برميل المندي ماضبط معي خسرني ذبيحة و خمس روس دجاج!!!

[أمير الجود]

أسعد الله اوقاتكم ياشباب
عندي برميل مندي مدفون بالأرض
و جربته مرتين . مرة بهرفي و مره بدجاج
ماأدري وين المشكلة بس اذا جيته بعد ساعة أو ساعتين الاقيه بارد حتى الدجاج ماأستوى:(
مع ان الجمر كثير:f واغطية زين والحفه ببطانيه ثم ادفنه يعني مااقدر اكتمه اكثر من كذا مع هذا ماضبط.
دلوني تكفون وين المشكلة:confused:
ترى البرميل نقدنا عند الرجاجيل (ليتنا من حجنا سالمين)

[ham1407ham]

يمكن الارض ممطورة

[«نجم الخير»]

نوع الحطب ايش ؟

[لذاع]

هلا بك اخوي
احتمال ان المشكله بالبرميل
واحتمال يكون بالغطا
انا انصحك تجيب برميل ثاني وتدفنه
وجرب على دجاجه وحده
خلها ساعه الا عشر او خمس حسب الجمر
الى ان تضبط معك
وعقبها ابد بالهرافى
والله الله بالغطا اللي يكتمه زين
واذا غطيته ودفنته رشه بالماء
وااسف على الاطاله

[علومك غانمه]

ممكن تذكر كمية الحطب الي انت حاطه واذا كانك حاط فحم فقط ماينفع لازم حطب ويكون شلايخ لان الذبيحة تبي لها نار قوية

[ياحلاة الربيع]

أعتقد بسبب كثرة الماء في الرز أو قلة النار

[قلايد الخيل]

الله يعينك بس ليكون الهرفي طلع خساره وماتعشيتوه

[نواف بن محمد1]

البرميل لم يسخن لازم تسخنة بحطب وفحم اكثر من ساعة

[محب الخيال]

توقعت طبحه طلع سوال

الارض جايها سيل

[gx 94]

أخوي برميلك برميل السنيدي اذا هو ابشرك ماراح يضبط قبلك انا مليت وكرهت البرميل خيرها بغيرها

[جوبتير]

يجب ان لا تقل شبة النار عن ساعة كاملة وإن زاد فهو افضل حتى تحمى اطراف الأرض بجوار البرميل لمسافة كبيره لتمسك الحراره لأن الحطب من اول ما تكتمه ينطفي ولا يبقى الا ما يمسك من حراره اكتسبها اثناء شبة النار
وخصوصا اذا كانت ذبيحه
قد يكون اللحم اكبر من مقدار البرميل أو ان قفل البرميل غير جيد ويحدث تنسيم وهذا ما يفسد العمليه كاملة

[koogak]

ياليت تشرح طريقتك بالتفصيل عشان يتضح الخطاء ان وجد

[ابومحــ م ـــد]

انا مع اخوي نجم الخير (((((((( من الحطب ))))))))

[أمير الجود]

ياشباب اولا البرميل الأزرق الكبير مفصل عند الحداد
وشبيت فيه ثلاث شلايخ سمر الوحده طولها متر ونص حتى جمرت
والأرض ماجاها مطر الله يجيب الخير
والمشكلة حتى الدجاج ماجابه كيف عاد اللحم
لكن وش كثر الحطب اللي يكفي ذبيحة

[abuyazeed]

البرميل فيه تنسيم يمكن يكون فيه شقوق او انه ما تم دفنه مضبوط يعني فيه فراغات كبيره بينه و بين الارض

[أمير الجود]

اتوقع ان فيه فراغات بين البرميل و الأرض
لكن حتى لو كان فيه ... ما اتوقع ان حرارة البرميل تروح بسببها

[يارييس]

الحل عندي وانا ابو هندي
عندك تنسيم يالحبيب في الصندوق
والحل حط عفشك كله وقبل ماتسكر الغطاء غط البرميل بقصدير بس حطه حط ويكون زياده شوي
وبعدين غطه بالغطاء حق البرميل وعقب حط الخيشه المبلله بالماء وعقب حط بلكتين فوق الغطا
وباذن الله يزبط معك

[ديفون]

لحفظ الحرارة يجب تعبئة خارج البرميل بالزجاج . وشكرا

[ابو عبدالرحمن القرش]

امير الجود

الحال من بعضه

انا ياما احرقت من لحم ودجاج في برميل المندي

المشكلة اني اغطيه بالكامل ولما اجي افتحه احصله محروق

لكن الحمد الله على كل حال

مع الايام نتعلم

تقبل مروري وتعليقي على الموضوع

[أمير الجود]

