المساعد الشخصي الرقمي

مشاهدة النسخة كاملة : بالنسبة لمقاسات واعمار الطيور


ولـد الدوادمي
13/09/2006, 08:17 AM
اولأ ابداء بتحية الإسلام

السلام عليكم ورحمه الله وبركاته

حياكم الله

بالنسبه للطيور لاهنتو من عمر كم يبدن يصيدن وتكون مقاساتهن وشي ؟

مثل 12 ونص*12ونص هل هو يصيد

أو الـ13*13 هل هو يصيد

وكم ياخذ معك الطير وانت تدربه وعلى فكره ابتعبكم شوي لاني توني مبتدى

وأي واحد له خبره بالطيور يرسلي ايميله على الخاص

واكون لكم شاكرا

أخوكم / ولـد الدوادمي
الوافي عزام
13/09/2006, 08:54 AM
مرحبا بك ياولد الدوادمي

بالنسبه للطيور فهي من اول سنه تطير من اعشاشها تسمى( فرخ ) سواء كانت شيهانه والا وكريه والا حر
وبالنسبه للصيد فالطير ما يطير من عشه الا هو جاهز للصيد :
يعني من يوم يشبك الطير يعلم على كيف راعيه ويفعل ان شاء الله

وبالنسبه للتعليم يختلف من شخص الى شخص

فبعض الناس تلقاه يطيح الطير ويعلمه بسرعه فائقه
والبعض الآخر تلقاه راكد على طيره ولا هوب عجل وهذا هو الأفضل

ومقاسات الطيور

الوكارى والشياهين الجبليات تلقاها تقريبا من 12 الى 14 وشوي ولا تنسى لكل قاعده شواذ يعني تلقى وكريه كبيره والا جبليه كبيره ...والخ
الشيهانه البحريه وهي من الطيور الفائقة السرعه ومقاساتها تبدا من المثلوثه 13الى الوافيه 15
اما الحر فيبداء من المثلوث حول 14وهو اصغر شي بالحرار الى الوافي وهو اكبر شي بالحرار ومقاسه الى 18

وانت كمبتدأ عليك بالوكري كبدايه وجالس لك صقار عشان تاخذ منه كل شي مرحله مرحله ولا تستعجل على الطير وعلمه . واذا خلصت من التعليم وطاح الطير ( يعني طاح اللي براسه ) علمه على اللي تبي حمامه , كروان , حباره .... وترى الوكري وترى الوكري يعجبك وطير صامل

اهم شي تعلم طيرك على الملواح ( الشلو ) عشان ماتبلش به لآصار مامعك حمام واعجل لك
والشلو زين للياقة الطير ( تمرين ممتاز )

اعذرني على التقصير ما معي وقت والا مايكفي هالكلام
وارجوا اني افدتك
وان كان هناك تعليق او زياده لمن هو اعرف مني فليتفضل مشكورا
والسلام عليكم
م-ت-ن-ا-ث-ر
13/09/2006, 11:33 AM
الوافى ماقصر بس ابى اضيف ان الشياهين الجبليه التبع مقاسهمن 8انش الى 10 والتامه الجبليه الانثى من 12 انش الى 13انش والوكرى التبع مثل الجبليه التامه فى المقاس والتام الوكرى مثل الشاهانه التامه البحريه من 14انش اى 15.50انش والبحريات التبع مثل الجبليه التامه والتامه البحريه طول 14انش الى 16 والحر اتلمثلوث التبع من 15الى 16 انش والتام يصل الى 19 النادر
وزى ماقال الوافى عزام مايخرج من الوكر الذى خرج من البيضه منه الا وهو صياد واول سنه فرخ وعمره التالى قرانيس والوكرى بطى فى الطيران وانت ابخص
ولـد الدوادمي
13/09/2006, 02:34 PM
أخي الكريم /الوافي عزام قوله شكرا لك ماتكفي والله ياجعلك ذخر قل امين بان الله يوفقك ويجزاك الخير كفيت ووفيت وعمرك طويل يارب


أخي الكريم / المتناثر بيض الله وجهك وجعل عمرك طويل والله كثر من امثالك ويخليك لوالديك

وجزاكم الله خير كفيتو ووفيتو
ابو عايد
13/09/2006, 10:05 PM
أخي ولـد الدوادمي من هنا



الصقور .. وطرق صيدها وتدريبها (http://www.mekshat.com/vb/showthread.php?s=&threadid=2133)





مالك لوا يا جراش (http://www.mekshat.com/vb/showthread.php?t=20124)



( ( الصقور كما عرفتها ) ) (http://www.mekshat.com/vb/showthread.php?s=&threadid=7348)



بواسطة التمرين يتذكر الطير الهدد !!! (http://www.mekshat.com/vb/showthread.php?t=25873)
ولـد الدوادمي
14/09/2006, 06:58 AM
تسم يمناك اخوي ابو عايد

بس انا ابي مواضيع غير هذي وختصره واكون لك شاكرا
الدندون
14/09/2006, 03:27 PM
أخوي ولد الدوادمي ..

تبي نصيحتي والعلم اللي يجمد على الشارب :)

خاو صقاقير وصاحبهم وأطلع معهم للهدد وجالسهم وانشدهم عن كل شي ..

الايام هذي بداية طلوع الطيور من الربطة وتلقى المجالس وطلعات التطليق والهدد واجد ..

يعني تبي تستفيد ولا تستحي من النشدة لو هي بسيطه ..

الصقارة وعلومها ما تجي الا من مخاوا الصقاقير ..

وأنت ماشاء الله عليك في غبـّه نجد وهل الطيور مالين الدوادمي وقراها ..


وسلامتك :)
الباهي
15/09/2006, 02:19 AM
كفيت ووفيت يابو محمد ولا يهونون الربع
الغايب الحاضر
15/09/2006, 11:15 AM
اخوي ولد الدوادمي الشباب ماقصرو بيض الله وجيههم لكن ماينفع الصقار مثل التدريب العملي وهذا مايجي الا بنقل الطير ومخاوات الصقاقير هل الخبره ولا تستحي تسئل عن اي شي ماتعرفه
ابو عايد
15/09/2006, 12:41 PM
السلام عليكم ورحمه الله وبركاته







خاو صقاقير وصاحبهم وأطلع معهم للهدد وجالسهم وانشدهم عن كل شي ..

الايام هذي بداية طلوع الطيور من الربطة وتلقى المجالس وطلعات التطليق والهدد واجد ..

يعني تبي تستفيد ولا تستحي من النشدة لو هي بسيطه ..

الصقارة وعلومها ما تجي الا من مخاوا الصقاقير ..

وأنت ماشاء الله عليك في غبـّه نجد وهل الطيور مالين الدوادمي وقراها ..


وسلامتك :)
:good: :good: :good: :good:
ولـد الدوادمي
16/09/2006, 09:27 PM
ياجعل من رد على موضوعي بالجنة

جزاكم الله الف خير