المساعد الشخصي الرقمي

مشاهدة النسخة كاملة : للأستشارة ... وش رايكم بالبليزر الجديد


هــ 2006ـــدد
15/08/2006, 01:18 PM
السلام عليكم ورحمة الله وبركاته

اخواني اعضاء منتدى مكشات المحترمين

حبيت استشيركم ...

فيه واحد من الربع وده يشتري سيارة دفع رباعي بالتأجير منتهي بالتمليك فطبعا الجيوب غاليةعليه والراتب مايغطي فقال تكفى شر علي بالبليزر لانه رخيص الى حد ما ....قلت والله ماعدي اي فكره عن الموتر ،، لكن بسألك ناس يبخصون بالمواتر...

فقلت مالي الا أخواني بمنتدى مكشات..:good: :good: :good:

فعــــاد مادري وش رايكم بالموتر من ناحية القوة ، التحمل ، الراحة ، الحرارة ............... وغيرها من المواصفات الاساسية لكل سيارة .

واذا كان فيه سيارة دفع رباعي احسن منه بس مهب غالية انصحونا به .....
فتكفون لاتعطونا ركبة :D

تحياتي لكم،،،،
escape_man
15/08/2006, 01:33 PM
بتكثر عليك الاراء والانقسامات لكن باعطيك رايي وباحاول اكون محايد مع نفسي ومعك لاني اكره شيئ اسمه دفع رباعي امريكي الا بالجموس القديمة.

من عيوب البليزر الجديد انه طامن جدا فمايصلح للي مقصده بر ومكاشيت. وايضا عيبه وعيب اي امريكي القربعه داخل السيارة والديكورات والعيب الي اعرفه والاخير باي امريكي تندية الزيوت والصوف من يوم يمشي 100000.

مميزاته قوي ومريح ومناسب للسفر البري وللعائلة وايضا فخم وواسع.

اذا تبي بديل ورخيص وافضل الباث فايندر موترك بالديره وبالبر.

آخيرا خله يتاكد من فتوى البيع بالتاجير لانه الي واصلني عدم جوازها من هيئة كبار العلماء فقبل لايسئل خله يبحث عن بركة ماسيشتري
وانه لايكون وبال عليه.
ابومعاذ3
15/08/2006, 02:32 PM
السلام عليكم

انا ناوي اشتريه وحذرني منه واحد من زملائي عند اخوه
يقول نوقفه في الورشة اكثر من عند البيت حرارة موديله 2004 او 2005 نسيت وكم مره نحمله في سطحة لأن فيه قطعة اكترونية تحترق ولاتوجد عند الجميح الا بطلوع الروح وننننننتظر متى تجي

وأعلم ان السيارات توافيق
تحياتي
عاشق ربـع
15/08/2006, 05:59 PM
نصيحتي لك ان كانك تطلع للبر ومولع بالمكاشيت لاتاخذة مايصلح للبر ابد ابد

تبي تاخذ موتر يقربلة بالسعر شف الباث احسن لك طبعا الشكل القديم
غالي
15/08/2006, 07:13 PM
الي اعرفه عنه :
1- الموتر يتعلق بسرعه بالرمال والبر لانه نازل.
2- يشفط بانزين شفططططططط ....... اكثر من الاندكروزر والباترول
وخله يشوف شركة له تقسط يختار سياره من اي معرض ويشترونها ويبيعونها عليه اقساط
هــ 2006ـــدد
15/08/2006, 10:33 PM
تحياتي وشكري الجزيل لكل من :
1-escape man
2- أبو معــاذ
3- عاشق ربع
4- غــالي

واقولكم والله انكم كفيتوا وفيتوا والله يجزاكم الف خير على النصايح ، وفكيتوا الرجال من البهذلة ومطارد ورى الجميح او العيسى
وانا ان شاءالله راح ابلغ الرجال واقولك خلك بالباثفندر ازين لك نيسان ومعروف واضمن لك من الامريكي التالي .

بس حبيت اعلق على اخوي escape man واقولك بالنسبة للإيجار المنتهي بالتمليك صح انا سمعت انه مايجوز ، لكن برنامج عبداللطيف جميل وبرنامج الاهلي اسمه ( الإيجار مع الوعد المنتهي بالتمليك ) وهذا موافق عليه الشيخ المنيع على ماقريت بنشرة البنك الاهلي ((( وأبري ذمتي ولا تاخذون بكلامي تكفون تأكدوا قبل ))))

ولله يوفكم جميعا،،،