أسئلة تحتاج أجابة...؟؟؟

[RO MY O o]

السلام عليكم ورحمة الله وبركاته.

أما بعد:

أرجو من الي عنده خبره في هذه الأمور = الأسئلة يجاوب عليها بأمانه لاني متوهق :D


1) البوت جديد وصادر من دولة البحرين فما هي الامور التي تلزم لأحظاره للسعودية؟ وماهي المصاريف اللازمه لذلك.

2) كيفية أستخراج الرخصه للبوت ورخصة السائق مع العلم ان الرخصه المطلوبه نزها ومن أي دائرة حكومية.

3) هل يوجد أوراق أخرى غير الرخصه يحتاجها البوت لنزوله للبحر؟

4) ماهي الأسئلة التي تحتاج الاجابه عنها في أختبار الرخصه للسائق البوت؟ وهل يوجد أختبار لرخصه البوت أم هي رخصه واحده؟ ومن أي دائرة حكومية؟

5) اعطي مالديك من معلومات حول أوراق البوت والدوائر الحكومية التي تلزم لأكمال أوراق البوت.

6) من أين أحصل على كاشف الاسماك وتحديد المواقع والمظله والتيلر في المنطقة الشرقية.

7) هل يوجد موقف للقوارب؟ وبكم سعر السنه؟


8) أماكن صيانه البوت الدورية..؟

9) أوقات المسموحه لنزول البوت للبحر.؟ وهل يوجد أوقات للنزول؟

10) 24 قدم ماهو عدد المسموح للركاب.؟

11) هل يمكن أن أعطي مندوب او مكتب وهو يخلص الأوراق البوت ولا يحتاج صاحب البوت نفسه..؟؟


الله يجزاكم خير أحتاج ضروري خدمتكم في هذه الأسئلة :D
والله يسهل الأمور :good2:

تحياتي لكم

[الفرضة]

السلام عليكم ورحمة الله وبركاته.

أما بعد:

أرجو من الي عنده خبره في هذه الأمور = الأسئلة يجاوب عليها بأمانه لاني متوهق :D


1) البوت جديد وصادر من دولة البحرين فما هي الامور التي تلزم لأحظاره للسعودية؟ وماهي المصاريف اللازمه لذلك.



ألف مبروك الطراد والله يعطيك خيره ويكفيك شره . طبعا اوتوماتيك الظاعن يخلصون اوراق الجمارك من طرفهم . انت الي عليك تدور اي احد يوصله لك والظاعن يدلونك على ناس جيدين . يتم توصيل الطراد في شاحنة سطحه وتحتاج تروح جمارك الجسر وتوكل لك مخلص شوف واحد اسمه ابراهيم ثاني مكتب على اليسار ممتاز جدا وخبير ويتعاملون معاه الظاعن طبعا بياخذ عليك 450 كامل مع تخليص اوراق الفسح من سلاح الحدود وقيمة الشحن تقريبا من 1000 ريال إلى 1500 ريال أنت وحظك طبعا اول ما توصل الشاحنة راح يدق عليك السواق وتتواعدون في مكان في هذه الحالة تروح عند صناعية دله طريق الجبيل بعد الخضرية تديور من كبري سيهات وكأنك راجع الدمام على يدك اليمين مباشرة تلقى الرافعات الخاصة بحجم 5 طن شوف اي واحد حباله نظيفه سلاسل ما ينفع بيجرح الفيبر ونصيحه لا تاخذ السطحات الصغيرة حتى لو هايط عليك اغلبها تنقلب خذ ابو 5 طن وتقريبا بياخذو 300 ريال وكاسر معهم تتوجهون للطراد وينزله لك محل ما تبغى .

2) كيفية أستخراج الرخصه للبوت ورخصة السائق مع العلم ان الرخصه المطلوبه نزها ومن أي دائرة حكومية.




