هل غرزت أكثر من مرة؟

[يالبى الهلا]

نعم غرزت أكثر من مرة وتعلمت في البر وعلى شاطىء البحر وأسوأ شيء كان الشاطىء:


أن لا تجزع أبدا تنزل من السيارة وتفكر بهدوء فالخوف والجزع سبب كل المشاكل.
تأكد أنه معك جهاز اتصال وعندك أرقام الطوارىء.
إياك أن تقف فجأه فهذا يحفر في الرمل.
ضع السيارة على الغيار الثاني أو الثالث وامشي بسرعه أكبر على الرمل الناعم.
حرك دواسة البنزين بشكل متقطع يعني اضغط خفيف ثم أعلى قليلا خفيف ثم أعلى قليلا وهكذا.
قبل لا أدخل مناطق الغرز الخفيفه أشغل الدفع الرباعي.
ضع بعض الماء في السيارة دائما للطوارىء لا قدر الله.
خذ معك ماطور هواء للنفخ وجاروف للحفر.
إذا أنت راعي بر خلي معاك دائما لوحين حديد محفر قياس 30 في 100 سم ضعه تحت الكفرات المنغرزة وتوكل على الله.
أنتبه للمبة حرارة زيت الجير ( مهم جدا جدا)
إذا الغرز قوي نسم الكفرات (الإطارات) حتى ضغط 15 أو حتى 10 بس لازم يكون معك ماطور هواء.
انتيه مهم جدا لا تحط يدك تحت الكفرات أو الإطارات وأنت تحفر وإلا علقت يدك تحتها.
مهم جدا لا تدوس بنزين بقوة وإلا غرزت أكثر وحفرت أكثر ولكن جرب أولا تحريك السيارة والتركشن مشبوك ولكن بسرعه منخفضة جدا.
إذا لم ينفع التركشن إفصله وحرك ببطء شديد أماما ورجوعا.
إذا نزلت السياره أكثر بالرمل استعمل الجاك أو رافعه وضع حجارة أو خشب عريضه تحته لترفع السيارة ثم انظر أي من الكفرات أو الإطارات يدور وضع تحتها حجارة أو خشب أو أي شيء لأنه إذا تحرك كفر أو إطار فإن الآخر يتوقف لذلك احرص على ايقاف المتحرك بوضع الرمال أو أي شيء تحته أو اجعل شخص يقف ويحرك بجسمه حتى تلامس الكفرات المتحركة الأرض.
استعمل الغيار المنخفض ولكن انتبه لحرارة زيت الجير.
حاول استعمال حبل القلص !ذا أمكن.
ركب ونش إذا أمكن.
استعمل بالون لرفع السيارة ثم ادفن تحت الكفرات أو ضع حجارة تحتها ولكن انتبه ليديك.

اللهم احفظنا

[SGL]

بيض الله وجهك يالبى الهلا اذكر مره غرزت بونيت غماره الظهر بعز الصيف والمنطقه ماحولك احد حولت اطلعه اللين صدامه وصل الارض ومافي حولي لاخشب ولاحجر تدري طلعتها بأيش بزوليه كانت معي بصندوق هذا بعد ماحيلي طاح احفر وناقز من بعدها سارت علاقت حب بيني وبين هذيك الزوليه

[سعد العقص]

صراحه الطلعه الي بلا تغريز مالها داعي

[يالبى الهلا]

صراحه الطلعه الي بلا تغريز مالها داعي


فعلا الطلعه لاتحلو الابالتغريس ابدا البسملة و الصلاة على النبي مثل ما نعرف انه اهم شي بالرمل هو التنسيم حتى انه اهم من الدبل واي شي تتوقعه ولا تقول لي نزلت الهواء لـ30 او 20 , اقل شي 18 الى 10.بس حاول ان تاخذ احتياطك ولا تنزعج او تدوس للموتر بقوه فينزل اكثر وبدال ماتطلع تحفر حاول ببطء امام وريوس وهز الموتر بالدعسه البنزين مهما كان التغريزه لا تدعس للموتر الااخذ الموتر عزم وتحس انه با يتحرك ادددددعسسسسسسسسس والله الحافظ

[يالبى الهلا]

بيض الله وجهك يالبى الهلا اذكر مره غرزت بونيت غماره الظهر بعز الصيف والمنطقه ماحولك احد حولت اطلعه اللين صدامه وصل الارض ومافي حولي لاخشب ولاحجر تدري طلعتها بأيش بزوليه كانت معي بصندوق هذا بعد ماحيلي طاح احفر وناقز من بعدها سارت علاقت حب بيني وبين هذيك الزوليه


تنزيل الهواء بين 15 و 20 فاذا لم تنزل الكفرات الى هذا الحد فالتغريزه لا محاله ولان ينفعك 100 دبل

فصل التركشن حيث ان من المعروف ان الرمال ناعمه وعندما نسرع فيها فان نظام الكمبيوتر يعطي امر للكفرات لضرب فرامل حيث انه يعتقد ان السياره في وضع غير طبيعي

تعشيق الدبل الخفيف وليس الثقيل واستعمال الغيار اليدوي

في حالة الغراز لا سمح الله يرجا الانتباه الى ما يلي

اولا التجربه بالدبل الصغير وجعل السياره تتارجح الى الامام والخلف وعدم الزر عليها حتى لا يعلق اسفل السياره بالرمل وتدور الكفرات في الهواء ففي هذه الحاله لان تخرج حتى في الدبل الكبير

