&&&&$$$(( هل طيرك يلحق السوادي سلم ))$$$&&&&

[(هزاع)]

السلام عليكم ورحمة الله وبركاته
ياهلا بالاخوان اينما كنتم
كما عودناكم على اثراء هذه الخيمه المحببه للنفس بطرح مواضيع للمناقشه
قيمة الطير
((السوادي سلم))
يتفاوت سبق الطيور بانواعها على اللي عطاها الله
ثم
يتحدد سرعة الطير لاوجد الصحه والجرد للطير
ثم
يأتي التعلوم والطبوع الزينه
ثم
يأتي الصيد
ثم
يأتي زين الريش والمقاس
ثم
يأتي الوصوف الزينه والماكر وللتفاريخ الشركه ونسبة الخلطه
ومن هذا المنطلق يحدد الصقاره قيمة الطير بنائا على مايحمل الطير من هذه المميزات
واكثر الاسئله شيوعا
هل طيرك يلحق السوادي سلم
وهل المقياس لسبق الطير ان يلحق السوادي سلم ؟
وهل السوم بيختلف لاحق السوادي سلم ؟
وهل هناك فرق بسرعة حمام القلبان عن حمام اللي يعشش بالمناير؟
وهل الطير الصايد المشروط الذي لايرغب الحمام ولايجرده راعيه الا على الشلو ليس له قيمه؟
وهل الطبوع تزيد او تنقص من قيمة الطير؟
وهل لرتفاع الطيروصملته ورى الطريده لها قيمه؟
الاجوبه يالصقاره عطونا من واقع تجاربكم ومشاهداتكم بالمدعى وبالمقناص

[عابر الموج]

حياك الله يابو مشعل وشكرا لك على الطرح الطير قيمته تنقاس على التالي
1- فعل الطير
2- لون الطير
3- مقاس الطير
4- اصالة الطير
5-طبوع الطير
بالنسبة للحمام يلحق السوادي او غيرة ماهو دليل الدليل سبق الطير على الصيدة الي هي الحبارة اعرفلك طيور تلحق السوادي وغيرة وروحت الحباري شوف العين ويجود بعض الطيور هدده على الحمام ياسلام وعلى الصيد يريوس ورا الصملة والجناح الموقف تتحكم ايضا بسعر الطير والحمام ماهو سواء فيه السوادي ويوجد حمام الشبابيك تجد حمام الشباك البعض منه اسبق من السوادي هذي وجهت نظري واختلاف الراي لايفسد للود قضيه تقبل تحياتي

[صقار محترف]

السؤال هذا للتاكيد على سرعة الطير

والطير اللي يلحق السوادي سلم ( النشيط اللي مصيود توه وليس قديم في الاقفاص ) هذا بالتاكيييييييد طير سبوووووووووووق
والحمام بعد يختلف وسرعتته تتفاوت حسب نشاط الحمامه وصحتها

[حشّار]

وعليكم السلام
مرحبا اخوي هزاع
بالنسبه للي يحدد سعر الطير
اولاً الفعل
ثانياً ×الطبوع الزينه
ثالثاً ×الجناح((سرعة الطير))
رابعاً ركادة الطير
خامساً المثايل×
سادساً اللون
اما بالنسبة للحمام فهو بلا شك ماهو واحد فيه بعض الحمام ماهو سبوق وفيه شي فارط
لكن ماهو دليل اللي يصيد السوادي يصيد الحباري
والله يابعض الحباري ما تردها فروخ الشياهين لاطارت تقل كدريه ×
وبعضها يطرحها الطير اللي طياره وسط بس يرتفع
ولكن اللي انا اشوف بالطيور بعض الطيور جناحه قوي بس مشكلته الصمله مايصمل بالمطراد لو يصمل ماراح عليه شي×
وبعضها تلقا جناحه عادي وصملته قويه بالعربي كبده كبد حمار لا يكل ولا يمل×
وبعض الطيور مايصمل على الحمام لكن على الحباري يتغير جناحه وصملته وتشوف جناح موقف وصمله مسكته
على العموم الطير اللي جناحه قوي وهو مافعل له قيمه واذا فعل زادت قيمته بفرق ماهو بسيط×
والطير اللي فعل ياخذ حقه على حسب جناحه×
لذلك الفعل اهم من الجناح×
واذا اختلط فعل وجناح كثر الدراهم اعرف ان راعيه ماهو بايعك الا لاعزلته عنه بخشم الريال
ومثل هذا ياكثر اللي يخطبونه

