صوت طقطقة في المكينة بعد التشغيل بدقائق

[ابوعبدالالة]

اخوتي الكرام
السلام عليكم ورحمة الله وبركاتة
وكل عام وانتم بخير
تقبل الله منا ومنكم صالح الاعمال


هذة اول مشاركة لي في منتديات مكشات
انا معي يوكون 2006 ماشي تقريبا مية واربعين
الموتر فية صوت في المكينة طلع لي من سنة تقريباً الصوت عبارة عن طقطقة تك تك تك تك تك تك والصوت هذا مايجي الا بعد التشغيل بخمس الى عشر دقايق واذا احتمت السيارة راح الصوت من حالة ادوس لة اوصل الار بي ام الى اربعة الاف مرتين ثلاث يروح الصوت واحيانا امشي عليها والصوت موجود بعد شوي يختفي الصوت من نفسة
ولايجي الصوت الا عند بداية التشغيل لمن تكون السيارة باردة
مع العلم ان انبير ضغط الزيت على النص ولاينزل عنة الا بتكتين فقط يعني فوق الثلث بكثير ولايصل الى الاحمر اطلاقا
كنت اغير الزيت عند الشركة باستمرار لكن الصوت جا السيارة وانا لازلت اغير الزيت عند الجميح يعني مالمسها ابو يمن ولاغيرة

للمعلومية احد الزملاء نصحني بزيت 30-10 w استخدمتة
الا ان الصوت لايزال باقي

لعلمكم انا قرات عن مشكلتي قبل ان اطرحها لكم هنا
البعض ينصح بتغيير طرمبة الزيت مع العلم ان ضغط الزيت كويس

انصحوني بارك الله فيكم مالعمل ؟

وكما قلت لكم الصوت ياتي لمن تكون السيارة باردة ويذهب من نفسة بعد عشر دقايق

افيدوني جزاكم الله خير ورحم الله والديكم

اخوكم / / ابوعبدالاله

[ابوسامي999]

اعتقد والله اعلم ان السياره بحاجه لوزن البلوف خاصة ان الصوت يظهر والسياره بارده وبعدما تحمى يختفي الصوت

[فراس1]

السلام عليكم اخي هذاالصوت من طرمبة الزيت ومادام الصوت يروح بعد دقايق لاتقلق اما اذا كان مستمر فيجب تغيير الطرمبة ولاحظ امبير ضغط الزيت اذا نزل تحت الربع هدا دليل ان الطرمبة لابدمن تغييرها لظعفها والله أعلم

[عاشق مطر 2]

لايهمك انبير الضغط غير دقيق
غير طرنبت الزيت

[gpr57]

اخي الكريم
اذا كان صوت تك تك خفيف عند بداية التشغيل في الصباح ويختفي بعد حوالي 25 ثانية وامبير الطرمبة مع اول تشغيلة يقرب من النصف ولا ينزل فهذا صوت طبيعي
حتى لو غيرت نوع الزيت ما راح يختفي
لأن من الطبيعي يكون عمود الكرنك فاضي من الزيت اثناء الوقوف الطويل وعند التشغيل يحصل صوت التكة
الى ان تبداء الطرمبة في ضخ الزيت الى الجزاء المحرك وتزييته

الصوت هذا موجود عندي في سيارتي الي في التوقيع من خمس سنوات وكارفه وما فيه الا العافية

اخير تقبل مروري

[ابوعبدالالة]

اعتقد والله اعلم ان السياره بحاجه لوزن البلوف خاصة ان الصوت يظهر والسياره بارده وبعدما تحمى يختفي الصوت

مشكور اخوي ابو سامي ماقصرت بيض الله وجهك
انا هذا اللي مخليني اصبر عليها ان الصوت يختفي لكن بعض الورش قالوا لي غير تكايات البلوف انا اخاف افك المكينة وابلش

[ابوعبدالالة]

السلام عليكم اخي هذاالصوت من طرمبة الزيت ومادام الصوت يروح بعد دقايق لاتقلق اما اذا كان مستمر فيجب تغيير الطرمبة ولاحظ امبير ضغط الزيت اذا نزل تحت الربع هدا دليل ان الطرمبة لابدمن تغييرها لظعفها والله أعلم

مشكور اخوي فراس ماقصرت بس انا عندي ضغط الزيت فووق الثلث بواجد وهذا اللي مصبرني على تغيير الطرمبه وشافها اكثر من راعي ورشه قال الضغط عندك جيد والمشكله مو من الطرمبه
قضية انه ينزل تحت الربع لا ماينزل

