سجل هنا تجاربك المخيفة اثناء الكشتات [الأرشيف]

مشاهدة النسخة كاملة : سجل هنا تجاربك المخيفة اثناء الكشتات

turkiq

04/09/2006, 10:45 AM

موضوعنا شيق وياليت الجميع يشارك ولايبخل علينا اكييدكلنا كشتنا ويمكن البعض منا مر بتجارب مخيفة سواء مع جن او حيوانات مفترسة او مع قطاع طرق او ظروف جوية او تضاريس سيئة ......الخ المهم معضمنا ماشاء الله كشت وبعضنا كشتاته عالمية بمعنى الكلمة وتسجيل تجربتك هنا مفيدة لكل انسان مبتدئ او جاهل قولوا بسم الله نبدا من بدا

ناصح

04/09/2006, 11:55 AM

موضع شيق

تفضل قصتي على هذا الرابط (http://www.mekshat.com/vb/showthread.php?t=51370)

أبو فراس

04/09/2006, 12:06 PM

السلام عليكم ورحمة الله وبركاته

الافضل انك تبدا انت مادام انك صاحب الموضوع

.

turkiq

04/09/2006, 03:50 PM

خلاص انا بشارك لكن اخاف احرقها عليكم واجيب اخطر مشاركة

المهم قصتي ما كانت في كشته كنت في سكن شركة وهذا السكن في منطقة صحراوية مقطوعة بحكم نشاط الشركة وفي ليلة ظلماء ليلة خميس وكل زملائي يومها كانو مسافرين كل واحد لاهله يقضون نهاية الاسبوع وانا ما سافرت لاني من ديرة بعيدة والسفر اسبوعيا لها متعب ومكلف
المهم ما اطول عليكم

وانا جالس بغرفتي الساعة واحده ونص ارتب لي اغراض سمعت صوت خرفشة من وراء الباب بالضبط وقلت اكيد هذا واحد من الشباب رجع لسبب ما وقمت فتحت الباب

ولا شفت ولا مخلوق

مافي الا خلا خالي ورب عالي

سكرت الباب بسرعة وقفلته من الداخل وبديت احس الخوف يسري في عظامي لان الصوت اللي سمعته صوت محاولة لفتح الباب
وقمت بنية طيبة ولا في بالي الا ان واحد من الشباب رجع

تعوذت بالله من الشيطان الرجيم ورحت للسرير وانا افكر ولاجاني نوم وبعدها يمكن بساعتين

قمت من الفزعة على اصوات حصى يتحذف على الباب
طالعت من الشباك ولا شفت شي ابدا

قعدت اهوجس للفجر وبعد ما طلع النور قدرت انام

زملائي لمن رجعوا حكيتهم القصة وذكر لي واحد منهم قديم بالشركة ان حكاية الحذف بالحصي سبق وحصلت معه

تمت القصة

ريان الشمال

04/09/2006, 05:37 PM

هذا الله يسلمك ...........
كنا طالعين رحله بريه في النعيريه الله يرزقها بالسيل اللي يغسل عنها حرارة الصيف
القصه وهيا انه كان واحد من الشباب المتواجدين معنا تقدر تقول عنهـCITY BOY...... طلعنا نجربع وشلناه بالغصب معنا الاخ
مايعرف عن الجرابيع اي شي ولايربطه بها اي صلة معرفه مسبقه وحنا نطارد الجرابيع النظام معروف ينزل الاول ويساعده اللي بعده الحين جا دور خوينا قال OKاللي صدنا يكفي مادري يمكن من باب الخوف او يخبي الخوف ومايبينا ندري والشعب كلهم عارفين بطولاته في البر الزمناه انه ينزل زعل الرجال وجلس على حافة الحوض (الموتر اللي معنا ام اعزيز. ددسن)
السواق اسرع زي العاده بس بفجئه غير متوقعه مدرينا الا خوينا طايح قلنا نرجعله بعد هالمهمه ابعدن عنهـ2 كيلو وحنا راجعين طفا السواق النور وهويعرف مكانه اقولكم مانسمع الاصوته تقول غرقان بدموعه وصلنا عنده ومحد تكلم قال ابوالشباب انتم اخوياي راعين البكـ آب
اثر الرجال تلخبطة اعلومه وقام يحوس بالكلام.........
بعدها بمدة اصر الايطلع للبر بس ايش برفقة الكشاف الخاص له والسلاح الابيض بانواعه.........
وفي النهايه نتقول اللي مايعرف الصقر يشويه
انتهت القصة.....................
الله يعيد ذيك الايام بالخير