الله على اللي لاطلب تقل شيهان
واسبق من الشيهان وارهى جناحه
ماهي سواليفٍ من فلان لفلان
مثل القطا لا فر واخلى مراحه

تقبل مروري اخوي هزاع×
وهذي وجهة نظر حشّار قد اجد من يوافقني واجد من يخالفني ولكن تبقى وجهة نظر×

[راكااااان]

هلا وغلاه ابو مشعل جزاك الله خير على الموضوع ,,,اما بنسبه لي انا مقاس الطير ريشته عمره فقط الباقي من مهام الصقار ريموت كنترول ,,يتحكم فيه من طبع وسبق وركاده وصيد,,,الى ا خ

[سعد الرويس]

ياهلا والله يابو مشعل..
انا بوجهت نظري المتواضعه ان السبق اولآ بذاتن للفروخ..
ولا اتوقع ان احد بياخذ طير صايد حباري ولاهوب سبوق , انت تبيلك طير لا طارت الحبارى خريش لحقها لين حولها برقبتها , والكراوين بعد , والا وش هوله تقنص..؟
وبالنسبه للي يقولون السبوق مايفعل ولا يصمل هذا غلط , السبوق مايخيب, الا من صقاره..
العام شارين فرخ حر(شباب) على الحمام السوادي , ويوم جاء موسم الكراوين 19 على يده واغلبها تلحيق والسنه هذي 3 حباري ووحده تلحيق عقب طيور..
اهم شي: السبق ثم الفعل ثم الريشه والشكل واذا اجتمعت الاثلاث ياسلام وقليل ماتجتمع ..

وهذي جواب الاساله بالنسبه لي شخصيآ..
هل المقياس لسبق الطير ان يلحق السوادي سلم ؟ نعم لان السوادي بوجهت نظري المتواضعه اسبق من الكروان والحبارى الا ماندر..
وهل السوم بيختلف لاحق السوادي سلم ؟ نعم بيزود اكيد
وهل هناك فرق بسرعة حمام القلبان عن حمام اللي يعشش بالمناير؟ على حسب, اذا كان الحمام يسرح بعيد على شان الاكل يصير اسبق , اما اذا كان ينزل تحت العماره وياكل فهاذا مايجيك سبوق.. واسبق سوادي عندنا ياهل الرياض سوادي الجنادريه ..
وهل الطير الصايد المشروط الذي لايرغب الحمام ولايجرده راعيه الا على الشلو ليس له قيمه؟ اكيد له بس يمكن ماياخذ حق اللي يلحق الحمام سلم
وهل الطبوع تزيد او تنقص من قيمة الطير؟ اكيد
وهل لرتفاع الطيروصملته ورى الطريده لها قيمه؟ نعم

هذي كلها وجهت نظري وانا اسف على الاطاله والفلسفه الزايده , بس الصراحه اول مره اتحمس لموضوع كذا والله لا يهينك يابو مشعل على الطرح دايمن مميز..
تقبل مروري وخالص تحاياي..