[ابوعبدالالة]

لايهمك انبير الضغط غير دقيق
غير طرنبت الزيت

هلا بك عاشق مطر ومشكور
طيب انت تقول لايهمك انبير الضغط غير دقيق وشلون اعرف انه غير دقيق
وش اللي يثبت لي ان الخلل ميه في الميه من الطرمبه
ونبير الضغط فوق الثلث بكثييير
هل حصلت معك المشكله اخوي عاشق مطر وغيرت الطرمبة وانحلت ؟
عشان كذا انا طرحت موضوعي هنا لاستفيد وقد ياتي احد من بعدي ويستفيد وساكتب ماسيحصل معي في النهاية لتعم الفائده

[mdr3m777]

اخوي حتي الصوت هذا عندي
اتوقعها يا ( صباب ) او ( المينيفولت عند بدايه حراره السياره )

[ابوعبدالالة]

اخي الكريم
اذا كان صوت تك تك خفيف عند بداية التشغيل في الصباح ويختفي بعد حوالي 25 ثانية وامبير الطرمبة مع اول تشغيلة يقرب من النصف ولا ينزل فهذا صوت طبيعي
حتى لو غيرت نوع الزيت ما راح يختفي
لأن من الطبيعي يكون عمود الكرنك فاضي من الزيت اثناء الوقوف الطويل وعند التشغيل يحصل صوت التكة
الى ان تبداء الطرمبة في ضخ الزيت الى الجزاء المحرك وتزييته

الصوت هذا موجود عندي في سيارتي الي في التوقيع من خمس سنوات وكارفه وما فيه الا العافية

اخير تقبل مروري

مشكوؤ اخوي gpr57 على تفضلك وتعقيبك على الموضوع
الصوت مايروح بعد 25 ثانيه اخوي الصوت يطول يمكن ياخذ فوق عشر دقايق لين يختفي تماما بعد كذا خلاص
لكن الصوت مزعج والله والله اني انقهر يوم اسمعه
الحين الاخوان اللي ردوا جزإهم الله خير تبانيت ردودهم اللي يقول وزن بلوف واللي يقول غير الطرمبه وانت تقول طبيعي وبعض الورش يقولون تكايات بلوف وهذي فيها فك راس المكينه
الى الان انا على مفترق طرق لاأدري ماذا اعمل
مشكورين اخواني على تجاوبكم واتمنى المزيد من الطرح حتى اصل الى حل يفيدني ويفيد غيري في هذة الميشكله

[ابوعبدالالة]

اخوي حتي الصوت هذا عندي
اتوقعها يا ( صباب ) او ( المينيفولت عند بدايه حراره السياره )

هلا بك اخوي mdr3m777
طيب الصوت عندك حاولت تصلحه ؟ ممكن تفيدنا من تجربتك مع الصوت هذا
معليش اخوي وشتقصد بالصباب ؟ هل قصدك التكايات ؟
المينفولت ؟ عفوا وشو المينفولت ؟ ترى خبرتي قليله في الجمس

[gpr57]

اخوي
ممكن تشغل السيارة في الصباح وهي باردة وتسجل الصوت بالجوال لفترة قصيرة
وترفعه على اليوتيوب او هنا حتى نسمع صوت الطقة وشدتها

[بردقا]

اذا سير التايمن عندك مو جنزير فغيرة
يجي ببعض السيارات سير ربل (بلاستيك مقوى) وهذا يتغير كل 100000
وبعضها جنزير (حديد) هذا مايتغير ابد الا اذا انقطع

[ابوعبدالالة]

مشكور اخوي gpr 57 ان شاالله سأحاول تسجيل الصوت
رغم انني لا أعرف ارفع المقاطع الصوتيه على اليوتيوب
ولا حتى هنا لكنني سأحاول ولك شكري وتقديري

أخي بردقا مشكور يالغالي
حقيقة ان الصوت ماجا عندي الا بعد ماكملت السيارة 100.000 كيلو
لذلك من الممكن ان يكون سير التايمن
وللعلم اول مرة اسمع عن سير التايمن هذا
ولا أدري هل هو جنزير او بلاستيك مقوى
سأبحث واتيك بالخبر اليقين

[ملك تميم]

السلام عليكم اخوي انا اعتقد انه صوت البلووف وهي يبيلها وزن ولاهوب لازم يفك المكينه يفك وجه المكينه بس حانا معنا ونيت مديل 2007 من طلعناه وكاله وهو فيه هذا الصوت الى يومك ماصلحناه بس هو يضر مع الوقت بعد 10 سنين تقريبا والله اعلم

