المساعد الشخصي الرقمي

مشاهدة النسخة كاملة : مغامرة الربع الخالي


deer
27/01/2013, 01:23 PM
السلام عليكم ورحمة الله وبركاته

فيه واحد من الجماعه فيه قل صح عسا الله يشفيه ويعافيه .. وجاء للبيت عندنا قبا كم يوم

كان عندنا عزومه لواحد من الجماعه ... والمجلس مليان وصاك رجاجيل .. ورفيقنا

مهب صغير ... لكن سولف علينا سالفه من سواليفه ... وطبعا خذ وخل ..

يقول قبل يجي اربعين سنه .. كنت طالع اقنص لحالي بالربع الخالي .. على الفرت حقي ..

ويوم توسطت بالربع الخالي ولاني ناسي اعبي الموتر بنزين ..

والله ويقطع علي الموتر من البنزين ويطفى ... ويقول والله واتلفت حولي ولا

ما حولي احد .. واصوت باعلى صوتي ولا من يرد لي الصوت ..

ويقول ولا الدنيا قيظ وحر وشموس تشوي القعس .. والله وانا اللي اخذ شماغي وارش

عليه شوي ماء من الاديتر واجغم لي جغمتين من الاديتر واعض شليلي وابدا امشي

.. وامشي يجي ثلاثين كيلو عن موتري ... وارقى على راس طعس واتشوف ..

ولا اني اشوف لي شي يبرق ويلمع من بعيد .. واوجه له .. واناظر ولا طرف حديده

مندفنه بالنفود .. وانا اللي احفر له بشوف وشي .. وتطلع جناح طياره .. وانا اللي احفر

والقاها طياره من طيارات هتلر حقت الحرب .. واطلع الطياره وادحدرها من فوق النفود

واركب مكان الطيار وادق سلف لكن ما اشتغلت .. وانا اللي انزل من الطياره ..

وافتح الشنطه حقة الطياره واطلع شنطة العده وافك التانكي حق البنزين .. واشقله على

ظهري .. وارجع لموتري .. واصب البنزين بتانكي موتري .. واركب الموتر واسمي

واشغل وتشتغل من اول نقرة سلف .. واتوحى صوت المكينه وكني مستنكره شوي ..

يقول انا موتري طافي بنقره .. وغراز .. وانزل وانسم للكفرات شوي .. واعشق

الموتر L واحبس كلتش شوي .. وادعس له ابيه يطلع من النقره ..

ويقول والله يوم فز الموتر ذيك الفزه اللي ما فزها قبل .. وانا اللي انطرب وادعس له

مع النفود .. وادعس .. شوي الا اسمع صوت اول مره اسمعه .. طيييييييييييييط ...

وشوي اللي الموتر قام يرجف .. ووشوي ويقلع .. ويطير .. ويرتفع سماء ..

وامسك فرامل ولا يهدي مرتفع خشم الموتر للسماء .. واناظر الطبلون ولا هو مكيم ..

ويقول وانا اللي افضي الموتر .. يوم تعدل وجهه .. واناظر من الدريشه ولاني ما اشوف

شي .. مغيم سماء .. وياولد وش الدبره .. ويهديني ربي والقمه بالريوس .. يوم هزع

وجه الموتر .. تحت ويجيك على وجهه .. نزووووول .. وانا اللي اسايس الموتر ..

بالقير والدركسون .. وتبينت لي الارض .. واناظر الا ذاك الخط اللي قدامي .. واوزن

الموتر عليه واجيك نازل واول ما لمس الموتر الارض وانا اللي اسحب الجلنط ..

يوم قام الموتر يخمس اللين وقف .. وهو بس وقف .. الا شرطه ودوريات نازلين

برشاشات ويمسكوني .. ويركبوني سيارة شرطه غير شرطتنا ... ويدخلون بي

ذاك القصر ويدخلوني على ذاك المجلس اللي فيه واحد يدخن غليون .....

وادقق في وجه الرجال واتمقله الا والله ابوعدي صدام حسين " رحمه الله " ..

ويقوم ويسلم علي ويقول روعتنا يارجال نحسبك اف 15 .. وانا اللي اضحك واقعد

اسولف معه واتقهوى وشوي يجيبون الغداء رز تمن .. واتغدى واعين واجيكم ساري

للرياض .. يوم خلص السالفه والناس تضحك وهو اللي يزعل ويمصع ذاك اليمين انه

صادق ولا كذب علينا .. الله يشفيه ويعافيه .. لكن والله سواليفه ما تشوفها

ولا بافلام الكرتون ..

