من يساعدني اصيد هالسمكه ؟

[اتعبني العقير]

السلام عليكم ورحمة الله وبركاته

ادخل في المووضع مباشرة
/
/
/

انا من الحداقه اللي اصيد في العقير وفي مكان توني ادله وصرت اروح له لاكن في شي مجنني في المكان ماني قادر اعرف شنو مع ان خبرتي في الصيد مايقارب 2 سنتين لاكن هالشي ماني عارفه شنو لان اول مره تقابلني سمكه بهالاسلوب وطريقة هرووبها انا اروح اصيد في هذا المكان و الطعم ربيان واحط ميدار 12 تقريباً والخيط 50 ياباني واقط سنارتي مافي شي يظل الخيط تقريباً 4 الى 5 ساعات ماتجي لي نقده وحده وفجأه تجي تله قوويه تنسفط سنارتي وهي على الاستاند وينقطع الخيط قبل اوصل للسناره عشان افتح القفل واضبط السناره واحط فيها طعم ونفس الحركه يقطعها ثانيه لاني مابجلس 3 ساعات منتبه للسناره ماتحرك وسألت كذا شخص وش طريقة التصرف مع هالشيء او وش نوعه اصلا قالي خل القفل مفتوح بس خفت اخليه مفتوح ولا يمسكها الميدار عدل وجربت بخيط مقاس اكبر مايضرب معاي لان شكلها سمكه حذرة

ارجو من عنده الخبره عن نوع السمكه او طريقة صيدها يعلمني عشان اسدح لكم صورتها في المنتدى وشكراً :(

دمتم بود :)

[احمد يعقوب]

والله يا صاحبي اتوقع بان يكون هذا النوع من السمك يكون عقام
ومالك الا تعمل مصفر وتوكل على الله .

[k.fares]

وعليكم السلام ورحمة الله وبركاته

مقاس الجلب مناسب لكن ينقصلك تركب مصفر مقاس 40 او 100 نص متر
والميدار غيره وركب مقاس 7
واللعف سردين او لبايب ربيان لان نوع هالسمكة من حسب وصفك كناية و الله العالم
طريقتك غلط يالطيب بعد ماترمي وترصي لم الربغ الزايده وفك القفل او الساعة النوع ذا او ماتشوفها تطرب تمس الساعة بيدك وتشك وتقفل وتبقي شي بسيط وشتغل تسحيب

الله يوفقك..

[ALBASEL4]

اذا كان خيطك بالقاع فممكن تكون ارقيطه ,

بالنسبه للسناره القفل ماله علاقه بالموضوع اضبط الساعه من فوق بحيث ينسحب الخيط

لكن ببطء حتى تتعب السمكه بعدين اسحبهاا , وان شاء الله المره الجايه بتصيدها

[اتعبني العقير]

مشكور اخوي احمد يعقوب على اجتهادك بس البحر اللي اصيد فيه ماتوقع موجود نوع السمكه اللي قلتها مع اني بصراحه ماعرفتها وايضاً مافهمت طريقة المصفر اللي تقصدها

[اتعبني العقير]

مشكور اخوي
k.fares (http://www.mekshat.com/vb/member.php?u=244984)

على الفكرة وانشاءالله راح اجربها والله يكتب الخير للجميع

[اتعبني العقير]

تسسلم اخوي الباسل على المعلوممة الصراحه راح عن بالي فكرة الساعة قلت بغير الخيط لان اسمع من بعض الاخوان عن خيط حرير يكون ضعيف وقوي

اسعدني مرورك

[majid2]

جرب خيط 60 او 70 و خلي الثقال فوق و الميدار ممتد بعيد عن الثقال تقريبا 20 الى 30 سانتي بحيث يكون الطعم حر ، و إن شاء تتوفق في صيدها .

[Multi صياد]

اخي الكريم طول ما انت مقفل على ساعة المكينة فأي سمكة كبيرة راح تسوي نفس الفلم بتشد الخيط بقوة لين يقطع, لو فتحت الساعة و قطع الخيط مع اول ضربة و بشكل سريع فهذا (قد او دويلمي) اما اذا قاوم و هو لسة تحت الماء ممكن يكون سبيطي او شعرية كبيرة و الارجح يكون سبيطي , اما اذا قام يطامر و يسوي العاب بهلوانية في الهوا هذي هي الضلعة. هذي اشهر الاسماك اللي ممكن توصل الى احجام ممكن انها تسحب و تقص الخيط.
ممكن اتضيف مهم الحاقول لانه ما شاء الله يوصل احجام خيالية في العقير.