ارجو اكون افدتك

[200]

السيفون يمكن مو أصلي أو الرقم ألي على السيفون يختلف عن ألي أول كنت تركبه تأكد من هالناحيه

[joblak]

ما فيه الا العافيه اغلب الامريكي كذا هذا صوت التكايات ولا يأثر ولا يضر ولا تفكر تسوي به شي انا كان عندي بيوكون 97 واستعملته سنتين وبعته وهو فيه عادي والحين عندنا سبرومان فيه الصوت ولا يضر ابد ابد ابد

اتمنى اني افدتك

[نواف حسن]

مثل ما قالك اخوي joblak هذي صوت التكااايات مررره طبيعيه هذي تجي اذا ابطا الموتر ما مشاا او صارله مده واقف وخاصه بالشتاء بعدين شغلته ويكون الزيت نازل كله يكون ارتفاعه شوي صعب فيطلع الصوت غالباً تجي بالجموس والفرود ال ٨ سلندرر واذا مرره مضايقك الصوة غير التكاايات وانا انصحك ماتغيرها مادامها بعد التشغيل بمده تروح


نصيحه للأخوان/

اذا سيارتك صارلها واقفه شهر شهرين سته شهور سنه لازم تعبي المكينه زيت زياده على زيتها القديم بحيث اذا سحبت العيار يكون واصل الزيت لنص او فوق نص العيار بدون ماتشغل وتخليه لمدة ساعه بحيث الزيت يتشبع بالمكينه ويلينهاا وبعدين تفك الصره من تحت وتفرغ الزيت كله وترجع الزيت اللي يناسب عيار سيارتك وتروح تغير الزيت مع السيفون عند المشحمه

دمتم بخيررر

[ابوعبدالالة]

أشكر جميع الإخوان اللي شاركوني بارائهم
تمنيت لو جعلت لكل منهم رد منفصل
لكن ليعذرني الجميع
أخوي joblak يظهر ان المشكله في التكايات مثل ماقلت بالضبط
واللي خلاني أرجح انها التكايات هو كلام وتعقيب الأخ نواف حسين اليي اقدم له الشكر وخصوصا عندما قال هذي تجي اذا صار الموتر له مدة واقف مامشى وهذا اللي صاير معي بالضبط احيان يجلس اكثر من عشرة ايام ماإشتعل
واكيد الزيت ينزل تحت كثير
عموما انا لن اعمل شي حاليا سانتظر خصوصا ان الصوت يزول بعد حوالي ربع ساعه من بداية ظهوره
أشكر كل من شاركني الرأي والمشورة في هذا الموضوع ولعل يستفيد منه اناس اخرون
وسوف اقوم باضافة مايستجد في هذا الموضوع
شكرا للجميع وتقبلوا تحياتي

[owwn]

موترك مافيه شي ان شاء الله
انصحك تستخدم زيت كاسترول ماقناتك 10 _40
ان شاء الله يروح الصوت

[ابو فهد 999]

خذ العلم والنصيحة= ببلاش قبل لا تصير بفلوس
أنا سيارتي ددسن٢٠٠٩ والصوت صارله سنه معي
وما خليت ورشة الا رحت له الي يقول طربمة الزيت والا التكايات الزنجيل
وقالي ميكانيكي بكستاني هذا صوت عادي ارتفاع الزيت مـا يأثر ولاصدقته قال اذا انت مصمم تروح للوكالة أنا اوفر لك وشغلي ٢٠٠ ريال والقطع ٥٠٠ريال بدال ماتروح للوكالة وياكلونك
ورحت للوكالة قالوا هذا صوت الزيت وقلت غيروه وغيروه ولا نفع وقالوا تكايات وغير التكايات مع الزنجيل ولا نفع
ولحد الان الصوت موجود والحمد لله مـا يضر السيارة
وغررت بالشتاء أغير الزيت الا ٣٠/١٠ واحس انه ماشي كويس وننتظر النتائج

[ابو فهد 999]

لا تلعب في موترك اخوي هذا صوت ارتفاع الزيت لان السيارة باردة اول ماتشغلها يرتفع الزيت فوق
ومثل ماقصيت لك سيرة حياتي في الرد الي فوق هذا

الا هل بلغت اللهم فشهد

[مدير الكدري]

انصحك لاتلعب في السياره انا معي باترول ٢٠٠٩من شريته في الصوت في المكينه طق

طق طق طق طق مافي شي من زيت المكينه حط كاسترول ماتسمع الصوت انصحك وشكراااا