وسلامتكم
أبوعابد 22
27/01/2013, 04:27 PM
الله يهيديك بس الرجال صادق
واصلن عيب انك تكذب الرجال ولا بعد حلف وما صدقته
والله لا اشوف فلم في التلفزيون مثل ذي السالفه والله
لكسر التلفزيون ههههههههههه
اجل صدام وماقلكم بعد مر على هتلر وعطاه رصاص بلجيك ههههههههههه مالها مطار
ابو ماجد 2
27/01/2013, 07:02 PM
حلوووووووه
صح لسانك
لكن صاحبكم صاحب خيال خصب
ويمكن لو هو في بعض الدول لأستفادوا من قدراته في انتاج افلام تعتمد على الخيال
deer
28/01/2013, 09:17 AM
الله يهيديك بس الرجال صادق
واصلن عيب انك تكذب الرجال ولا بعد حلف وما صدقته
والله لا اشوف فلم في التلفزيون مثل ذي السالفه والله
لكسر التلفزيون ههههههههههه
اجل صدام وماقلكم بعد مر على هتلر وعطاه رصاص بلجيك ههههههههههه مالها مطار


شكرا لمرورك وتعليقك .. لو سمعت باقي سواليفه كسرت كل الاجهزه عندك هههههههه
deer
28/01/2013, 09:21 AM
حلوووووووه

صح لسانك
لكن صاحبكم صاحب خيال خصب
ويمكن لو هو في بعض الدول لأستفادوا من قدراته في انتاج افلام تعتمد على الخيال



والله ان افكاره وسواليفه ما تشوفها ولا افلام كرتون .. اشكر لك مرورك وتعليقك ..

اذا تعرف احد بهوليوود علمنا نرسله لهم .. لكن خوفتي يعطيهم السواليف اللي

ما اقدر حتى اكتبها هنا من قوة السالفه ..
ابو ماجد 2
29/01/2013, 10:46 AM
والله ان افكاره وسواليفه ما تشوفها ولا افلام كرتون .. اشكر لك مرورك وتعليقك ..

اذا تعرف احد بهوليوود علمنا نرسله لهم .. لكن خوفتي يعطيهم السواليف اللي

ما اقدر حتى اكتبها هنا من قوة السالفه ..

ههههههههه
حياك يالغالي
اخاف اذا طلبوا منه قصص خياليه يعطيهم الواقع وليس خيال
النبهاني
29/01/2013, 05:03 PM
وعليكم السلام ورحمة الله وبركاته
اخوي ما اقول الا الله يوسع صدرك بالعافيه
ويسلمك من كل شر
deer
30/01/2013, 07:45 AM
وعليكم السلام ورحمة الله وبركاته
اخوي ما اقول الا الله يوسع صدرك بالعافيه
ويسلمك من كل شر


هلا بك .. والله ان ردك علي اكبر شرف لي وانت من انت بهذه الخيمه
اسعدني والله مرورك الكريم والله يجعل الجاي من ايامك اسعد من اللي راح




تقبل مني كل تحيه واحترام
deer
30/01/2013, 07:51 AM
ههههههههه
حياك يالغالي
اخاف اذا طلبوا منه قصص خياليه يعطيهم الواقع وليس خيال