في هذه الحالة تاخذ اوراق الجمارك واوراق الفسح وتروح وزارة المواصلات بجانب المبنى الرئيسي للبريد وتقدم طلب اصدار اوراق طراد جديد في هذه الحالة يقولك المهندس اختار اسم وبيعطيك بعض الخيارات المناسبة لاسمك الخاص وتكتب الاسم على الطراد وتجيبه عندهم او تتفق مع المهندس على مكان في فرضة الدمام او الخبر لانه في ايام مخصصه له يطلع فيها . واذا كنت نشيط وجبت الطراد لهم يومين وانت خالص
بخصوص الرخصة تاخذ الدفاتر وتروح لسلاح الحدود في القطيف قسم التراخيص وتطلب منهم اصدار دفتر للطراد وايضا تقدم على الرخصة عندهم ويختبرونك في السباحة واحيانا يعطيك منهج بسيط عن الملاحة البحرية ويختبرك فيها نظري ويعطيك ورقة فحص طبي تسويه من اي مكان وعلى حسب رواقة العسكري يمكن يقولك ما يحتاج اختبار ولا شي جيب فحص ونخلصك .

3) هل يوجد أوراق أخرى غير الرخصه يحتاجها البوت لنزوله للبحر؟



المطلوب ثلاث دفاتر ورخصة قيادة دفترين خاصة بالمواصلات خاصة بالتملك واستخدام الواسطة ودفتر من سلاح الحدود من احل تصريح الابحار


4) ماهي الأسئلة التي تحتاج الاجابه عنها في أختبار الرخصه للسائق البوت؟ وهل يوجد أختبار لرخصه البوت أم هي رخصه واحده؟ ومن أي دائرة حكومية؟


سبق اجبت لك من سلاح الحدود والاختبار على حسب العسكري اهم شي اختبار السباحة تكون تعرف تسبح ويمكن تكون سهالات


5) اعطي مالديك من معلومات حول أوراق البوت والدوائر الحكومية التي تلزم لأكمال أوراق البوت.


كلها ذكرتها لك يالغالي

6) من أين أحصل على كاشف الاسماك وتحديد المواقع والمظله والتيلر في المنطقة الشرقية.


من شركة دار موجة في فرع لهم في الدمام في الكورنيش والمظلة في عند سانست مارين بعد اسكان الخبر من جهة الكورنيش او ورشة الربعان في سيهات اما التيلر اذا ميزانيتك ممتازة انصحك بورشة المدني بعد الخضرية تعدي مصنع القحطاني بيجيك محطة اللفة الي بعدها تجي شارعين مسافة كيلو وتجيك على اليمين


7) هل يوجد موقف للقوارب؟ وبكم سعر السنه؟


في الحبيل في الفناتير يبغالك واسطة وفي المرسى الجديد في نهاية الفناتير مدري متى بيخلص في بعد في الساحلية في الهافمون 600 ريال ستة اشهر هذا الي اعرفه او بإمكانك تصبغة ضد النو وتسويلك مربط في فرضة الدمام وتستودعه ربك وتربطه

8) أماكن صيانه البوت الدورية..؟

ورشة الربعان بسيهات الاكثر شهرة ويعملون جميع انواع الصيانة من فيبر ومكاين ومظلات وتوانكي وقطع غيار ياماها
عبدالقادر الهندي ممتاز جدا وامين بس شغله مكاين ياماها ورشته في الثقبة
في ورشة في الخضرية بس ما اعرف اسمها ولا مكانها
في الجبيل البلد ورشة خالد جنب الفرضة في البلد
ورشة جاسم الربعان في الخبر بعد اسكان الخبر من جهة الكورنيش تجيك مجموعة ورش هو خلفها في الداخل

9) أوقات المسموحه لنزول البوت للبحر.؟ وهل يوجد أوقات للنزول؟


الدمام 24 ساعة على حسب الاحوال الجوية
الجبيل والخبر ما عندي علم

10) 24 قدم ماهو عدد المسموح للركاب.؟


من 8 وفوق

11) هل يمكن أن أعطي مندوب او مكتب وهو يخلص الأوراق البوت ولا يحتاج صاحب البوت نفسه..؟؟

في الجمارك لازم مخلص بيريح كثير وشرحت لك
المواصلات انصحك تروح بنفسك العملية سهلة جدا
سلاح الحدود لازم بنفسك علشان الرخصة

الله يجزاكم خير أحتاج ضروري خدمتكم في هذه الأسئلة :D
والله يسهل الأمور :good2:

تحياتي لكم


اتنمى اكون ساعدتك واذا تبغى ارقام ابشر احط لك ارقام من التوصيل الى الورش

[RO MY O o]

يا الله أرحم هالادمي وارحم والديه وأجمعه مع الرسول صلى الله عليه وسلم في الجنه....