الأخضر

04/09/2006, 05:39 PM

1- كنت في رحله عمل عام 1417هـ إلى هجرة الخرخير
وسكننوني في بيت من الجاهز جنوب الديرة يقولون إنه يخص إدارة تسمى ( شؤون الخليج ) المهم في الليل صكيت باب البيت ودخلت غرفتي وإنسدحت ومادريت إلاّ والباب يفتح وأطمر ومافيه أحد وصكيت الباب وبغيت أقفله ما لقيت قفل ورجعت لفراشي ومرة ثانية فتح الباب ... وكان باب غرفتي مردود مادريت إلاّ وباب غرفتي يفتح بعد لكن بهدوء وسمعت صوت المفصلات ... وحسيت إن شعر راسي وقف وكل شعرة لحالها من الروعه ... وقمت ولعت النور ودروت وصكيت البيبان وقلت الدعوى ما بدهاش ... وزبنت الدين ... وقريت الورد وصرت اكرر أية الكرسي ونمت بدون مشاكل الحمدلله .
ذكرت القصة لصديق يمارس الرقية وعنده علم بالتعامل مع أهل الأرض فقال أنت السبب في تماديهم معك ولو أوردت أو قرأت أية الكرسي وتصور لك احد منهم باي صورة ونفثت عليه مباشرة لحرقته بإذن الله ... وهم يعلمون ذلك ويخشون من لديه علم ويلعبون ويآذون من يجهل ويخاف منهم من باب الأذية .
2- في إحدى رحلات الصيد إفترقنا بين الجبال من الصبح على أن نتقابل الظهر .. واثناء مشيي شاهدت عش طائر جارح في مكان صعب في عرض أحد الجبال فقررت الصعود للعش ... وبعد جهد ومحاولات للوصول إليه وعند الإقتراب منه نشبت ولم أستطع المواصلة أو الرجوع وأصبت بروعه وخوف شديد من الموت لأن اقل خطأ مني سوف يؤدي إلى سقوطي لمسافة عالية جداً وقعد متمسك لأكثر من ساعتين في مكاني وبغيت أصيح من هانشبة والروعه ولأن الطيحة تراولي كل ما تحركت وفي الساعة الثالثة سمعت صوت أحد يناديني من بعيد أثره واحد من الأخوان ويوم قرب علمته السالفه وإني ناشب وخايف ... راح بسرعة وجمع الباقين وجوني بعد حول الساعه وأنا على حالي وأردى وبدو يطلعون وقربوا لي وبدوا يقولون إنزل شوي برجلك اليمنى وشوي باليسرى وتمسك زين بالحجار ولا تناظر تحت ... لأنهم لاحظوا خوفوي وروعتي من الموت ... وجزاه الله خير واحد من عيال العم قربلي وصار حول رجلي وأنا داق الريوس وبدا يرشدني إلين نزلت ... لا عادت على ذاك العش وعلى اللقافة ويوم نزلوني خنقتني العبرة من فرحة السلامة .
والقصص واجد بس أعتذر لعدم الإطالة .
تحياتي .

عجمي

04/09/2006, 08:53 PM

السلام عليكم ورحمة الله وبركاته

موضوع شيق يشكر صاحب الفكرة

موقف لن انساة :

في احدى طلعات الصيد (ارانب ) بالمنطقة الشمالية طردنا ارنب بالليل وصوبناة بالرمية وزبنت ضلع ماتطلعة

السيارة

المهم نزلنا انا ورفيقي ندور الأرنب وحنا ندور بين الحصا بالكشاف لقينا هيكل عظمي لشخص متوفي قديم جداً

ومردوم

علية الحصى ,,, وتعوذنا من الشيطان وقرينا الورد ونزلنا على طووول

اخوك عجمي

بيرق العزة

04/09/2006, 10:32 PM

زوووووووووووووووووو ؟؟؟؟؟؟؟؟؟؟ مره من المرات نطرد جربوع ونا متحمس نازل وحاط رجلي وراه اذا بي بقبر في الصحراء امامي ومير امسك اول لفه واترك الطرد والاخ السائق راح وراء الجربوع ونا في ظلمه وشف عااااااد وش صارلي قدقدقدقدقدقدقدقدقدقدققدد وبرد جميع الافلام المرعبه تمر

turkiq

04/09/2006, 10:36 PM

ريان الشمال
الاخضر
عجمي الله يعطيكم العافية على المشاركة :good:

ابو فراس هاه عطنا الهرجة :rolleyes:

ويين الشباب ؟؟؟؟؟؟ ........ يالله يا شباب مشاركاتكم تكفون

turkiq

04/09/2006, 10:41 PM

شكرا ناشد الخير........

