محتاج راي اهل الخبره بأستفسار بسيط ..

[هزيمي]

السلام عليكم ورحمة الله وبركاته

كيف حالكم عساكم طيبين يارب
طبعاَ هذي اول مشاركه لي فالمنتدى وماراح تكون اخر مشاركه بـ اذن الله

وحبيت اخذ رايكم واستفسار بنفس الوقت ،

انا كانت عندي برتا ، ام 5 وصارت ظروف وبعتها ..

والحين انا معروض لي ثلاث شوازل وللأمانه انا سمعت عنهم الزين والشين

وبنفس الوقت جربتهم ، لكن انا ابي اعرف وش السلبيـات وش الأيجابيات لـ الشوازل ؟

الثلاث المعروضه علي ووش الي يدوم اطول ، ويتحمل قرامات ورميه حار ومميُز عن المعروض لي من هالثلاث

1 - الفرسان ستوقر

2 - ام بطه

3 - بيكال

إتمنى من الشباب يفيدوني ، بـ الشي الحلو الي مايتعب وخرباته بسيطه

لاني انا اول اشتريت شوزل إسمها بدروس او بدرويس تركيه وعلتني

إتمنى اني ماطولت بموضوعي المتواضع وكنت خفيف ظل بـ استفساري

(:heart: )

اخوكم ، محمد الهزيُمي ..

[ابو سمسم]

البيكال تتحمل الكرف عيبها الثقل وكثره التنظيف

الاستوقر وام بطه مثل بعض خفيفه ورميها ممتاز ولكن تعتبر الدرجه الثانيه بعد البيكال

[S3llo]

خذ البيكال ما يبيلها سؤال
الام بطه هذاها معي كل شوي طالع فيها خراب والستوقر ما ادري عنها بس من ناحية الكرف وتحمل الضغوط خذ الروسيه وركب لها تشوك 690 وان شاء الله راح تعجبك

[albikal]

خذ ام بطه خفيفة وتنظيمها زين وسوقها احسن من البيكال
وارخص من الجميع وتودي نفس الغرض

[أبوصالح9]

بيكال + تشوك 680 امريكي

واي سلاح يحتاج تنظيف وعناية حتى النبيطة

اللهم هل بلغت ؟ اللهم اشهد

وفالك الدسم

[ابو سعد2]

اخوي بالنسبه للروسيه بندق عمليه وجباره وحقت كرف لكن لك عليها في الرمي حتى بتشك 690 يعتبر رميها متوسط ولا يبرد الكبد وتزم فوق كذا

اما التركيه ماهي حقت كرف ولا تضمنها وعمرها يعتبر قصير لكن في الرمي تطربك وتبرد كبدك ورميها يعتبر ممتاز
هاذي وجهة نظري قد تكون صح وقد تكون خطا
اتمنى أني افدتك

[الشمروخي]

بيكال + تشوك 680 امريكي

واي سلاح يحتاج تنظيف وعناية حتى النبيطة

اللهم هل بلغت ؟ اللهم اشهد

وفالك الدسم

كلام كليم اسمع الشور السديد بيكال وينك والتركيات ابعد نصيحه
والنصيحه الافضل ارجع لبرتاك افضل منهن كلهن

[ابو سفيان]

خذ ستوقر موديل ٢٠٠٠ نضماها مثل نضام السوبر بانلي يخوي البيكال غاليه ويبيلك تشتري تشكات ويبيلك ويبيلك خذ ستوقر قسم بالله لتطربك انا محدثك اتلكها ولم اواجه غير مشكله وحده الي هي النفل وبعدها سارت سااااالكه بعد ما شديت صامولة الحاضن ولا ترمي اكثر من ضغط ٤٠ بها وخفيفه وحاره
موفق باذن الله

[قناص الأشهب]

بالنسبة للخيارات اللي ذكرت
أذا تبي ترمي ضغوط أكثر من 50 فعليك بالروسية بتشك 690 أو 680 ترولك
وذا تبي التنضيم الممتاز خذلك الأستوقر ولكن لاتتعدى ضغط 40 مع ان في ناس رمت فيها الى ضغط 50 ولكن بتقلل من عمرها

[صقار محترف]

ياخوك اذا تبي نصيحتي خذ البيكال ولا تتردد
وركب عليها تشك 690 الاصلي
رمي ممتاز وبندق تتحمل الرمي والكرف والمكده وسالمه من العيواب المصنعيه
العيب الوحيد ان مكينتها ثقيله شوي اذا جيت تفلكها فقط لاغير
وبالتوفيق

[ابوعرباء]

اخوي البيكال افضل وتشك ترولك 680

[هزيمي]

الله لأيهينكم جميع ، بس يقولون ان البيكال ضربها ماش والضرب عند الستوقر ..

وبيني وبينكم ياشباب انا مدري كم اسعارهم للامانه الي اذكره اشتريت برتا من 4 سنوات

جديده ب 5 والحين يقولون توصل 16 ؟؟؟؟؟؟؟؟ بس اتمنى الرد على هالسؤ البسيط ..

واذا فيه احد عنده ستوقر قريب للحفر برسلي رساله بالخاص ..

[هزيمي]

وينكم يالربع ،

[براء محمد]

يا اخوي انا معي استوقر 2000 اخذتها جديده قبل اربع شهور ماشاء الله البندق تتطربك في الرمي وخفيفه والضغوط الى ضغط 40 انصح بها لكن غيره ماجربت والله يرزك بالخير

[صياد الليل]

ما يبغيلها من كل النواحي البيكال افضل شي في اللي ذكرت
ونصيحه مني:
ابعد عن اي سلاح صناعه تركيه

وبالتوفيق أن شاء الله

[هزيمي]

ماقصرتو جميع ، لكن يالربع ابي كم اسعارها بالحفر ..

[web]

السلام عليكم

انا والله ماعرف عن البنادق المعروضه شئ سوى البيكال

لها كم سنه معي ممتازه جداً وعمليه وصبوووور يمكن تنقدون على ماقد نضفتها ابد كل موسم اخذها واذا نتها الموسم بجربها والدولاب
بس لاتستخدم التشكات الي معها ترفع الضغط وماتجملك
خذ معها تشوك ترولوك ٦٩٠ او الثاني ٦٨٠ وتبي تطربك ان شاء الله
اما خرابات ماقد شفت منها شي ابد والحمد الله