تحياتي للجميع

[Multi صياد]

المصفر يا حبيبي انك تحط سلك معدني قبل الميدار عشان الاسماك اللي اسنانها حادة و تقدر تقص الخيط

[سداح الاول]

شوف يا حبيب البي

اولا ضروري تخلي الساعه مفتوحه شي بسيط اولا عشان يطربك الصوت الي يطلع ازززززززززززززززز وتشوف السناره واصله الارض وثانيا عشان لا تنكسر القصبه وينقطع الخيط

اما اذا انقطع عندك الخيط من منطقة الميدار يعني تحس ان الخيط انقطع من اسنان السمكه فشي اكيد الي اقطعه سمكه <<<< احلف فكره قطوو
اقصد سمكة البكوده او القد كما وضح الاخوان اما خيط سنارتك 50 ممتاز جدا لا تغيره لانك لو حطيت مقاس 120 راح يقصه زي السلام عليكم الى اذا كنت محظوظ وتعلق الميدار في طرف براطمه مراح يقدر يقصه لان عادة البركوده ما تقاوم كثير وتجي جهة سحب الخيط وخاصه ان هذا الوقت موسم البركوده والبحر مليان منها

كل الي عليك تسويه:

جيب سلك طوله نص متر وركب فيه الميدار ابو ثلاث شعب وشك فيه ميده وحط الثقل فوق وراح تصيدها


تحياتي لك

واذا تبي استفسار اكثر او حاب تشوف هذي السمكه على الطبيعه كول مي

[ABO 3bdullah]

جرب خيط 60 او 70 و خلي الثقال فوق و الميدار ممتد بعيد عن الثقال تقريبا 20 الى 30 سانتي بحيث يكون الطعم حر ، و إن شاء تتوفق في صيدها .



:good2::good2::good2::good2:


مهم جدا ترك مسافه بين اللعف والرصاص عشان يكون حر ويتحرك مع التيار ولا تنسى
المصفر (السيم الحديد) ضروري في حالتك هذي ,,, وبأذن الله تجيبه وتسدح صورته هنا بالمنتدى :D

[ABO 3bdullah]

جرب خيط 60 او 70 و خلي الثقال فوق و الميدار ممتد بعيد عن الثقال تقريبا 20 الى 30 سانتي بحيث يكون الطعم حر ، و إن شاء تتوفق في صيدها .



:good2::good2::good2::good2:


مهم جدا ترك مسافه بين اللعف والرصاص عشان يكون حر ويتحرك مع التيار ولا تنسى
المصفر (السيم الحديد) ضروري في حالتك هذي ,,, وبأذن الله تجيبه وتسدح صورته هنا بالمنتدى :D

[accentkool]

اتوقع انها سبيطية لان السبيطي كثير بالعقير
بس شكلها حجم جدا ررراقي xxxl
ارخي من الساعة شوووووي عشااانت تتتعب السمكة مع بداية الضرب
وابعد عن الربطات اللي تقلل من قوة الخيط واللي تسهل قطعة لانك تتعامل مع حجم xxxl
استخدم المداور والاقفال وان شاء الله تصيدة وتسدحة عندنا هنا

[صياد الاحساء]

جهز روحك يوم الاربعاء ترا انا متوعد فيه كمان

[اتعبني العقير]

مششكورين جميع الاخوان على افكاركم الطيبه وتدل على خبرة كبيرة في الحداق واسعدني كثيراً تفاعلكم معاي في هذا الموضوع خصوصاً ان السسمك هذه الايام قاعد يتممرد علينا وخصوصاً في بحر العقير لا بد من وضع حد لهذه المهزله واذا مانفع المصفر بحط سسيم علاق حق ملابسس عموماً تشكرو على مجهودكم حبايبي ومحاولتكم مساعدتي وانشاء الله لو صار وصدتها بحط لكم صورتها بالطول والعرض والله يوفق انششاء الله

تقبلو ودي اخووكم .. اتعبني العقير

[صياد الاحساء]

بنسبه للمكان ارض صخريه كلها جحور هوامير ٩ طلعنه هوامير ٤ كيلو ونص من نفس المكان

[صياد الاحساء]

طبعآ المكان مافي سبيطي بيتنآ ميد مامره ضرب سبيطي والمحل محدق شعري ولا اتوقع الشعري ينجمع مع السبيطي في مكان واحد فقط الهامور طبعآ احنا عارفين المكان مزبوط. كله صخور لنا اربع سنوات في المكان لاتقول لخمه

[مجنون عجلان]

الله يكون في عونك شد حيلك
وربنا يسهل لك طريقه في صيدها
والله ياخي مالك مني الا الدعاء
وان شاء الله نشوفها منسدحه على صفحه مكشات
الغالي