يوم صار خويّي دليلة .. لكن

[راع الكحيلة]

السلام عليكم ورحمة الله

أبا عبدالله وما أدراكم ما أبا عبدالله

هو أخ حبيب سنافي شرواكم .. وهو أخو دنيا من اللي ودك تبذل الغالي والنفيس للحصول على خوّته

وما تحلى طلعتي البرية إلا إذا كان حسـّه موجود عندي أو حولي

طبعا أقصد الطلعات البرية القصيرة والقريبة نسبيا وليست البعيدة التي تحتاج سفر.. لأن الطلعات البعيدة ما هوب زين معها بالحيل وبينه وبينها زعل وثار

المهم ها السنافي هذا كل علم ٍ غانم عنده لكن به عيب واحد وغثيث بالحيل

وهو انه دايم مضيّع الدرب وفوق هذا دايم يكمل الضيعة بتغريزة طيبة مع عذر أقبح من ذنب

مع ان محلي يبطي على نفس الموقع و لمدة أكثر من سنة أحيانا ... يعني ما فيه عذر له عن سبب الضياع ...لكن الأعذار ما تخلص

مرة :
والله يا خوك أشغلني التلفون ودجيت

ومرة :
أصلا أنا متعمد أدوّر طريق مختصر

ومرة :
هو انت غيرت محلّك ؟؟

في حدا هاالمرات تأخر علي وطبعا ولا يمكن أقلط العشا دامه ما وصل.... (أمون على الربع الموجودين)

- ألووو أنت وينك ؟؟

- والله ياخوك مدري .. بس اللي اعرفه اني طحت لي في الرمال المتحركة حقت عنترة يوم بغى يجيب النياق الحمر ....

- طيب علمني وين كنت قبل ما تطيح في ها الرمال

- أبد ما غير على الدباية الكبيرة اللي انت خابر وعليها حول 7 كيلوا إلا يوم غرقت أقصد غرزت

- طيب .. طيب عرفت مكانك ..جايك .

ويوم وصلت له :confused:

- يا الله دخيلك ... أنت وشلون طحت في ذا الرميل هذي ما يصير تمشي فيها على هونك ..كان حطيت رجلك يا خوك ؟ خاصة إن طول ها التغريزة حوالي 30 متر يعني قصيرة وبتعديها لاصرت مستن.

- بعد .. وشنسوي ... هذا اللي صار جاني تلفون وانشغلت معه وطبيت في ها البحرة وعقبها إلتف السكان من كيفه .. ويوم ناظرت برا إلا موج الرمال للباب

وبعد توفيق الله و جهد جهيد طلع الموتر

وبعد ما وصل معي للمحل إلاّ ويقومون الربع ويستلمونه .. وعقب ما أخذ نصيبه من الإستلام حبـّوا الشباب إنهم يرفعون معنوياته ..وقالوا له ما عليك من ابو طلال... أصلا هو السبب لأنه ما وصّف لك الدرب الصحيح ..

- يا سلام .. طيب أنتم وشلون دليتوا على وصفي مع انكم أول مرة تجون ولا أنتم أهل بر والحبيب ذا صار له كم سنة يجيني ولا زال على حاله

المهم عدّت ذيك الطرفة على خير

الاسبوع اللي وراه

الربع كلهم مجتمعين ... وأنا ما غير أحاتي خويي

لا حول ولا قوة إلا بالله هذا وشبلاه أبطا علينا ..؟؟

- ألووو ...يا اخوي الساعة وصلت 8 وانت ما جيت .. أنت وينك؟؟

- والله يا خوك لا تنشدني ... مدري ويني .. بس تعال خذني
- آخذك منين وانت ما تدري وين انت اصلا

المهم وأنا اصعد فوق واتلفت يمكن اشوف نور السيارة وهي تدور ... وما لقيت شي

- طيب يا خوي شف لك صرفة عطني أي وصف أو أي شي مر عليك في الطريق .. قرب الشغلة لي
ما فيه اختيارات عندك ؟؟

- والله يا خوك أنا أذكر اني مريت على شبك طويل على يساري وكان قريب مني

- بس .. بس .. يوريكا :bounce: .. أقصد وجدتها ... وقف محلك ولا تتحرك شبر واحد

وأنا اقفز على الموتر نوع F15 وانطلق بأقصى سرعة على خط واحد كأني أشوفه قدامي وأنا أصلا ما شوفه
بس من كثر ضيعاته أصبحت أتوقع وين يضيع ووين يغرز ووين يدور الطرق المختصرة

المهم وعلى السّـنة إلا أنا مار عليه وهو ماسك الجوال وراكب فوق الغمارة علشان الإرسال .. الظاهر ان حتى جواله مغرز

طبعا ما سلم من العتاب وما سلمت أنا من الأعذار الداجة

واكتشفت ان الرجال ضايع من بعد المغرب لكن جزاه الله خير وكا العادة ما يبغي يتعبني في عناء الوصف مرة ثانية له ...أو إني انتظره في مكان معلوم .. وما هو قابل يقتنع ان التعب والغثا كله في انه يسكت إلى أن يدج ويدججني معه.

