الفرار وتوفير البنزين مابين الـ (حقيقه) و الـ (وهم)

[عاشق التوام]

السلام عليكم ورحمة الله تعالى وبركاته

صبحكم - مساكم الله بالخير يالنشاما


قريت وسمعت الكثير والكثير عن آراء الأخوان في موضوع الفرارات وإن سبقني أحد الإخوان بطرح موضوع يهتم بنفس موضوعي


وكانت الآراء مابين مؤيد ومعارض في سالفة توفير البنزين

ومن ضمنها
أن مهمة الفرار مقتصره فقط على فصل الدبل و إراحة الدفرنس الأمامي والسيارة بشكل عام

والرأي الآخر يجمع مابين (توفير البنزين) وماسبق ذكره في الرأي الأول خصوصاً توفير إستهلاك البنزين

للعلم أني سمعت أن له أضرار بقدر ماله فوائد على المدى البعيد كالرجّه ومسحية الكفرات الأمامية وتهريب الشحم الخاص بما يسمى بالركب للموديلات من 88 إلى 97

أتمنى من لديه خيره بهذا الشأن أن يفيدنا إفادة قاطعه



وتفضلوا بقبول وافر الإحترام والتقدير

[تزبطي]

انا معي بترول 91 ربع
اتردد عليه بشكل يومي مسافة 80 كيلو

بعته وبديت اتردد على اربع ابواب97 نفس المسافه كل يوم

مافرق معي شي ابد ال97 فيه فرار

وال91 بدون فرار

مالاحظت اي تغيير وتعبيتي هي وحده
يعني اذا صار اخر الشهر 15 ريال رايح جاي هالمسافه المذكوره
مالاحظت شي ابد ولافرق
اذا كان فيه فرق فاني ما انتبهت له يعني مايستحق

هذي تجربتي لحد الان

[RW7..ALBDAWA]

والله كذآلك نفس الحكآية سمعت بآنـه ينشط عزم السيآره

[عاشق التوام]

نفس التجربه أخوي مصيبه

ونفس الموديلات ولكن الـ 97 اللي كان معي ربع

أعني بأنه كان معي 91 بدون فرارات وبعدها أخذت الـ97 وأضفت له فرارات

ولا لاحظت الفرق اللي أسمع عنه أبد



شاكر لك هالحضور يالأمير

[عاشق التوام]

هلابك أخوي روح البوادي


ياكثر ماسمعنا عنه ولكن للأسف مافي شي من اللي سمعناه

حتى راحه للسياره ما لاحظتها مثل ما يقولون أن الدفرنس الأمامي يكون أخف بعد الفرار


أسعدني تواجدك طال عمرك على طاعته

[خبايا انسان]

بالنسبه لي ,, اكبر فايدة استفدتها من الفرار هي رجة عمود الدبل ,, قبل ما اركب الفرار عمود الدبل يرج على السرعات العاليه او يرعش ,, لكن بعد ماركبته راحت الرجه تماما

[عاشق التوام]

أخوي خبايا انسان


كلام جميل أخوي لكن
أكيد عندك مشكله في عمود الدبل

لكن إن ماكانت عندك مشكلة الرجه في عمود الدبل تعتقد إن الفرار له منفعه مثل ما نسمع ؟؟؟

[محامي وراط]

امسي / اصبح على الجميع كلن باسمه ،،


اولا اشكر صاحب الموضوع على طرح مثل هذه المواضيع الرائعه


واحب اذكر تجربتي مع فرار السليماني البرازيلي النيكل ( على باث 2005 اوتو ) :


1-في كل مرة افلل التانكي يوفر معي 50 كيلو بالضبط او يمشيني 50 كيلو زيادة


( مثال : الموتر يمشي 350كيلو قبل الفرار - بعد الفرار صار يمشي 400 كيلو بنفس دعستك )


2- يفصل الدبل او الدفرنس الامامي : يزيد من عمر الدفرنس والدبل لفترة أطول ،،


3- الموتر تحسن عزمه فالفزة وصار انشط وحتى على السرعات العالية ايضا ،،


4- لو عندي رجه فعمود الدبل تختفي تماما ولكن ولله الحمد والمنة العمود سليم ومافيه رجة ،،


5- ويكفي انه سعرها مناسب لادائها وفوائدها ( 550 راكبة على الموتر وجديدة )


6- ولها ان فوق سنتين ونص وماشفت منها مشاكل ولله الحمد علما اني استخدمها دائما ،،


7- وان بغيت موترك وكالة اشبكها على وضع 4×4 يصير موترك على وضعه ومهنا ضرر ان شاء الله ،،


ملاحظة / اتوقع على الموتر الثقيل مثل الفتك والهدد او الباترول القديم ما يفرق العزم او الفزة واجد لأن الموتر ثقيل ،،
لكن البنزين على كل موتر بيفرق معك لا يقل عن 50 كيلو اضافيا بعد تركيب الفرار
واللي بيعرف يحسب لموتره بالكيلو بوضعية 4×4 ويحسب لموتره بوضعية 2×4 وبيلاحظ الفرق فالصرفية ،،


وهذا كل تفاصيل تجربتي مع الفرار ،،

[بترول88]