اي واقع الله يجزاك خير ... اقولك الرجال الله يشفيه عليه خيال غير طبيعي


ويمكن هذا اللي هبله ... كل السواليف خياليه لكن مشكلتها


تستحي من الله قبل كل شي ... عشان كذا ما اقدر اكتبها


الرجال مهبول وقلبه خضر ... ابلش يعني


الله يشفيه ويعافيه واشكر لك مرورك وردودك
المهاجر انا
30/01/2013, 07:52 AM
لله يشفيه برحمة لكن ينفع يكتب قصص خياليه
الله يوسع صدرك وصدره والجميع
يكفيني نظرة
30/01/2013, 10:08 AM
انا اجد انه من الممتع اني اجلس مع شخص مثل هذا ياخي يشلخ عليك وانت تستمتع ولانتب ملزوم تصدقه خله ياخذ راحته واذا قضى طقق نعيلاتك وتوكل على الله اهم شي يملا المجلس موب تبلش به يقعد ويسكت وتمل من الجلسه .
ابو ســــاره
30/01/2013, 10:32 AM
ههههههههههههههههههه
خويكم هذا وناسة ويوسع الصدر
وترى فيه ناس كثيرين عايشين ومغنيهم الله على ذالسوالف عند الشيوخ والله من الشرهات على ذالسوالف
قوافي ( أم نهار )
30/01/2013, 04:05 PM
عليكم السلام ورحمة الله وبركاته
سالفه جميله جمل الله حالك برضى رب العالمين
اشكرك اخي الفاضل
تحياتي وتقديري واحترامي
اختك
..قوافي..
سامرنجد
30/01/2013, 10:52 PM
يعطيك العافيه وسالفه توسع الصدر والناس الان اصبحوا جديين بدرجه ممله لاسوالف ولاقصص
انا اخبر واحد زي خويك بس عاد مايحلف انه صادق واللي حوله كلهم يعرفون انه يبكش عليهم بس يبون يضحكون وهو يقولهم قبل يسولف تبون صدق والا من اللي مايقلن قصده من الي مالهن مطار يقولون عطنا ويسولف وهم يضحكون
وسيع البنايد
02/02/2013, 04:18 AM
بيض الله وجهك وسالفه رهيييييييييييبه نستاذنك في نقلها للمتعه
deer
03/02/2013, 08:19 AM
لله يشفيه برحمة لكن ينفع يكتب قصص خياليه
الله يوسع صدرك وصدره والجميع

مشكور على مرورك وتعليقك

والله يوسع صدرك ومن يقرا بالعافيه
deer
03/02/2013, 08:21 AM
انا اجد انه من الممتع اني اجلس مع شخص مثل هذا ياخي يشلخ عليك وانت تستمتع ولانتب ملزوم تصدقه خله ياخذ راحته واذا قضى طقق نعيلاتك وتوكل على الله اهم شي يملا المجلس موب تبلش به يقعد ويسكت وتمل من الجلسه .

والله هو من ناحية ممتع صح ... لكن مرات يشطح بقووووه ونضحك غصب ويزعل علينا ولا يكمل السالفه .. انا اللي ودي اعرفه وشلون يفكر ذا الافكار ومن وين له ..
deer
03/02/2013, 08:23 AM
ههههههههههههههههههه
خويكم هذا وناسة ويوسع الصدر
وترى فيه ناس كثيرين عايشين ومغنيهم الله على ذالسوالف عند الشيوخ والله من الشرهات على ذالسوالف

تعرف لنا احد نوديه له ويشرهنا ولك النص ...

اخاف يشوتنا اذا سمع سواليفه هههههه

مشكور على الرد
deer
03/02/2013, 08:26 AM
عليكم السلام ورحمة الله وبركاته

سالفه جميله جمل الله حالك برضى رب العالمين
اشكرك اخي الفاضل
تحياتي وتقديري واحترامي
اختك

..قوافي..


قوافي ... ردك والله شرف لي وانتي ملكة هذه الخيمه

تقبلي اختي الكريمه مني كل الاحترام والتقدير

ومرورك هو كل الشرف لي

تحياتي وتقديري
deer
03/02/2013, 08:28 AM
يعطيك العافيه وسالفه توسع الصدر والناس الان اصبحوا جديين بدرجه ممله لاسوالف ولاقصص
انا اخبر واحد زي خويك بس عاد مايحلف انه صادق واللي حوله كلهم يعرفون انه يبكش عليهم بس يبون يضحكون وهو يقولهم قبل يسولف تبون صدق والا من اللي مايقلن قصده من الي مالهن مطار يقولون عطنا ويسولف وهم يضحكون

خويكم عاقل .. لكن خوينا عسى الله يشفيه ويعافيه

يتكلم من جد .. ويختمها بايمان مغلظه ..

اشكر لك مرورك وتعليقك
deer
03/02/2013, 08:29 AM
بيض الله وجهك وسالفه رهيييييييييييبه نستاذنك في نقلها للمتعه

هلا بك اخوي وسيع البنايد .. انقلها لو تبي على سطحه

هههههه

اشكر لك مرورك وتعليقك
ابوكشتات
03/02/2013, 08:48 AM
الله يجزاك خير على النقل الممتع . خويكم يسمى فاكهة المجلس .انا اشهد
deer
03/02/2013, 11:02 AM
الله يجزاك خير على النقل الممتع . خويكم يسمى فاكهة المجلس .انا اشهد

الله يوفقك ويسعدك ... فاكهه بعض الاوقات .. لكن بعض


السواليف يمكن تخليك تهون عن الاسم

اشكر لك مرورك وتعليقك
أنفاس رجل
03/02/2013, 11:23 AM
نسخ
يقول انا موتري طافي بنقره .. وغراز .. وانزل وانسم للكفرات شوي .. واعشق

الموتر L واحبس كلتش شوي .. وادعس له ابيه يطلع من النقره ..