[راكااااان]

اخوي سعد مهما كان سبق الطير الحمام يخرب طبعه ومهما كان سبوق وصمله يحل عن بعظ الحمام سوادي مافيها كلام بعظ سوادي والله فروخ الشياهين تحل عنه ولاتقولي غير الكلام هذه ,,,

[سعد الرويس]

اخوي سعد مهما كان سبق الطير الحمام يخرب طبعه ومهما كان سبوق وصمله يحل عن بعظ الحمام سوادي مافيها كلام بعظ سوادي والله فروخ الشياهين تحل عنه ولاتقولي غير الكلام هذه ,,,

كلامك صحيح , بس انا مانيب فاك لطيري كل يوم سواديه سلم , لانه بيفشل اذا كل مره ماصاد..
انا بفكله اذا جاء تحدي ولا تلحيق والباقي بنتفله ولا بلاعبه على الشلو..

[نجم404]

وعليكم السلام ورحمة الله وبركاته

حياك الله يابو مشعل على هذا الطرح الجميل وقيمة الطيرتنقاس على التالي :
1 - فعل الطير ويدل على ذلك الاسعار الخيالية للطيور الصايدة والمشروطة وتستاهل
2 - طبوع الطير من ناحية الركادة والطلع التي هي مهمة عند اي صقار
3 - اصالة الطير ما هو تفريخ.
بالنسبةللمقياس السبق انه يلحق السوادي فالحبارى اسبق وانشط من السوادي طير مهاجر عابرة دول ههه
اما الطبوع اكيد انها بتزيد من قيمة الطير لاان الطير لاجاك يكافخ ولا ينمسح وجهه من بيقنص والاارتفاع والصملة لها قيمة واجدة عند اي صقار. ولاهنت على الطرح وننتظر جديدك تحياتي لك. ..

[سنجااار]

السالام عليكم ورحمة الله وبركاته

عابر الموج ماخلا شي ولاتهونون ، لكن بالوقت الحالي اول مايسألك شلونه على الحمام ؟؟

ثم عاد ينشد عن الحباري والكراوين

تقببل مروري

[برق المغيب]

تسلم يابو مشعل على هالموضوع اللي يجمعنا على الخوة والنقاش الطيب حتى وان اختلفت الأراء في هالمواضيع ولكن نتفق على اشياء مهمة نفيد ونستفيد منها جميعا وكل واحد له هواء في الطير اللي يبي يقنيه ويتنومس بصيده ... عندي ثلاث امور
1- السبق : جناح الطير على حبارى والا غيرها
2- الفعل : صملته على الصيدة وشطارته في تعامله معها بعض الطيور
أرفل تتعبه صيدته
3- مقاس الطير ولونه وعمره: تكمل الناقص ويبيها كل ناقل طير في
طيره هذا راي ممكن اخطي واصيب ولا يشاركني فيه احد مع الشكر لسعة الصدر

[مدهـوش]

الكل أدلا بدلوه وأباح مافي قلبه

موضوع يدعي للنقاش الحاد والوجيه والمفيد أيضا


فالكل أجاب أجابات كافيه ووافيه وهي رغباتهم وأدلائهم


فأنا : أحب الطير اللي يلعب ويرغب الملواح أكثر من الحمام بعد لونه وقياسه ووصفه


واما السوادي فلا كل طير حر يلحقه لان من الصعب اللحاق به وأخص الحرار الكبار وكثرة الهداد عليه يؤثر بالطير حسب ما جربت


فرغبت الملواح أفضل بكثير ورفع تام للياقة الطير


فتقديري لك وللموضوعك المميز

[ذراع الذيب]

السلام عليكم ورحمة الله وبركاته


هلا والله وغلا


بأخوي ابومشعل


اولاً اشكرك على هذا الموضوع المميز طبعاً تكرر مثله لاكنك كتبته بقلم رائع ممزوج حبره بالتشويق


في وقتنا الحالي من ناحية الوحوش معاد يهمنا ماكرها وكذلك التفاريخ ماتهمنا مزارعها


يهمنا اكثر الفعل فقط لاغير


اتكلم عن رائي ولابغيت انشد عن الماكر او عن المزرعه يكون الطير اللي ابيه مادربه احد غيري ياوحش او من مزرعه


