يا أهل الفتك وش الحل مع الحرارة .....!!!

[جار طمية]

السلام ورحمة الله وبركاته .. أسعد الله أوقاتكم بالمسرات .. وبعد
لدي اشكال مع الباترول 2002 فتك بارتفاع الحرارة فوق الربع بشوي ،
حتى في عز البرد ترتفع فوق الربع ، وديتها ميكانيكي وقال عندك توماتيك المروحة
رحت وشريته ب600 وكالة ، وغيرت البلف وكالة ، وبعد ما شغلت الموتر رجعت نفس المشكلة
. بالمناسبة اذا فتحت الاديتر والسيارة شغالة يطلع الماء بقووة للخارج ويفور ..!!
أتمنى منكم مساعدة أخوكم .. جزاكم الله خير الجزاء

[SGL]

كيف الرديتر عندك وطرنبة المويه

[مدهوش]

راس مكينه والله اعلم والفتك يتهدد على الراس دايم كذا او اقصد (غالبآ) عموما خذها من اخوك نصيحه قبل الخساير ووجع الراس شف لك ميكانيكي جيد ومعروف وقف الموتر عنده وقله اكشف لي على الراس بالمخرطة واذا طلع فيه طعج خلهم يمسحونه خفيف وتوكل على الله مع تركيب وجه راس جديد

[مدهوش]

تعقيب على مشاركتي اذا الحرارة ترتفع فوق خط الربع بشعره بسيطه فهذا عادي حسب معلوماتي والربع فتكاتهم واجد واغلبهم كذا اما اذا فيه مويه تطلع والموتر ينفخ ولياته تحجر معناتها راس والله اعلم

[جار طمية]

الموتر توي شاريه ونظيف ماشاء الله .. وديت السيارة لمكيانيكي وقال الحرارة طبيعي .. بالنسبة للرديتر ما أدري عنه بس وش رايكم بالتصييخ ..؟

[جار طمية]

اخوي مدهوش ادهشتني وروعتني .. بالنسبة لماء الاديتر يقولي المكانيكي طبيعي يطلع اذا فتحت الغطا والسيارة شغالة ولذلك يقول عبء الماء مع القربة .. واللي انا مستغرب منه دائما السيارة اذا فيها حرارة تحس بفوح الماكيته اذا فتحت الكبوت بالنسبة لموتري مافيه اي عوارض ...!!

[ابو عادل َ]

قبل تخسر وتفك الراس صيخه قبل وغير طبلة فوق وتحت على الدرب لأن اديتر الفتك فتحاته صغيرة واسرع شي تتسدد وعب موية تويوتا الحمراء , وغير غطاء الاديتر وغطاء القربة الاساسية اذا هن مبطيات,
هالقطع استهلاكيه وما منها خسارة .
و إن شاء الله تزين امورك .

[SGL]

مثل ماقلتلك صيخ الرديتر أو غيره ركب أردني ولايكون داخل هواء باالرديتر وكمان لو تنظف المكينه من داخل عند محل الرديترات يكون أفضل والراس أنا مستبعده

[ابوسند9]

وعليكم السلام
اخوي جار لي رجعه للموضوع وراح تجد الجواب الكافي ان شاء الله

[جار طمية]

اشكرك ابوعادل على الافاده .. بانتظارك ابوسند

[عاشق الشعبيات]

غير الغطيان الإثنين يمكن السبب منها

وإذا الأديتر نظيف لا تصيخه

والحرارة متى ترتفع؟

إذا كنت واقف وطولت في الوقوف وإلا إذا مسكت خط واسرعت؟!!


طبعاً إذا كنت واقف فيه عدة أسباب منها:
توماتيك مروحه أو غطا رديتر او راس المكينة طبعاً إذا تبي تعرف إنه راس أول ما تشغل السيارة وهي باردة واحتمت السيارة في خمس دقايق تبدا في الإرتفاع إلى آخر شي.

وإذا كنت تمشي فيه عدة اسباب:
ممكن يكون من الأديتر وصخ ويبيله تصييخ
وممكن يكون من الديلكو يبيله ضبط الوزن لأنه إذا كان زايد عن معدله الطبيعي فهذا سبب في الحرارة ، إذا تبي تعرف إن الديلكو يسبب لك حرارة إذا دعست وأنت ماسك خط تبدا تسمع لقلقه في المكينة كأنه صوت قروش أو هلل.

