صوت بالمكينة ومحتاج فزعتكم

[فيصل85]

السلام عليكم

انا عندي صوت بالمكينة من جهة اليسار فقط له سنة تقريبا ومدري كيف اوصفه لكم .. لكن ارفقت مقاطع فيديو تبين هذا الصوت.
طبعا رحت لكذا ميكانيكي متخصص واحد قال ذراع البستم والثاني قال سبايك متآكله فيها ضعف وماتضخ الزيت زين لفوق وتوضيب 15 الف
علما باني غيرت طرمبة زيت وطقم تكايات ووجيه مع صنفرة ومخرطة بلوف من 6 شهور تقريبا والسيارة ماتغير فيها اي شي والصوت باقي ( الا اذا كان ماركب التكايات الجديدة هذي بذمته )
والزيت اللي اغيره من وكالتها ونفس رقم اللزوجه اللي بغطا المكينة 5w20

السيارة : كلزلر سي 300- موديل 2006 - 8 سلندر - ماشي 170 الف

سافرت عليها كثير ماشاءالله مافي اي مشاكل من ناحية العزم والزيت ممتاز ماينقص ومايحترق واغيره في مواعيده وماعندي غير هالصوت مجنني وفي هزه لاتذكر بالمكينة وفحصت كمبيوتر قالو طرمبة البنزين ضعيفة وتصفية مكينة وبنشيك على البواجي

صوت السيارة عند التحمية الصباح وهي باردة
t5mthASCZIU


الصوت فقط من جهة اليسار
c19-M2xeKl8


وهذا رابط فيديو اخر
JJ0gv4E9xjY

ارجو الافادة الله يجزاكم خير

[ابوسند9]

اخوي
الصوت كانه صوت بلوف تبغى وزن
لكن جرب فك سير المكينه وشغل فممكن الصوت من علبة الدركسون او احد البكرات وتاكد من سير المكينه
وبالنسبه للهزه شيك على كراسي المكينه
واهم شي لا تستعجل واترك كلام الورش وان شاء الله المشكله بسيطه

[منطفق بركاده]

معي واحد من الزملاء بالعمل معاه درانقو 2008 هيمي 8 سرندر وهو رجال ميكانيكي من الدرجه الاولى ولا افضله على احد

كان يطلع معاه نفس هالصوت ويقول الموتر جديد ولا فيه اي مشكله غير هالصوت


انتهت مشكلته انه يغير زيت وسيفون بنفس الوكاله لانه مافيه اي زيت بالسوق المحلي نفس زيت الوكاله


هذا والله اعلم

[mekshaat]

برسل لك رقم مهندس سعودي يشتغل بكل
السيارات لكن على كلامه لي يقول الكلزلر
والشيروكي بالذات متخصص فيهم ويوضب
مكاينهم وعنده عمال فلبينيين ممتازين
وعنده سوداني توه جايه خبره20 سنه
بتوضيب المكاين ومشاكلها موقع الورشه
بالرياض,

[فيصل85]

اليوم مريت ورشة ويقول هذا عمود التيمن وبيفك صدر المكينة من غير مايفرط البساتم وبيسحب عمود التيمن
وانا والله مدري ودي اجمع كذا معلومة بالذات اللي قد مرت عليهم هالمشكلة وثم استخير واتوكل على الله

[البديع 828]

السبايك اخوي صوتها عند الدوس فقط. وهي شغاله السيارة ماراح تلاحظ فيها شيء ولا عندك من اشتغاله
فقط فقط وحط عندها خطوط في الدوس فقط سواء واقف او تمشي
يعني بضرب لك مثال
اول ماتشغل السيارة وحميت الموتر ودست له وهو واقف تسمع صوت طقطقه بالدوووس فقط
واذا مشيت مثلاً ٦٠ وعطيته دعسه وانت ماشي تسمعه واذا رفعت رجلك او ثبت السرعه الخفيفه ماتسمعه
وانتبه لاتستعجل

[فيصل85]

الله يجزاك خير اخوي البديع 828 طمنتني الحمدلله
باقي بس اشيك على عمود التيمن (الكام)
والصراحة مدري الورشة اللي دخلت السيارة عندهم من زمان غيرو التكايات قبل والا لا مع العلم ان الصوت كان باقي
انا محتار الحين افك المكينة كاملة اشيك على العمود او افك الراس الايسر واغير التكايات
واللي مجنني لمن تروح جهة الكفر الايمن الامامي ماتسمع شي ومن جهة الكفر الايسر الامامي تسمع الصوت واضح
صوت تكاية وحدة فقط
والله محتاااااار جدا
وانا مااعرف كيف صوت عمود التيمن اذا خرب وش اعراضه
دلوني ياجماعة الخير وش اسوي رحم الله والديكم

[فيصل85]

up........

