معلومة عن منطقة الزبنه وإستفسار عن منطقة الزخنونية في العقير.

[الياسين]

السلام عليكم ورحمة الله ..

حبيت أحذر رواد منطقة الزبنة من كلاب تهاجم المرتادين ويبدو إنها مسعوره وهذا حصل لنا اليوم الصباح قبل شروق الشمس حيث كنا في السيارة وتمت ملاحقتنا من بعضها ..

وعندي إستفسار عن موقع منطقة الزخنونية وكيف نصل إليها من جهة قرية الجفر ؟
ويفضل يكون التوضيح بالصور ..

[عاشق الموج]

عليكم السلام

تسلم على تحذيرك وفعلا المنطقه فيها ايضا عقارب وافاعي يعني من يروح لها لازم ياخذ حذره

بخصوص الزخنونيه وانت جاي من قرية الجفر يا طويل العمر اذا وصلت العجير قبل الدوار القريب من الميناء

تنزل الطريق الترابي على يدك اليمين وتمشي سيده ان لم تخني الذاكره حوالي 25 كيلو ولازم تصرح من

خفر السواحل وفالك السبيطي

تحياتي

[شرق المغيب]

مابها الا العوافي يمكن الكلاب الي هاجمتكم كلاب احد العزب القريبة دايم تطرد السيارات

لي اربع سنوات في هالمنطقة والغلث في الشتاء وفي عز البرد ماهو وقته الله يكفينا وياكم شره

[accentkool]

مششششششكور عالتحذير ياغالي
الزخنزنية مع دوار المينا الصغير تنزل جلد عاليسار
وتكمل لين توصلها وتصرح هناك وفالك العريضيات والسبيطية

[حنيف]

ا
الكلاب اجلكم هاذي عادتها تلحق السيارة وتنبح عليها اما ذي والله العالم انها جعور
لانها تشكل مجموعات وتحمي منطقة العيش خصتها عن كل من يمر فيها سواء انسان ولاجان بالنباح
عليك على ان تتعدى منطقة حماها

[صياد الاحساء]

ههههه انا البارح كنت رايح بوقميص وقبل مانوصل عند البوابة الي تصرح فيه ب٣ كيلو جت من اليسار مجموعه كبيره من الكلاب بمولحقتنا اول ما توقف وتعشق الريوس يقوموا بلأنسحاب بس ههههههه زعاطه

[شرقاوي بحري]

الزخنونيه زي ماقالولك الاخوان بس حط في بالك ان المنطقه ترابيه بمعنى (( جـلـد )) طوال ال20 او 25 كيلو

[عبيد سالمين]

بالضبط مثل ما قالو الشباب وصرح من المركز بعد ما توصل وانتبه من العقارب المنطقة مليانه عقارب يا كافي الشر وفالك السبيطي

[الياسين]

يعطيكم ألف عافية ..

بالنسبة إلى طريق الزخنونية، هل هو نفسه الطريق اللي يكون قريب من السيف ؟

وهل يمكن الوصول إلى المنطقة بسيارات سيدان عادية أو لازم تكون معنا سيارات دفع رباعي ؟

هل يكفي رمي السنارة من على السيف أو لازم تدخل مسافة داخل البحر وترمي ؟

[عاشق الموج]

يا طويل العمر اي سيارة ممكن تروح حتى لو صغيره ماهو ضروري جيب

والمنطقه صايره مثل الجرف يعني ماهي رمليه والعمق قدامك على طول