وش احسن محل رحلات بالرياض

[المصور الواعد]

السلام عليكم ورحمة الله


اخباااااااااااااااااركم



وش احسن محل رحلات متكامل وسعره حلو في الرياض
هل القاضي او السنيدي او مكشات او الكشاته او او او ؟؟؟؟


نبي ارائكم الله لايهينكم

[راعي المكشايت]

برق الحيا شارع الميه اشوفه رخيص وحليو اما الكشاته فيه اشياء حلوه وتصنيع محلي

اما السنيدي يا دافع البلاء غلاء

[GMC 111]

من ناحيتي انا لايوجد ولا محل في المملكه نقول عنه ممتاز ولا جيد جدآ

كلها مش حالك لامن ناحيت جودت السلع ولا توفرها ولا الأسعار الناار

[ابو نايف التميمي]

السنيدي الام

والباقي عيالها

[Abo Alia]

من ناحيتي انا لايوجد ولا محل في المملكه نقول عنه ممتاز ولا جيد جدآ

كلها مش حالك لامن ناحيت جودت السلع ولا توفرها ولا الأسعار الناار
اوافقك اخي لا يوجد ولا محل متكامل
القاضي محل مهم لجودة خيامة :good2: لاكنة يفتقد لمعضم الوازم الاخرى
برق الحيا محلة صغير ولا يوجد فيه الا بضائع محدوده ، ( وان وجدت فيه بعض البضائع التي لم اجدها عند غيره مثل شواية ابو الوليد )
السندي ما شاء الللللله محلهوكبير وفخم وليس مغبر مثل باقي المحلات :good2:، ولاكن يجب ان لا تغرك المظاهر حيث انه رغم كبر محله وامتلائه بالبضائع الا انك عند التدقيق سوف تصاب بخيبة الامل، مثل قد ترى ان احد ارففه الطويله مزدحمه بالماقد من اوله الا اخره،، لتكتشف بعدين ان كلها نفس الموقد، ونفس الشي بالنسبه للمفرش نفس البضاعه مكرره على الارفف كان الرجال ما عنده مخزن جايب كل بضاعته في صالة العرض :p.
عيب ثاني لن تجد عند السندي اي بضاعه لمتافسيه، مثلا لا اذكر اني رائي اي من خيام القاضي عنده :mad:.
ساكو قد تجد فيه بعض البضائع حق الخواجات،،وخصوصا المواقد،،ولاكن تضل محدوده جدا.
في رائيي افضل محل زرته (واكرر كلمة زرته لاني لم ازر كل المحلات طبعا) هو القناص في الدمام لتنوع الشديد في بضائعة حيث سوف تجد عنده منجات القاضي والسندي جنبا لجنب :good2:
لاكن حتى هذا المحل ما شفت عنده مواقد البريموس.
في النهايه مافي كامل غير وجهه سبحانه وتعالى :D

[أسير المساري]

الكشاته حليوين من ناحية الاسعار لكن ينقصهم بعض الامور وبرق الحيا اسعاره غاليه شوي لكن السنيدي اسعاره نار نار نار نار

[المصور الواعد]

بيض الله وجيهكم ... مااااااااقصرتووو يالذيابة .. الله يجزا كل واحد رد ويرزقة ويزوجة


لكن سؤالي الأخير عن فراش البر سمعت ان أفضل فراش هو فراش الفصول الأربعة
وش أحسن نوع .. من أي محل .. وع كم اسعارة؟


تعبتكم معي .. الله لاااااااااا يهيييينكم

[متعب العساف]

السنيدي هو اكثر شي تحصل الي تبيه تحت سقف واحد

[مكشاتي مدني]

تبي نصيحة اخو محل البرية اللي بالروابي افضل محل وراعية نصوح ويخاف الله واغراضة اصلية ومتكامل ماشاءالله روح البرية ولاراح تندم

[ابولولو]

