معاناتي مع مروحة المشب . تكفون الفزعة

[دكتور زمانه]

السلام عليكم
باختصار . عندي مشب طوب وحطيت مروحة حديد على الجنب
لشفط الدخان . اذا الجو كويس تشفط مضبوط واما اذا كان الجو
فيه هوى قوي فالله يخلف ( تعكس ) تصير تجيب الدخان داخل الغرفة
وتعبتني بالحيل . الله يوفقكم ويفرج لكم ابغى حل عاجل

[السرحان502]

حطها ع رقبة الوجار

[ابولولو]

لاتصير قالب المروحه اخوى

شى ثانى لايصير فيه تنسيم يعنى شفط هواء من الخارج

[سكيكو]

الاسباب حسب اعتقادي
1- ان تكون المروحة جهة الشمال او الغرب
2- ان المروحة مقلوبة اتجه الدفع
3- قوة المروحة ضعيفة بحيث لا تقوم قوة الرياح
4-ارتفاع المدخنة ليسى كافاً

[أبو ذيب 77]

واضحة جدا بما انك قلت انك حاطها على جنب..

اكيد الهواء بيضرب فيها..حطها في علو المدخنة مثل ماقال اخونا السرحان

[باوزير]

ممكن انه المروحة مواجه الريح ×

[سلطان الخير12]

نفس كلام الاعضاء

[ابو فيصل 99]

اخوي من تجربه قبل
لازم يكون مستوا الفتح اللي فوق متساوي من جميع الاتجاهات ولاقريبه منه شي يرد لهوا عليه

[كتاب]

مثل ما قالوا لك الإخوان
الفتحة اللي يخرج منها الهوا لا تضعها في اتجاه هبوب الرياح لأن الرياح سوف تدخل إلى الداخل ( عكس ما تريده)
الأفضل أن تكون باتجاه الجنوب والشرق وعندئذ تساعدك الرياح على شفط الدخان حتى لو ما كان فيه مروحة
فإن لم يمكن ذلك فلتكن باتجاه الأعلى وفوقها غطاء يحمي من المطر .

في الحقيقة هذا فن أبدعوا فيه الماضين ونسيناه
وقد بنوا البيوت في الماضي لتتلقى نسيم الهواء بدون مكيفات ولا مراوح كهرباء
الآن وضعنا كل اهتمامنا على الكهرباء ونعتقد أنها وحدها تكفي حتى لو عكس التيار

[مزاجي]

لازم تنسم للباب او الدريشه حق المجلس ورا ح تشفط مزبوط

[حب لاينتهي]

الحل

ركب للوجار حلق سحب اذا فيه دخان اسحبه والدخان يطلع

واذا جمرات رجعه

ان شاء الله افدتك

[H 2]

اخوي هل المروحة الى مركبها بالوجار بالكهرب ؟؟ اذا بالكهرب هل هو 220 ؟
شوف اخوي انصحك تجيب لك عامل دكت
ويكسر المشب من اعلى راس المشب من الخارج ويحط عليه صاج مثل المضلة ويحط المروحة تحته وخذ لك مروحة كوري لان الياباني موقف
بتحصل ع حسب الفتحة الى عندك
اذا 35*35 بحدود 130
اذا45*45 بتحصلها 170
وخله يحط الكهرب 220 وصدقني ان شاء الله انك بترتاح
لكن اذا حاطها ع الجمب وبدون كهرب او كهرب110 وتركيبها غلط اكيد ماراح تجيب نتيجة ابدا
واهم شي تجيب مختص واذا انت بالرياض رح للصناعية الى مقابلة للحراج واسئل عن الى يسوون الدكتات او رح لطريق الامير سلمان وانت جاي من الدايري الشرقي اذا جتك اشارة القيور والمكايين يسار
انت خذ يمين واسئل عن الى يزينون المكيفات الصحراوية والدكتات
وبالتوفيق

[دكتور زمانه]

السرحان 502 أبولولو سكيكو أبوذيب 77 باوزير سلطان الخير 12 ابوفيصل 99 كتاب مزاجي حب لاينتهي h2
الله يرضى عليكم
وبيض الله وجيهكم
ألف شكر وتقدير

[دكتور زمانه]

فعلا المروحة في الجهة الشمالية
فهل الأفضل أحطها شرق والا جنوب