عندما عدنا للمخيم وجدت أن نار المندي خبت وبردت فسلمته للربع في المجلس ودقيتهم سلف(شغلتهم عليه) .. ورحت اشعل نار المندي مرة ثانية ...وما أشوف إلا الربع مشرشحينه تشرشح ... خله وياه هاالدليلة



يتبع ...

[سيف السيف1]

من إسلوبك واضح أن الرجال ((( نكته ))) مقبول حتى لو ضاع عدة مرات .. هذا وهي طلعات قريبة وشلون لاصارت بالدهناء أو الصمان..
مع أن القارمن ما خلا للي يعرفون شئ.. تحياتي لك

[الهلالي]

منتظرين يبو طلال لا تطول شوقتنا .

[الضاري]

الله يرج عدوك ياراع الكحيله



مبتلي بواحد من هالنوعية أخوك



ويمكن ما تصدق لو أقولك طالعين بشعيب



وجيت أولهم للمكان وهو يعرف المكان



المهم وقفت وفتحت كبوت السيارة ( كن عندي سالفه )



المهم مر من عندي الرجال وما عرفني وكمل طريقة لآخر الشعيب



وصلوا بعض الشباب وجلسوا وأقول لهم اللي صار



وبعدين رجع ومر من عندنا مره ثانية ونفس الطريقة



قال واحد جالس ويعرفة زين : ألحق الرجال وهاته معك والله ما طق خبر



المهم رحت ورجعته للمكان وأنا منصدم ماني مصدق أنة فية نوعية من الرجال كذا

[راع الكحيلة]

أبو فارس
حياك الله
وكلامك صحيح يا الحبيب
و والله لو يضيع باليوم مئة مرة .. الغالي ما نخليه
====================
الهلالي
أبشر يا الحبيب
====================
الضاري
حياك الله يا الغالي
لكن يا خوك ممكن توصف لي ذا الرجال يمكن انه خويي بو عبدالله :)

[راع الكحيلة]

نواصل معكم بعض طرائف الغالي ... الحلقة قبل الأخيرة واسمحوا لي على التقسيط ترا أخوكم
بطيء حيل في الطباعة وتراني جالس اكتب لكم القصة مباشرة ما هي مخزنة من قبل

ودارت الأيام

وتعددت مواقعي والتي أبقى فيها مدة طويلة ومن كثرة تردد الربع عليها حتى سياراتهم حفظت الطريق ..
إلا صاحبي الغالي

مرة انتقلت لموقع سهل جدا ووصفه أسهل من أنه يحتاج وصف أصلا

قلت للربع تراني انتقلت لموقعي الجديد ووصفه إنكم تمشون على نفس المزفلت السابق مسافة 17 كيلو ثم تنزلون
دباية على اليسار وتمشون فيها مسافة كيلو فقط تلقون الغرفة القلص أم 11متر والوايت والخيمة ومحصار الغنم

ما خذيت إلا والربع كلهم وصلوا .... إلا ... الحبيب الغالي

وعقب ما أبطى علينا قلت خلني اتصل عليه وأفكه من الاحراج يمكن ما عنده مشكلة في دلالة المحل الجديد لكن
يمكن تعطلت سيارته وما يبغي يشغلني عن خوياي

رفعت الجوال وضغطت رقمه وأول كلام قاله :

هلا والله بو طلال .. هلا بالغالي .. هلا بالحبيب النشمي .. هلا بالسنافي والله ..هلا بالــ...

إخلص وينك .. وين تغريزتك ها المرة ؟؟

مدري..؟!!؟!؟؟! لكني نزلت بر بعد ما استمريت 7 كيلو على المزفلت

شنهو ؟؟ 7 كيلو ... ؟؟ أنا قايل لك 17 كيلو ..وين راحت العشرة الباقية

مدري .. قلت أجيك قطوع أسرع ... طريق مختصر يعني

والله العذر اللي ما له سنع ... ليته قال نسى العشرة وفك نفسه

ألحين أنا قايل لك إنك إذا قطعت 17 كيلوعلى المزفلت تنزل يسار للبر وبتلقاني على بعد كيلو واحد فقط يعني
تمشي بري كيلو واحد فقط ..يعني حتى موترك مرتاح... تقول لي نزلت من مسافة سبعة علشان تقطع فيها أكثر
من 10 كيلو رمل وتسميها قطوع ؟؟؟

المهم وصلت له ومعي القلص كالعادة .. ويوم جيته لقيت ورعه معه الله يصلحه ومخلي الورع يدعس على البنزين
وهو يحاول يدفع سيارته اللي راكزة للمرايات .. مع ان وزنه هو أصلا ما يصلح انه يدفع دباب ابو ثلاث عجلات

المهم أول ما شافني وهو يلقي على مسامعي معلقات الترحيب كلها يبغي اسكاتي .. وصاح على الورع :

قم فز خل السيارة تولّي ورح حب خشم عمك وعمي ...