تبي نصيحة اخو محل البرية اللي بالروابي افضل محل وراعية نصوح ويخاف الله واغراضة اصلية ومتكامل ماشاءالله روح البرية ولاراح تندم

:good2::good2::good2:

وبعده برق الحيا

[المصور الواعد]

تبي نصيحة اخو محل البرية اللي بالروابي افضل محل وراعية نصوح ويخاف الله واغراضة اصلية ومتكامل ماشاءالله روح البرية ولاراح تندم



بيض الله وجهك ونصيتحك ان شاء الله في محلها

لكن وين وصفة بالضبط اي شارع لاهنت ؟

[ابولولو]

بيض الله وجهك ونصيتحك ان شاء الله في محلها

لكن وين وصفة بالضبط اي شارع لاهنت ؟

الوصف واضح ياالحبيب

بعد مخرج 15 وانت متجه شمال وماسك خط الخدمه اول دخله شارعين من عند شركه المياه ومصلحة الدخل والزكاه بااتجاه الشرق امشى الين تجيك الاشاره شف محلهم قبل الاشاره على يدك اليسار



جوال 0540200095 أحمد

[دايم الخير]

من وجهة نظري محلات الكشاته والبرية وبرق الحيا متقاربين من ناحية اهتمام الكشاته و نوعية العرض

وكما قال احد الاخوة السنيدي الأم وهذول عيالها !!

هناك محل الفراسه للتفصيل وبعض المعروضات جيد فيها

[شربوش]

الكشاته مكمل وبضاعته جيده الله يوفقهم

[مكشاتي مدني]

بيض الله وجهك ونصيتحك ان شاء الله في محلها

لكن وين وصفة بالضبط اي شارع لاهنت ؟
وصفة طال عمرك اذا دخلت مخرج 14 وانت بالدايري باتجاة المطار شمال اول ماتجيك فرع مصلحة الزكاة والدخل لف من عندها يمين وخل الزكاة يسارك وانت متجة شرق هذا شارع الزبير بن العوام ابد بعد ماتتعدى ممشى ابن القاسم يجيك اول اشارة شارع عنيزة لف دوران يوتيرن ويجيك على اليمين علطول

[هابكيدو]

من ناحية كثرة المعروض السنيدي...
أما الأرخص فهو الكشاتة...
وابوخالد ما يقصر معك....علمه غانم بيض الله وجهه ومن يقرا هالكلام

[مواطن]

برق الحيا

الكشاتة

البرية

[راعي الاند]

بسم الله الرحمن الرحيم

وبكل اسف لا يوجد محل يفي بجميع احتياجاتك .... يعني اذا بغيت شي لازم تروح لكذا محل عشان تحصلة يعني ما فيه محل جامع الكل. كل الي عندنا قز صحن عزبة وجرابات حط تحتها مية خط كل شي له اجراب؟؟؟؟ ملعقه يفصلون لها اجراب صحن اجراب زراديه اجراب .... وانت ماشي.

لكن الشكوا على الله مافيه احد من هالتجار فكر يفتح محل متكامل كل ربعنا يقلدون بعض!!

الله يوفق لكن عموما انا ابكتبلك اسامي المتوفرين

الرمايه غالي
البريه اشياء محدودة وبس مفيد بتعبيت غاز الدبات
السنيدي ... للاسف غالي وبضاعته 100% صيني
برق الحيا ... كان كويس وفجئه قلب غالي!
الكشاته محدود البضاعة

[بدر سليمان]