والله العظيم أنك رجال كفو يبو الشباب وماقصرت وانا اشهد لو أنك ماجاوبت علي كنت بتوه والله العظيم.

حلو الحين الترتيب كالتالي أروح للضاعن واخذ الاوراق واعطيهم المندوب ابراهيم في الجسر واشوف انسان يوصل الطراد للسعودية وبتفق معه ينزله في الخريف في الراكه في أوتو موتو عشان يركبون المكاين ولكن ماعندي تيلر والخريف يقول دبر لك...هنا مشكله والتيلر مو ضروري بنسبه لي ان لقيت موقف في هاف مون .

والجبيل مافي أمل سألت وقالو مافي الا المواقف الجديده بس مافيني والله اروح واجي الجبيل افتكينا من سابك بسبب الخط ومافيني ارجع للخط مره ثانيه ههههه.

طيب الدوائر الحكومية عرفتها يحتاج اخذ شيء معي ولا بس الاوراق الي من الضاعن والفسح...
ولا يحتاج صور شخصيه وصوره الاحوال...؟؟؟؟

وبنسبة للسطحات ماعرفت مكانهم زين الي اخبره السطحات حقت السيارات الي قريب الخضريه عند محطة البنزين بس وانا راجع للدمام من كبري سيهات أحصلهم على يمين شلون شكلهم سطحه عاديه ولا كيف عشان لمن يخلص الخريف من المكاين اجيب سطحه يشيله الى هاف مون ان شاء الله اذا في موقف...

وبنسبة للورش خلنا قريبين بالخبر الي يسوي مظله سانست بعد اسكان الخبر غالي ذا ولا رخيص ومن اي طريق اوصل له من الطريق الي من اللولو اروح يسار تجي الحديقه وسيدا يوديني على دوار الشبيلي ولا من جهة الاسكان العسكري من وراء يعني...؟؟؟؟ وكم اسعاره مظله عاديه...؟؟ واذا عندك رقمهم ولا شيء عنهم تكفى لا تنساني....؟؟؟

ورشة جاسم الربعان في الخبر بعد اسكان الخبر من جهة الكورنيش تجيك مجموعة ورش هو خلفها في الداخل.....تكفى رقم شيء عن هذه الورشه...؟؟؟


وفرضة الدمام ينخاف منها ولا ادري باقيه ولا شسالفه اشوفهم شالو كل الطراريد من هناك....
بس هاف مون بروح لهم وابرك مافيني نزل وطلع طراد من المصنع على البحر ومن البحر على الصيانه ومن الصيانه على البحر مافيني شيل وحط...وطلعاتي واجد في السنه الاولى فا خله بالبحر اسرع واريح...

طيب في سؤال مهم تخبر لي مكاين 75 يماها مستعمل بس تكون مره جيده وسعره معقول ولا تنصحني اشتري جديد وافتك....؟؟؟

وتخبر لي تيلر اجار....؟؟؟؟


ومعليش تعبتك معي بس والله الدعاء من قلبي لك....

تحياتي
والكاشف وتحديد المواقع في كورنيش الدمام

[الفرضة]

ارقام اهل البحرين للنقل والتخليص
حبيب 0097333515832
سعيد 0097339095274

مخلص الجمارك
إبراهيم 0504991815

سطحات للنقل
ابوصالح اليماني 0593049345

الورش
عبدالقادر الهندي الموقع الثقبة 0567363935
جاسم السعود (ابوعلي) 0504946308
ورشة المدني للحدادة والعربات والمظلات 0505824728