لا أخفيكم أني لا أملك نفسي من الضحك أحيانا من ردة فعله .. وكل شعور بالغضب يضيع لاشفت فرّته البشوشة

قلصته وطلعته من التغريز وتبعني للموقع

وكا العادة رميته في حلوق الربع يتصبرون فيه على ما اسنـّع أنا العشا




بس ترى ما بقى إلا الحلقة الأخيرة الجاية و اللي صار فيها دليلة وافتخر في دلالته مدة ساعة فقط لا غير

يعني

يتبع .....

[أبو شعلان]

بسم الله الرحمن الرحيم

هههههههههههههههههههههههههههههههههههههههههههههه

أخوي راعي الكحيله ياصبرك عليه ... أحسن حل لك وله دورلك مكتب إستقدام وجب لك هندي أو بنقالي وركبه معه ...
وإذا بغيت توصّف كلم الهندي ... والباقي كلمه هو ويالله يالله بعد ...

بس ولو أحس إنه رهيب من بعد ماقال للورع رح حب خشم عمك وعمي .... يبي يسلم من الشرشحه

الف شكر لك أخوي راعي الكحيله .... وسعت صدورنا بهالسوالف الطيبه

,,,,,,,,,,,,,,,,,,,,,,,,,,,,,,,, وتقبل تحياتي ,,,,,,,,,,,,,,,,,,,,,,,,,,,,,,,
:j

[ريف النشاما]

على الخط
هههههههههههههه

[راع الكحيلة]

أبو شعلان
حياك الله

ويا صبره هو علينا بعد ...:)

هو سلم من شرشحة واحد وطاح في حلوق الربع اللي منتظرينه

=============================
يا اللي على الخط

لا تقطع الخط :)

=============================
نكمل معكم


بعد هذا المكان بمدة ليست بالقصيرة وبعد عدد مهول من التغاريز

قررت أن أبحث عن مكان أفضل للحلال وكان بعيدا نسبيا عن الطريق العام المزفلت مقارنة مع مواقعي السابقة

وصـّفت للربع المحل وسبقتهم من العصر لأني أعرفهم ما راح يجون إلا بعد المغرب بحكم إن الأجواء صيف

وكنت متوقع ان الكل سيضيّع الطريق في الليل فما بالكم بأبا عبدالله

المهم ذيك الليلة وعقب صلاة المغرب جلست برا مقابل النار الله يكفينا واياكم شرها جلست أتفكر في ها الهدوء والسكينة اللي تبعث على النفس الإنشراح ... قلت أرتاح وآخذ نفس واستجمع طاقتي قبل ما تشتغل على جوالات اللي مضيعين الدرب ... وخاصة اللي انتم خابرين ... من غيره ؟؟ ملح الجلسة

المهم وانا في جلستي هذي إلا ذاك الموتر اللي تقول جايني دعوم ... لا يمين ولا يسار إلى أن مر علي وأشوف راعيه مطلّع فرّته من القزاز ويناظرني بكل عنجهية وكبر وتباهي.. مع ابتسامة صفراء استهزائية

وعندما عرفته كاد أن يغمى علي وبغت تخنقني العبرة

معقول ؟؟؟؟ :no:

هل يمكن ؟؟؟

لا أصدق

هذا ابو عبدالله ما غيره ؟؟

لا ..ومن زود الرهاة عدّاني شوي وعمل له تفحيطة فوق تحت ورجع .. وقال و هو مزهو كالطاووس

أخوي ..حنا لا بغينا نجي .. نجي .. وما علينا من الشايعات اللي تقول إنا نضيع والا نغرز

صح كلامك والظاهر اني كنت متوهم يوم أطلعك من التغريز وانقذك من الضيعات

أخوي هذا تواضع مني لأحسسك بأهميتك ومدى فائدتك .. بعدين لا تنسى إني دايم مشغول بهموم الأمة وما ني فاضي لك انت وغنمك ... ما عندي وقت أتحفظ مواقعك .. منين شديت ولا وين نزلت ..

ما شاء الله عليك بس عندك وقت تمضي الساعات في البران .. ضايع

لأ هذا موضوع ثاني .. ضيعاتي ذيك فيها شي يسوا يا بو طلال ... مندي طلي diet.. والا سمك .. والا فرّي :)

المهم الرجال كان سعيدا جدا لوصوله بدون ضيعة وأظن أنا إن الرجال كان ناوي يوقف يسألني عن مخيم ابو طلال .. وتفاجأ إن المخيم اللي قدامه هو مخيم أبو طلال

أو يمكن إنه نسى إني غيرت محلي وراح لمحلي الأول وضيّع ووصلني في محلي الجديد :)

طبعا جلست أنا وياه لوحدنا ..وما وصلوا الربع بعد .. وهو كأنه يتمنى شوفة اللي كل يوم مشرشحينه

ولسان حاله يقول ..وينكم يا هالخمّة يا زين شوفتكم وانتم مضيعين ها الليلة والله لاضحك عليكم لين أشبع