بس بيني وبينك وللتصحيح فقط (رضاء) ما فيها همزة (رضا) غلطة شائعة خصوصا تشوفها في لوحات المحلات

اخو صالحة

06/09/2006, 02:19 PM

هذي قصة صارت لنا بعد عيد الاضحى العام الماضي.....
وهي عبارة قطاع طرق

تحركنا من حائل قريب العشاء نبي يم سامودة الله يذكرها بالخير بعد صلاة العشاء

والله ماجات الساعة حوالي 12:30 الى وحنا بالينة نبي يم سامودة
كنا سيارة واحدة جيب باترول

الوكاد مشينا بتجاه سامودة بعد محطة الشرق الاوسط بشوي والا كامري تكبس بالنور وقفنا ونزلو اثنين من اخوينا ...
حنا نتحرى اخوينا جو اثنين مسلحين كل واحد معه مسدس وصوبه علينا قال كل واحد يطلع اللي معه ...

عطيناهم كل اللي معنا وانحاشو الوكاد اخذنا رقم اللوحة و رحنا يم شرطة لينا وسجانا بلاغ وبحثو برقم الوحة طلعت ان الوحة مسقطها راعيها لها ثلاث شهور....... واتذكر اللوحة ط ن ب 516

مع ان الطريق كان ملي بالسيارت ولكن قضاء وقدر

خليف العيد

06/09/2006, 05:38 PM

بسم الله الرحمن الرحيم
السلام عليكم ورحمة الله وبركاته

طلعت انا وأحد الزملاء من هواة البحث عن الاثار في شمال محافظة الزلفي العام الماضي وكان وقتها برد شديد المهم وقفنا السياره وكل واحد مسك له طريق يبحث على رجوله مشيت مسافة كيلو عن خويي والسياره وبعد شوي سمعت صوت هدير جمل التفت يمين ويسار مافيه شي نزلت راسي للبحث لانه فيه اسهم حجريه وحريص عليها المهم بعد فتره سمعت بوري سياره
التفت إلا وش التفت والله ياخوان مابيني وبينه مايجي خمسين متر وش توقعون
جمل (بعير) املح وراعي السيارة هو راعيه اخيراً صاربيني وبينه اطالع سيارتنا بعيده خويي عند السيارة يطالع فينا اخيراً وصلنا خويي اسأله ماشفت البعير وهوناوي على شر يقولي شفته قبل يلحقه راعيه لكن كنت احسبه ناقه طيب فرضنا انه ناقه وجاي يد رهم اكيد الوضع ماهو طبيعي
اخيراً ماعاد اروح معه لويقول اللي يقول
يعني(التوبه من ناس اغبياء)
وسلامتكم
اخيكم ابوسامي
(( الـزلــــــــــــــ باحث اثارـــــــــــــــــــفي ))
اللهم انت الشافي المعافي اشفي اخينا ((البـــــاهــي))

نايف الحربي

08/09/2006, 07:05 AM

السلام عليكم

مشكور على الموضوع الأكثر من رائع

هذي قصه صارت للناس اعرفهم وهي الحقيقه تخوف وتضحك في نفس الوقت :eek:

طالعين للبر وطاقين لهم خيمه طبعا هم بعيدين عن البلد المهم جاء الليل وهم معهم سياره وحده قربم السياره

من الخيمه علشان يشبكون لمبه معهم يسوون على نورها العشاء

المهم استواء العشاء وقاعدين يتعشون ويسولفون بالجنون طبعا فيهم خوف شوي هم ثلاثه

شوي الا ذرا الخيمه دخل عليهم ياولد :eek:

يصدقون يكذبون الا وتطفي اللمبه ودخل عليهم شي غريب عاااد شف انواع الصيااح اللي وطاء العشاء واللي طلع من الخيمه كلها

المهم طلعوا من الخيمه مدري وشلون اطلعوا ولعم بالتريك الا اللي دخل عليهم

وش تتوقعون ؟ :confused:

السياره تبي تعشى :D

كانت على رفعه شوي وتدحدرت ودخلت عليهم

شف عااااااد انواع الضحك

اتمنى تكون اعجبتكم

بن عاقول c.o

05/11/2006, 01:07 AM

والله أنها قصص مثيرة وشيّقة ... ومفيدة لأخذ العبرة وتوخّي الحذر مما يجهله المرأ
مشكورين على التفاعل والحماس ولو أنها جايه متأخره

everyshark

05/11/2006, 02:47 AM

بسم الله الرحمن الرحيم
هالقصة صارت عام 1423 وحنا في راس ابوعلي بالجبيل كنا نايمين فوق الصندقة في الليل حدود الساعة12 والا انا اغفي على الساعة 1 الا اشوف جنب الساحل الا صوت غريب كنه محرك ديزل وتتراوا لي اشكال طيور غريبة وانا عاد من الخوف انزل تحت الثوب واظل ارجف لين تطلع الشمس ولله واشوف الا ولا في شي ابد ابد وادكر للحين هالشكل شايف حمار في هالليل واثر الصباح ما في لا حمار ولاهم يحزنن وخبروني اهل البحر انه دا الجن يسمونه ام البقيق

فنجال السيف

13/11/2006, 02:45 AM

السلام علليكم

موضوع صراحه جميل

المهم

القصه هذي كنا حول عفيف واقرب ديره لنا تقريبا 30 كيلو المهم كنا طالعين حول ضلع وكان الوقت متاخر وتحتري اخويانا وحنا ندور

محل شفنا نور سياره متجه لنا وما عطيناه وجه ورجع وبعد مده يوم ديورنا لقيناه ملحم فينا ومطفي النور وشغل نوره واسرع وخفنا واسرعنا

شوي ولحم فينا وزدنا السرعه وكنا نمشي تقريبا 130 ويوم دخلنا الاسفلت كان ملحم فينا مررره وكان يحاول يتجاوزنا وما عطيناه مجال

وكان يدفنا علا خفيف ويوم دخلنا الديره مشى وتعدانا وصراحه موقف لا يمكن ان انساه وناسف على الاطاااله ........

هواوي

13/11/2006, 03:49 AM

موقف صار لواحد من اخوياي

الساعه كانت 10 تقريبا او 11 كنا جالسين في المخيم واتصل علينا اخو واحد من خوينا وهو مرتبك وما يعرف يتكلم وفي حاله شيه هستيريه لدرجه انا اخوه الي كلمه ينتفض من الخوف من صوته وبغا ينهبل يقول اخوه شكله انخطف

الي فهمناه انه يقول انا بينكم وبين البقالات الي في مفرق الطوقي الي يودي للصمان تعالوني بسرعه ويستنجد ويصرخ وهو منهار

المهم رحناله ولقينا بينا وبينه تقريبا 18كيلو ولقيناه في حاله يرثالها مصلب جوا السياره ولا كان احد حوله ولا طالع فينا بس يناظر قدام المهم نزلنا وسمينا عليه وركبناه السياره معنا وهو في حاله لا وعي مدري وش لون اوصف حالته ولكن جسده صاحي وعقله غير صاحي يعني فاصل لا يسمع ولا يتكلم ومطيع في نفس الوقت ((عمره 18 سنه)) وبعد ما اخذناه وسمينا عليه ورجعنا البيت وجا واحد من اخوانه شيخ فاضل قرا عليه علمنا عاد وش الي صار له

يقول كنت ماشي تقريبا 120 ومشغل النور الداخلي ومستانس وخاش جو وفجئه لمح شي توقع انه انعكاس النور في قزازة السائق

المهم يقول واطفي النور الداخلي الا وفيه واحد جنب القازه يركض جنب السياره وانا كنت ماشي 120((طبعا جني)) المهم يقول حسيت اني في حلم وهو يطالع فيني ويضحك ويقول هذاالي اذكره ويحلف بالله انه ما يعرف كيف وقف وكيف دق علينا المهم طريق الصمان ماعد هو رايحله ابد والقصه حصلت قبل النقطه في الثمامه وسط اسبوع من شهر 10 عام 1423 هجري

جساس بن مره

18/11/2006, 05:15 AM

http://s124.photobucket.com/albums/p21/kkkk_025/th_43aa0178e9.gif

كل قصه اروع من اللي قبلها يعطيكم الف عافيه وفعلا مسليه وياليت الاخوه اللي عندهم قصص يعطوناها

