استفسار عن جمس 8100 ينفع في البر؟

[Abdullatif]

لإخوة المكشاتيين الكرام السلام عليكم
ناوي آخذ سيارة تكون كبيرة, و استعمالها بيكون فقط خميس و جمعة, للبر (في سيارة صغيرة أستعملها خلال أيام الاسبوع)
طبعا معروف الجيب أو السفاري ما يحتاج مدح, بس أنا لي رغبة بالجمس, و تحديدا جمس 8100 الي تجي مكينته 8.1 (موديل 2002-2006), اللي يجي صالون و ليس الحوض, و أحتاج مشورتكم
كثيرين قالوا لي ما ينفع, لأنه ثقيل مرة و خصوصا من الأمام (لأن المكينة ضخمة)
و ما ينفع لأنه طويل و بيعلق في الطعوس
و أنا أدري ان هذا الكلام منطقي, لكن كل أخوياني اللي يقولون كذا ما عندهم جموس, يعني كلام ليس عن خبرة, و أنا لي رغبة أسمع من شخص يملك الجمس و يطلع به البر
السؤال هو:
- هل فعلا هذا الموتر ما ينفع تطلع في البر؟ و فعلا بيغرز و يغثني؟
علما أنه ما لي نيه أني أطعس فيه و تحدي و خرابيط, بس في نفس الوقت ما أبي أطلع البر مع جيوب و ما أقدر أوصل للمكان اللي يروحونه

-هل كبر حجم المكينة يعوض عن ثقل الوزن؟
-هل تركيب كفرات بالون أو كفرات 33 انش يفرق؟ و هل يحتاج الموتر ترفيع حتى تركب هذه الكفرات؟

و أخيرا, اذا أحد عنه جمس 8100 و يطلع بيه البر, هل من الممكن اشوفه كيف يمشي معك في البر؟
و شاكر لكم سعة صدركم

[Abdullatif]

نسيت أقول أن الجمس فيه دبل

[أبو الوليد 14]

والله ونا اخوك الجموس عزمها ماشاء الله تبارك الله
بالنسبة لممشاه بالرمل يعتمد على :
تنسيم الكفرات
الدبل
والموتر 8سلندر اكيد بيتمشى على الرمل حتى لو السواق عليمي فما بالك لو السواق كويس ويداري الموتر صح
بالنسبة لثقل وزنة شف مقاطعه في اليوتيوب يفاحط على القار وشلون عاد بالرمله
الثقل في الرمل إذا انت منتب راعي مراقى اعتقد يعتبر ميزة بحيث الكفر مايحفر ويغطس والموتر انت تقول دبل
والثقل بالخطوط ارسى للموتر بعد طبعا انا اتكلم عن وزن الموتر مع تحميل معقول

طبعا انا ماجربت نوعية ال8100 لكن احاول افيدك وإذا لقيت موتر جربه وشف عزمه وبتلقى اجابة عن اغلب التساؤلات اللي فوق
واستشر واسال بيفيدونك الشباب
فيه مواقع متخصصه للجموس فقط وملاكها بيفيدونك ان شاء الله

ومبروك مقدما والله يطعمك من خيره ويكفيك شره

[escape_man]

مكينة 8100 الي هي تعادل 450 بالجموس الاقدم موديل

مكينة جبارة يعيبها الحرارة والثقل لكن اذا عرفت ان الدفرنسات عندك للاستخدام الخشن

و عزم التورك هائل فهذا بيلغي اي سلبية ثانية.

طول الموتر ماهو عيب .. بالاخير هو موتر عائلي .. يعني وين تبي تراقي به :)

[فرفور بريده]

مشكلته اول ماتدعس يغطس بالرمل من العزم

اذكر حوض غماره 8100 قير عادي .. بالرمل وهو واقف اول ماتدعس البنص للاخير يمشي مترين ويثولث

[خاب الرجا فيك]

خذ الكلام مني عن خبرتي البسيطه بمعشوقي الجمس
انا انصحك بالصالون 2500 6 لتر مش 8100
ليش ؟ انا اقولك ليش
الجمس 6 لتر اقوى من الجمس 8100 !!
لان الـ 8100 قوته مركزه على عزم الدوران وليس الاحصنه
بعكس الـ6 لتر اللي اقوى من 8100 بالاحصنه لكن يتفوق ال 8100 بالتورك
الفرق بينهم ان الـ6 لتر انشط من ناحية التسارع والعزم واقل صرفية بنزين وممشاه حلو بالبر والخط ويسحب مايقول لا
الـ8100 مامنه قصور لكنه اكثر صرفية وممشاه حلو بالخط وماله مثيل بالسحب وحلو بالبر مايقول لا
ويمشي مع الدروب اللي يمشيها غيرك ويمكن افضل
احد ميزات الـ 8100 بالمراقا بالنفود !!
على ان مكينته كبيره بس بالمرقا افضل من باقي المكاين لان عزم الدوران فيه اعلى من الاحصنه
بالتالي الطلعات سواء مراقا او اي خط معتلي يرقاه وهو يضحك ويتمخطر !
وبالاخير مثل ماقالوا الشباب اللي يحكم على ممشى الموتر بالنفود 4
1/ السواق وعلى قولتهم الخيل من خيالها
2/ نوع الكفرات والافضل تكون عريضه الدنلوب 275 حلوه بالخط والبر
ولاتحتاج ترفيع او تنزيل اهم شي ماتكون الكفرات سخيفه مره يعني يكون عرض الكفر 265 وطالع
3/ هوا الكفرات لايتعدا 20 ويفضل 15
4/ الخبره ومعرفة الرباضات والقصوص وغيرها يعرفها الواحد قبل يوصلها وهالامور يكسبها الواحد مع الوقت
انا اختلف مع اللي يقول الجمس تعطيه عليمي وبيمشي !!
بالعكس الجمس يبيله سواق لانه قوي وفي نفس الوقت ثقيل
يعني لو تدعس ثقله وقوته بيخليه يباوش مكانه ويغرز
وهنا تجي المشكله في الثقل اذا غرز تغريزه قويه صعب يطلع بسهوله
لانه اذا دعس بيحفر زود من القوه والثقل واذا مادعس بيكون مكانه
لكن فيه ميز بالجموس من موديلات 2000 وطالع ان دبلاتها قوية وتشبك الاربع كامله حتى في حال التغريز الكامل
بعكس موديلات 2000 ونازل اللي اذا غرز ينفصل الدبل من نفسه !!
لكن الجمس يبيله مسايسه وموازنه واهل الجموس عارفين وش اقصد
وللي مايفهم بالجمس: على ثقل الجمس اذا حسيت انه بيغرز المس البنص لمس خفيف
ويطلع معك بعكس السيارات الثانيه اللي كل مادعست اكثر كل ما مشى معك اكثر !
وبخصوص ترفيع او تنزيل انا انصحك تخلي الموتر على وقفته خصوصاً الـ8100 وقفته وكاله وقفت شيخ
عموما الله يكتب لك اللي فيه الخير
بالتوفيق والمعذره ع الاطاله