بخصوص عزب السنيدي الجاهزه

[Asd-ed]

السلام عليكم


ياخوان بغيت اسئل عن عزب السنيدي الجاهزه وسط وكبير وش رايكم بها زينه وتكد وجودتها ولا وش تنصحوني فيه ناوي على وحده كبيره ومعباه اغراضه كامله ب حول 450 ياليت تفيدوني ب اسرع وقت عنهن ناويها قبل الربوع

[قناص خلاوي]

عليكم السلام
باختصار الجاهزة يحطون لك اردى شي فيها من معاميل وقدور وبيالات وفناجيل
مامثل تشتري اغراضك على هواك كل غرض من محله الاصلي
لك وللزمن
موفق خير

[تساهيل1]

صادق انت تاخذ جاهز ..؟

لا والله وانا اخوك

لو تحط على الـ 400 دبلها
وتاخذ لك شي يسوى ولك وللزمن ابرك لك

اذا انت تبي عزبة شاهي وقهوه

او عزبة طبخ او كلهن

خذ صندوق فاضي
مثلا للشاهي والقهوه

ووتكون الورقه معك
وعب صندوقك بشي كويس وجيد

وخل بربسة السنيدي عنك
الجاهز ماينفع حتى بالثياب
ماعمرك شفت احد يلبسها جاهزه
وش عاد العزبه

اباريق صغار وخربطه


ولط اطيب تحيه

[Asd-ed]

والله حيرتوني يالربع كنت ناوي اريح راسي عن الخوسه والمشاوير لاكن اظاهر على حتسيكم ماتنفع ولا ب ميتين ريال لعل واحد يفيدنا بالاغراض اللي نعبي بها العزبه نظري بالجاهز انه مب ناقصه شي لاكن كان به واحدن يقولنا وش نحط فيها بالتفصيل مايقصر

وانشالله اعضاء مكشات مايقصرون ولاهنتو على الرد السريع ياللي فادنا تو

[Asd-ed]

ابي واحدن يعدد لنا اغراض عزبه شاهي وقهوه وطبخ عشان اكتبهن ب ورقه واروح اجمعهن مرتن وحده ولا انسى شي

واجود الانواع وشي ومن وين اشريهن الله يوفق من يدلنا عليهن

[متابع قديم 22]

عليكم السلام

أخي ماذكره الأخوان صحيح بالنسبه للجوده والنوعيه . لكن بإمكانك تأخذ الشنطه من أي محل
وتختار عزبتك على كيفك تضمن النوعيه المطلوبه والكميه كذلك.

مع تمنياتي لك بالتوفيق
----------------

[فيصل التميمي]

اخوي الاغراض واضحة
مثل عدة الشاهي والقهوة
دلة بريق تفوبح ابريق شاهي فناجيل وبيالات علبة سكر وشاهي وقهوة وهيل هذي هي عزبة الشاهي والقهوة
اما الطبخ قدر ظغط حق السيف وصحون

[Abo gssar]

اغراض الشاهي /
مفك عجل +رقعة تيوبلس + سكر
ههههههه
لاتزعل مني انت تسأل عن اغراض انت اللي تحددها لانك انت اللي بتستعملها عشان كذا ريح نفسك وانزل محل اواني منزلية وخذلك لفه فيه وشف وش تحتاج وان شاء الله ماتخرج منه الا بعدة كاملة ....وان شاء الله اول براد تزينه يكون على جال وادي بعد المطر..

[ابورايف]

لا أنصح بالعزبه الجاهزه

خذ الشنطه وعبها أنت على مزاجك

تقبل مروري وردي

[Asd-ed]

لا أنصح بالعزبه الجاهزه

خذ الشنطه وعبها أنت على مزاجك

تقبل مروري وردي

ماقصرت والله يابو رايف كفيت ووفيت ممكن يستغرب كم واحد اني شكرتك مع ان مافيه فايده واضحه بالرد لاكن ماقصرت ارسلت رقمك لي بالخاص وعطيتني جميع التفاصيل بكل وضوح ماقصررت والله

[سيف وقلم]

خذ من البيت أي شيء قديم والناقص اشتره

[ابولولو]

اخوى مر البريه وعندهم شنطهم ممتازه وفيه رجال نصوحين مره وثقه ابوصالح وابويزيد قلهم الى تبى وخل الباقى لهم يعطونك الشى الممتاز بس قلهم ابى الزين والاصلى واسعارهم معقوله

[ابوعبدالرحمن.]