هذه الارقام المتوفرة لدي
بخصوص اجراءات المواصلات اكيد لازم صور شخصية وصور بطاقة احوال اجراءات رسمية
واسف بخصوص الورشة الي في الهبر انا غلطت اسمها ورشة جاسم السعود والربعان في سيهات
موقع السانست مارين والسعود الشارع الي فيه مجمع اللولو تخلي المجمع على يسارك وتتجه سيده بمحاذات الاسكان والبحر يسارك نهاية الاسكان ركز على اليمين بيجي عدة محلات وابرزها السانست وقوى الخليج للتجهيزات البحرية
بالنسبة للسطحة شكلها زي الدينة الوسط يعني اكبر من السطحة المعروفة الخاصة بالسيارات وتلقى مكتوب عليها ٥ طن
بالنسبة للهافمون اتوقع مواقفهم خارج البحر يعني تخلي طرادك على العربة وتنزله واذا رجعت تطلعه بس روح الساحلية وتاكد منهم وبالنسبة للهافمون مافي صيد وصعبة تطلع خارج حدود الهافمون ولازم ترجع المغرب
يالنسبة لفرضة الدمام الوضع عادي طرادي واقف هناك ومليان طرادات
في حالتك لازم تشوفلك عربة او تشتري تستخدمها لين تجهز الطراد والرافعات والسطحات تستعين فيهم في التنزيل اول ما يوصل الطراد غير مناسب تنقل الطراد عليها لانها في الغالب غير مجهزة ومكلفة
انت في البداية اتصل على احد الارقام وانصحك بحبيب عملي وتعاملت معاه من قبل وهو ياخذ الطراد من البحرين والاوراق لازم تكون معاه يسلمها لك السواق اذا وصل
المخلص دق عليه وخله يتصل على حبيب ويرتب معاه الوصول يعرفون بعض زين
انت الي عليك تروح تفوض ابراهيم في الجمارك في الجسر وتمشي وانتظر وصول السواق الخبر ونصيحه اذا حريص على طرادك حاوب تكون معهم عند التحميل من الظاعن علشات مايعورو الفيبر
نصيحة لاتخطي خطوة لين تتصل وتسأل
وانصحك ركب المكاين اول وبعدين خلص المواصلات مرة وحدة
بالنسبة للاسعار السانست غالي بس شغل ممتاز وفنان في المظلات المتحركة
المدني غالي بس لو تسأل الخريف يدلونك عليه
بالنسبة للعربة حاول تشوف احد الشباب يساعدك لانك بتحتاجها كثير في مرحلة التجهيز للخريف والمواصلات والكهرباء والمظلة ولو تشتري لو مستعمل احسن لك من وجع الراس

ويالغالي هذا واجبنا نقدم المساعدة ونعين ونعاون
ويارب ييسر امورك ويجعل الطراد فاتحة رزق وسعادة
واي استفسار حاضرين يالغالي

[الفرضة]

بالنسبة للكاشف محلات دار موجة وكيل قارمن يوفرها وعلى الظمان وتاكد من وضع الخرايط الجديدة
والمكاين لوتقدر جديد لك وللزمن والمستعمل مو شين بس والله اعرف ناس عافو البحر من اول عطل في المكينة وانت ووضعك

[kharshoum]

الف مبروك الطراد اخوي روميو وفعلا اخونا الفرضه كفى ووفى كل كلامه صحيح ومرتب الله يرحم والديك ويجزاك الجنه ويكثر من امثالك كفو والله

[RO MY O o]

الله يسعدك يا فرضه وبنشوف هالفرضه وان شاء الله يكون كل شيء تمام التمام..

ويعطيك الف عافيه على الأرقام والله ماقصرت الله يجزاك خير.

الله يعين ويسهل والله بديت أحس ان الموضوع صعب الله يكون بالعون ولكن الأمور تترتب.

أن كان كذا أجل بركب مكينه كبيره عشان ماحد يسرق احد يقولون الصغار ينسرقون بسرعه ولا أدري والله.

والفرضه بروح أشوف سالفتها بالدمام.

والله ماقصرتو والله يبارك فيكم.