[ابوسند9]

وعليكم السلام
اخوي ما دام المويه ما طلعت مع علبة الزائد السفلى ما عندك مشكله
وما دام مراوح المكيف ما اشتغلت بدون تشغيل المكيف ما عندك مشكلها
واذا الحراره فوق الخط الثاني بشوي ما عندك مشكله
وما دام السياره فيها بلف ما تفرق الحراره سواء بالسعوديه او بموسكو
والمفترض انك ما غيرت تماتيك المروحه لان طريقة فحص التماتيك سهله وله طرق واجد للفحص
لكن بقولك اشياء تفصحها واذا تحتاج استبدال تستبدلها افضل والكلام اللي راح اذكره راح ان شاء الله تسلم من مشاكل الحراره لمدة اربع سنوات
اول للعلم اديتر الفتك سيئ جدا وفتحات الاديتر صغيره جدا واي شي يسكرها وللمحافظه عليه تحتاج كل سنه تغيير المويه وكل سنتين تسييخ وغسيل سرندل
- لذا انت سو تسييخ وخليك على راس العمال لان تسييخ اديتر الفتك ياخذ وقت وبعض العمال ماعنده ذمه يجرب يسيخ ثلاث خانات ويقول الاديتر كويس ما يحتاج تسييخ واحينا يسيخ خانه وخانه لا
- كذالك اذا كان السياره عندك تماتيك خليه يسيخ من اسفل الاديتر الى اعلى أي يفك الطبله السفلى اللى فيها مبرد الزيت لانه لو سيخ من اعلى فيه خطرمن سبتت التسييخ انه تشعر المبرد ومن ثم يدخل الزيت على القير وانت ما تعلم وهالكلام حصل لا حد الزملاء
- كذلك فك طرمبة المويه وشيك عليها اذا تحتاج تغيير وسعرها 280 ريال
- برضو غير غطاء الاديتر وغطاء القربة اللي بجانب البطاريه وانتبه من الوكاله لا يعطوك اغطية مكينة4500 لانها تختلف
- كذالك بعد ما تفك الاديتر شيك على الطبله العليا والسفلى اذا تشوف على اطرفها فيه تهريب مويه او ملوحه فلا بد من تغيير لانها في أي وقت الله يستر تنفجر عليك وسعرهم جميعا تقريبا 500 ريال والافضل التغيير اذا كانت السياره ماشيه 250 الف وطالع
- لكن لو نحسب التكلفه 500 ريال طبلات + 200 ريال تسييخ وغسيل سرندل غطاء اديتر 70 ريال =770 ريال وسعر الاديتر جديد1600 ريال الفرق 800 ريال تقريبا واديتر جديد وانت بالخيار
- اخر حاجه طريقة تعبئة الاديتر بعد التسييخ و 90 % من الورش يجهلها
- اولا تعبئة اديتر الفتك له طريقه خاصه حتى لايكون هناك هواء داخل الاديتر اوالمكينه وثلاجة المكيف ومن ثم حدوث الحراره
- وطريقة التعبئه عن طريق القربه التي بجانب البطاريه والسياره طافيه مع ترك غطاء الايتر مفتوح
- ومع حل مسمار تنسيم الهواء وموقعه تفك غطاء المكينه البلاستيك اللي مكتوب عليه 4800 وشوف على يسار غطاء زيت المكينه واعلى دينمو المكينه فيه ماصوره صغيره فيها مسمار رقمه عشره تحله شي بسيط حتى تطلع المويه واذا شفت الاديتر امتلئ شد المسمار وسكر غطاء الاديتر وعبئ

القربه مويه حول الفل واذا احتاج مويه راح يسحب منها وانصحك بمويه مقطره ومحلول ميتسوبيشي
حاجه مهمة
اذا السياره عندك تماتيك
انتبه تشغل السياره والاديتر مفكوك لانه ليات زيت القير مفكوكه وبكذا راح يخرج الزيت فلو اضطريت للتشغيل سكرها بمسامير

[فتك08]

ماأزيد على كلام الإخوان بشيء....ماقصروا كفوا و وفوا

بالنسبة لقربة الأديتر اللي بجنب البطارية غطاها رقمه88 و راح تجد الرقم مسجل على الغطاء

تأكد بأن الغطاء الموجود الان يحمل هذا الرقم....و إحذر تركب غطاء ليس له في الأساس...

الخراطيش تأكد لايكون أحدها ينسفط مع الدعس أو الحرارة....لأنه في هذي الحالة يسبب

لك مشاكل.....بالنسبة لماء الأديتر.....أخالف الإخوان في إضافة الماء المقطر...

إذا تبي الأديتر و مجاري التبريد تصدي أضف ماء مقطر....لأن مياه الأديتر كتويوتا

و ميتسوبيشي و نيسان جميعها مخففة و مخلوطة مسبقا و مسجل عليها لاتضف ماء...