واكبر شريحة عند الصقاقير تبي طير فاعل ويكون مقاسه زين ماتبي لالون ولامثايل لأنهم فاقدين حاجتين الدخل المادي واراضي الصيد المتوفره



والاخوان ماقصرو وكلن ادلى بدلوه واستفدت منهم كثيير وانت تسأل عن الحمام السوادي السلم


وهل المقياس لسبق الطير ان يلحق السوادي سلم ؟
لا لاكن انا مجبور لأقيس سبقه على السوادي لقل الصيد
والصقار الواعي يبي يعرف جناح الطير لو على الشلو


وهل السوم بيختلف لاحق السوادي سلم ؟
على حسب السوادي في صحته وفي سبقه وعلى حسب نوع الطير
والمسافه اللي طرح فيها السواديه او ردها وهنا يتحدد سعر الطير
ولاجيت اشري طير مشروط يلحق السوادي سلم اجيب حمام ممسوكه من امس ونشيطه


وهل هناك فرق بسرعة حمام القلبان عن حمام اللي يعشش بالمناير؟
نعم يوجد فرق كبير جداً


وهل الطير الصايد المشروط الذي لايرغب الحمام ولايجرده راعيه الا على الشلو ليس له قيمه؟
الصايد هذي الايام كلن يدوره واللي يبي يتعنى للحباره بيشتريه
لاكن مع قل الصيد صارت الناس تدور اللي يرغب الحمام اول شي
قل الصيد مع الشبوك مشكله كبيره


وهل الطبوع تزيد او تنقص من قيمة الطير؟
اكيد الطبوع الزينه تضيف للطير حسنه وتوجد طبوع تكرهك بالطير ماتشتريه لو بريال


وهل لرتفاع الطيروصملته ورى الطريده لها قيمه؟
الصمله والارتفاع عامل جداً مهم وهذا الشي يرجع للصقار نفسه


الملاحظه :
فيه طيور سباق وتلحق الصيد كالحباري والكراوين لحوق غاصب
لو تقيس سبقها بذيك اللحظه على سوادي سلم راح تجيبه في اقرب مسافه
ولاكن المشكله بالرغبه فيه طيور ترغب وفيه طيور لا
ولاكن انا مجبور
ادور طير يرغب السوادي ويلحقه سلم لقل الصيد بمناطقنا
واختلفت هنا الامكانيات


وملاحظتي على سؤالك الثاني
على حسب والطير اللي ابي اشتريه لازم اشوف طياره والحمام اشرط اني اجيبها
لأن فيه ناس تشرط ان الطير يلحق السوادي سلم لاكن تحصله ممسوك من فتره طويله


وامكن تحصله هزلان وضعيف والطير اللي يلحق السوادي سلم
ومايعطيها فرصه تبعد عنه هذا اللي عليه الكلام


وعندي ملاحظه اخرى الطير اللي يفعل ويلحق بنسبة 80% بديار نجد والشمال يكون فعله بديارنا بالساحل الغربي الجنوب 40 او 50 %
الاجواء لها دور كبير في طيار الطير

[صقار الأسياح]

موضوع مفيد لأكن انا ارى ان السوادي صعب انا عندي طير اضمن لك انه يرد السوادي يعني يردده بس يذبح الطير بالمرواغه لين يتعب الطير ويحل هذا وش يسمى

[هواي البر 2]

السلام عليكم موضوع جيد للنقاش اغلب الصقاره تقيس سبق الطير
بالحمام السوادي (الدحل) والطير الى يلحقها من الطير الاحرار القرانيس
البيتيه يعتبر سوق بالحيل وماهو شرط يصيدها صعبه على الاحرار القرناس البيتي ولاكن الفروخ اغلبها تلحق وتصيد السوادي سلم وطبعن فيه احرار بيتية تصيدها بس قليل مره السوادي سلم تظلم الطير الحر في مهده
وهذي جهت نظر لا اكثر

[صقر الجنوبي]