الكشاته.. صراحة أسعاره منافسة بمعنى الكلمة ومن واقع تجربة بأسعار شنط العزبة وجودة الخياطة شيء مرة يستحق.. اخذت لفة على أسعار الشنط عند برق الحيا والسنيدي أسعار الشنط الكبيرة كلهن نفس القماش صيني" بحكم ان الشنط الكبيرة ماتجي غير الصيني الا تفصيل" وتتراوح ببرق الحيا والسنيدي من 120 إلى 145 وأخذته من الكشاته ب 58 ريال فقططططط.. ونصيحة رح للسنيدي وبرق الحيا والكشاته وسو مقارنة بأسعار الشنط بالذات وشف فرق الجودة....أما الشنط الصغيرة جربت برق الحيا قبل ثلاث سنوات تقريبا تنزاني ولين الحين اكرفها كرف سواء سفرات او كشتات وبالمطارات قبل شنطة ملابسي وممتازة "تنزانية" بس ما اشوف ان جودتهم مثل ماكانت...تركيزي هنا على الشنط والتفصيل.. اتمنى قدمت مايفيد والله يرزقنا ويرزقهم.. تحياتي لك

[رحال شمال]

تبي نصيحة اخو محل البرية اللي بالروابي افضل محل وراعية نصوح ويخاف الله واغراضة اصلية ومتكامل ماشاءالله روح البرية ولاراح تندم

الله يبارك فيك ... راح نجيه باذن الله بس هل عنده المواقد الاصليه بريموس وكوفيا وغيرها

[krm9]

كل محل وعند ما يميزه

[رحال شمال]

السنيدي بضاعته في الفتره الاخيره اغلبها صيني وغير معروفه يستوردها باسمه ... كذا الواحد مارح يشتري يكفيه تجارب ...


على فكرة من يخبر موقد كوفيا العقرب ابو لي ( هوز ) طويل الي لقيته هوزه قصير وتورطت فيه ماينفع مع دبت الغاز الزرقاء كود بتوصيله

[رح هس]

البرية ...برق الحيا...ثم ساااكووو:D

[hwi]

برق الحياء معرضهم زين والأسعار كلهم للأسف غالين الكشاته تعاملهم محترم ويساعدون العميل قدر الإستطاعه البريه غالي تعاملهم مع العميل للأسف لامباله بلعميل تقل انهم يعطونك فلوس مو انت اللي تشتري منهم ووالله اني ما اعرف ولا واحد من المحلات اللي ذكرت وذلك كله عن تجربه..

[بروفيسور2007]

ابعد عن السنيدي وتلقا السعر المعقول والجوده
السنيدي خذت منهم شنطة عزبه ومااستخدمتها الا سنتين او اقل ومركونه بمستودع وفجأه احتجت للعزبه وبعد مابغيت اشيلها تقطعت السبت في يديني كأنها محترقه من الشمس مع العلم انها تحت مظله وهذا دليل على رداءة الخامات المستخدمه

[مكشاتي مدني]

الله يبارك فيك ... راح نجيه باذن الله بس هل عنده المواقد الاصليه بريموس وكوفيا وغيرها
البرية تخصصة دوافير عندة كوفيا وادوفير ايطالية اصلية لها قاعدة حديد مرهمة بطريقة فنية وكل شيء عندهم شنط تنزانية وابريق ودلال ودوافير واشياء كثيرة ويعبون لك الغاز بسعر ممتاز وروعة

[المصور الواعد]

بيض الله وجيهكم يالذياااابة لااااااهنتم

وبالنسبة لفراش البر تخبرون هاليومين برد وش احسن نوع

[مكشاتي مدني]

بشر اخوي رحال الشمال عساك لقيتة محل البرية للرحلات ولا توك ماوصلت له

[الفضلي 11]

كان لي شرف زيارة المحلات المذكورة
وكلامي ليس للمقارنة فكل محل له ما يميزه وعليه كذلك الملاحظات
ونصيحة لكل الأخوة اصحاب المحلات اخذ النقاط التالية بعين الاعتبار

