امنيه لصقاقير السعوديه وخصوصا المنطقه الشرقيه ،،،،،،،،،،،،

[الطبشي]

رساله موجهه الى المسؤولين واتمنى انها توصل الامكانيات موجوده والموقع موجود وكبار الصقاقير في المملكه مايقصرون والفكره موجوده ليش مايكون فيه دعم لمسابقه خاصه با الصيد با الصقور سباقات الدعو والهدد والمزاين وش الي ينقص المسؤولين اتمنى انها توصل ولاتحرمونا من تعليقاتكم الايجابيه

[عادل الهلباني]

اتفق معك ..
والله يعطيك الف عافيه "
ونقول يارب توصل رسالتك :

[صقر الاول]

ان شاء الله توصل رسالتك

[لبيه يمنادي]

ان شا الله اتحصل من الامراء او احد الرجال الهياار اللي يتبنها ويقوم بها ... والمملكة ماتخلا من اللي فيهم خير ويشجعون الماروث الشعبي

[ابرق الحرار]

ان شالله خير وعسا الرسالة توصل

[قلب ذيب]

المسابقات هي ترقيه للتراث ومحافظه عليه , والمسئولين امامهم المسابقات تجرى في الدول الخليجيه المجاوره
ويش اللي مايخليهم سباقين الى دعم التراث والشباب , يضمون ضايع الشباب من التفحيط ودورة المولات .
الامكانيات متوفره والصحاري بالاف الكيلو مترات !؟
لكن الفساد المستشري في الاجهزه المختصه وابتعاد المسئولين عن ذلك النوع من الرياضات والدعم ادى الى ا همال مثل تلك المسابقات , يعني ام رقيبه تنثر فيها الملاين وهي لاتصل الى صغار الملاك من الابل , لكن الهوامير والحيتان تطحن الاخضر واليابس .... ( وسمعنا غسيل اموال ) !!؟؟ لانريد ان نخرج عن الموضوع لكن المؤكد ان هناك حاجات ملحه يحتاجها الناس لم يلتفت لها فكيف بمثل تلك المسابقات التي يعتبرها البعض بطره .

[رآعي جملآ]

اخوي موجودة السباقات .. عندك بالنعيريه

لاكن ماعندي اي خلفيه عنها

[عزااااام-1]

الي في النعيرية الي كان قايم عليها ومحتويها بن جبيرين المحافظ وبعد مانقل الغيت انا كنت عندهم اول الوقت وبلغوني لاامراء ولا كبار المسؤلين يفكرون باي اهتمام للمواطن وبدون تطبيل

[طيري خلا]

اتمنى من الامراء والمسؤلين ينظرون لحالة الصقاقير

وين سباق النعيريه اول يازينه ويازين جمعة الصقاقير حنا نبي دعم كل دول الخليج فيها سباقات الا حنا

والله اتمنى اتمنى المسؤلين ينظرون لهذا الشي والاماكن كثيره بالشرقيه من جنوب الاحساء الى شمال الحفر كلها قيعان طيبه

تصلح للسباقات ويرجع تراث الصقاره وكل سنه يزيد حماس الصقار وياخذ طير افضل من السنه اللي قبلها


بس نبي من يوصلها للامراء والمسؤلين تكفووووووووووووووووووووووووووون تكفووووووووووووووووووووووووووون

تكفوووووووووووووووووووون تكفووووووووووووووووووووووووووووووون تكفوووووووووووووووووووووووووووووون


نبي سباق نبي سباق

يعطيك العافيه يالطبشي

[alaaly]

السلام عليكم ورحمة الله وبركاته ،،،،،


مرحبا بك اخوي بو محمد ، طال عمرك طلبك مهب صعب لكن يبيله واحد من الكبار يهتم فيه في البدايه بس وبعدها الشركات تموله ويستمر ويتطور الموضوع

[قلب ذيب]

فقد اسمعت لوناديت حيا .......... ولكن لاحياة لمن تنادي .
هم لويسمحون بجمعيه للصقاقير كان من خلال الاشتراكات والتبرعات ورعاية بعض الجهات بتم عمل كل ماهو مطلوب ومهم ومايحتاجه راعي الطير , لكن لايرحمون ولا يخلون رحمة الله تنزل .!؟
يعني سباق النعيريه ومهرجان النعيريه ( وفعاليات ربيع النعيريه ) كان ابن جبرين مفعلها ومشتغل عليها وعز الله الرجال ماقصر .
طيب..... ابن جبرين راح محافظة بقيق والشرقيه بها امير جديد حد يوصله من روس العرب ولاهوب مقصر .

