أي أرقام للهواتف

[اابوكايد]

اولا اخوي الدزق والصحن والفحمة طقم ب 650 نوع فاليوم او شاكس لانه افضل من الاصلي بسبب ان الكلتش يصير خفيف
ثانيا شغل اليد مايتعدا 250 ريال
بالنسبة للطلبون تغيرة وتركب طبلون شيروكي استخدام سعودي لان الي معك استخدام امريكي ويجي بدون عددات يعني دور طبلون شيروكي من موديل 97 الى 2000 سعودي تلقها عند بعض قطع الغيار المختصين بالشيروكي او التشاليح
ثالثا سو تصييخ للرديتر وغير البلف الحرارة وحط حق كابرس موديل 89 او 90 افضل حتى تنزل الحرارة
والمراوح ترا ماهو لازم تغييرها لان مراوح البلد قوية بس اشبك المروحة الثانية على طول او حط لها حساس تشتغل على الثلث هاذي خبرة كم سنة مع الشيروكيات
اما بالنسبة للورشة بالرياض شفلك واحد يكون كويس لان شغلت الدزق والصحن بسيطة
ترا تركيب البلف سهل بس يبيلك تجيب وجه كوع الماء اصلي ب15 ريال وتقدر تفكة انت بنفسك
و لونك بالقصيم كان دليتك على اكثر من ورشة والله الموفق

[الإستراتيجي]

ينقل للقسم المناسب

وكذلك يمنع كتابة أي أرقام للهواتف


أي رقم أي رقم حتى لو كان يبي رقم أمن الطرق مثلا ;)


رقم أمن الطرق للفائدة :D ×××××× <<< أوف


طيب ألحفو أمن الطرق تحصلونه ورى مكتوب :good2:

[القلب المحروم]

اولا اخوي الدزق والصحن والفحمة طقم ب 650 نوع فاليوم او شاكس لانه افضل من الاصلي بسبب ان الكلتش يصير خفيف
ثانيا شغل اليد مايتعدا 250 ريال
بالنسبة للطلبون تغيرة وتركب طبلون شيروكي استخدام سعودي لان الي معك استخدام امريكي ويجي بدون عددات يعني دور طبلون شيروكي من موديل 97 الى 2000 سعودي تلقها عند بعض قطع الغيار المختصين بالشيروكي او التشاليح
ثالثا سو تصييخ للرديتر وغير البلف الحرارة وحط حق كابرس موديل 89 او 90 افضل حتى تنزل الحرارة
والمراوح ترا ماهو لازم تغييرها لان مراوح البلد قوية بس اشبك المروحة الثانية على طول او حط لها حساس تشتغل على الثلث هاذي خبرة كم سنة مع الشيروكيات
اما بالنسبة للورشة بالرياض شفلك واحد يكون كويس لان شغلت الدزق والصحن بسيطة
ترا تركيب البلف سهل بس يبيلك تجيب وجه كوع الماء اصلي ب15 ريال وتقدر تفكة انت بنفسك
و لونك بالقصيم كان دليتك على اكثر من ورشة والله الموفق


بيض الله وجهك انت والاخوان على الرد الطيب
طيب وش رايك حساس مرسيدس 80-85
كذا شخص مدح لي

[اابوكايد]

حساس المرسدس ميزته انه يشغل المروحة الكهرباء يعني اذا وصلت الحرارة على الثلث اشتغلت المروحة
وانا اقولك اشبك المروحة الكهرباء على طول وحطلها فاصل متى مابغيت تشغلها او طفيها

[سيف وقلم]

ادخل منتدى ملاك جيب بيفيدونك إن شاء الله.

[القلب المحروم]

جزاكم الله خير عندي شيئين
1- ابغا طبلون سعودي 6 انبيرات للشروكي تعبت بالتشليح وما لقيت

2- طيب من يعرف لي احد يضبط لي الكلتش والقير بالرياض غير المطويع لانه غالي
وكرامه ماعنده وقت ((ياحبذا شرق الرياض))

[اابوكايد]

اليوم توي شاري دزق وصحن وفحمة موصيني عليها واحد من الشباب كلفت القطع 600 ريال طبعاً الصحن نوع فالو صناعته كوري والدزق نوع شاكس امريكي لانه افضل وراح تخف دعسة الكلتش
ومثل ماقلتلك الله يعينك تدور لك واحد بالصناعية بس يكون ميكانيكي فاهم مهو شرط انه يصلح الشيروكيات بس انتبة من النصابين
اما بالنسبة للطلبلون مالك غير توصي احد بعنيزة يجيه لك لان الشروكيات منتشره عندهم وقطعة متوفرة عندهم بالتشاليح وبقطع الغيار والله يسر امرك

[وجعين]

الله يعينك الشروكي خرابته كثيره اهم شي كانك تبيه يمشيك لا تزره بلحيل بنفود لان مكينته اقوى من القير ودايم يفرط كلتشه وحرارته ترتفع لاكن الشتاء على الابواب ولا تسرع عليه ولو شاورت قبل تشريه لانه يمكن يتعطل عليك بلبر ويواهقك لو ارد الله اخذت لك باترول او فكسار او متسوبيشي لك ولزمن .

[ابو خالد 111]

اخي الفاضل كانك تبي فني ممتاز

فيه واحد فلبيني مهندس كان بالمتحده وطلع هو وربعه وفتحوا لهم ورشه

انا واعوذ بالله من كلمة انا كان معي شروكي وعانيت منه وبفضل الله ثم هالمهندس
طلع لي كل شي بالسياره

الوصف /

شارع الامير بندر وانت متجه لسلمان الفارسي ابد اول ماتتعدى اشارة مجمع الامير سلمان يجيك على يمينك ماك بعدها البنك الاهلي بعدها محطة الدريس هو بنفس المحطه

اسمه / رستون __شغله كله / شروكي وكلايسلر وشارجر

اتمنى اني افدتك وان بغيت شي حاضر راسلني على الخاص

[القلب المحروم]

الله يجزاك خير ورحت له وشاطر بس زحمه عند رستون

[القلب المحروم]

للرفع و الاستفادة