المساعد الشخصي الرقمي

مشاهدة النسخة كاملة : وش أحسن مطاره


أبو سيف السيف
22/08/2006, 11:03 AM
السلام عليكم .. يسعد لى مسائكم ..

أخواني وش احسن مطاره بالله .. لحد يقولي السنيدي ترو كل ماشريت وحده يمار تنقط مايمديني اعبيه مويا والا تنقط

بالرغم اني منقعه بمويا ومره نقعته بمويا وملح ..؟؟ بس ماش تنقط

وش تنصحوني فيه بالله ..

تحياتي للجميع
dr.mekshat
22/08/2006, 11:27 AM
لحد يقولي السديري ترو كل ماشريت وحده يمار تنقط مايمديني اعبيه مويا والا تنقط





اللي اعرفه ومن واقع تجربتي البسيطه انه المطاره الكويتيه الصنع افضل شي

وانا مجربها لا من ناحيه فرق البروده ولا من ناحيه التنقيط

بس وين تلقاها هذا اللي نبي الاخوان يفيدوننا فيه

والله يسر لك مرادك
وبالتوفيق

تـــحــــيـــــاتــــي
أبو سيف السيف
22/08/2006, 11:40 AM
هلا والله

مشكور على مرورك .. اى والله ياليت يدلونا الشباب وين تنباع لان بصراحه اللى بالسوق ماش ماهن مضبوطات
تنقط وقسمن بالله قبل امس شاري وحده يقولي راعي المحل انه بكستانيه وبداخله مطاره وفوق المطاره خيشه قالي نقعه بالماء ..

نقعته وخليته ساعه ونص ونشفته وعبيته امس مويا .. يوم قمت الصبح اليوم مافيه ولا نقطه مويا .. انا شفته تنقط بالبداية بس قلت يمكن تنقط على خفيف عشان تبرد طلع العكس عشان تفرغ

مشكور يالغالي والله يعطيك العافيه
أبوملوح
22/08/2006, 11:58 AM
أخوي أضن أن التنقيع
يحتاج مده أطول ماتكفي ساعه ونص خلها يوم وزياده
كشته 111
22/08/2006, 12:01 PM
السلام علي الاخوان جميعا ,, ابنقل لكم وش يسوي احد الاخوان با المطارة عشان ما تنقط وانتم شوفوا اذا تناسبكم او لا ,,, اول ما يشتري المطارة يوديها لخياط الخيام يعيد عليها الخياطة عشان يسكر الفتحات حقة خياطة المصنع ,, والخياطه تكلفه 5 ريال في سوق الخيام وانتم ابخص ,,,, ودمتم سالمين ,,,
أبو سيف السيف
22/08/2006, 12:05 PM
هلا والله أبو ملوح تسلم يابعدي والله شكلي ابى انقعه يومين وزياده عشان تضبط ..

لاهنت ومشكور على مرورك
أبو سيف السيف
22/08/2006, 12:06 PM
هلابك يابعدي كشته 111 وقسمن فكرتك حلوه والله ابى انقعه زي ماقال ابو ملوح اذا ماضبطت
مالى الا محل الخيام

مشكور ولاهنت
شبح الصحراء
22/08/2006, 12:12 PM
علشان ما تنقط المطارة لازم تنقعها في ماء مخلوط بشوية طين وتخليها ليلة كاملة لأن حبيبات الطين الصغيرة تسكر الفتحات التي يخرج منها الماء أما التنقيع بالماء والملح فلا ينفع لأن الملح يذوب تماماً في الماء ولا يسكر الفتحات ، وعلى فكرة ترى التهريب الخفيف للماء ضروري لأن المطارة يعتمد تبريدها على انها ترشح ماء من جدرانها ثم يقوم الهواء بتبخير الماء وتحصل البرودة وهذه نفس طريقة تبريد جسم الإنسان عبر العرق مع فارق التشبيه .
أبو سيف السيف
22/08/2006, 12:27 PM
الله يجزاك ألف خير شبح الصحراء واغدينن اسوي طريقتك ماء وطين واغديه تضبط ..
لاهنت وعساك دوم سالم

تحياتي لك