مكشاتي الجزيرة

22/11/2006, 09:51 AM

السلام عليكم
أذكر مرة يوم كنا صغار ..طلعنا للبر مع العائلة وكان الجو ربيع وموسم فقع..
فنزلنا في احد الاماكن ونصبنا الخيام وهذا الكلام الساعه 10صباحا وبعد الغداء قررنا التمشي في البر والتفقع ( التقاط الفقع ) فخرجنا في مجموعات..وسلكت كل مجموعة جهه مختلفه...أنا خرجت مع أخي الكبير وخواتي ووالدتي وخالتي ثم ابعدنا عن المخيم قليلا وكنا منهمكين في ألتقاط الفقع..وفجأة قابلنا قطيع من الكلاب الكبيره المسعوره وكنا نراها تعوي وتنبح من بعيد وهي متجهه لنا فرمينا الفقع واطلقنا سيقاننا للريح..وحنا نركض وهي تركض خلفنا ..موقف مرعب..ونركض وهي تركض خلفنا الين أقتربت منا كثيرا ..فقالت لنا والدتي خلاص قفوا مكانكم فوقفنا وواجهنا الكلاب وقالت والدتي الكلاب تخاف اذا وقفت وهاجمتهم واذا هربت لحقتك..فوقفنا وألتقطنا الحجاراة ورميناها عليها لكن الكلاب تنبح ولم تهرب ..كان نباحها مرعب وكان الصوت يهز المكان من كثرة هذة الكلاب..فقررنا المشي ببطء والتهويش عليها ..وبعد قليل جاء والدي بالسيارة وركبنا وخرجنا من هذا الموقف المرعب والحمدلله

المنصف

22/11/2006, 09:57 AM

هالقصة لواحد من الربع
يقول رحت اقنص وباره ووقفت بالليل عند التلعه اللي ابغى اطلع لها الفجر وتعشيت والليل ظلام دامس والمكان موحش
وسيارتي هايلكس نصف هنقلين وفرشت فراشي بالصندوق وسميت بالله ونمت يوم جاء تالي الليل والا أقوم من هز السيارة
وانا آقف من الخوف وظلام دامس ما أشوف يدي وأدور الكشاف اللي بجنبي مالقيته تدربى من الهز
وكلما وقفت طحت الى ان تماسكت ووقفت ومسكت الحنايا والا السيارة حاطة رجلها واتمسك ماأدري وش السالفه
وشوي والا تضرب في جرف والاني على وجهي ضارب القزازة الخلفية وخشمي يصب دم حسيت به من حرارة الدم
وانا أقوم وأدور الكشاف بس أبغى أشوف وش السالفه والا السيارة مافيها أحد ودماني مغرقة ثوبي
والله وأنا أتنافض من الخوف وأطالع والا مافيه أحد أثرني واقف بعلو التلعه ومعشق السيارة بالثالث أحسبنه الأول
طبعاً مافيها فرملة يد قديمه أثر السيارة دحدرت فجأة تالي الليل ولا وقفها إلا الجرف اللي بأسفل التلعه
وسلامتكم
وإذا أعجبتكم فيه قصة ثانيه بكره انشاء الله لنفس الشخص القناص
أخوكم المنصف

turkiq

04/11/2010, 07:00 AM

الله يعطيكم العافية .... ما اعتقد في مانع اننا نرفع الموضوع لمزيد من المشاركات
اللي عنده شي لا يبخل علينا

a7md al-q9em

04/11/2010, 07:24 PM

..........................

راصد بيئي

04/11/2010, 09:07 PM

ياجماعة الخير
صارت قصة لشاب اعرفه
وقصة صارت لي انا
وسأذكرهم كلهم

اما القصة الأولى هي لخويي

يقول كنت ماشي بالليل عند قرية سلطانه الي على خط القصيم قبل التفتيش بالرياض ومعاه سلوقي جالس يتقنص فيه
المهم سلطانه معروفه انها قريبه من منطقه تدريب قوات الأمن الخاصه ومعروفه انها يوجد في برها بيوت قديمه متهالكه
يقول صاحبنا كنت ماشي بالهايلوكس ومعي السولقي واطرد جربوع ورى جربوع ومبسوط
يقول ولا فيه حصني شطف قدامي واطرد وراه بالموتر والسلوقي ورى الحصني وانا متحمس اصيح للسلوقي ابيه يلقطه
المهم لا ذيك بيوت الطين قدامي بالليل والحصني يدخل له خرابه يقول لحقته ونزلت من الموتر ومعاي كشاف والسلوقي معاي

