هل هذا بسبب وزن الموتر ولا الكفرات

[مخاوي العشه]

بسم الله الرحمن الرحيم

السلام عليكم ورحمة الله وبركاته


يا أخوان عندي فورد F150 غماره ونص

طبعا قير تماتيك


الموتر نشيط بالنفود ماشاء الله لكن فيه حاجه مادري هل هي
من الكفرات ولا وزن الموتر ولا عشانه تماتيك

ان اذا وقفت بالرمل وماطقيت الدبل ومشيت يبدا يحفر ولا يمشي

يحفر بمكانه لازم اطق الدبل

علما ان وزن الموتر هههه ماشاء الله 4700 كيلو يعني 5 طن الا شوي

الموتر عليه اضافات شد وتانكي كبير دايما به ماء وعزبه

دئما الكفرات اذا دخلت النفود يكون الهواء

تحت ال20 بشرطه او شرطتين بمقياس ضغط الهواء


فما ادري ليش دايم يحفر بمكانه

هل كل التماتيك كذا


في امان الله

[فرفور بريده]

ماظن وزنه 5 طن الا شوي .. اتوقع بحدود الطنين الا شوي

شي اخر

العزم له دور ترا .. خصوصا الامريكيه يعطيك عزم قوي بدورات قليله عكس الياباني

انت جرب ادعس خفيف لاحسيت انه يمشي ويحفر زود الدعسه شوي

وخلك شوي لمين يمشي

انا كذا

بس موتري ولد عمه سييرا 1500

[فيصل البهيشي]

لا تدعس على الاخر

واذا فيه تراكشن خله شغال فالقومة لأن عندك الافجي فيه نظام يمسك الكفرات ما يخليها تدور وتفحط حتى لو تدعس على الاخر هو يفصل الدعسه من حاله مايخلي الموتر يفحط لكنه مايصلح فالطعوس لنه يمسك الموتر ومايخليه يمشي زين

[بدوي جنوبي]

مخاوى العشه أكبر غلط ما تشغل الدبل
بصراحه انا أستغرب من اللى ينزل البر وما يشغل الدبل
حتى لو كانت السياره خفيفه او قويه

لازم تشغل الفور ويل (دفع رباعى) الخفيف على الاقل
لان تشغيله يضاعف لك العزم بدوران أقل للمحرك
ويعطيك حماية للقير الاوتو والقير العادى يحافظ على الكلتش وللمحرك من الضغط الزائد
ويمنع زيادة حرارة المحرك ،،، ويقلل من أستهلاك الوقود و و و و الخ ،،،،

نصيحه شغل الدبل عشان ما تخسر القير .

وطبيعي ان الكفر يحفر مكانه لان لا يوجد دفع امامى مساعد ولا تنسي الوزن له دور .