شوي إلا أبو صالح يتصل

بوصالح
يا بو طلال والله يا خوك كن ابو عبدالله اعداني وكني ضيعت

لا ما عليك .. إنت وين بس ؟؟

أظنتي إني حولكم على الوصف

طيب أنا أشوف نور سيارة من بعيد طف النور وولعه مرة ثانية علشان اتأكد انه انت

طبعا ابو عبدالله يسمعني وكأنه قاعد على نار يبغي يفزع للضايع ..علشان يورّي ها الاشكال منهو اللي يدل ومنهو الدجّة

ويشوف ابو عبدالله نور السيارة يكبس على بعد 5 كيلوا جهة الشمال

ويصيح :
شفته.. شفته ..خلاص .. خلاص .. سكر الجوال قل له إني جايه

لحظة يا بو عبدالله

فات الأوان .. فقد امتطى صهوة موتره وانطلق جهة نور السيارة

المهم وانا اتلفت شفت نور سيارة قريبة مني جهة الجنوب وممشاه ممشى اللي يبغي الحروة

وأنا اشيل الجوال على ابو صالح

أبو صالح .. طف النور شوي وولعه.

ويوم طفاه إلا هو بو صالح ... طلع جنوب مني وقريب بالحيل وما هو شمال على حسب ظن ابو عبدالله

طبعا يمكن أحد منكم يسأل وش ها الناس اللي توصل الحروة ولا تشوف الموقع

السبب أني فارض حظر وأن من أكبر الممنوعات تواجد ماطور كهرب و فقط مكتفي بنور السراج أو لمبات
الفلورسنت ذات الـ12 فولت اللي على البطارية..لأني جاي البر أصفي راسي وأدوّر الراحة والهدوء ولا يمكن
أسمح بطقطقة ماكينة الكهرب عندي

نرجع لموضوع ابو صالح

يوم عرفت انه هو قلت له :

ابو صالح انا اشوفك لف شوي يسار ... بعد شوي ... بس ثبت ها الاتجاه وتكفا طف النور بسرعة

أطفيه ؟؟ وشلون أجيك ؟؟

انت ما عليك خلك على ها الاتجاه والارض زينة ومستوية ... طف النور سرعة

أها طفيته وش عندك؟؟

قلت له : ابو عبدالله شاف له نور شمال وانطلق يمّه يظنه أنت ...ولا ودّي إنه يشوفك ويدري انك وصلت

وضحك ابو صالح ..
الله يغربل ابليسك وشناوي تسوي بالرجال ؟؟

أبغيك تتصل عليه الحين وتكلمه وتستمر في الكلام كأنك تنتظر توجيهاته إلى أن تدخل علي وعطني الجوال

طبعا وبكل خبث أصحاب المقالب قال :

أبشرررررر

طبعا للتوضيع طلع النور اللي متوجه له أبو عبدالله سيارات مصبنة وفلاوة يفحطون عن بعد في البر وهو يشوف نور سيارتهم يروح ويجي وظن انها سيارة ابو صالح تكبس لنا

اتصل ابو صالح على ابو عبدالله

هاه يا بو عبدالله ما شفتني للحين

بو عبدالله
إلا شايفك .. إر جع فوق حدر تراك مقفي

طبعا سيارة الفلاوة بما انهم يفحطون يصير وجهها جنوب ثم شمال والعكس

بو صالح
طيب أها وبعدين

بو عبدالله
تمام .. تمام ... يا ولد انت علامك عودت عكس اقول لك تمام وانت تعكس ... إرجع ..إرجع

بو صالح نزل من السيارة ودخل المجلس وسلم علي وهو لا يزال يسمع تعلميات ابو عبدالله

أخذت الجوال من ابو صالح

واسمع ابو عبدالله

هاه شفتني هذا انا أكبس لك ... و..


كلمت ابو عبدالله وقلت له :

بشر عساك لقيت أبو صالح

وأول ما سمع صوتي

هاه :confused: :no:
بسم الله الرحمن الرحيم ...انت منين طلعت ؟؟؟؟

طبعا تقطعنا من الضحك أنا وابو صالح والربع اللي جونا ثم وقعنا في معضلة كبيرة ألا وهي إعادة المفقود :)

فأخذنا نضيء له الأنوار لعل وعسى والحمدلله ربكم لطف ورجع لقواعده سالما يجر أذيال الخيبة

واستمرت نوبة الضحك هذه لأكثر من سنة كلما تذكرنا ها القصة




قصة يوم صار خويي دليلة


انتهت

[المترو]

السلام عليكم ورحمة الله وبركاته

ابو طلال يا هلا وغلا وتري على الخط من اول السالفه لكن ....................ولا تقطع سالفته .