للمعلومية....ماء ميتسوبيشي إماراتي و سعر الجالون 40 ريال في المحلات و في الوكالة

بعد الخصم55ريال تقريبا و تركيزه30% ....و يوجد نوع ياباني موجود بالوكالة و لم

أحصله في المحلات الخارجية و سعره بعد الخصم 95 أو 105ريال تقريبا و تركيزه50%....

ماء نيسان ياباني الصنع و سعره لدى الحمراني بعد الخصم 85ريال أو 95...

و ماء تويوتا من خلط أبو جميل في جدة :D و سعره في الوكالة 40 ريال....

[بن الزايد]

غير غطاء رتيتر ماء بس
القصة مع واحد وقف على الخط يطلب ماء سالة وش سالفه الحرارة قلت وين الغطاء هاك قلت تسلم بعد الفحص لقيت سنج او صد قلت بشيل الجلده سفليه قال تم قلت الحين شغل ولا توقف المحرك الى عند الباب بيتك """الخ

[محسن اليامي]

غطا رديتر الماي قبل الخساير

صارت معي في فتك 2003

[أصيل حجآ زي]

http://www.mekshat.com/pix/upload/images39/mk55341_zaz.gif
الحـمـد ُ لله والصـلاة و الـسـلام عـلى رسول الله
وأزوآجـه الـطآهـرآت الـمـُطـهـرآت أُمهـآت الـمـؤمنين
وآله وصحبه ومن وآلآه وجميع الأنبيـاء والـمـُرسلين .
اللهـُم بـك أهـتـدي و بـك أسـتـعـيـن وبنيبيك مُحمـدٌ أقتدي .


يأخوي :
أذا أنت حآط مُبرّد
{ أنتي فريز كولنت Antifreeze Coolant }

مُركز


يعني ما خففتهُ بالماء 50%
نصف ماء ونصف مُبرّد


فالمُحرك أكيد بيسخن .


أن قللت الماء تسبب في صدى
ومشآكل وأن كثرت المُبرّد تسبب في حرآرة .


والسلام ختآم




لا تنسى أن لون المُبرَد حق
قربة تبريد المُحرك { اللديتر }
لسيآرآت جي أم GM
لونهُ كهرمآني / مثل البُرتقآلي .



أشتر مُبرّد فقط من الوكآلة
وأفضل شي أن يكون صنآعة جي أم GM فقط


ويبدوء لي أن فيه تنسيم هواء من المُحرك
الى نظآم تبريد المُحرك /// خآصة أن وجدت الليآت منفوخة .



تعلم كيف تغير الطبآت بالطــُرق الصحيحة بالأشرطة والصور وعلومها ؟؟؟؟؟؟؟ بنفسك {DIY} . (http://www.mekshat.com/vb/showthread.php?t=446533)



ما هو صمآم الحرآرة { الكوع / الثرموستآت} وكيف صيآنتـُه { تغييرُه / أختبآرُه } {DIY} ؟؟؟؟؟؟؟ (http://www.mekshat.com/vb/showthread.php?t=429000)



أحمر / أزرق / أخضر / زهري / وردي ! أي لون مـنآسب لمـُبـرّد قربة التبريد { اللديتر} {DIY} ؟؟؟ (http://www.mekshat.com/vb/showthread.php?t=410160)



تـعـرف على تهريب رآس المـُحرك المشطوب بالنيلة وبالضغط والأسبآب لزيآدة الحرآرة بالصور! (http://www.mekshat.com/vb/showthread.php?t=415860)



قـلـل حرآرة مُحركك>< وكـيـف تـُـوآجـه سـخـونة مـُحـرك سـيـآرتك أو قيرها التمآتك >؟؟؟. (http://www.mekshat.com/vb/showthread.php?t=229941)

[asheqalreem]

دااام مابه بالمكينه حراره من تفتح الكبوت والليات ماهي بمسخنه ويابسه
بصفتي مجرب للنيسان
ترى الامبير حق الحراره يعطيك قرائه خاطئه فلا تتهور وتخسر

[أوتارالقلب]

نصيحه اخو بعه رايح يعاكس ويبهذل فيك وشكله يبي مسح راس

[sgl2002]

دااام مابه بالمكينه حراره من تفتح الكبوت والليات ماهي بمسخنه ويابسه
بصفتي مجرب للنيسان
ترى الامبير حق الحراره يعطيك قرائه خاطئه فلا تتهور وتخسر

هذا الكلام الصح

[جار طمية]

أشكركم جميعاً على تفاعلكم .. لاحرمكم ربي الأجر ..