[mr-albreak]

السلام عليكم ورحمة الله وبركاته
الله يوفقك ياغالي ويسهل لك امورك ويعينك على مراجعة الدوائر الحكومية
بس حبيت افيدك في نقطه باالنسبه لاجهزة الملاحة
دار موجه بصراحه اسعارهم غاليه في محل فتح في الدمام من حوالي السنه وشوي
اسعاره ممتازه اسمه صدى العامه جنب محل القناص لمستلزمات الرحلات على طريق المطار
والله يوفقك ياغالي

[RO MY O o]

يعطيك العافيه يا أخوي والله حصلت لي في البحرين تحديد المواقع وكاشف الاعماق بجهاز واحد نوع جارمن 2012

بسعر 3700 ريال فلازم أشيك في هنا عن الاسعار ونقارن الاسعار والله يكتب الي فيه الخير وجزاكم الله خير

[الوحش79]

الله يجزاك خير

اخ الفرضه
ماقصرت انت وصاحب الموضوع

الله يجعله بميزان حسناتكم

[دابوي]

جزاك الله خير اخوي الفرضة والله يوفق الجميع

[الفرضة]

ياربي يسعدكم ويوفقكم جميعا
واجب المسلم يساعد اخوانه المسلمين
والله لا يحرمنا واياكم الأجر

[RO MY O o]

جهاز الجارمن 521s الخريطه والفش فاندر كامل بـــ 3149 ريال بدون التركيب من دار الموجه بالخبر.

وتم طلبه.

وتم التنسيق مع الرجال الي بيجيبه من البحرين وأبراهيم المندوب.

التيلر والمظلات لقيت جاسم الي بالثقبه يسوي رخيص القلفانايز 600 ريال وزود القماش والاستيل 2500 ريال مع القماش.

وبنسبه للمكاين لقيت لكم رجال يبيع في البحرين يقول ان عنده يماها 115 موديل 2010 غير موظبه تو ستروك بــــ 10 ألف ريال...

وعنده يماها ثنتين بكراتينهم 85 تو ستروك ثنتيهم بـــ 20 الف ريال.

ويوصل الطراريد الى السعوديه خذا علي 1000 ريال.

الفرضه الي بالخبر مريتهم وقالو لي النزول اي وقت مافي وقت محدد ولكن ممنوع الحريم ينزلون معك.

يعني أهلي ماراح يطلعون معي الا الأطفال فقط لا غير...

والتصريح لازم من الخبر وليس من الحرس الي بالقطيف...

لانه سألني من وين تبي تنزل الطراد فاقلت له من الخبر فا قالي لازم من الخبر الي بالشارع الظهران.

حبيت أضع الامور الي مريتها وسألت عنها.....

طبعآ دار الموجه يطلب لك الجهاز وياخذ منك يومين لين يوصل ولا يركبونه لك ويقولون مايبي له فن انت بنفسك تركبه...

السانست الي بالخبر يركب المظله بــ 10 الف ريال المنيوم او ستيل ما أتذكر والقلفانايز 6000 ريال.

وهذا والله ولي التوفيق..

ليت الموضوع يتثبت لانه فيه معلومات من خروج الطراد من المصنع الى نزوله الى البحر وراح يفيد كل انسان مايعرف يتصرف لمن يطلع طراده من المصنع...

وشكرآ لكم

[الفرضة]

الله يسعدك ويبارك لك في طرادك وحلالك
وزين سويت انك كملت الموضوع من اجل الافادة للكل وهذا من طيب أصلك يالغالي
ومثل ما ذكرت لو الموضوع يثبت حتى الكل يستفيد منه
الله يحفظك ويرعاك

[عاشق السرعة 2]

شكرا. معلومات مفيدة و مهمه.الله يجزيكم كل خير

[RO MY O o]

الشكر الجزيل لأخونا الفرضة بصراحه ماقصر ولا يهونو الأخوان الباقين وأنا من باب أن الناس ما تدور على المحلات وتسأل لاني سألت وخلصت فا حبيت نكمل الموضوع عشان الكل يستفيدون من الموضوع ومن المحلات ويعرفون الاسعار لان بصراحه تعب يدور على المحلات كلها.

وجزاك الله خير بعد أنت يا عاشق البحر.

[الفرضة]

الله يعافيكم جميعا

[برهوم جدة]

مبروك RO MY Oo :)وعسى القارب داخل عليك بالبركة والسعادة . واشكرك لاهتمامك بتثبيت الموضوع وبالنسبة لاخونا المحترم صاحب الاسم " الفرضة " اقول له صدقني انك انشاء الله مأجور على تعليمك وعلى تفهيمك وعلى اسلوبك وصبرك وربنا يبارك لك بحياتك :good2:.