1. الاهتمام بمظهر المعروض وهذه الصفة يتفوق السنيدي على الجميع
2. لايعقل أن تكون وكيل سلعة ولاتتوفر لديك فالواجب أن يكون لديك دراسة عن خبرة وتجربة عن حاجة السوق وتغطيتها أولا بأول وهذه سلبية تشترك فيها كل المحلات وأقلهم في ذلك السنيدي أيضا لخبرته الطويلة ومتاح له ماليس متاحا للغير من سعة المعرض والمخازن
3. الجودة للأسف الشديد السنيدي يأتي أقلهم حظوظا فقد وفر أغلب ما يحتاجه المكشاتي ولكن يؤخذ على بعضه أنه سريع التلف او غير مدروس بطريقة صحيحة
4. البرية قدم ميزة ممتازة بالصيانة والتعبئة وهذه تحسب له ولكن المكان المخصص لذلك غير مناسب فالأفضل أن يكون في زاوية مؤخرة المحل وليس في الواجهة
5. بعض المحلات للأسف الشديد يعرض مالديه بصورة جميلة وعندما تزوره تجد خلاف ما يعرض والله يكون في عون من كان في الرياض ويتعني مسافة 350 كيلو ذهابا واخرى عودة للقصيم لأحد المحلات ويجد الغبار والبعثرة وعدم التنظيم وهذا ما حصل معي ولكن احمد الله انه كان في طريق سيري ولم اكن اتعناه فلم البث الا عشر دقائق وخرجت من سوء ما شاهدت
6. مكشاتي كان جديدا في العرض واسلوب الديكور ولكن مع مرور الأيام قد يكتفي من يزوره بزيارته مرة او مرتان ثم يقف لأنه يجد نفسه امام نفس المنظر والأفضل اعادة النظر في طريقة العرض ولكن يبقى المعرض من أميز المعارض في جودة المعروض وتوفرها بصفة دائمة
7. بيتي والرحلة خطوة جديدة في توفير قطع الغيار تفوق على كل المحلات الأخرى فيها وكذلك نجاح مبهر في تسويق مالديه في المحلات الأخرى يحتاج الى تنوع اكثر في العرض حتى يجلب زبائنا اكثر
8. لم يتح لي زيارة محل رفيق الدرب لوجود المحل في منطقة زحمة وهذه تحسب عليه ولكن عوضها بالتسويق الناجح في كل محلات الرحلات وكذلك لم يتاح لي زيارة الرماية أما وكيل بريموس بادحمان فارجو من كل المشكاتية ان ينسوه بالمرة فحاليا ليس محلهم
9. القاضي لديه منتج خيمة القاضي ويجلب كل الزبائن ولكن بعد اقل من شهر وفي عز الموسم لا ترى هذه الخيمة فقد انقطعت فهل يعقل ذلك ولديه محل كبير ولكن منظم بشكل غير مدروس ويحتاج عناية اكثر
10 . برق الحيا مكان المحل جدا ممتاز ويشجع على زيارته لأنه في الطريق ولكن بطيء في توفير الجديد واما الكشاتة فما زال في حاجةالى خطط مدروسة لتطويره
هذا ما اتيح لي ذكره من خلال ترددي على الرياض حيث يعالج ولدي فيها ويكون لدي وقت فراغ كثير اقضيه بالتردد على هذه المحلات
وأرجو أن لايفهم من كلامي أي مقصد آخر ولكن خدمة اخواني المكشاتية وكذلك نصيحة لأصحاب المحلات أن يعرفوا حاجة المكشاتية ونظرة الزبائن لمحلاتهم حتى يحققوا المزيد من النجاح والتطوير

[رحال شمال]

بشر اخوي رحال الشمال عساك لقيتة محل البرية للرحلات ولا توك ماوصلت له

مشكور اخوي على التفاعل الرائع ان شاء الله اجيه اليوم او باكر واعطيك العلوم . ومرة اخرى مشكور .

[أبوعبدالرحمن الأسعدي]

السنيدي انصحه يقلب محل مواعين افضل له ... قديما السنيدي ممتاز ورخيص الان غالي والبضاعه صيني درجه ثالثه للاسف ومن تالي صار محله زي محل السيف الي تحت كله مواعين وقدور !