[ls1.5700]

اسمع اخوي فيه طريقه انا استخدمها دايم اذا فيه صوت بالمكينه او غيره وهي فعاله
لتحديد المشكله اللي هي
اي قطعة خشب مثل عصاء المكنسه اكرمك الله
او اي شي بس تكون خشب
طريقة الاستخدام
حط طرفه على المكينه او اي شي تبي تحدد مكان الصوت
والطرف الثاني على اذنك وانصت للصوت وحركه تدريجي للمكان اللي تحس فيه مكان الصوت
بعدها تحدد الصوت بكل سهوله
بعض الناس يستخدم ماصوره حديد بس انا افضل الخشب لسهوله التعامل معه وخفته وزنه
ودقته ولا يحتك بالمحرك مثل الماصوره ويصدر صوت غير المراد فحصه مثل القرقعه وغيرها من الاصوت المزعجه التى تعجز عن تحديد العطل
اذا تأكدت من تحديد المشكله وديه للورشه وقلهم وين المشكله بالتحديد
انا سمعت ادلصوت اللي بالمقطع الفيديو
واضن وحتمال كبير الصوت من احد التكايات او الصبابات
او احد البلوف فيه مشكله او يحتاج وزن لاكثر ولا اقل
وفيه احتمال ثاني ونا شاك فيه اللي هو واحد من اذرعة البستم
فيه فضاول بين البنز وذراع البستم
يعني مركب المكبس بالذراع فيه زي الخابور يسمونه بنز
شيك عليه افحصه بالطريه اللي قلت لك من الخارج حط طرف الخشبه على السلندر ويبين معك اذا فيه صوت طقطقه
اذا مافيه صوت فالمشكله من الراس توكل على الله وفكه
فاكيد المشكله منه وبعد الفك يبين كل شي

والمعذره والسموحه على التقصير هذى مالدي
والله ولي التوفيق

[Vتكان]

جرب ترش القزوز ببخاخ حق ماء وشف التبخير هل المواصير متساويه بالحراره
صارت معي مره طلع صوت من جهة اليسار بس (صوت طرق زي الطقطقه )ورشيت مواصير الهدرز وطلع بستم رقم 7 تبخيره يتاخر عن الباقين (جتني وسوسه ألف ) وطلع بالاخير البوجي فيه كسر خفيف غبرته وضبط يالله لك الحمد
موفق

[فيصل85]

سويت الطريقة اللي قلتولي عليها وشكلها 80% تكاايات بلوف ان شاءالله اخر الشهر ادخلها ورشة
وياليت تعطوني عناوين ورش ممتازة بالرياض
ومشكورين يا اخوان ما قصرتو وجزاكم الله الف خير

[ls1.5700]

يعني نجحت الطريقه اللي قلتلك
صحح انها بدائيه بس عماليه ودايم استخدمها 00000
اذا كانت تكايات بأذالله مامنها ضرر بس صوتها مزعج
بالنسبه للورش اللي بالرياض ان شاءالله يفيدونك ماقي الاعضاء
لاني والله ماعرف وورش هناك
العذر والسموحه اخوي فيصل

[فيصل85]

مامنك قصور لا انت ولا الشباب اللي ردو علي
والله يكثر من امثالكم ويوفقكم الى مايحبه ويرضاه

[البديع 828]

صوت البنوز قرقشه ماهي صافيه مثل صوت مكينة الديزل بس ناعم شوي
يفرق عن صوت الطقطقه اللي يصدرها البستم


لاتفك المكينه.
شيك على البلوف وعيد وزنها

[فيصل85]

دخلتها الورشه امس عشان الميكانيكي يشيك البلوف وبرضو بالمرة خليته يفك الكرتير ينظف شخال المكينه
والله يكتب اللي فيه الخير لي ولكم
وبعلمكم وش يصير معي ومشكورين يا اخوان ولاهنتو

[يالبى الهلا]

ارك الله فيك أنا عندي مشكلة من أمس تقريبآ
أحاول أدخل على بعض الخيام فيطلب مني تسجيل دخول جديد

وإذا سجلت دخول جديد يرجع للصفحة الرئيسية

إيش الحل ؟ بارك الله فيك

[فيصل85]

تم حل المشكله ولله الحمد طلعت وحدة من تكايات البلوف مكسوره وغيرتها بطقم جديد
واشكر جميع الاعضاء الذين ساندوني الى ان تم حل المشكله.

[ls1.5700]

الحمدلله على حل المشكله ولانتهاء منها من غير رجعه ان شاءالله
والله ياخوي فيصل اني فرحت لك من كل قلبي
والف شكر لك على الافاده بحل المشكله لتعم الفائده للجميع
وفي أمان الله