هل السرعة العالية تضر بالمكينة ؟

[أَبوابراهيم]

السلام عليكم

ابقاكم ربي بكل خير وصحة وعافية

معي سيارتي فورتشنر 4 سرندل "مكينة هايلكس وبرادو"
تفصل على 160 وانا احيانا اذا مسكت خطوط امشي 160

حبيت استفسر عن اضرار السرعة العالية للمكينة بشكل عام هل هي تضر ؟


الله يكفينا وياكم شر السرعة :)

[التمسساح]

كل شي اذا زاد عن حده انقلب ضده

[ع ــقــاب]

اخوي قبل ما تسأل عن اضرار السرعة على المكينة المفروض تكون حريص على سلامتك اكثر من سلامة المكينة والسرعة العالية مافيها خير واكيد لها اضرار على المكينة وانت لو تلاحظ عداد الضغط بتلاقي في نهايته جزء أحمر واذا وصل العداد للجزء الاحمر فهذا يعني خطر لان المكينة تكون في اقصى طاقة لها , تخيل انت لو يخلونك تركض في اقصى سرعة لك لمدة ساعتين اكيد مابتقدر وببتعب بسرعة وبتجلس يومين مريض ترى المكينة مثل :D ,, اتمنى لي ولك وللجميع السلامة والتوفيق

[بدوي جنوبي]

السرعه العاليه تقلل من عمر المحرك
من خلال ألأحتكاك بين أجزاء المحرك لكن على المدى الطويل

[صاروخ الغطغط]

السرعة منها ضرر سف سيارات الشيبان لايسرعون ومحافضين عليها كم تقعد معهم سنين مكينه وبدي وشف الموديل الي بعدها موديلات حديثه وتوضيب والموترجديد كله بسبب السرعه والخط الطويل

[مخ سعودي]

والله يالغالي تختلف من سيارة الى سيارة
بعض السيارة ٨ سلندر مثل الامريكي وتمشي ١٨٠ والضغط على ٢ ونص يعني المكينة مرتاحه
وبعض السيارات تمشي ١٦٠ الضغط على الاخر فكل سيارة تختلف عن الثانية
غير كذا وانا اخوك
خلك حريص اكثر على نفسك مو على سيارتك لان السيارة تتعوض

[ملك الفكتوريا]

صحيح كلام اخونا مخ سعودي


السيارات الامريكيه الثمانية سلندر مثل الفكتوريا والكابريس والجمس تمشي 180 لضغط يكون 2800 دورة تقريبا

يعني الضغط ما وصل لثلاثة وتعتبر مرتاحه مقارنة مع الكراتين كامري النترا اكسنت


يمشي 180 يكون الضغط لا يقل عن 4


لكن حتى لو الضغط 1ونص وتمشي مثلا 800 كيلوا متواصله ينقص من عمر المكينه


لكن اذا الزيت وفلتر الهواء والامور هذي دايم تغيرها لا تخاف

[تمنيتك لي]

أي أكيد لهآ أضرآر لكن على المممدى البعيد

[تيرنيدو]

السرعه تظر السيارات التماتيك اكثر
اكثر خرابات القيرات التماتيك سببها السرعه الزايدة
لان قوة ضغط المحرك على التروس يعني تاكل التروس وانعدام القير مباشره هذا غير الضرر الاكيد على المكينه
كلما كانت السرعه معقوله كانت افضل

وبعدين باظيف شغله
عندما تمشي بسرعه 200 من الرياض للشرقيه ويمشي شخص اخر بسرعه 160 فالفارق هو 18 دقيقه
يعني الوصول بينكم قريب جدا

تحياتي

[آخر العنقود]

هلا اخوي السرعه ما تضر الموتر ولو انها تضر ما حطو سرعة السيارات 200 او 220 او 240 او 260
واهم شي احرص علي زيت المكينه والسوايل.

[مدور طريق]

بالعكس السرعة تقوي عزم السيارة وتصفيه من الكربون :good2:
بس احرص على الكفرات
والياباني معليه خوف .. الخوف من ساهر :D

اترك عنك انتاج العم سام ترا موراهم الا الدجه.. واذا وصلك زين للديره الي تبغاها :D
قال ايش قال ضغطها مرتاح ....خخخخ

[مخ سعودي]

بالعكس السرعة تقوي عزم السيارة وتصفيه من الكربون :good2:
بس احرص على الكفرات
والياباني معليه خوف .. الخوف من ساهر :D

اترك عنك انتاج العم سام ترا موراهم الا الدجه.. واذا وصلك زين للديره الي تبغاها :D
قال ايش قال ضغطها مرتاح ....خخخخ


ههههههههههههههه
لبى قلبك يالياباني متى عرفناه يالغالي
ماعرفنا اليباني الا بعد الجمس والدوج . وكان شيبانا ماياخذون الا الدوج والجمس والقصايد كثيره

[أَبوابراهيم]

بيض الله وجيهكم جميعا .. وماقصرتو

الخلاصة ان السرعة تضر المكينة بتعرضها داخليا للاحتكاك والتآكل على المدى البعيد

اشكر جميع من اسدا لي النصيحة وكتب الله لهم التوفيق والمثوبة وحفظكم من كل شر