يقول دخلت بين الخرابات افتش ومتحمس مره
شوي ولا سمعت هاك الصوت الي تقل صوت 100 رجال يمشون !!
ويطلعون صوت بس موب كلام كذا " هه هو هه هو هه هو "وصوت مشي رجلين كثيره

يقول انا قلت بقلبي بس ذولي جن بيحشرونني بالخرابه
وجلست وسجدت وقلت مالي الا ربي وانا دموعي اربع اربع والسلوقي جلس يلعب بشماغي وانا ودي اذبحه واذبح الحصني معه

المهم شوي ولا صوت المشي يقرب من عندي وانا ماعرف ادعي ولا اسمي من الخرعه
وذكرت اني مشغل خالد عبدالرحمن وانا اطرد قبل شوي قلت بقلبي شكلهم انطربوا على خالد وجوني :(
الزبده شوي ولا واحد يككلمني وانا يوقف شعر راسي من الخوف مدري منهو
قالي وشعندك هنا ؟؟
قم وقف!!

يقول انا قمت وطاقتني ام الركب واشوف قدامي ولا فيه رجاجيل واجد لابسين لبس عسكر!!
قلت للرجال الي كلمني انتم جن ولا انس؟
ضحك وضحكوا كلهم وبعضهم تسدح من الضحك وكانوا حول ال100 عسكري

قال حنا طلاب قوات الامن الخاصه دايما نتدرب في هذي المنطقه
وش جايبك بين هالخراب؟
قلت له والله معي سلوقي وشفت لي حصني ولحقته ودخل هنا وقلت بطلعه بس
ضحكوا وقالوا لاعاد تجي هنا ولانشوفك مقرب لها

وانا ماصدقت خبر
والله واركب الموتر وماردني الا القير
وسلامتكم

ابو يوسف GX-R

04/11/2010, 11:02 PM

كانو شباب كاشتين وكان هناك واحد يحب يسوي المقالب بالشباب المهم الرجال عنده طريقه اذا شاف واحد متركي على الخيمه طبعا يبان ضهر الرجال وش يسوي@

يجي ويشوت الرجال الي متركي على الخيمه طبعا الشباب ملو منه الرجال جاك واحد وجاب دبه الغاز وحطه كنها رجال متركي ويجيك ويشوت دبه الغاز وينكسر اصبع الرجال وخذ ضحك الشباب عليه وتاب عقب هالدبه صار مايشوت احد ابد الله يستر

باث 3

05/11/2010, 08:40 AM

ما شاء الله تبارك الله قصص مثيره وجميله ومخوفه في نفس الوقت,

هذي القصه حصلت لي في الدوام,

أذن المغرب وقلت ميد خويي أنا بروح أصلي وبجيك,

المهم رحت المصلى وكان بعيد شوي من محلنا,

وأقول في نفسي أرب أني أحصل جماعه يصلون عشان أصلي معهم,

دخلت المصلى وكان تقريبا ثلاث أمتار في ثلاثه صغير جدا ولا لقيت أحد,

المهم كبرت وصليت وقريت رافع صوتي تعرفون صلاة مغرب ما فيها شئ,

وأقرأ الفاتحه يوم وصلت ولا الضاااااااااالين,,

ألا الفاجعه اللي وراااااي آآآآآآآآآآآآآآآآآآآآآآآآمين:eek:

أنننننننننننننننننننننحش وأكمل صلاتي سري خخخ:Dوالله من الخووف

وأطلع وأنا مخترررررش,خخخ

أتمنى أنها حازت على إعجابكم,,

تقبلوا تحياتي

القرشه

05/11/2010, 09:22 AM

ربي يحفظكم ما فيه اسوأ من انه يمرض معك احد او يخرب موترك وتقعد يومين ما شفت موتر

فارس الشمال33

03/06/2011, 11:31 AM

يعطيكم العافيه على القصص الشيقه يا أخواني

القصه هذي صرت مع ناس من الجيران

كانوا الشباب 2 اخوان طالعين يجربعون المهم الاخ الكبير يسوق واخوه الصغير ينزل للجرابيع المهم السواق حب يخوف اخوه لما نزله يطرد جربوع شاف له قبر ديور بالسياره وترك اخوه حول القبر وابعد بالسياره عشان يخوف اخوه قام اخوه الصغير ونزع ملابسه
ووقف على القبر و بعد فتره جاه زي الكسر في رجله تحول الى سرطان وتوفى الله يرحمه

ام الدجيجات

28/08/2015, 04:02 AM