عندي مشكله ياأخوان ابيكم تساعدوني على حلها ..

[راعي ساموده]

أولا السلام عليكم ورحمة الله وبركاته ..
اشكركم على المرور ومشكلتي هي التالي ...
ادمان شراء أغراض البر بجميع اشكالها , كل ماشفت محل مستلزمات رحلات بريه تلقاني تقل مقروص والعياذ بالله ,
تصدقون ياأخوان اني اشتري اشياء وألقى بالبيت زيها , وكثير اشتري اشياء ما أحتاجها لمجرد انها تخص البر لا وبعد هاليومين طاري على بالي دربيل غالي ( مع اني متأكد انه يبي يقعد زي الأغراض الثانيه ( بالمستودع ) هههه
ولايغركم كلامي تراني على الله ثم على هالرويتب لاتجاره ولا ورث ( مع الاعتذار للأخوه الأغنياء:d )
فبماذا تنصحونني جزاكم الله خيرا ؟؟

[الملتاااااااع]

والله انصحك انك اذا اشتريت شي ماتكون متدينه يعني اذا مو دين زين

وثانياا .. وين ساكن انت عشان بفتح محل ادوات بريه عند بيتكم

ههههههههههههههههههههههههه امزح ياخوي الله يكون بعونك

[خليف العيد]

اخي ساموده
هلا فيك اولاً
اقول لك ( ربعك واجد )
يعني شرحك سرى

[الكلاسك]

اشتر لين تخلص فليساتك وبعدها راح تتأدب تماتيك تصير لين طلعت ريالك تتحسر لين ترجعه مكانه هههههههه

[غالي]

اخوي ساموده
اعرض الاغراض الي ماتبيها يمكن الاخوان يشترونها منك بربع القيمه :j
(عصفور باليد ولا خمسه على الشجره) :p
وخبر على الطاير كانك من راعين الاسهم مثلي ومبتلش ؟؟:(
للإسف تراها مقبله طيحتن قشراء قشرااااااااااااااااااااااااء:eek:
والله اعلم

[الضاري]

الله يستر عليك أخوي

المشكله ما هي فيك وحدك

واجد من نوعيتك وأولهم محاكيك

ياشاف حاجة جازت له يطقها ولا يشاور ويارجع للبيت لقاها قدامه ( شاريه قبل )

أما حل .. ما أعتقد تلقى حل حتى لو كويت يدك

[أبو شعلان]

بسم الله الرحمن الرحيم

أخوي ساموده هذي الصراحه مشكله ... ولابد أن يكون لها حل ... والحل هو :

بما أن هذه الحاله مستعصيه فلابد من :

يجب أن يتم الترقيد ( التنويم ) في في مستشفى ( البر ) قسم ( الشعيب ) . مايقارب لـ 3 أيــام

ثم يتم أخذ العلاج كلآتي :
أربع دخّل قبل النوم وأربع على الريق صباحاً . وقميريتين بعد الأكل مباشره من دون ماء مع راس بصل أحمر .

وبإذن الله ستشفى . ولا تنسانا من الدعاء ...

,,,,,,,,,,,,,,,,,,,,,,,, وتقبل تحياتي ,,,,,,,,,,,,,,,,,,,,,,,,,,,,,
:j

[راعي ساموده]

السلام عليكم ورحمة الله وبركاته ..
أخوي الملتاع
حياك الله ومالك الا كل يوم أشتري منك غرض

الأخ باحث اثار ..
تصدق لقيت شرحي سرا وااااااااااااااااجد ههههههه

الأخ الكلاسك .
المشكله ان الريال مايرجع مكانه اذا راح راح

الأ خ غالي ..
وش تعرض ؟؟ يارواق متقطع يامسحاة مصديه هههههههههههههه ,,,الأسهم وما ادراك مالأسهم

الأخ الضاري .
على قولة أخواننا المصريين اصرف مافي القيب يأتيك مافي الغيب

الأخ ابو شعلان ..
ههههههههههه وش ذا الوصفه هذي وصفة خبيييييير

[المليحي]

عزيزي اسعد الله مساءك وصباحك مختصر الكلام هوفي حالة انك تشتري مستلزمات الرحلات حاول انك تحا فظ عليها في مكان بعيد بحيث تحصلها سليمه في حالة طلبها مره ثانيه

[عجرم]

وعليكم السلام ورحمة الله وبركاته
ماهي مشكله الدفع الريال وسيله وليس غايه
شرحكم بالسرى بس مشكلتي لاطلعت
للبر من كثر العفش
تقول عرب رحيل :p
وحنا ناس مغداء عن معشاء مايقل عن 10 كم

[عاشق القمة]

والله ياخوي سامودة إني موسوس أغراض البر!!!!!!
ولافيه محل في المنطقة اللي انا فيها إلا واشتريت أغلب الانواه اللي فيه
وعلى قولك ارجع البيت القاه أو ألقى زيه؟؟؟؟؟؟؟
بس إذا لقيت علاج تكفى لاتخلينا...................

[طيرالنوى]

يا رجال اطرب نفسك ولاترده عن شي اشتر ولا تحسف اذا الناس ماتبي منك شي ترا هذي هي التجارة والمكسب وبعدين مهومدفون معك شي
هذا رائى وانت ابخص في نفسك