اما خويك هذا لاتفرط فيه وسيع صدر ويتقبل الشرشحه اليوم اغلب الناس ما تقدر تقلو لهم زحو وراكم ؟؟

زانت علومك وعساها دايمه والله لايحرمنا من علومك وسوالفك ورأيي انك تؤلف كتاب عنه حج وقضاء حاجه


لك وافر التحايا

المترو

[راعي ساموده]

هههههههههههههههههههههههههه السلام عليكم ورحمة الله ..
الله يجزاك خير راعي الكحيله على هالرفيق اللي ودنا نتشرف بالسلام عليه والله انه عسسسسسسسسسسسسل , بس ودي اني معكم يوم يجي بدون مايضيع.. ودي أشوف وشلون يناظرك ويتبسم ويعلمك انك مهوب بس انت اللي تدل هههههههههههههههههه

[راع الكحيلة]

كنت الليلة في ديوان الدليلة .. ماغيره

بعد ما عشاني في مطعم سمك .. يعرف نقطة ضعفي ... والمشكلة انه ما هو متخصص سمك

وعندما كملنا الجلسه في ديوانه أنا وياه بس ..فتحت جوالي ودخلت النت عن طريق الجوال

وقرأت له روايتي المأساوية معه وكان يتابع معي ذيك المواقف وكاد أن يفطس من الضحك على نفسه ..
وعلى سواته فيني ذيك الأيام ... ولازال




==================================
المترو
حياك الله ... وصدقت

ها الايام وسيعين الصدر عملة نادرة ... والله يجعلنا منهم

==================
الأخ سامودة

وإياك أخي العزيز

وتوني واصل البيت بعد عودتي من ابو عبدالله..وقرأت رسالتك فاتصلت عليه وأبلغته أن هناك أحد الإخوة
يحمل لقب (سامودة) تراه يسلم عليك فقال:

عليك وعليه السلام وسلم لي عليه بعد

ونقلت له كلامك ((ودي أشوف وشلون يناظرك ويتبسم ويعلمك انك مهوب بس انت اللي تدل))

قال :قل لسامودة ما شفت شي بعد ...

[مريقب العيفار]

الله يسعد ايامك اخوي راع الكحيلة

اسعدتنا بهالسوالف عن صاحبك طيب الذكر

[الضاري]

أجبرتني على العوده مره ثانية

جالس أضاحك روحي وأنا جالس قدام الشاشة

لو يمر من عندي أحد قال أنسفه الله يخلف علينا

الله يعطيك العافية ولاتنسانا من هالقصص الحلوه

أثناء سردك للقصه ضربت على وتر قوي وحساس عندي

وهو الراحة والهدوء والسكينة في البر عندما تطفئ الأنوار

يا... الله ... لحظات لايمكن أن توصف وانت عيونك محلاقات بين النجوم

تعرف النجمه الفلانية وترجع للنجمه الفلانية وتبحث عن نجمه ما طلعت يمكن تشوفة

وبالأخير ترجع للجدي وتنزل للارض

لكن لحظات فيها الكثير من الراحة والصفاء النفسي.... ( عاد فسر هذي ما أدري !!! )

المهم الله يعطيك العافية

[راع الكحيلة]

مريقب العيفار

يا مرحبا بك ...والله يجعل أيامك كلها سعيدة

===================
الضاري الله يعافيك

تقول عوّدت مرة ثانية

وأقول لك حياك الله هالمرّة و في كل مرة

[المربد]

زانت علومك يا بو طلال
ومثل ابو عبدالله المفروض انك ما تطلع الا وانت مار عليه ورابط حزامه بالمرتبه الامامية معك منها سعة صدر لك ومنها توفير وقت وجهد.

[راع الكحيلة]

المربد

حياك الله يا الحبيب

فكرة جميلة ولم تفت عن بالي ..ولكن المشكلة إنه سريع مسرى وبيسريني معه و لأني أعرف سوالفه فدائما مخليه لحاله ..

يبدأ بالتثيوب قدامنا ..خاصة عقب العشا.. ويجيب النعاس للموجودين
وخوفا من انه ينقدون عليه الربع إنه سرى مبكر يقول بصوت عالي

يا الله مشينا يا الربع..

بدري يا بو عبدالله :confused:

شنهو بدري ؟؟ حنا ورانا ناس تسأل عنا ... أجل مثلك ما وراك أحد يسأل عنك
أنا أصلا لا غبت سويعات يحوش العرب قلق نفسي

طبعا تلقى بعض الجالسين بعد كلام الدليلة قد أيده في المسرى إما حياء من أنه قد يكون أخرني أنا يا راع المحل وهذا غير صحيح لأني أصلا رتبت أموري وخرجت للبر لأبطي هناك أو إن هذا الجالس لقى العذر اللي يخليه يهج بدري مع ابو عبدالله

أقول له:

يا ابو عبدالله تراك أنت بالذات مرخوص لا بغيت تسري .. لأن ما عاد فيك طب
لكن لا تهجج الناس وتسريهم وهم مستانسين وودهم في الجلسة والليل توه في أوله.