[الفرضة]

تكملة للموضوع
توكلت على الله وشريت مكينتين ٤٠ من البحرين واخذت عليها فاتورة مختومة من نفس الورشة
طبعا اهم شي تكون ارقام المكاين واضحة في الفاتورة
حملتها في سيارتي الكامري
وجيت راجع السعودية دخلت من جهة الركاب عادي ولا كأن معاي شي
لما وصلت التفتيش عند الجمارك لازم توريهم البضاعة وفاتورتها
مباشرة وبكل سلاسه قالي وقف السيارة وروح لمكتب الافراد في نفس المكان
رحت واظهرت لهم الفاتورة طبعا جيب اثباتك والوضع سلاسة ولله الحمد
دخلت مكتب وانشأ لي الموظف معاملة جمارك وتحويل على الفسح الفوري
وسلم لي الاوراق وقالي اتجه للفسح الفوري
طبعا الفسح الفوري بعد تفتيش الجمارك وانت راجع السعودية في بوابة مباشرة تدخلك على جهة الشحن والمكاتب الخاصة بجميع اجراءات الشحن والفسح الفوري
طبعا تتوجه للمكتب الخاص بالفسح الفوري وتسلم له الفاتورة والاوراق الي انشأها لك موظف الجمارك قبل التحويل توقف السيارة قريب من مكتب الفسح وتتوجه للمكاتب الداخلية ينشأون لك معاملة ويجي الموظف يشيك على البظاعة ويعطيك اوراق وفيها تحويل على قسم الاشعة يطلع معاك موظف يسهل لك الذهاب وتدخل على قسم الاشعة الخاصة بالسيارات الخاصة توقف السيارة وتنزل وتدخل اوتماتيك مجرى السونار الاشعة للكشف على السيارة
بعدين يسلمونك النتيجة وتتجه مرة اخرى لمكتب الفسح طبعا انا طلع معاي موظف معاه سيارة سوزوكي يسهل علي الطريق لانه في بوابة تفصل بين الجهتين لازم يكون معاك موظف
لما ترجع لمكتب الفسح يكتب لك الموظف خطاب لسلاح الحدود في الخبر لأخذ الموافقة على دخول المكاين
يسلمك الخطاب ويقول لك خلصه وانت لك الحرية تبغى تخلصه بنفسك
اذا بسيارتك تنزل المكاين وتروح تخلص وترجع
او اذا ودك تسلمها مخلص احتمال ياخذ ٣٥٠ ريال بس تكون مرتاح
او تخلي سيارتك واقفة عندهم وتروح مشي الى المطاعم وتلقى تكاسي وسيارات كدادين يعني سيارة خاصة والمسافة ابو عشر دقايق مشي
انا اخترت اروح مشي واخلص بنفسي ولقيت واحد رايح جاي ١٥٠ ريال طبعا هو الي يدفع رسوم الدخول حسب الاتفاق
في المرحلة هذه تتجه لمركز سلاح الحدود في كورنيش الخبر خلف مجمع الخليج يوقفك راعي التاكسي عند البوابة وتنزل مشي الى المكاتب الداخلية تتجه للمدير تسلم الاوراق للسكرتير وتنتظر لين تخلص امورك طبعا من مكتب الى مكتب لين تخلص الحمدلله نصف ساعة وانا خالص
ترجع لخويك التكسي تلقاه معصب هههههههه
ترجع بعدها للجسر والفسح الفوري وتسلمهم خطاب الموافقة
يعطيك الموظف اوراق ويقول لك سدد رسوم الجمارك طبعا ٥٪ من قيمة السلعة واكيد انت لازم من الاساس تضع قيمة مخفضة قبل لا تجي السعودية
في عندهم عامل والله نسيت اسمه عطه الاوراق والفلوس وريح بالك يروح يسدد لك في البنك ويرجع لان البنك مسافة يبغالك مشي تعب اشويه لما يجي العامل تعطيه عشرة عشرين انت وكرمك
تسلم الموظف الاوراق بعد السداد وتنتظر لما يخلص اوراقك ويسلمها لك والف مبروك
تتجه لبوابة الخروج الخاصة بالشحن راح تكون قريبة منك جدا
وكذا تكون خلصت من جميع الاجراءات ويبقى المواصلات وغيرها

