جي اكس ار - مطفيه مافيه الا العافيه وجيت اشغله وخامد والدركسون ما يتحرك

[سحاب نجد راعي شقراء]

السلام عليكم ورحمه الله وبركاته

اخواني ابي فزعتكم لاندكروزر جي اكس ار مافيه الا العافيه طلعت للبر ووقفت وطفيت السياره

ويوم جيت اشفلها ماطاعت تدق سلف والدركسون مايتحرك لايمين ولا يسار

وش يمكن يصير منه ونا في البر هلحين يعني لا تبطون في الرد علي الله يجزاكم خير

[وحيد الدرب]

تأكد من اصابع البطارية يمكن مرتخية

[vxr 1998]

وضح اكثر يعني موديله وهل هو قير اوتوماتيك وهل الانوار الي بالطبلون شغاله علشان يفيدونك الاخوان ومن ناحيتي كانك ببريده ابشر بسعدك هالحين اجي واساعدك

[ابونواف سعد]

القير تماتيك او عادي ؟؟؟إذا تماتيك احيانا لازم تعيد القير للبي كم مره لانه يفصل الكهرب عن السلف

[سحاب نجد راعي شقراء]

هلا اخوي وحيد الدرب

الاصابيع ماسكه زين في البطاريه يالغالي

[الصمان 2]

اذا كان الموتر يبي اشتراك أو سحب ابشر يالغالي


حدد مكانك





.

[الوسمي44]

ان كانه موديل ٢٠٠٨ وفوق تأكد من بطارية الريموت ولا فك الريموت وقربة من زرstart وراح يشتغل بإذن الله

[سحاب نجد راعي شقراء]

موديله 2003

قير تماتيك

الله يجعله في موازين حسناتكم

[ابوسند9]

اخوي سحاب
هل الانوار تشتغل والبوري وغيره؟ وضح
واللى يدق سلف وما يشتغل؟

[سحاب نجد راعي شقراء]

وضح اكثر يعني موديله وهل هو قير اوتوماتيك وهل الانوار الي بالطبلون شغاله علشان يفيدونك الاخوان ومن ناحيتي كانك ببريده ابشر بسعدك هالحين اجي واساعدك


بيض الله وجهك يالغالي

انا منيب في القصيم يالغالي يلوموني فيكم يهل القصيم عزالله انكم رجال من اصلاب رجال عليهم الكلام

الله لا يحرمنا منكم يهل القصيم

[سحاب نجد راعي شقراء]

اذا كان الموتر يبي اشتراك أو سحب ابشر يالغالي


حدد مكانك





.


ياجعل والديك للجنه بيض الله وجهك يالغالي ماتقصر جعل الشر يقصر عنك

[سحاب نجد راعي شقراء]

اخوي سحاب
هل الانوار تشتغل والبوري وغيره؟ وضح
واللى يدق سلف وما يشتغل؟



ابد يالغالي خامد مره والدركسون لاف شوي يوم اوقفه وهلحين صلب لا يمين ولا يسار

[ابوسند9]

يعني افهم منك ان الكهرباء ما توصل ابداا!
اذا كان كذالك فا شيك مضبوط على اصابع البطاريه
وسلك السالب الخارج من البطاريه و ركب بالبدي فربما يحتاج شد
وكذالك سلك الموجب الخارج للسلف من البطاريه
وهل البطاريه عندك الكترونيه؟

[ابوسند9]

ايش تقصد في ان الدركسون صلب ؟ يعني المفتاح ما يلف معاك؟

[سحاب نجد راعي شقراء]

يعني افهم منك ان الكهرباء ما توصل ابداا!
اذا كان كذالك فا شيك مضبوط على اصابع البطاريه
وسلك السالب الخارج من البطاريه و ركب بالبدي فربما يحتاج شد
وكذالك سلك الموجب الخارج للسلف من البطاريه
وهل البطاريه عندك الكترونيه؟



شيكت ما شفت شي كلش سليم والبطاريه اكترونيه يالغالي

[عاشق الشعبيات]

ياخوي اتصل على جوالي عشان اتفاهم معك

[ابوسند9]

اذا البطاريه الكترونيه فا اتوقع المشكله منها فجئه تبطل عكس التعبئه

[ابولولو]

انا صار معى مثلك رحت للبر ووقفت الموتر مافيه اى شى يوم جيت اخر الليل اسري عيا يشتغل مره


طقيت السلف وحركت القير تماتيك اشتغل بعد نصف ساعه من المحاولات ماادرى القير كان معلق او غيرمتغير شوى او من السلف يوم طقيته من تحت بمفك العجل السالفه له سنه والا الحين مانب مصدق يوم اقول المكان مسكون جن بسم الله :D

[سحاب نجد راعي شقراء]

ايش تقصد في ان الدركسون صلب ؟ يعني المفتاح ما يلف معاك؟



هلا بالغالي المفتاح يلف الى الاخربس تحس وهو يلف انه خفيف والدركسون على قفلته ما فتح والانوار تولع والبوري يظرب بس المفتاح الا لف مايولع في الطبلون ولا لمبه ومن ضمنهم الدركسون قافل

يمكن يكون السوتش يبي تغيير

[abo aryam]

حاول تحرك الدركسيون يمين ويسار يمكن قافل ( لانه فيه تأمين ) وحرك القير ورجعه لل P

[kshtat999]

يعني المفتاح يدور بوش؟
اكيد كان خربان من اول واهملته وتفلت مره وحده مالك الا تغيره

[ls1.5700]

صارت معنا بجيب ربع 2003 نفس المشكله الحاصله معك وحسنا بالموتر ونثرنا الظفيره
وكل شي سويناه 00 واخر شي جانا واحد خبره حاصله معه من قبل
المهم نظف دكمة السوتش من التراب والاوساخ وهي راكبه في محله
ونظف السوتش نفسه ودق سلف وشتغل الموتر
حاول تجرب نفس الطريقه لاعله تفيدك

[سحاب نجد راعي شقراء]

بيض الله وجيهكم كلكم يا الغالين ون شاء الله ابا اجيب واحد ينضف دقمه السلف ولعله يشتغل ان شاء الله

ولكم مني حبه على خشومكم كلكم ياالغالين وتستاهلون

ولا صلحته ان شاء الله ابا اعلمكم وش كان السبب

[سحاب نجد راعي شقراء]

يا الغالين تدرون وش صار منه العطال طلع من السويتش شفتو الا دخلتو المفتاح تبي تشغلون السياره

الي يدخل فيه المفتاح وتفره منكسر كسر

ورحت للوكاله وصارمهوب عندهم وسوولي طلبيه وقيمته 730 بعد الخصم

وسلامه قلوبكم يالغالين -

وشكركم مره ثانيه على فزعتكم كلكم الله لا يحرمنا من الرجال الطيبين الي هم انتم


وفي حفض الرحمن الرحيم

[ls1.5700]

بشرك الله بالخير والحمدلله انها زانت
والله اني شاك بادقمه وقلت لك نظفها بس ماتوقعت انها منكسره
المهم لاتركب الا اصلي والله يوفقك ويجزاك الله الف خير على الدعوات الطيبه