اسباب تأخر حذف الطير للريش؟

[Hawawii]

اخواني السلام عليكم
نبي نسوي قائمة بالاسباب اللي تسسب تأخر الطير في حذف الريش وقت الربط لعلها تكون مرجع يستفيد منه الاخوان:
وخلوني ابدا بأولها
1- العلف غير موزون او كافي

[حشّار]

وعليكم السلام
يدخل في ذلك امور كثيره
اولها المرض والعلف ومشاكل في مدهنة الطير سوا ناشفه والا منسده او ملتهبه
بعدين نرجع لنوع الطير بعض الفصائل تتأخر في الحذف مثل الشياهين البحريات
والحد عاده مايتأخر بالحيل واذا تأخر مايطويل ويحذف
تقبل مروري

[بدوي نمبر ون]

فيه شغله غريبه بس يمكن بعضكم لاحظها
الطير اللي يتاخر اعزله مع طير يحذف طبيعي تلقاه يحذف مثله

[جلاد الحباري]

تأخر القرناس بالنسبه للحرار هو نتيجه لنقص القيتامينات ونقص المناعه وأحدد البيوتين له دور فعال اذا نقص الطير يمسك ولا يحذف واللي عنده طير يتأخر له حل واحد يعطي الطير كورسات التهابات لمدة ثلاثة ايام ويتأكد من سلامته من الامراض ويحرص على عمل المدهنه وبعدها ينزل الطير ويقصر علفه قبل الربطه بأسبوعين اهم حاجه ان الطير ينزل نزول ولا يصير هزيل مره بل اذا كان وزنه الف يصير مثلا 700 او 750 وبعدها يربطه ويرفعه شوي شوي لا يزكه مره بالعلف مثلا يغديه نص فريه ويعشيه نص لمدة يومين وبعدها يعطيه فريه كامله لمدة عشرة ايام وبعدها يغديه نص فريه ويعشيه فريه واذا غلق الطير بعد الصنعه راح يحذف باذن الله

[ابرق الحرار]

تاخر حذف الطير للريش
1-عدم تنويع العلف والتأكد من سلامته
2-المكان غير مناسب للطير مثل:-
*عدم التهويه المناسبة
*عدم دخول اشعة الشمس بشكل غير مباشر
*عدم الاهتمام بمتابعة الطير من الامراض بشكل مستمر
*عدم النظافة بشكل مستمر لمقيظ الطير
3-عدم الملاحظة الشخصية من صاحب الطير مباشرة وانما يتم تسليمه للمربط مثله مثل الطيورالموجودة بالمربط وهذا اهم سبب ريئسي ولايزعلون علي اهل المرابط هذا الكلام الصحيح