ملاحظات هامة
١) لازم تكون ارقام المكاين واضحة في الفاتورة ونصيحة سجل اي رقم تشوفه في المكينة سواء طويل او قصير لان المواصلات مزاج احيانا يعتمدون على الصغير واحيانا الطويل
٢) الفاتورة لازم يكون عليها ختم سواء خاص بالورشة او اي مؤسسة واذا ما لقيت روح في المنامة انت وصاحب المكاين المنطقة الدبلوماسية في عندهم مكتب التوثيق الخاص بوزارة العدل تاخذ رقم وتسوي مبايعة عندهم رسمية وتكتب فيها جميع المعلومات الارقام واسمك ورقم بطاقتك راح ياخذو رسوم ما تزيد عن ٥٠ ريال
٣) انتبه تشتري مكاين ما عليها ارقام لانها ما راح تمشي في المواصلات ويكون الرقم واضح واذا عجبتك مكاين مالها رقم قل لراعي المكينة يشوف اي ورشة عندهم يسويلك رقم بقطعة نيكل تكون ارقامها بنفس طريق وتسلسل صنعها وموديلها وكلك نوعية مكاية طريقة في تسلسل الارقام
٤) احتفظ باي ورقة سلمت لك من جميع الاجراءات لين تنتهي من تسجيلها في المواصلات وتضعها على القارب
بعض الناس يتسرع ويرمي بعض الاوراق او يضيع الفاتوري او ورقة الجمارك وتضيع جهد كبير


في النهاية اتمنى الكل يستفيد وللمعلومية ولله الحمد ما اخذت معاي الشغلة كثير مشيت من البحرين الساعة ٩ صباحا وخلصت جميع الاجراءات ودخلت الخبر الساعة ٢.٣٠ العصر تغديت عن اهلي

واي استفسار حاضرين

[RO MY O o]

الله يبارك فيك يا برهوم جده....

الفرضه انتبه من الي معصب هههههه ...والله شريت المكاين من الخريف ثنتين 85 والله غالين بس وش نسوي...


عندك الموضوع أني رحت البحرين وخذت العربه من محل غير الضاعن ورحت مصنع الضاعن وحطو لي الطراد على العربه ورحت الجمارك وخذلك الزحمه ودخلت من جهة الغير محمل ولا قالو لي شيء دامه بأسمي ومشت الامور من ناحية الأخ ابراهيم الي عطيتني اياه المخلص الجمركي جااااااامد عطيته الاوراق بعد ما أتفقت معه من قبل وأول ما جيت خذا الاوراق وركض خلص الامور وجاء وقت الحرس والله خذت سيارتي الثانيه ورحت الحرس ولا طولو مثل الي قلته نصف ساعه وكل شيء جاهز....
وأرجع للجمارك ويدخلون الطراد بكراج الله لا يوريك أبو ساعه جالس داخل وانا وخويي برا مدري وش الموضوع المهم يوم خلصو قالو خلاص وعلى بركة الله اخذ الاوراق من أبراهيم وسدد لي وكل شيء وأطلع من الجمارك...

الحين نجي لموضوع المواصلات أسبوعين يجحدوني ولا جاو لي فا خذت الطراد ورحت لهم بكبري,,,,,فتشوه وانتبه تنسى موضوع السي فتي يعني الامور الحمايه والصحه...(لاتنسى لايف جاكيت والطفايه والطوق النجاة وشنطة الاسعافات والمجداف والاحبال والمرسا) وأعرف انك راح تفتح المكينه مجرد أختبار عادي...

والله يا طويل العمر تخلص من الفحص على طول تدفع وصورك ويبتدون يسوون اوراقك انا جالس لهم من الساعه 6 الصباح وما جاوو الا الساعه 9 الصباح ونشبت لأهل أهلهم انهم يخلصون طرادي اليوم وابشرك خلصوه بنفس اليوم...

بعد الفحص والتسديد تروح عند المهندس (المفتش) يطلع لك أسم لطرادك وانت تختار وعليهم أسامي الله لا يوريك...

بعدها يسوون لك الدفاتر حق الطراد...

تخلص من الدفاتر تطلع وتشوف لك حل تكتب اسم الطراد والرقم على الطراد من الجهتين بخط واضح فا أبشرك روح أقرب خطاط خله يسوي لك ستكر وبس...