يقول خلهم يخاووني في الدرب ...أحسن من إني أرجع لحالي ;) ...مع انه يوم جاء..جاء لحاله

الظاهر دليلتنا ما هو واثق حتى من طريق العودة :)

[خشم الحصان]

الاخ الغالي

ابو طلال
راعي الكحيله
السلام عليكم
اخيي والله مدري وش اقول الا انك ماجور ان شاء الله بس ياخيي ابنشدك هي ديرتكم حطين عليها شبك او عقم او حفره
الخوفه يوم يروح ولا يرده الا (اليوم له يومين مارد عليه)
هذا الله يحسن ماينفع معه ولا اقمار ناسا
البر مهيب مشكله لو ضاع تبي تلقاه بس الخوفه لاياه يقضب دركسون (طارة) طراد ثم رح يابو طلال لاهنا شعيب ولا رمل ولا زفلت الله يكرمكم
اخيي انا خابر ان فيه ناس تجمع طوابع او عمل قديمه او اثار لكن واحد هوايته مطارد وضيعان
عموم ياخيي الله يوسع صدرك بالعافيه
اخوك
خشم الحصان
...............

[غالي]

اما ابو عبدالله ههههههههههه
الله يستر عليك ياراعي الكحيله وعليه
ويوسع صدوركم بالعافيه

[دله وفنجال]

السلام عليكم...
راعي الكحيلة الله يوسع صدرك دنيا واخرة على السوالف الزينة انت وخويك ابو عبدالله وسيع الصدر ...
لاكن عنديلك اقتراح وراك ماتهدية قارمن وتخزن مواقعك المعتادة والي كثير ماتروحلة وتواعده فيها لجل انه مايضيع وتكسب فية اجر والهدية ماهيب ضايعه لاصارة لصديق عزيز...

[ريف النشاما]

لالالالالالالالا ...............هذا ما يصير يأبو طلال

هالحين طال عمرك على طاعة الله

من شروط الخوة ......... إنك ما تعلم على خويك لاصار دلخ....!!!!!!!! ولاّ رمّ ما يعرف يشتغل ولا اللي هوهو..........؟؟؟؟؟؟؟

وأنت مشاء الله ....... ماعاد هي بالديوانه ولا عند اليماعه :mad:

هذي على رؤوس الأشهاد ........................

تعلم بسوايا أبو عبد الله

أنا يابو عبد الله .............. أشوف والشوف شجر إنك تمسك الرجال (((بحق))) :j على رؤوس الأشهاد مثل ماهو سوا ........

هالحين أنا وش يعرفني فيك يابو عبد الله :confused:

ومع هذا أدري وش سويت وأنت بذيك الديار :no2:

لالالالالالالالالا

الحق وجب والهرفي حضب ماعنك وعنه يابو طلال ................................ :no:

وأنتبه يابو عبد الله تسمح له .............. خله يتربع فيه ,,,,,لاااااااااااااااا

ومندي مثل اللي أنت خابر يدعسه وسط الكيس :good:

( وحنا يابو عبد الله حبيناك وحنا ماشفناك .............و الحق لاتخليه )

فزعه من أقاصي نجد ........... شفت وشلون كل الناس دروا :eek:

لالالالالالالالالالالالالالالا

وبعد لو يصير قريب حول الحفر حول الخفجي ترا لي وجهه هاليومين :D ...... يعني نحضر

وإن ماجيت هينه....... أخوي متعين بالحفر وتوه مباشر على وزن مباشربرو
والرجال بس يدور المشاوير يعني يكفي عني ويبي ياكل حقي وحقه :cool:
هههههههههههه

وهذي قصيدة على لسانك فزعه مني لك :cool:

يالله الخيرة وش اللي صار ليه = كيف هذا ياعرب يجري وصاري
ماهقيته فيك ياجزل العطية = كيف تنشر ضيعتي وسط الصحاري
بي درى اللي ساكن ن جو أبرقيه = واليمن والشام والقاصي وجاري
وصرت أنا مشهور ياربعي كذيه = لكن الهرفي عليك اليوم حاري
حق مشروط ن ولا ينقص شويه = وفوقهن مندي متبل بالبهاري


وسلامتكم وسلامة السامعين

[راع الكحيلة]

الغالي جدا
خشم الحصان
يا مرحبا بهالطلة

تقول الله يغفر لك :
((هذا الله يحسن ماينفع معه ولا اقمار ناسا))

إلا هو أطلق من أقمار ناسا بنفسها ... ودليلة صحيح .. لكن بشوارع الديرة فقط
يعني ستريت بايلوت :)

أما البر ... لو الله يفكه من الاجتهاد بس :)

شاكر لك يا الغالي


=============

الغالي
الله يجزاك خير ويسعدك في دنياك والآخرة

============
دلة وفنجال

يا مرحبا بالحبيب وجزاك الله خير على الدعاء والله يسعد أيامك
اقتراحك على العين والراس ويستاهل أكثر من الجارمن

بس أخاف إني أجرح ثقته بنفسه .. كون انه يعتبر من أدلاء العرب المعدودين

[راع الكحيلة]

مرحبا بالغالي جدا أبو عزوز ..ريف النشامى

تقول الله يغفر لك:

((من شروط الخوة ..... إنك ما تعلم على خويك لاصار دلخ....!!!!!! ولاّ رمّ ما يعرف يشتغل ولا اللي ))

لا يا خوك ما هوب بدلخ ولا رم :)..هو شيخ المجلس وقبلته وملحه كله وما ذكرت من روايات على سبيل التندر على المواقف التي حصلت ونشرها بعلمه هو ..يعني ما خالفت الشروط ;)

ريف:
((الحق وجب والهرفي حضب ماعنك وعنه يابو طلال ....وأنتبه يابو عبد الله تسمح له ..... خله يتربع فيه ,,,,,لااااااااا))

يبشر بالحق لين يقول بس كفى بالله عليك فقد انبشمت :) .... هو .. واللي فزع له

ريف:
((( وحنا يابو عبد الله حبيناك وحنا ماشفناك .............و الحق لاتخليه )))

شفت يا بو عزيـّز لو أني ما كشفت عنه وما طوّفت بعض الشروط كان ما تعرفت عليه وحبيته انت والربع ..صدتك.


بعدين ما شاء الله على ريف النشامى ..مكمل الفزعة بأبيات بعد ...

يالله الخيرة وش اللي صار ليه = كيف هذا ياعرب يجري وصاري
ماهقيته فيك ياجزل العطية = كيف تنشر ضيعتي وسط الصحاري
بي درى اللي ساكن ن جو أبرقيه = واليمن والشام والقاصي وجاري
وصرت أنا مشهور ياربعي كذيه = لكن الهرفي عليك اليوم حاري
حق مشروط ن ولا ينقص شويه = وفوقهن مندي متبل بالبهاري


صح لسانك يا ريف أقصد أبو عبدالله .. بما انها على لسانه

طيب يا بو عبدالله خذ ها الرد على أبياتك بها الكليمات اللي كتبتها لأدافع فيها عن موقفي

عشر سنوّات(ن) وانا حالي هذيّة ****تظلم الدنيا وانا اطرد في البراري

طيب وشبلاك تهج بالليالي في البران هو انت مضيع حلالك؟؟

لا ني فاقد(ن) ذود(ن) ولا رعيّة****انشد طول ليلي محدن عنـْها داري

أجل رحال والا عاس والاّ...؟؟

ولا ني عساس(ن) يم الارض النديّة****ولا ني رحال(ن) مزاجه في المساري

أجل اسمح لي يمكن أنك سروق

ولا ني حواف(ن) ومخاوي حنشليّة*****خوة السرقان بالليل الغداري

أجل وشبلاك ؟؟
مـا ني إلا مبتلـى بضيعـة خـويـّـة***** اتبعه بالليل واقص الاثاري

طيب وليه يضيّع وشعذره؟؟

عذره انه يختصر دربه شويّة*****يعني اقطوع(ن) يعني في البيدا ضاري

لكن ريف يقول انك فضحت ضيعاته

ماحدن قد نشر ضيعات الجرهديّة****غير نفسه يوم يغرّز في المذاري


لكن تدرون يا الربع عاد


ابصم واختم من خاوى..ذا..واهنيـّه****بشّة حجاجه تمحي كلّ الكداري

دين ..خلق ..خفة دم ..كرم ..فزعة ..راعي مواجيب ...سعة صدر.


الله يحفظه ويبارك له في ذريته

[راع الكحيلة]

أبو عبدالله

أبطيت علي يا الغالي .. والطلعات البرية ناقصة جدا بدونك

الله يفرق بينا وبين ها الدورة الخارجية اللي خذتك مني كل ها الأشهر ... عساها تنتهي على خير

سبحان الله ...الإخوة الأحباب والأصدقاء كثير والحمدلله

ولكن

يبقى أن لكل انسان أخ يمتاز عن غيره بخصوصية ليس لها مثيل بين الباقي

يا ابو عبدالله ارجع ولك مني إني أحط محلي وين ما تبغي ووين ما تحب .. علشان لا تطاول المسافة

حتى لو تبغي إني أخلي الجيب والقارمن مبرمج وجاهز تحت أمرك قبل الطلعة بليلة وأنا أروح بتكسي للبر علشان ما تضـيّع كالعادة ... فما عندي مانع أبد.. أبد .


يا بو عبدالله كلنا فقدناك .... (من غير شر إن شاء الله)

الربع فقدوك

البر فقدك

الدبايات فقدتك

حتى الرمال فقدت احتضان عجلات سيارتك والتمسك بها ..لحين وصولي وانقاذك منها ...كالعادة

فقدك المندي ... اللي تطل عليه وقت إخراج الهرفي فقط

يا بو عبدالله

فقدتك المعاميل ..