ودي يحترق مره....
المشكلة لما تنتظر ساعتين و بالآخر تشيل عفشك و تدور الفرن:mad:

يالربع أحد يبي برميل مندي للبيع:p
تراه ممتاز ينفع برميل و ثلاجة:D

[أجسن الأسماء]

إن كان وصفك دقيق بأن الحطب كافي الغطاء جيد فالمشكلة تتركز في وجود رطوبة حول البرميل وهذي حصلت لي

[النووي 2009]

ماأحد يتعلم بلااااااااااااااااااااااش
هههههههههههههههههههههههه

[ع العمرو]

بارك الله فيك طلع البرميل وحط عليه عازل حراري وعند التنزيل في الحفرة حط داير مادار عليه ملح خشن والله ان يطبخ البعارين الي حاجات مع الرسول صلى الله عليه وسلم حجة الوداع.

[سوسة حطب]

انا اتوقع ان برميلك سليم ولا فيه شيء بس يعيبه (أتوقع) ان القدر الخاص بالرز قريب لم شبك الدجاج ويمكن انك حاط تحت القدر مركاب نصيحه إذا فيه مركاب شيله وبعد ما يجمر الحطب وزعه على الأطراف بحيث يكون إللي بالنصف خفيف مره وجرب على سمك (مقاطعين الدجاج) وخله ساعه وشف الطعم اهم شيء الجمر

[الحداااق]

يمكن الارض مسكونه

[بن حاضر]

اكيييييييد من الحطب
او ان الحطب توه ما جمر وانت عجل عليييه ..

[الوافي 22]

قدر الرز كبير ويحجب الحرارة عن الدجاج او الحم

[ابو خالد88]

غط فتحت البرميل بالقصدير وبعدين غطه بالغطاء مضبوط وجرب واعزمنا ههههه امزح

[بتارالذرعان]

البرميل فيه تنسيم يمكن يكون فيه شقوق او انه ما تم دفنه مضبوط يعني فيه فراغات كبيره بينه و بين الارض

اخوي كلامك صحيح وحاوال تدفنه زين وخله متماسك مع الحفره البرميل الرمل=متساوي طولي

[قرناس نجد]

دام الهرفي والدجاج ما استوى هذا من مثل ما ذكرو الاخوان

يوجد تنسيم تأكد من وين واذا كان من الغطاء حط قصدير ودبله

وغطه وحط بلاكه او ثنين بس تأكل من الجنوب فيه تنسيم ولا لا

[odgti]

يمكن البرميل فيه تنسيم

سخن البرميل لدرجه انك ماتقدر تشوف القاع من شده الحراره

[* ابو باسل *]

زود الحطب لان ثلاث شلايخ ماتكفي حط من خمس وفوووق .

[ابوفهيدان]

مشكلته مافيه حرارة كافية
كثر الحطب وخله يشب داخله
اهم شي داخل البرميل تولعه

[أمير الجود]

الله يجزاكم بالجنة جميع
ابدفنه من جديد لأنه احتمال كبير العامل مادفنه مضبوط..
وبكثر الحطب و بدبل القصدير على الغطا...
و الوعد لحم الأضاحي بعد الحج لأني حجاج ان شاء الله
و تراكم معزومين كل باسمه بس تحملوا مايجيكم

[كرداش]

يجب ان لا تقل شبة النار عن ساعة كاملة وإن زاد فهو افضل حتى تحمى اطراف الأرض بجوار البرميل لمسافة كبيره لتمسك الحراره لأن الحطب من اول ما تكتمه ينطفي ولا يبقى الا ما يمسك من حراره اكتسبها اثناء شبة النار
وخصوصا اذا كانت ذبيحه
قد يكون اللحم اكبر من مقدار البرميل أو ان قفل البرميل غير جيد ويحدث تنسيم وهذا ما يفسد العمليه كاملة


كلامك صحيح و لازم الحطب يكون جذووون كباااار

[ايكو2002]

انا نفس المشكلة حطيت كيس فحم كبير وكثرة الحطب غيرت الغطاء بواحد له ربل على الغطاء حتى ماينسم البرميل الرز يستوي واللحم نص استوى كيف ؟؟ مع العلم اجي على البرميل بعد ساعه او نصف ساعه النار بارده وطافيه لاحياة لمن تنادي والبرميل جديد مليت منه