[شنوان]

ابن جبرين مسكين وشسوي لحاله لازم احد يدعمه وجزاه الله خير الي قايم على هذا الش لحاله وجعل والديه الجنه هو ومن في المنتدى الطيبين وكل القائمين على هذا الصرح الطيب وتشجيعهم على هذا التراث الاصيل
المري بن حصوان فاز في المركز الاول واعطوه 3000 ريال هل هذا يعقل
وشارك في قطر واخذ المركز الثاني واعطوه 300.000
ولكن نقول عسى الله يزينها عندنا وتصير الجوائز افضل من كذا
وبارك الله فيكم

[رآعي جملآ]

للاسف ان المسؤلين لا ينظرون لهذه الهوايه اي اهتمام ..

والاغلب منهم لا ينظر لها من باب اسعاد وتجمع الصقاقير ووناستهم وانما لاسباب ماديه ولذالك لا يلقون لها اي اهتمام لانها ماتدخل لهم فلوس .

وسامحوني على الصراحه

[راع الطيب]

انشهد يارعي جملا

[طيري خلا]

مرحبابكم نرجع لموضوعنا

يا راعي جملا يا بعض المسؤلين يا فيهم صقاقير واجد بس ما يبون يدعمون هذي الهوايه
اوش رايك يالطبشي نسوي سباق مصغر بتقول نبي دعم الدعم خلها علي لو تكون الجوائز

جهاز طيور + 10000 ريال + تجهيز الموتر كامل من القناص + الجائزه تكون طير تبع شاهين

يعني مثل المركز الاول =10000 ريال
الثاني = تجهيز الموتر كامل للمقناص
الثالث = تبع شاهين
الربع = جهاز طيور
_______________

هذي الجوائز لكل فئه مثل الحر والشاهين والجير الشاهين والجير الحر والجير البيور

100 الف تجيبلك كل الجوائز
10000 للحاصلين على المركز الاول من كل الفئات صارت 50الف

وال 50 الف الثانيه نشتري منها 5 اجهزه ابو ثلاث يطلع ب 3800 مع الريش 19000 الف المجموع

وتجهيز المواتر من المقناص ب 3000 المجموع 15000

والتبع الشاهين من 3الاف الى 4 الاف

تطلع كل الجوائز ب 100 الف ريال واللوازم الباقيه الصقاقير ماهم مقصرين

كذا سوينا سباق متكامل اذا ما في احد ينظر لنا

[طيري خلا]

شوركم يالربع يهمني

[راكااااان]

طير الخلا عزالله كلامك ذهب

[طيري خلا]

يا مرحبا يا راكان حنا ودنا نشوف الصقاقير والجمعه الطيبه والتعارف بينهم

وبيع وشرا ونسوي سوق مصغر للبيع الصقور في نفس السباق ونشوف لنا كم شاعر والكل

من الصقاقير بيدعم وشرط بتشوف اللي جايب بيت الشعر واللي جايب خيام واللي جايب العامل حقه يزين القهوه

واللي جايك يقول قصيد واللي جايب ذبيحته معه يعني بأذن الله كل شي يصير بس يبي العزيمه من بعض الصقاقير

وبأذن الله بنحصل دعم

[راشد الهاجري999]

طير الخلا والطبشي والجميع ان نطرنا الدعم بنبطي عظم
الشباب في الغربيه ولان هل الوادي سووا سباقات بينهم درع سيف ياخي حتى حمام عادي اهم شي نظهر وتظهر سمعة الشرقيه
اضم صوتي لك ياطير الخلا وانا عجزت احاول في الشباب مدعى هافمون ولا في فايده
اصملوا وانا معكم ونحط شاره نبداء فيها بدايه بسيطه والخير بيجي
اخوكم راشد طامي

[وسًاام]

الله يوفقكم ويحقق امنيتكم
والشي هذا بيفرح كل صقااار

[السعدعالي]

اتمنى انها تتحقق ويحيون التراث الشعبي

[البروالطير]

أن شاء الله أتكون في السعودية
أفضل السباقات للطيور لكثرة الصيادين بيها
ولعراقة هالهواية والخبرات
والاهم بأنها تلم شمل الكثير من الصقارين الخليجيين
خلال الفترة القادمة لصيد الكراوين
أقتراح :-ممكن تسوو مسابقة لصيد الكراويين
بين اعضاء مكشات علي الاقل الموضوع موصعب
وتكون بداية خير لسباقات الملواح وغيرها..