فقدتك الجلسة اللي تحت سما ربي

فقدتك سفرة العشا.. الشغلة الوحيدة اللي تطـّير النعاس عنك

فقدنا ذيك السوالف والضحكات


يا ابو عبدالله

فقدك .....أخوك أبو طلال

[راع الكحيلة]

وبعد وانتهاء الدورة التدريبة الخارجية و استمتاعنا بوجوده معنا
قدر الله له أن يذهب قبل شهر إلى لندن لعلاج والدته شافاها الله

والحمدلله كانت تجري الأمور من حسن إلى أحسن وكان يخرج من سكنه إلى المستشفى عن طريق قطار الأنفاق واعتاد على الطريق ... لكن
الظاهر ضيعاته في البر لاحقته حتى وهو في لندن

استلمت منه فجأة هذه الرسالة :


يا ولد ضعت بالانفاق .. الله كريم

ثم استرسلت معه بالرسايل ..بسبب صعوبة وتقطّع الاتصال بيني وبينه

وش ضيعك ؟؟ ووين وصلت ؟؟

والله مدري إلتهيت وطفت المحطة وعلى وجهي .. اللي أعرفه صار لي أكثر من ساعة ونص وأنا ضايع

يا ولد ما تبي ذكاء .. انشد أي واحد قريب منك

ما يعطون وجه .. والطيب فيهم يقول رح اذلف شف الخريطة

: :) :) :)

قلت طيب حوّل من القطار المحطة الجاية ورح يم اللي يبيعون التذاكر وانشدهم

قال مقدر .. لي تجربة قاسية معهم .. وكرامتي ما تسمح
لأني أول ما طبيت ديرتهم جيت أشتري تذاكر وسألني راع التذاكر تبي اسبوعي والا شهري؟؟ قلت هاه .. وش الزين فيهم
عصب راع التذاكر و قال لي اطلع برا السرا .. رح فكر .. بعدين تعال .. طبعا كنت أبي أرد عليه لكن مشكلته إنه صتيمه ما ينطرح
شفت شلون التجربة قاسية ..

قلت والله إنه أقدى فيك ذا السنافي

قال : أبو طلال والله إن شكلي صار مشبوه في الأنفاق مغير رايح جاي تقول ناوي لي نية ..
مير تشوّفوني على البي البي سي الليلة وهم ملقين القبض علي ومكلبشيني

وترا إن امسكوني أبعترف بسرعة باللي يبونه وأول أسم أبذكره هو أسمك يا بوطلال

:) :) :) الله يقطع ابليسه

وبعد عناء طويل قدر يوصل لسكنه .. بس مدري شلون

وأكيد بيقول أصلا أنا متعمد أشوف أنفاقهم وأدور طرق مختصرة جديدة مثل ما كان يقول عن ضيعاته في البر


الله يستر عليه ويردهم سالمين .

[قناص الهمله]

الله يعطيك العافيه

[ضفنان]

ابو طلال الله يعطيك العافيه على هالسوالف الزينه وهذي والله الخوه والرفقه اللي ما تنشرا بالدراهم خوتك مع ابو عبدالله وهذا والله الرجال اللي ينفقد اللي فيه الصفات اللي ذكرتها انت اما دجاته في البر وضيعاته واعذاره شىء ثاني الظاهر انها هي اللي خلتك تتمسك في ابو عبدالله لان مواقفه لا تنسى وانتم ماخذينها فرصه للتعليق عليه :D:D:D مااقول الا الله يصبرك على دجاته الداخليه والخارجيه والله يصبره بعد على تعليقاتكم والله يجمع قلوبكم على المحبه دائما ولا يفرقكم بشر ...
واسأل الله ان يشفي والدة ابو عبدالله ويرجعها واياه سالمين بإذن الله ويبدأ مسلسل الضيعات البريه من جديد :):):) ...

تقبل مروري وسلمني على ابو عبدالله ،،،

[t3ebt]

العنوان بالاساس يضحك شلون عاد سوالفك مع خويك

خوي مثل هذا ونيس

[راع الكحيلة]

الله يعطيك العافيه

الله يعافيك يا الغالي

[راع الكحيلة]

ابو طلال الله يعطيك العافيه على هالسوالف الزينه وهذي والله الخوه والرفقه اللي ما تنشرا بالدراهم خوتك مع ابو عبدالله وهذا والله الرجال اللي ينفقد اللي فيه الصفات اللي ذكرتها انت اما دجاته في البر وضيعاته واعذاره شىء ثاني الظاهر انها هي اللي خلتك تتمسك في ابو عبدالله لان مواقفه لا تنسى وانتم ماخذينها فرصه للتعليق عليه :D:D:D مااقول الا الله يصبرك على دجاته الداخليه والخارجيه والله يصبره بعد على تعليقاتكم والله يجمع قلوبكم على المحبه دائما ولا يفرقكم بشر ...
واسأل الله ان يشفي والدة ابو عبدالله ويرجعها واياه سالمين بإذن الله ويبدأ مسلسل الضيعات البريه من جديد :):):) ...


تقبل مروري وسلمني على ابو عبدالله ،،،


بارك الله فيك وجزاك الله خير

وقد أخبرته بردك السابق وسلامك فأرسل لي رسالة يرد عليك فيها ويقول :

بلغه تحياتي وقل له صار دليلة في لندن :) :)