صوت بالخلف ونه خفيف

[ابوتركي5555]

السلام عليكم ورحمة الله وبركاته
عندي صوت ونه خفيف تبدأ من سرعه عشره ولاهي قويه تحس انها مع الكفرات تطلع الونه وكل ما اسرع تزود شوي وماخليت محل الا ويعطيني شكل محل يقول بيرنق ومحل يقول كرونه ومحل يقول ترس الكرونه واحترت بينهم طبعاً الموتر اف جي والموقع الشرقيه اذا تعرفون المشكله او تدلوني ع ورشه جيده لاهنتم

[ابوتركي5555]

وين اصحاب الاف جي

[منتهاها]

وعليكم السلام ورحمة الله وبركاته

خذ النصيحة من قلب محروق ومن القلب للقلب عسى الله لا يحرق قلبك

اذا بتفتح الدفرنش انسى الهدوء

الكويت قريبة .. سكراب امغره

غير الدفرنش كامل .. وريح بالك و وفر مالك


انا الى الان حايس مع موتري وطرحت موضوع والى يومك ما لقيت حل على هذا الرابط موضوعي
http://www.mekshat.com/vb/showthread.php?t=550048

خراب يجر خراب .. حرق اعصاب واموال تهدر في سبيل الحصول على راحة البال

وانسى الصوت لين تكبر العله دامه ماشي ومقبول واذا كبرت .. دق سلف لسكراب امغره بالكويت
وترى فيه موديلات حديثة واسعار مناسبة جدا جدا

الله يسهل امرك

[Hummer-H2]

أنا كان عندي مثلك ونويت افك الدفرنس بس قلت قبلها خلني أبدل كفراتي بكفرات واحد من الشباب

وأعطيت بنشري 50 ريال ورحت له أنا وواحد من اخوياي معه نفس حجم الكفرات والجنط والحمد لله راح الصوت

فشوف لك موتر بنفس حجم الجنوط والكفرات وفكها من عنده وجربها

ابدأ بالأسهل

[Suliman-]

والله يابو تركي قد مر علينا موتر اف جي فيه ونه

عند السرعه ثمانين او ميه
ومافيه مكان مارحنا له

ودخلنا على واحد يقاله الصمعاني بالقصيم
ومن شرحنا له قال بغير رمان العكس جب القطع
واذا ماضبط اعطيك حقك

فعلاً الموتر تمام وتكلفة الرمان 400. ريال

بس مادري اذا مشكلتك نفسها ولالا

[ابوتركي5555]

يعطيكم العافيه ع الردود وبالنسبه للكفرات بدلهااا مع خويي والصوت موجود
الونه خفيف وكل ورشه يصرحلك مره يقولون رمان ومره كرونه واحترت واذا طلعة كرونه بروح اركب دفرنس من امغره