اطلب رايكم يالاخوان (بهذا الموقف الصعب) لاتبخلوا علي بالحل

[الزعول]

السلام عليكم ورحمة الله وبركاته
بااخواني عندي موضوع اباخذ رايكم فيه وماله من موقف صعب
اخوكم الزعول كنت بالبر عند ابل خويي واتصلوا فيني جماعه ولم انتبه لتصالهم الا بعد ساعه وانا جوالي سوا مافيه رصيد واخذ تلفون خويي واتصلت فيهم ورحبت وهليت فيهم ولزمت عليهم يجوني في محلي ووصفت لهم
وفرحت فيهم اشد الفرح وكان الاتصال فيه صعوبه في هذه المنطقه
قلت لرفيقي خاوني لهم في الموعد قال مايخالف قلت بسرعه قال ان شاءالله
يوم جينا نحرك الا ابوه وعمه يجون عند ابل خويي وتعذر الرجال عن الروحه
قلت تاخرت علي ربعي وانا احرك مسرع بعد مامشيت 13 كيلو ومن السرعه
ضربت في شطب جرف على سرعتي وكسر العكس والهوب والكفر ودخلن تحت الموتر
مامسكهن الا الذراع وهو يحذفبي وفكني الله من القلبه
الموتر ماعاد يمشي وانا ارجع لرفيقي على بعد 13 كيلو مشي
وراح الوقت وتعبت وعلمتهم بالسالفه قالوا يابن الحلال ربعك حقين بر قلت ايبله قال اجل بيتصرفون والديره قريبه لهم وخيرها بغيرها وتركت ربعي وبلشت بالموتر
وخجلت ابديلهم السبب من الاحراج هذا كل مافي الامر والى الحين مادري وين اودي وجهي
وانتم وشرايكم بعذري وانا ابيهم يخلفون الجيه علي وكل واحد له حق وفي اي مكان يبونه هم
فهل عذري مقبول
لا وازيدكم من الشعر بيت جوالي طاح بالمدي حق الابل وكمل الناقص
عطوني رايكم الله يعافيكم

[ابو صفوق]

السلام عليكم ورحمة الله وبركاته
قبل اي شي يابوك الحمد لله على السلامه وبالحديد ولا بك
الموقف ما فيه صعوبه والضرف حصل غصبن عنك ومن لم يعذر الناس لا يعذر واسمحلي يابوك إذا جماعك ماتفهمو اللي صار بسلامتهم ولا يضيق صدرك لكن انت غلطت بحاجه ،انك ما علمتهم وهم جايينك من الديره كان لابد تتصل من نفس جوال رفيقك أو متى ما حصلك تلفون على طول تتصل وتقول وش اللي أخرك عنهم ،لأن أكيد هم انشغلو بعد عليك وانت مواعدهم واكيد بيتفهمون والله لا يجيب الزعل
ثنيان بن صفوق الثنيان

[المهستر1]

حمد لله على سلامتك وجعلك ان شاء الله ماتشوف الشر
ماعاد ودي اقول شيء بعد كلام ابونا ابو صفوق بيض الله وجهه..
كفى ووفى

[الاربع وعشرين]

وعليكم السلام ورحمة الله وبركاته

لعل في الامر خيرة

وانت سويت اللي عليك

ورايي انك تستغفر الله وتلازم الاستغفار باليل والنهار

ورد بالحديث عن الرسول صلى الله عليه وسلم(من لزم الاستغفار جعل الله له من كل هم فرجا ومن كل ضيق مخرجا ورزقة من حيث لا يحتسب)

واذا عرض لك مطب او جرف او حصى او بعير او سيارة او سيالة رمل وانت تسوق
قل(بسم الله)هذا دعاء اذا تعثرت الدابة والدابة هي المركوب اللحين السيارات والدبابات والطيارات
وش رايك تعلمني وين البعارين(البل) غديني اسير عليكم
صلحت السيارة والا توك

[الزعول]

السلام عليكم ورحمة الله وبركاته

قبل اي شي يابوك الحمد لله على السلامه وبالحديد ولا بك
الموقف ما فيه صعوبه والضرف حصل غصبن عنك ومن لم يعذر الناس لا يعذر واسمحلي يابوك إذا جماعك ماتفهمو اللي صار بسلامتهم ولا يضيق صدرك لكن انت غلطت بحاجه ،انك ما علمتهم وهم جايينك من الديره كان لابد تتصل من نفس جوال رفيقك أو متى ما حصلك تلفون على طول تتصل وتقول وش اللي أخرك عنهم ،لأن أكيد هم انشغلو بعد عليك وانت مواعدهم واكيد بيتفهمون والله لا يجيب الزعل

ثنيان بن صفوق الثنيان

الله يجزاك خير يابو صفوق على مداخلتك ورائك السديد
ونصيحتك الطيبه والتي تقبلتها بصدر رحب
وانت وسعت صدري بتوجيهاتك الطيبه الله يوسع صدرك بالايمان
وفقك الله والله يحفظك

[نفود حلوان]

هلابك اخوي الزعول ابو زعل
وش اللي يحرجك ونت ماقصرت وللي صارلك من العجله كله على شانهم والحمدلله على السلامه
حجتك واضحه ولاتستحي قله ونت مطمئن وللي مايعذرك بهالضرف دربه خضر000000تحياتي

[الزعول]

حمد لله على سلامتك وجعلك ان شاء الله ماتشوف الشر

ماعاد ودي اقول شيء بعد كلام ابونا ابو صفوق بيض الله وجهه..
كفى ووفى

هلابك يامهستر والله يحلي ايامك
وكلام ابوصفوق كلام جزل ورزين
ومطابقة رائك مع ابوصفوق
دليل توسع فكرك بمثل هذه الامور
وفقك الله

[صقرولدصقر]

لاحوووول ولاقوة إلا بالله

سلامات ياالزعول في الحديد ولا فيك ياخوك

بالنسبه لربعك بيعذرونك فلا تهتم ولا تزعل نفسك

وكان المفروض انهم يتصلون على جوالك يوم شافوك تأخرت عليهم

بس مايهمك انتظر أي مناسبه عندك وأعزمهم وبيجونك إن شاء الله

إذا ماجوك تبا تبين وتتضح الأمور إلا إذا تعذروا من بدري

في هذه اللحظه إشرح لهم ماحصل معك وصدقني بياخذونها بروح مرحه

[ابونواف سعد]

الحمدلله على السلامه وانت الحين راع الحق المفروض يتطمنون عليك ويعتذرون منك لأنهم هم السبب بعد الله في اللي حصل لك ولموترك ..يارجال انت الله يعينك موترك متعطل ومشيت 13 كيلو مشي وجوالك غرق ونحاست امورك وهم مابهم إلا العافيه يحمدون ربهم بدل هاالجيه يجون مره ثانيه والربيع جاي والامور طيبه ووسع صدرك ..