السلام عليكم.
اخي الكريم اذا انت من سكان الرياض .
1- رح الغرابي (قسم الأشرعة) واشتر شنطة فاضيه وحسب المقاس اللي يفي بالغرض والافضل ان تشتري ثنتين وحده للشاهي والقهوه والثانيه للطبخ لانك ماكل مارحت للبر تبي تطبخ
2- بالنسبة للاواني عندك شارع السباله وعب الشنطة من جميع الاواني اللي تلزمك للبر مثل :
الدله 2-الابريق 3-القدر 4-الصحون 5-علب المعاميل لحفظ القهوة والشاي والهيل والسكر (اهم شي يكون استيل )6-السكين 7-الدافور(اهم شي يكون ايطالي ابعد عن الصيني) 8-الذراية 9-بيالات
10- فناجيل 11- بريق لغلي الماء
ارجو ان اكون قد قدمت لك الفائدة .

[web]

مثل ماذكرو الاخوان

بعدين انت تقول على كلامكم ماتصلح ولا ب200 ريال ليه هي بكم معروضه !!!

اذا تبي نفس العده الي فيها ولا تكلف عليك 150 ريال العزبه خذها من الغرابي باقل من نصف السعر الي تباع فيه العزبه بالمحلات
اما اعده اذا تبي نفس الي يصلحونها لك ويبيعونها ب 400 ريال رح لم ابو ريالين وتلقى دله ابو !!! ب10 ريال ومفواح للقهوه ب10 وراس دافور صيني ودبه صينيه ب35 ريال وعلب بلاستك فارغه تلقاها عند محل البلاستيك الحبه بريال او عند ابوريتلين بريالين طلعت عدتك ب 100 ريال هههه
اذا بتحط القيمه الي هم يبون لا والله طق اغراض جوده لك ولزمن ولا مانع من شراء جديد وتحطه بالبيت وتاخذ الي بلبيت مستعمل لان النار تعدمها

[راعي المرباع]

كل الاخوان وافين وماقصروورا ولكن رايي من رأي ابو عبدالرحمن كلامه وافي ومليان وخذ بنصيحته .

[الوافي.]

ههههههههههههههههههههههههههههههههههههههههههههههههه
هههههههههههههههههههههههههههههههههههه
ههههههههههههههههههههه
شف الرابط وهالعزبة يمكن تصلح لك
http://www.mekshat.com/vb/showthread.php?t=52837
الاخوه الغالين
السلام عليكم
اخواني واحبتي في الله موضوعي بيتكلم عن عدتي المكشاتيه وذلك للمشاركه والمشوره
وتبادل الخبره المكشاتيه بيننا وسوف اقوم بوضع بعض الصور لهذه العدة
مع الشرح
http://www.mekshat.com/pix/upload/images18/mk2673_02.jpg
في هذه الصوره نشاهد هذا العفش متنثر سنه عفش في الحراج ابن قاسم وكل هذا العفش
محمل في سيارتي الثلث وعن الغلط احد يقول (عشه)
http://www.mekshat.com/pix/upload/images18/mk2673_03.jpg
عدة المطبخ او الطبخ وعدة القهوه والشاهي وكذاك قناره مثل حقة الكوبوي علي وزن مكشاتي بوي
وكذلك شنطة مناديل للتمسيح وهذي ملزومه للطباخ
http://www.mekshat.com/pix/upload/images18/mk2673_04.jpg
شنطة المراجع او الكتب الخاصه بالرحلات والاحدثيات وغيرها من الكتب وكذلك اجهزة احتياط قارمن وماجلان
وعدة مختلفه من اقلام ومساطر ومفكات صفيره والكثير جدآ
http://www.mekshat.com/pix/upload/images18/mk2673_05.jpg
شنطة الاسعفات الاوليه وهي مهمه جدآ وهي عباره عن شنطه تقريبآ متكامله من شطرطونات ومقصات ومطهرات
وغيرها وكذلك جباير طويله وجباير قصيره و مثبت رقبه نسال الله الا نستعملها والله يحفظنا وياكم من كل مكروه امين
http://www.mekshat.com/pix/upload/images18/mk2673_06.jpg

