لمبة الـ ABS

[ليوان]

السلام عليكم ورحمة الله وبركاته

اخواني الأعزاء
عندي تاهو 2003 إستخدام امريكي
تولع لمبة الـ ABS إذا لفيت يمين او يسار ، كشفت عليها كمبيوتر في ورشه يقولون متخصصه قال عندك حساس الفلنجه يسار خربان غيرة وتنحل المشكلة
رحت اشتريت الحساس ( عبارة عن سلك ينشبك في الفلنجة الي راكب فيها الكفر الأمامي ) وركبته في ورشه ثانية
وانا عند الورشة لفيت يمين ولفيت يسار كبست فرامل ما عاد ولعت لمبة الـ ABS ولا فيه اي مشكلة قلت الحمد لله انحلت المشكلة ، وبعد مسافة 1 كيلو دعست على الفرامل دعس عادي مو بقوة ولا بسرعة عاااااااااادي جداً صارت تسحب ( يعني تمسك وتفلت بشكل سريع وتصدر صوت ترررررر تررررر تررر ) بدون ما تولع لمبة الـ ABS !!!!!
وبعد مسافة بسيطة مشيت من على حفر ومطبات صغيرة ودعست على الفرامل دعس خفيف طلع صوت إنذار في الطبلون وولعت لمبة الـ ABS ومن بعدها صرت كل ما الف يمين او يسار يجي صوت انذار في الطبلون وإذا دعست على الفرامل حتى لو ثانية أو ثانيتين تصدر صوت تررررر ترررر وتسحب الفرامل .
قلت يمكن يبي للكمبيوتر ريست ( إعادة برمجة ) وقفت السيارة وطفيتها وفصلت سلك البطارية السالب وخليته حوالي 7 دقائق وشبكته ومشيت بالسيارة الا والمشكلة نفسها ما تغير شيء

وش الحل يا اخوان افيدوني بارك الله فيكم

[ابو فهد 999]

؛؛؛؛؛؛؛؛؛؛

[ليوان]

وهل لو الحساس الي ركبته تبع موديل 2005 مثلاً هل هذا يسبب مشكلة

[Hummer-H2]

تأكد ان الحساس أصلي

[DBAAS]

الاعراض والاصوات اللي حصلت بعد التركيب تدل على عمل الحساس ولكن للاسف لم تعالج مشكلة التالف الاولى فعاد العطل من جدديد .

اعمل الاتي:
تاكد من توصيل سلك الحساس يمكن انقطع او انفصل وحاول تعرف الاسباب

كذالك تاكد من الحلقه الممغنطه المقابله لقلب الحساس فقد تصادف وجود جسم يدخل بينها وبين الحساس ويغير مكانه او يتلفه

اذا لم تستيطع بنفسك ارجع لنفس الورشه اللي ركبته عندها وبلغه بعودة المشكله واقتراحات الفحص وافحص معه وقارن مع تركيب ومجال الحساس المجاور(الكفر الثاني)

[Hummer-H2]

على فكرة صارت لي نفس مشكلتك وغيرت حساس وصرت اذا مسكت فرامل يشتغل مانع الإنزلاق وتسمع صوت تررررررر

وبعدها ولعة اللمبة

ورحت فحصت كمبيوتر طلع الحساس وهو جديد

عرفت إنها الفلنجه غيرتها وضبطت الأمور

[ليوان]

اشكركم اخواني الاعزاء Hummer-H2 / DBAAS

اليوم رجعت للورشة الي ركبت فيها الحساس وعلمته بالي صار قال خلنا نفصل الحساس ونجرب وفعلاً فصلناه الا واللمبه والعه على طول ولا عاد فيه صوت الدعسه ترررر ترررر قال معناه ان الـ ABS انفصل و الحساس كان شغال بس فيه مشكله (الظاهر الي قال عليها اخونا DBAAS الله يجزاه خير) قلت وين الحساس حقي القديم قال رميته ولكن بسيطة اجيب لك غيره راح الرجال ما قصر للورش الي حوالية وأخذ من عندهم كم حساس ( على فكرة الحساسات كثيره في الورش والأصلي بعد .. يفكون اهل السيارات الفلنجات بحساساتها ويخلونها عندهم ويركبون الجديده ) وفك الهوب وركب الاول الا واللمبه بعد والعة وركب الثاني الاونفس الموضوع مسك الفيش والمدخل ونظفها بالبخاخ حق التنظيف والهوى الا ونفس المشكلة اللمبه والعة قلت خلاص طبقها وابي اروح للي كشف بالكمبيوتر ..
وانا خارج قال لي الميكانيكي خلينا نسوي إعادة برمجه للسيارة ( يعني افتح القزاز وافتح واقفل السويتش بدون تشغيل عدت مرات وبعدين ادبل على الفرامل 10 مرات بعدين اشغل السيارة ) والله وسويناه الا ونفس المشكلة
واخرج من عنده رايح لصاحبنا الي كشف كمبيوتر وزعلان وافكر وش اقول له وكيف اتفاهم معاه حاس انه غلبني أخذ مني 100 ريال ولا استفدت شيء
بعد مسافة بسيطه اطالع في الطبلون الا والله اللمبة طفت ادعس فرامل ما شاء الله زي الحلاوة الف يمين يسار ما فيه مشكلة قلت الحمد لله وحولت على البيت والامور تمام من فضل الله
الظاهر ان الحساس الاول كان خربان او فيه مشكلة او مو راكب صح
او ان المدخل فيه تراب اكرمكم الله
ثاني شيء اعتقد ان بعد تركيب الحساس لازم يصير اعادة برمجة (الي ذكرتها .. فتح وقفل السويتش عدة مرات .. الخ ) ولازم بعد البرمجه آخذ مشوار 2 او 3 كيلوا حتى تطفي اللمبة وتعود الأمور لطبيعتها
هذا الي لاحظته واستفدته من هذا الموقف وان شاء الله تعم الفائدة لدى الجميع

اشكركم احبائي بارك الله فيكم

[Hummer-H2]

طبعا لما تغير الحساس لازم تمشي شوي عشان تروح اللمبة المعذرة نسيت أذكر النقطه هذي