بالنسبه للفرار انا نفس اخوي خبايا كان عندي رجه ومع الفرار طبعا راحت ، وبنفس الوقت تفرق ب ممشى الموتر صراحه يخف كثيير ، اما توفير البنزين مادري

[عاشق التوام]

يا هلا وغلا بك محامي وراط


أسعدني مرورك وإضافتك طال عمرك على الطاعة

تحياتي لك ولهالإفادة

[عاشق التوام]

يا هلا وغلا أخوي باترول 88


شاكر لك إبداء الرأي والله يرحم والديك

تحياتي لك ولهالحضور يالأمير

[مجهر الحق]

موتري باترول ربع موديل 91 مركب لة فرارات برازيلية لها سنتين ونصف

والشي الملاحظ فصل عمود الدبل عن الجربكس الامامي يعني توقف العمود عن الدوران قوة في العزم وخفة في المشي الصرفية لم تتغير مهما حاولوا يقنعونا ابصم بالعشرة مافية فرق

اذا تبي الفرارات تدوم معك كل 9 اشهر فك الفرارات ونظفها من الشحم القديم لانة بيكون لزج يعني خفيف وشحم مرة ثانية وانسى الخراب وبالتوفيق للجميع

[Al Rasee]

مافيه فرق ابد الفرق هو اذا كان بدون فرارات او انك شابكهن يكون الموتر شاد نفسه بالتماسك وهذا ملاحظتي
موتري موديل 97 ومركب شاهين بالون اذا فصلت الفرارات مع الوقت الكفرات الاماميه يطلعن صوت واذا شبكتهن يروح والصوت بسبب الكفرات نايلون والكفرات العاديه مابهن صوت الى ناوي يركب نصيحه لاااااايركب .....

[abo naser 1]

يفرق في خفة الموتر في الأسفلت بشكل ملحوض وخصوصاً للمواتر الي ادائها متواضع
ترتاح من رجة عامود الدبل ان وجدت
توفير البنزين ان وجد فهو بنسبة لا تذكر

[المنيعي1]

هذي تجربة لي في هذا الموضوع على الرابط

http://www.mekshat.com/vb/showthread.php?t=398767

[سابرالضلع]

بالنسبة لي انا اكيد مريح السيارة لانه يفصل عمود الدبل ويفكك من الرجه وترتاح السيارة اشكل منها اول وحتى عشان ماتروح عليك الكارونه اللي قدام عشان سعرها غالي
تقبل مروري

[سلمان المعيلي]

امسيكم بالخير
انا رأيي ان ابمواتر القديمه مشكلتها ماتفصل العمود بالسرعات العاليه
بما ان المواتر الجديده اغلبها تفصل عمود الدبل مع السرعه العاليه وهذا بدوره اذا كان شابك على طول
يأثر ع الصوف وايد كلام الاخ ابوناصر والله يوفق الجميع

[بايكال]

أخي العزيز..

تبي تعرف أنه يفرق ولا لا بطيقه بسيطه جدا.
طبعا هاذي التجربه للي مركبين فرار فقط .
أشبك الفرار على وضع 4*4 طبعا الموتر في حالة الوقوف والقير على الNويجب أن تكون السياره في وضع أفقي موزون وطبعا فرملة اﻹنتظار محرره حاول اﻵن أن تحرك السياره بالدف وأنت بالخارج..ثم غير وضعية الفرار إلى2*4وأعد تحريك السياره بنفس الطريقه السابقه..راح تلاحظ الفرق واظح جدا.
وراح تقتنع أن الفرار إذا فصلته في وضع2*4وأنت في سفر خلال طريق لاتحتاج فيه إلى الدفع الرباعي راح يوفر عليك الوقود والعزم.

[محب القلوب]

يفيدونك الشباب

[مكشاتي رحال]

موضوع رائع ومشاركات مميزة ومفيدة ،،يستأهل الرفع

[مطر وربيع]

انا ركبت فرارات على الربع باترول 92
الفوائد
ارتحت من رجه عمود الدبل نهائيا
خف الدركسون بشكل ملحوض
السرعه القصوى زادت شي بسيط
ممكن 5 او عشرة كيلو يمشيك زيادة التانكي
العيوب
لازم تنزل وتعشقه
ينفرط ومابشبك وتصير السيارة دفع خلفي فقط

[عربوق]

السلام عليكم ورحمة الله وبركاتة
كلامك على متمه يامطر وهي صاير معي الان دخلت في شعيب وغرز الموتر ونزلت وفريت الفرار على 4×4 وعشق الدبل لاكن للأسف ماشبك صار فارط لاتعتمدون عليها الفرارات البرازيلية ليست عملية بالحيل
مركبها لي تقريباً سنتين

[فرار]

الفرار ممتاز وماتحس بلفرق الاعلى الجيوب القديمه ﻻكن المشكله وين الفرار الزين

[ابن المهد]

اخوي الفرار ماتلاحظ فايدته الا اذا زادة سرعتك يعني من 120 وطالع يخف عزم الموتر وتلاحظ الفرق
اتكلم عن السيارات اللي ماعندهم مشاكل مثل رجة العمود وغيره
اما الصرفيه ماعندي علم فيها

[ريان14]

صلو على النبي
اللهم صلي على محمد