عدة الغراز وهي مكونه من مسحات وكريك وكذلك وتد حديد طوله 1 م وهو جبر جدآ وكذلك
سلالم حديديه للغراز مربوطه مع بعضها بسلسله قصيره وكذلك كنادر الله يكرمكم حقة خلطه
للمناطق الطينيه الي حد نصف الساق اما اذا كان الموتر متغبي الي نصفه فتشاهدون البس الكامل للمناطق الطينيه
لي علي رفرف الايمن للسياره ويوجد كذلك سلسه المانيه حقت التريلات طولها 10 متر وكذلك
ويرات بمقاسات مختلفه وقفزان وهوكات وبكرة سحب حقة الونش وكذلك دسوس (قفزات)
ويوجد في وجه الموتر ونش 4 طن (سنقل لين)
http://www.mekshat.com/pix/upload/images18/mk2673_07.jpg
ماصه تصفط وتصبح صغيره وتاخذ اربع رجاجيل ويمكن ان تستعملها كامكتب مكشاتي اما للقراءه
او مشاهدة الخرائط ولها كذلك مضله
http://www.mekshat.com/pix/upload/images18/mk2673_08.jpg
عدة الماء وتشمل جراكل وليات وكذلك ماطور سحب الماء واسلك كهرب باطول مختلفه وكذلك اديتر ثلجه
وذلك لستعماله وقت الوضوء في الفجر ايام البرد وبزبوز بقاعده مغناطيسيه
http://www.mekshat.com/pix/upload/images18/mk2673_09.jpg
عدة النوم وتشمل السرير والخيمه تسفط وتوضع في كيسها وكذلك جكيت مفصل خصيصن وبه 8 مخابي
ومبطن بسفنج من الداخل وهو ضد الماء وكرسي للجلوس وغيرها كما في الصوره
http://www.mekshat.com/pix/upload/images18/mk2673_010.jpg

عدة النزول في الدحول وتشمل كرسي النزول وكذلك طوق النجات وكذلك ادوات السلامه للشخص الذي يريد
ان ينزل للدحل مثل الخوذه وحق المرافق والركب
http://www.mekshat.com/pix/upload/images18/mk2673_011.jpg
هنا نشاهد عملية لبس كرسي النزول وكذلك عملية ربط طوق النجاة ويمكن ربط الشخص المصاب
او الشي الذي نزلت الي الدحل من اجله معك في نفس الكرسي وقوت حبال الكرسي وطوق النجاة
2 طن حسب كتلوج الشركه المصنعه والله اعلم واجل
اخواني واحبتي هذا بعض الاشياء التي لدي
اخوكم
خشم الحصان

[ابن العودة]

انصحك تروح لمحلات الاواني المنزليه
وتختار لك الاغراض الي تبيها وعددها
( الاغراض والعدد على حسب طلعاتك
وكذالك على حسب الاشخاص الي معاك بستمرار)
وتاخليها معك وتروح للغرابي وتشوف لك عزبه فاضيه
وتصفف اعراضك فيها ( كذا تكون اخذت الحجم المناسب للعزبه )
* وفي احد الشباب نزل موضوع مفصل عن عزبته
اضغط على اسمه تشوف عزبته ســيـف الــظــفــيـر (http://www.mekshat.com/vb/showthread.php?t=448963)
شف منها ما يلزمك
اسف على الاطاله واتمني اني افتك لو بشي بسيط
والله يرزقك بالعزبه الي تسرك وتقضي لزومك

[يا سلام سلم]

اسمع اسمع ،،


اسعد الله اوقات الجميع بالخير والمسرات ،،


مع اني ثقيل دم في الردود والمشاركة والمرور في مواضيع منتدانا الشامخ اللي ما يستاهل مننا الا كل خير ،،


لكني برد ،، ايه ابرد واشارك ،، ولا علي منكم ،، هههه


اسمع العلم الوكادي ،،، اللي يسد النشادي
اللي يبغى يشري عزبة،،، يشري لكن يشري هادي


الله الله الله شاعر ومبدع ما شا الله علي ،،


شف يالذيب الشباب ما قصروا لكن عندي كم نقطة مدري ذكروها والا لا:


1/ اشتر الشنطة فاضية وحط فيها انت على راحتك.
2/ لا تشتري شي الا انت مشيك ع مطبخ بيتكم( ترا امهاتنا عندهم مواعين زايدة تكفي دولة)
3/ اذا شريت شريت اشتر الزين لو كان غالي .
4/ لا تحاول تكمل العزبة من مرة وحدة( صدقني لو انكم عشرة تجهزون عزبة وحدة لازم تنقص )
وحلات الطلعات النواقص عشان تبتكر شي جديد وتشغل مخك.
5/ ابدا بشويش خطوة خطوة *** عشان تفهم
بداية ( قدر وملاس وصحن وسكين وملعقة) وبعدين تبيدا تحدد الحاجيات تحس انك تحتاج تحتاج قدر صغير يدخل جوا القدر الثاني عشان ما يضايقك هذا القدر تحتاجة للرز والا تسوي مرقة ،، تبدا تحط صحون صغار للسلطة مثلا ،، تبدا تحط مبشرة للطماط ،،، بعدين تتطور تبطا تجيب قطاعة الخضار ،، تجيب مشخال كبير ،، تبدا عاد تتفنن ،،
قصدير وما قصدير،،، ويله هلم جرا ،،
العزبة واغراضها ما لها نهاية،، عشان كذا جهز امورك بشويش ،،،


6/ لا تشتري شي ما تحتاجة ( اي شي تقول فيه احتمال احتاجة وهو غير ضروري لا تشتريه )
لانه يضيق عليك ولا تستفيد شي يمكن تستخدمة مرة في السنة وانت تشيله كل يوم ،،
مثال( انا في فترة كان عندي ضروف قاهرة ما كنت اكشت الا من بعد العصر للفجر واستحالة اكشت الصبح مستحيل المهم اني كنت شايل بالعزبة دلة حليب وقوطي حليب بودرة وشايل قواطي نواشف وشايل اغراض فطور حق خمس ايام وانا ادري اني ماراح افطر بالبر ولا بعد سنة لكن فهاوة وتعرف فيه فترة يحس فيها الواحد انه يبي يكمل كل شي وهذا سبب الزحمة ،،


7/ طرالي طاري شفت الصلصة اللي بعلب القزاز الصغيرة لا تفوتك اشتر الربطة واستخدمها ولا ترمي القزازة استخدمها للبهارات والهيل والمسمار ترا مالها ثمن ولا فيه في السوق كله اي علبة قزاز احسن منها
كانك تبي العلم لا تحط بهاراتك الا فيها والا قزازة العسل الصغيرة ( ما اقصد البيالة ) اقصد العلبة،،،
8 / نسيت اقولك والمفروض انه بالاول افصل عزبة القهوة والشاهي عن عزبة الطبخ ،،
9/ ونسيت اقولك والمفروض بالاول :mad::mad: انت ادرى بحالك وشخصيتك وطلعتك وانت ادرى بحاجتك لا تخلي احد يفصل لك على كيفة ولا تشتري شي عشان المكشاتيه مشترينه يمكن هم لهم حاجة فيه وانت مالك حاجة (( مثل اللي مفصل خيمة الطرقية وهو يكشت في الثمامة من بعد العشا للساعة 2 ))
10/ حسيت اني تكلمت واجد وغثيت الربع لكن الوكاد اذا اشكل معك شي خلك معي متواصل :p:D اشيا كثيرة قلناها واشيا ما قلناها لكن في الاول والاخير انت راعي الحاجة وما حك جلدك ظفرك ،،



الا اقول ما ودك اصور لك عزبتي:good2::good: ،،،،،


تصدق لو اصور عزبتي يمكنك تحج السنة الجاية:p:D ،،،


تقبل المرور والله يكتب لك الخيرة

واي شي حنا بالخدمة

في النهاية تقبل تحياتي / اخوك سرهيد اقصد ابن حسن اااااقصد اصيل حجازي يووووه وش فيني اخوك الغزال الشارد ااااقصد دهرااااان دهرااااان خلاص اخر شي اخوك يا سلام سلم ،،،،

والله اني كاتب وانا مروووووق ،،، شاهي ربيع مالو حل ،،،

السلام عليكم ،،،

[Asd-ed]

ماقصرتو والله يعطيكم العافيه