الراعبي

[أبو جراح11]

السلام عليكم

استفسار بسيط

فية طائر يشبة الحمام ( القوقسي ) ويشبه لليمام ، الاختلاف فقط في الحجم يعني تشوفها تقول قوقسية عندها (ضمور في العضلات )
بس غاية في الجمال وقالو هذي الراعبية
وفيها اختلاف ثاني وهو ان الريش حق الذيل أطول من القوقسي يعني لما تكون موقعة على غصن يوضح طول ريش الذيل
وفي مشيتها نوع من السرعة و في طيرانها ( تحس ان مكينتها مخروطه )

وشفت منها اشكال بس الاختلاف في لون الريش فقط
وقالو يجي منها نزل
وهي تعيش في مجموعات بسيطة وتحب تعشش في اشجار التين

السؤال هل هذا الطائر هو الراعبي ؟؟؟

تقبلو تحياتي 00

[أبو رافع الظاعن]

نعم هو الرّاعبي على حدّ وصفك الدّقيق الذي جعلني أتبسم وأنا أقرأ عباراتك وأتصورها :)
ولها أسماء يمكن تزيد على العشرة حسب المناطق

وهذا موضوع رائع للعضو الرائع بدر القاسم عن هذا الطائر:http://www.mekshat.com/vb/showthread.php?t=138216

[عواد الشمري2]

هلا الذيب
مااقصر معك ابو رافع اعطك العلم

[ثمان طعش]

الله حيه ياذيب ماقصر معك ابو رافع افادك ولا يكون حاط عينك على وحده رابضه على فريخاتها :eek: هههههه ;) :no2: :good2:

[أبو جراح11]

ابو رافع الظاعن
يارب ابتسامتك دوم
والله يجزاك خير على هالرابط
المشكلة اني بحث عن الراعبي وحطية الصور وماطلع عندي الا قوقسي
وقلت يمكن يفيدونن الشباب
الله يرحم والديك00 وبيض الله وجهك بالدارين00
============
عواد الشمري
هلا وغلا بالمعزب ترا ماجاوراناك حنا معشر الذيابة الا لاننا نعرف انكم هل الكرم منذو مبطي
منتم من الي لا كلينا لة طلي
قعد يولول تقل مصرية ميت رجلة بالعراق
وراح يشتكينا عند الشرطة وعند رئيس مركز القرية 00
===================
ثمان طعش
الله يرحم والديك يبن الأجواد والله ما اقوى اصيدهن مايطاوعن قلبي
خلن بطليان الرجال هو كريم وحنا نستاهل هههههه


يالغالي أن قد صاري لى سالفة مع هالراعبي
خلتن احرم اصيدهن وربي أفرح بشوفتها بس امد عليها الدربيل واقعد اتفرج في هالمزيونة
صرت اعشقهن ياخوي
فيها جمال سبحان الخالق
هي مملوحة هي ذربة هي خوافة ياعنك أنها ( ملكة جمال الطيور )
اليمام مايخاف تقول خاضور مهيب حمامة
فيها ثقل دم
والقوقسي تحس ان فيها جني مطيورتن تهبلك ان طارت فجاءة
والخظاري لآ لون ولا طعم ولا ريحة
----
ولو يحصل حطيت لكل راعبية خاضورين حرس
======
السالفة الله يسلم عمرك
كنت بسادس ابتدائي ومعي لي ساكتون
خمسة وثلاثين وارد الرميح
ومولع بالصيد الله وكيلك
وبهذاك اليوم لقيت هالراعبية مدري وش هالطير بس الوكاد انة يوكل
واصيدها واحطة بالكيس وارح ادور الضحية الثانية (( خبرك شبيح ومعة سلاح ))
المهم قابلن رجل من عيال العم قلت له وش ذا الطير
حطها بيدة وقال (( ياحيل الله !!! هذي راعبي وش تبي تصيدها ضعيفة ))
الصدق بغيت اصيح رحمتها ياخوي ( تقل نايم ووقضن الرجل )
عاد تأمل شكلها وهي ميتة ترحمة تقل طفل مذبوح
وعقبها حرمت اصيدها
واحرص ربعي انهم مايصيدونها
لدرجة اني اسبها في طعمها واقول تراها تاكل خنفس مثل الخاضور
ماتشوفونها دايم بالارض تدور الخشاش الله وكيلكم
(( الحب عذاب ))
بس واحد من الربع كشفن وصار يسب الراعبي ويناظرن وهم غافلين ويتبسم ههههههه
------------
وحتى القوقسي والطيور المستوطنة بشكل عام ما اصيدها الا بالليل
ليش؟؟؟
بهكا اليوم
كنت اصيد وقت الظهر وجدي ابو الوالدة الله يرحمة ويرحم اموات المسلمين
يروس الماء على البرسيم بالمزرعة
واجية وهو قاعد يشرب الشاهي ابريح واخذ لي بيالة
عاد الشاهي بهذي الظروف ومعة وجنب هالبرسيم وبضل النخل جنة
قال جدي بعد ماصبيت لفسي شاهي وش صدتا ؟؟؟
قلت حمام , قال لاحول والا قوة الابالله
ترا عليك من الله ياوليدي يمكن عندهن فريخات يموتن جوع في وكراتهن
يوم ضاق صدري
وقلت طيب يجدي كل الناس يصيدونهة
قال ايلا بغيت الحمام فرح قبل المغرب واقعد تحت الاثلة وصيدهن
قلت هذولي ماعندهن عيال ؟؟؟
قال ماجايك الا ذكور الاناثي على بيضهن وعند فراختهن وان جاك اناثي فماعندهن لابيض ولا فراخة
عقبها ماعاد اصيد حمام الا بالليل
عشان ما احط فريخاتها بذمتي
والله يعفو عن الي مضى وفات00
000
ويسلم عمرك00:)

[ثمان طعش]

جزاك الله خير (ياذيب مكشات) :heart: والله انا خابرن محل مليان من الراعبي وفي الرياض ;) عند :director:






:no2: ماني معلم علشان ماتصيدونها :no: يازين شوفتها :heart: :good2: :D

[الوايلي2012]

الله يعطيك العافيه ماقصرت

[أبو جراح11]

جزاك الله خير (ياذيب مكشات) :heart: والله انا خابرن محل مليان من الراعبي وفي الرياض ;) عند :director:






:no2: ماني معلم علشان ماتصيدونها :no: يازين شوفتها :heart: :good2: :D


========================
هلا وغلا بخوي ثمان طعش
الله يرحم والديك00انتبة تعلم عن مكانها ترا المفسدين بالأرض وآجد00
===============


الله يعطيك العافيه ماقصرت
======
هلا يالوايلي الله يرحم والديك وانتم لكم سبق في حماية الطير
تشهد لكم الحمرة ( القبرة )
ياقبرة بمعمري خلا لكي الجو فبيضي واصفري00

[خالداللهيبي (ابو احمد)]

تسلم اخوي


تذكرت اللي يقول :

ولي ونه من سمعها مايناما= كني صويب بين الاضلاع مطعون
والا بونه راعبيه حمامه = غادن ذكرها والقوانيص يرمون

[أبو جراح11]

اية يبو أحمد الشاعر يعرف قدر الراعبية هههههه

لكن أعتقد أن الشاعر ماخص الراعبية عبث
يقدر يقول يمامة أو اي نوع ويعدل بيت الشعر على كيفة
لكنه خص الراعبية لأنها ملازمة للذكر دائمآ ومستحيل تلاقي راعبية من دون ذكر 00

الراعبي علامة للوفاء زي الورد علامة للصفاء00

سبحانك اللهم ربي أحسن الخالقين00