هلا وغلا ابومشعل من وجهة نظري يختلف اذا كان الطير وحش أو بيتي فالطير الوحش تنقاس قيمته على الآتي :
1-ماكر الطير لأن الماكر له علاقه شديده وقوية مثله مثل الخيل الأصلية والأبل والهجن
2-نوع الطير
3-حجم الطير
4-لون الطير
5-صفات الطير

اما الطير اذا كان بيتي تنقاس قيمته على الآتي :
1-نوع الطير
2-لون الطير
3-حجم الطير
4-صفات الطير
5-فعل الطير
6-طبوع الطير
7-سبق الطير

والطير طال عمرك من صقاره مثل ماتعطيه يعطيك ولاهو دليل ان الطير اللي يصيد السوادي يصيد الحبارى.
الطير صملة اذا هو جايع ينقض على الحبارى بقوة وفعل يسر خاطرك بغض النظر عن نوع الطير ولونه وان هو معشى والله مايشقى بالطريده حتى ولو هي تحت مخلابه

[ســـبــار ربــعـــه]

وعندي ملاحظه اخرى الطير اللي يفعل ويلحق بنسبة 80% بديار نجد والشمال يكون فعله بديارنا بالساحل الغربي الجنوب 40 او 50 %

الاجواء لها دور كبير في طيار الطير


كلام ابوناصر في الملاحظه هذي ميه ميه.
وازيد عليه ان الطيور البيتيه الي تجي من الغربيه تبدع في الصفري عندنا يا اهل الشرقيه وتستهد قبل الطيور.

اما بالنسبه لموضوعك يالغالي.
طير الشلو المشروط والمعيد في الحباري تلقاه رخيص وطير الحمام لو انه ماشاف حبارى ولا مفرط حباري ومبربس تلقاه اغلى منه.

وللناس في مايعشقون مذاهب.
تحياتي لك يابومشعل.

[جنوبي 505]

ماشاء الله

[هتاش العطاوي]

السلام عليكم ورحمة الله وبركاته
شكرا على طرح الموضوع المشوق ابو مشعل لو كان الرد متأخر
ولكن اضم صوتي لركااااان المقاس والريشه والعمر والباقي على الصقار

[ابو وافي00]

السلام عليكم ورحمة الله وبركاته
الحمام صار معيار للطير وشرط من شروط البيع والقيمه الطيبه
حتى لو عندك طير سبوق على الحبارى والكروان لكن مايرغب الحمام محد طالع فيه
وعذرهم مافيه حبارى أو كروان
لكن حط جنبه طير ماشاف الحبارى ولا شاف الكروان ولا يعرفها لكن يلحق السوادي سلم
ياخذونه وهم مغمضين وبسعر ماياصله الطلاع اللحوق الذابح


تحياتي..

[صاحب بوعبود]

كلام اخوي ابوافي صحيح
ويوجد فرق بين الطير الي يلحق السوادي اول ماتطير والطير الي يلحق عقب طير وهذا لحوق وسبوق.

[wa7eeed]

بيض الله وجهك على الموضوع

[قناص الخبر]

مساكم الله بالخير ومشكور يا أبو مشعل على الموضوع
انا بوجهة نظري السبق الفارط بالطير من الله شفنا حرار تلحق لحوق فارط وتجيب السلم وبالمقابل شفنا فروخ شياهين ما تلحق السلم والحمام صار مقياس لسبق الطير لان الصقار يقيس سبق الطير بالحمام هذا الكلام بالنسبه للبيتي لكن الوحش تواصيف من مناكب وغيره هي اللي نقيس عليها سبق الطير

[صقر الجزائر]

- السبق : جناح الطير على حبارى والا غيرها
2- الفعل : صملته على الصيدة وشطارته في تعامله معها بعض الطيور
أرفل تتعبه صيدته
3- مقاس الطير ولونه وعمره: تكمل الناقص ويبيها كل ناقل طير في
طيره هذا راي ممكن اخطي واصيب ولا يشاركني فيه احد مع الشكر لسعة الصدر