أختبار السلاح الحدود في الخبر كل ثلاثاء....

فا تاخذ الدفتر وصوره فوتغرافيه للطراد مبين عليه اسم الطراد والرقم....وصور شخصيه وملفين أخضر أذا بتسوي جديد...

وعلى طول أنا رحت في يوم الاختبار وعلى طول ودوني وأختبروني في الفرضه في الخبر كيف تصفط الطراد ويوم أبحرت السلاح الحدود صدموني حمدلله والشكر بس..هههه

وترجع يسوون لك أختبار سباحه وعلى حسب المزاج أذا يبون يسوون لك واذا لا يمشونك أنا بصراحه مشوني ما أختبرت سباحه...

ولا تنسى تروح السلاح قبلها بيوم عساس تاخذ اوراق الفحص الطبي لان الفحص والتحاليل تطول شوي...

بعد اجتياز الاختبار وكل شيء وأوراقك جاهز تنتظر أبو ربع ساعه وتاخذ رخصتك وتقلع على البحر وتبحر والله الله بالصيد الزين...

اول نزله طبعآ خوف وياحبذا انك تنزل بالنهار....نزلت من الخبر والقلب يرجف عسى نرجع سالمين وأبشرك الامور سهاله كل شيء مشى على مايرام وصدنا وخزن مواقع الصيد والضحله وعرفت المنطقه والاتجاهات والجزر والعميقه...

ولكن ابتلشت في الطلعه مو جاي عدل بالعربانه هههههه وربك ساعدنا وزبط....

ثاني طلعه بالدمام والثقه زادت وخذلك نزلته بسم الله الرحمن الرحيم وما امداك الا راكب لك جزيره ههههههههه أنتبهو ترا في الفرضه الدمام اول ماتنزل الطراد يبي لك تروح يمين وتكسر يسار بعدين انا خشيت طول ودخلت فيها والحمدلله طلعنا بسهاله وصرحنا وطلعنا ما امداك توصل لمكان زين الا الدوريه وراك وش وضعك قالو يالحبيب تشوف هالنور الي جنبك قلت له أيه جد كان جنبي مره مره قال هذا ميناء راس تنوره قلت له ول ول قول والله وقام يضحك ومشت الامور بدون مخالفه لانه شاف اني توني طالع ومع وجهي مو راعي مشاكل ههههه

المهم كملت وحولك حوليك جلسنا نصيد ومايمديك من شقت النور الا داخل لك في خليج فرسان هههههههههههه قلت هلا هلا وصلنا أيران يا عيال كل واحد زين ما طبو في البحر من الخوف والله وتمشينا طبعى طلعنا من خليج فرسان وبنسبه لي الدمام أبرك من الخبر ولا في خربطه وجزر غريبه طالعه لك بنص البحر ولا بيبات لا سهاله الدمام ومناظر رائعه سفن معطوبه وموانى وخليج فرسان خهخخخخ يعني في مناظر بنسبه لي أرتحت بالدمام اكثر من الخبر....الخبر محدود أحس...

المهم طلعنا مره ثانيه بالخبر وما يوقفكم الا سلوى هههههههههه يعني تساهيل والمره الثالثه صار تنزيل وتطليع الطراد سهل بنسبه لي...وراح الخوف ورابع مره أبشركم فل السبيد يعني الدعسه كامله وتساهيل...

في كل نزله تأكد من عدة السلامه كامله نشبو لأهل أهلي في كل مره وبصراحه ضروريه لو صار ما صار على الاقل في سبب يحفظك بعد الله...

وهذا والله الموفق

[الدوسري 222]

الف مبروك اخوي RO MY O o على الطراد
وبالنسبة للمحل الي بالبحرين يبيع مكاين 85 بكرتونها وعدد هم 2 تو ستورك 20000 الف
ياليت تعطيني رقمه الله لايهينك واكون شاكر ومقدر لك .

[الفرضة]

يابعد قلبي اخوي RO MY O o
ويعطيك الف عافيه على المعلومات المفيدة
والله يباركلك في طرادك ويعطيك خيره ويكفيك شره

[الفرضة]

للرفع للفائدة ولقرب موعد البيع والشراء (فترة الشتاء)