أجل توماتيك ويحبس كلتش
ههههههههههههههههههههههههههههه

اقول اخذه لأقرب عجوز تكوي على الراس

هههههههههههههههههههههههههههههههههههههههههه

الله يشفيه يارب ويخلية لعين ترجية

تحياتي
راعي المكشايت
03/02/2013, 12:19 PM
هههههههههه

والله تذكرني في واد مثله والمشكله الاعظم انه يحسب ان الناس تصدقه كل ما يقولون الرياجيل سالفه قال قد صارتلي مثل السالفه ذي ويمسك خط والمشكله انا ما نقدر نخليه ولا نعزمه عن شبت ضو او سمره عند اي واحد منا ولاكن المفروض ان كل رجال يعرف ان كثر الحكي يقلل من هيبه الرجال وبسمته عن الرجال شرواكم
deer
03/02/2013, 01:57 PM
نسخ

يقول انا موتري طافي بنقره .. وغراز .. وانزل وانسم للكفرات شوي .. واعشق


الموتر L واحبس كلتش شوي .. وادعس له ابيه يطلع من النقره ..



أجل توماتيك ويحبس كلتش
ههههههههههههههههههههههههههههه


اقول اخذه لأقرب عجوز تكوي على الراس


هههههههههههههههههههههههههههههههههههههههههه


الله يشفيه يارب ويخلية لعين ترجية



تحياتي


هلا بك والله اخوي .. منب قايل لك خذ وخل ...

وعلى فكره ترا السيارات القديمه فيها L ...

ويمكن هذا الشي الوحيد اللي صدق فيه ..

الله يشفيه ويعافيه .. لكن تخبر لنا عجوز تكويه ..

ما لك الا اجر من رب العالمين .. وترا راسه كنه خريطه

من المكاوي يومه صغير ولا نفع ...

الله يشفيه ويعافيه

اشكر لك مرورك وردك
deer
03/02/2013, 02:00 PM
هههههههههه

والله تذكرني في واد مثله والمشكله الاعظم انه يحسب ان الناس تصدقه كل ما يقولون الرياجيل سالفه قال قد صارتلي مثل السالفه ذي ويمسك خط والمشكله انا ما نقدر نخليه ولا نعزمه عن شبت ضو او سمره عند اي واحد منا ولاكن المفروض ان كل رجال يعرف ان كثر الحكي يقلل من هيبه الرجال وبسمته عن الرجال شرواكم

هلا بك والله يالغالي .. رفيقنا عايش بعالم ثاني ..

الشكل ما فيه كلام .. لكن يقط خيط وخيط ..

واللي ما يعرفه اذا بدا يسولف .. يصدق .. لكن ..

بعد نص السالفه والله يضحك غصب عليه ..

وكثير من سواليفه ما سمعنا نهايتها لانه اذا ضحك احد

يزعل

اشكر لك مرورك وردك
قوافي ( أم نهار )
03/02/2013, 09:15 PM
قوافي ... ردك والله شرف لي وانتي ملكة هذه الخيمه

تقبلي اختي الكريمه مني كل الاحترام والتقدير

ومرورك هو كل الشرف لي

تحياتي وتقديري


شرف الله مقدارك وعز مقامك اخي الفاضل
الذيب سرحاني
04/02/2013, 02:07 PM
هههههههههه

يالله تشفيه وتعافيه مما ابتلاه

خويكم ذا محكواني مهوب بسيط عليه أفكار يمزجها بين الواقع والخيال
وحيد قلاسكو
06/02/2013, 10:20 AM
ابداااااااااع عشرة من عشرة يازززززززززين سالفته حتى لوانها مصفففففففففففة:D نبي كل سوالفة
شعيب الحزيمي
08/02/2013, 10:15 PM
الله يشفيه

سوالفه تونس

عزالله وسعة صدري جزاك الله خير
حسـام
13/02/2013, 12:05 PM
يمكن صادق ليه لا
وليه تكذبون الرجال :mad:
انا احس انه صادق :D
ياسر الشريف
17/02/2013, 07:12 PM
شكرا لك على هذه السالفه بارك الله فيك
تكاشف ابروقها
22/02/2013, 12:56 AM
حرام يمكن صحيح مايندرا كل شي جايز