[فتك 32]

رح شيك على وجه الراس قبل لاينعدم الراس عليك للمعلومية راس الفتك مايمنسح لازم تغيرة والله اعلم

[العطاوي a511]

اخوي مشكلتك من الثلاجه حقت المكينه فيها تهريب بسيط من الوجه

بس للاسف محد يكشف هاذا الخلل حتى الوكاله ويعاني منها جميع السيارات ومنها الباترول خاصه بسبب قوه المحرك واسباب اخرى فيه جهاز كشف بالدخان غير موجود بالسعوديه للاسف

وهي تسبب الاشياء التاليه

1- ضعف العزم شي بسيط
2- ارتفاع بالحراره
3- رمي بالشكمان


وهاذا مقطع توضيحي

kZsqEfP-5zM


اتمنى منك وضع طريقه الاصلاح بالصور والنتايج اتمنى لك التوفيق

[sgl2002]

^^^

هل يسبب نقص ماء الاديتر؟

[العطاوي a511]

^^^

هل يسبب نقص ماء الاديتر؟

اكيد اذا ارتفعت الحراره راح يطلع من القربه الاحتياطيه ويصير نقص

[ابوسند9]

الله يهدي بعض الشباب على طول مسح راس؟؟
اخر الدواء الكي
ممكن المشكله يبغى تسييخ
وممكن بلف وممكن غطاء اديتر او طرمبة مويه واشياء واجد
فا الله يعطيكم العافيه اخواني لا حد يستعجل با التشخيص على طول ويخسر اخوه المسلم خسائر مالها داعي واخر شي تطلع المشكله بسيطه

[حراره]

الله يهدي بعض الشباب على طول مسح راس؟؟
اخر الدواء الكي
ممكن المشكله يبغى تسييخ
وممكن بلف وممكن غطاء اديتر او طرمبة مويه واشياء واجد
فا الله يعطيكم العافيه اخواني لا حد يستعجل با التشخيص على طول ويخسر اخوه المسلم خسائر مالها داعي واخر شي تطلع المشكله بسيطه

+1
قبلك انا خسرت 7500 وآخر شئ طلعت المشكله من الاديتر
ومسيخه قبل ولا نفع
الله يعينك اخوي

[مركز حراره]

اذا مشيت وين تاصل الحراره ؟
واذا وقفت؟

[مركز حراره]

حاولت ارسلك بلخاص وماقدرت ارسل لي

[جار طمية]

بالنسبة للموتر سويتله امس تصييخ وغيرت غطاء الاديتر وغيرت الماء ومع،ذلك الحرارة لازالت تتعدى الربع بشعرة وتوقف يعني ماتزود على ومثل ماقلت لكم الموتر مافيه لافوح ولاشي كان الامر طبيعي ...!!

[جار طمية]

سويتله تصييخ امس وغيرت غطا الاديتر وغيرت الماء ومع،ذلك لازالت الحرارة تتعدى الربع بشعرة فقط وتوقف ...!! والسيارة مثل ماقلت لكم مافيها فوح حرارة ..!!

[ريالين الفسحه]

شيك علي الليات وانا خوك اذا فيها تهريب بسيط

[ابوسند9]

اخوي جار
ممكن تصور لنا الانبير؟

[محمدالعريني]

انا عندي نفس المشكله والخراطيش جدد والغطيان جدد والقربه اللي عند البطاريه جديده والبلف جديد والطبله جديده والتماتيك جديد والما ماينقص والاديتر مصيخ وترتفع فوق الخط بشعره واذا دعست شوي وانا واقف نزلت على الخط ومن يوم ارفع رجلي ترجع فوق الخط

[جار طمية]

رايح انزل صورة للحرارة باذن الله ... سؤال عندي الموتر اذا هديت عند مطب ودعست على البنص ضغط للمكينة يرتفع وتشحط السيارة وهي في مكانها بعدين كانه ينتع ويشبك ويمشي ...!!!

[العطاوي a511]

رايح انزل صورة للحرارة باذن الله ... سؤال عندي الموتر اذا هديت عند مطب ودعست على البنص ضغط للمكينة يرتفع وتشحط السيارة وهي في مكانها بعدين كانه ينتع ويشبك ويمشي ...!!!


عطيتك الحل وانت تدور حل للحين

[حراره]

رايح انزل صورة للحرارة باذن الله ... سؤال عندي الموتر اذا هديت عند مطب ودعست على البنص ضغط للمكينة يرتفع وتشحط السيارة وهي في مكانها بعدين كانه ينتع ويشبك ويمشي ...!!!

شلون يعني !!
قصدك لا هديت القير يفضي نفسه ثم لا دعست تجيه نتعه ويمشي

اذا نفس اللي فوق صارت لي وكان القير زيته ناقص
وغيرته عند ورشه متخصصه بالباترول بصناعية 17 الظاهر يقاله ابو صالح معروفه بالمنتدي
ب 700 ريآل وضبط .. عاير الزيت وتأكد

بالتوفيق