المساعد الشخصي الرقمي

مشاهدة النسخة كاملة : وش الرياضه البريه اللي تفضل تلعبها ؟؟


راعي ساموده
01/09/2006, 01:15 AM
السلام عليكم ورحمة الله ...
الان ونحن على مشارف خروج فصل الصيف وتلاشي الحراره تدريجيا .....
نتذكر أننا على مشارف النزهات البريه المحببه الى النفس واللتي لاتكتمل الا برياضاتها المنوعه .. لذلك نرجو مشاركة الأخوان يمكن نلقى لعبه جديده ؟؟ :d
kaaaatm
02/09/2006, 02:05 PM
كبردي




وهي عبارة لعبه تلعب في مكان مثل ملعب السلة لكن بدون شبكة ويكون في كل خانه عدد متساوي من الاعبين بحيث في المرة الاولى ياتي احد اعضاء الفريق الاول ودخل قسم الفريق الثاني وحاول لمس احد عضاء الفريق الثاني ثم يرهب الى خانته ثم يخرج الشخص الذي تم لمسه واما ان لم يلمس احد وقبضوا عليه ومسكوه فانه يخرج وينقص عدد اعضاء فريقه




وانا داري ان الشرح ماهو وااااااااااااااضح
عجرم
02/09/2006, 02:44 PM
عليكم بالمتوسعه
اضنها معروفه ماتحتاج شرح
راعي ساموده
02/09/2006, 10:08 PM
السلام عليكم ورحمة الله ...
أخوي كاتم ( كبردي ) تقل اني يعني الظاهر اني بديت احاول اني ............ بصراحه مافهمت شي هههههههههههههه

أخوي عجرم
ترا ديرتنا ماشا الله كبيره وكل منطقه تسمي اسم فياليت تشرح اسلوب اللعبه .
تركي0500
02/09/2006, 10:57 PM
اللعبة المفضلة لدي "أطول نطه"

طريقتة اللعبة: تركض تركض تركض وتنط أطول نطه هو الفايز... عسى الشرح وافي ههههههههههه

وفيه لعبة من يشيلة لازم ست لاعبين وأكثر كل ثنين مع بعض هذي نلعبها ونخلي القيم من عشرة على حسب الإغلاط واللي يوصل عشرة الأول يصلح الغدا هو وخوية ويغسلون المواعين !!
ان كانك ما تعرف طريقة اللعبة ترانا حاضرين .. قل لي علمني بسسس...
راعي ساموده
03/09/2006, 02:42 PM
هلا والله بتركي 050-
تكفى علمني طريقه اللعبه حقت (غسيل المواعيييين) هذا اهم شي تفتك منه بالبر تغسل وتربس بعز البرد ؟؟ وخوياك عند الضو مبصوطين
ولد المزاحمية
04/09/2006, 03:09 PM
انا احب العب الطائرة
تركي0500
04/09/2006, 03:43 PM
هلا بساموده.. ابشر ولا يهمك اعلمك.

الطريقة يا طويل العمر .. لازم يكون عدد اللاعبين سته واكثر ولازم عدد زوجي يعني 6 لاعبين او 8 او 10..

الطريقة كل ثنين مع بعض ..مثلا محمد مع خالد ..و عزيّز مع عبيّد.. وفهد مع سلطان..

بداية اللعبة واحد تتفقون عليه يبدأ.. مثلاً بدأ فهد وقال الكأس يشيله محمد أو اي شي كأس او بياله او فنجال اللي يجي..

يقول فهد "الكاس يشيله محمد" يرد خوية اللي هو خالد ويقول "محمد ما يشيله" ... يرد فهد ويقول "أجل من يشيلة" يقول خالد يشيله (اي واحد من اللاعبين غير خويه اللي هو محمد ..مثلا اختار وقال "يشيله عزيز" يرد خويه عبيد ويقول "عزيز ما يشيله" يرد خالد ويقول "اجل من يشيله" يرد عزيز (ويختار اي احد من اللاعبين غير خويه اللي هو عبيد اذا غلط واختار خويه تكون غلطه تحسب عليه...

واذا واحد تأخر ما رد يحسب عليه غلط على انه تأخر أو احد قلب الكلام يعني قال تو اجل من يشيله يقول يشيله محمد وهذا غلط لازم يقول محمد يشيله..

وهكذاااااااا الين يوصل عدد الاغلاط الى عشرة واللي ينهزم يروح يصلح العشاء هو وخويه ويغسلون المواعين..

هذي اللعبة بدون شرح..

فهد: الكاس يشيله محمد
خالد: محمد ما يشيله
فهد: أجل من يشيله
خالد: فهد يشيله
سلطان: فهد ما يشيله
خالد: اجل من يشيله
سلطان: عبيد يشيله
عزيز: عبيد ما يشيله
سلطان: اجل من يشيله
عزيز: محمد يشيله.. ثم يرد فهد وهكذااااااااااااااااااااا الين يغلط احدهم وتحسب عليه غلطه

وترا تقدورن تألفون انظمة وقرارات للعبه!!
ارجوا ان تكون الطريقة مفهوووووووووومه..
طخيمان
05/09/2006, 02:37 AM
أنا بصراحة الألعاب اللي دايما نلعبها في البر هي (عروستك) أو ما يسمى في بالي يعني نسوي قرعة بين الحاضرين واللي تطلع عليه القرعة يبعد شوي وحنا نختار شخصية معروفة عند جميع الحاضرين أو على الأقل عند اللي يلعبون ويبدأ اللي طلع يسألنا عن صفات هذه الشخصية إلى أن يبين له احد من الحاضرين صفة تجعله يتعرف على الشخصية وبعدين يجاوب واذا طلع الجواب صح يعلمنا من الشخص اللي بين له أبرز صفة في الشخصية الغامضة ويقوم اللي بين له وهكذا
أرجوا ان اللعبة سهلة و جميلة
المخيال
05/09/2006, 04:32 AM
جزاك الله خير ,,, موضوع شيق ويستحق المتابعة

في البر أحب أسبح ,,ههههههههههه ,, لا أمزح معك ,,, والله شف مافيه رياضه محددة أحبها الكل جيد

الله يعطيك العافية
غضنفر
05/09/2006, 12:12 PM
بالنسبة لي
احب ركوب الخيل ولعب القولف
هع هع هع هع هع هع هع هع
اليا جيت للجد افضل رياضة عندي التطعيس والتمشي بين النفود النظيفة
الخيال2006
06/09/2006, 02:04 AM
المشي وتسلق الجبال
kaaaatm
06/09/2006, 02:35 AM
كل هذا الشرح يا اخوي ساموووووووووود ولا عرفت شيء
شمالي غير
09/09/2006, 01:40 AM
بلاي ستيشن !!




بصراحه طلعة البر كلها رياضه الا للناس اللي يحبون التبطح وماعندهم الا " تكفى يافلان الله لايهينك بيالة شاي !! الله لا يهينك قرب القدوع الخ " هذولاء لازم لهم رياضه والا تكشت معاهم ..
ابورامي
12/09/2006, 03:32 PM
الطائره ولااااااااااااااو
ابو سلامه
31/10/2006, 03:00 AM
احسن لعبه عظيم ياساري

تاخذلك قوطي او حطبه وتجدعه وتروحون تدورونه بس لا حد يشوفك وانت تجدعه
والبلوت له طعم بالبراد
الطعس الذهبي
03/11/2006, 04:48 PM
ماعندي رياضة في البر