ثانيا في حالة عدم خروج السياره بالدبل الصغير نعشق الدبل الكبير ويجب قبل ذلك ازاحة التراب من امام الكفرات الامامية والخلفية ووضع اي حجار تحت الكفر وايضا نفس الكلام ارجحة السياره الى الامام والخلف والحرص على عدم تعليق السياره وفي حالة وجود عائلة او اشخاص في السياره الافضل ان ينزلوا منها

في حالة تعليق السياره والكفرات تدور في الهواء يجب علينا اولا ازاحة التراب من الامام والخالف ومن تحت السياره ومحاولة رفع السياره بالعفريته مع الحذر الا تقع السياره ووضع حجار او اشجار تحت الكفرات وانصح الاخوان كثيري التردد على البر اخذ بالون يوضع تحت السياره وينفخ عن طريق العادم وهذه الطريقه ممتازه في تعليق السياره وانصح بانزال هواء الكفرات الى 10 وان شالله تطلع السياره

تجنب السير بالسياره والكفرات منزل الهواء اقل من 15 وخصوصا على الحجار والجبال عدم ضرب فرامل وخصوصا في الطعس بطريقه مفاجئة حيث انه يسبب تعليق السياره

اتمنا للجميع التوفيق

[sgl2002]

الحمد لله على كثر ما اطلع البر وخصوصا النفود ماقد غرزت الا مرتين بحياتي

وحدة بالطين وتعرفون الطين ماينفع الا سحب

ومره تعلقت براس سيف قوي على جنب والموتر ماعاد اقدرت الف فيه لايمين ولا يسار


تعلمت :

لاتوقف بمكان به تغريز ولاتوقف بالنفود بمنحدر على جنب ولا تدعس للموتر بقوة اذا غرز

[هلبان]

مشكور اخوي على المعلومات القيمه
وبيض الله وجهك

[أب رحي]

السلام عليكم ورحمة الله وبركاته


أشكرك ياأخي العزيز على هذه المعلومات المهمه والمفيده....
الصراحه أنا أستفت منها....
جزاك الله خير....

تقبل مروري.

[صقر الكرادشة]

نصائح مهمة ومفيدة ومشكور اخوي

[ls1.5700]

الله يعطيك الصحه والعافيه اخوي يالبى الهيلا
فيه نقطه ماحبيتها منك اللي هي النقطه هذي اختلاف معك فيها
استعمل الغيار المنخفض ولكن انتبه لحرارة زيت الجير.
المفروض لاسمح الله غرزت وتغريزه جامده
اولاً تعشق الثقيل وتحاول فيه ولا تحاول بالدبل الخفيف قد تحترق الكلتشات اذا الموتر تماتيك واذا عايدي يحترك الدسك والصحن

ثانياً تحاول في نمره رقم واحد 1
ولا تحاول في نمر اقل من 1
واذ كان تماتيك تسعمل اثقل غيار موجود في موترك
واذا كان تبترونك استعمل رقم واحد 1 فقط
وفيه نقطه احب اضيفها لموضوعك المفيد
اللي هي
اذا كان الكفر متعلق يعني يدور بوش لاتحفر له ابد بالعكس ادفن عليه تراب
احفر للكفر الواقف عن الدوارن
يعني مو مره تنزل السياره على الارض وبعدها يمسك بطنها التراب ولا ينفع فيها غير السحب
ملاحظه / حاول بقدر الامكان لايدور الكفر لاتدوس بانزين كثير حبه حبه
في أمان الله

[أبو سيف]

الله يعطيك العافية

فعلا موضوع مهم الصراحة والتفاعل كان اهم ما شاء الله

تقبل مروري

[الحيسوني-]

ما قصروا الاخوان بس حبيت اكتب معلومه استنتجتها بعد ما تعلقت بس ماهو برمل
تعلقت على ارض صلبه وصار الكفر اليي يسار يدور بالهواء ( يدور بوش ) والكفر الـيمين ببطن الرفرف السيارة ددسن سبب التعليقة اني مسوي ابحافظ على السيارة وكنت مهدي مره معشق بواحد وضاغط على الكلتش
المهم استفدت




١) انك اذا سحبت الجلنط الكفر اللي يدور بوش يوقف ويبداء الثاني بتحريك السيارة
٢) اصمل على السيارة ولا ترحمها زياده عن اللازم بس انتبه لا تتهور

[أبو سيف]

ما قصروا الاخوان بس حبيت اكتب معلومه استنتجتها بعد ما تعلقت بس ماهو برمل
تعلقت على ارض صلبه وصار الكفر اليي يسار يدور بالهواء ( يدور بوش ) والكفر الـيمين ببطن الرفرف السيارة ددسن سبب التعليقة اني مسوي ابحافظ على السيارة وكنت مهدي مره معشق بواحد وضاغط على الكلتش
المهم استفدت




1) انك اذا سحبت الجلنط الكفر اللي يدور بوش يوقف ويبداء الثاني بتحريك السيارة
2) اصمل على السيارة ولا ترحمها زياده عن اللازم بس انتبه لا تتهور


معلومة ممتازة جداً. بس يا ليتك توضحها زين من ناحية. متى اكون ساحب الجلنط وانا متعلق؟؟

والله لا يهينك