........ قصه وقصيده من واقع المقناص ........

[قلب ذيب]

السلام عليكم ورحمة الله وبركاته .
في احد المقانيص واجهني الموقف التالي ...
كنا منكفين من المقناص وكنا مجموعه ليست بالقليله حوالي العشره , اتفقنا ان نمر على احد بيوت احدى البلدات ونضع طيورنا في ذلك البيت ومن ثم نظهر من تلك البلده ونمسي في الخلاء ونتابع سيرنا الى المكان الذي نقصده للسفر , وكان السبب الوجيه في عدم نومنا في ذلك البيت هو صغره وضيقه وتقادمه . والطيور سوف يستلمهن رجل مكلف بذلك
كذلك وجود البيت بين اهالي تلك البلده التي لانريدان يرانا اهلها والمتواجدين بها .
وصلنا ذلك البيت القبو ! واذا بالجماعه ينزلزن العفش من مفارش الى شنط والى ماذلك من الاغراض ! قلت لهم وش الخبر ؟ قالوا بنمسي في هذا البيت ! قلت لهم البيت ضيق . قالوا بيضمنا . قلت ما اتفقنا على كذا . قالوا . هذا الحاصل ! دخلت البيت عباره عن غرفتين وممر ومطبخ وحمام , الغرف 3/4 ضاقت بي ثيابي قلت . ياجماعه انا بمسي
برا , حد بيخاويني .
قالوا : نعم , مره يروحونو ومره يجون وبعد فتره لم يخرج علي أحد ؟!
المهم . خذيت فراشي واغراضي وحركت السياره وامست خارج البيت الضيق .
وفي الصباح رجعت ولقيت صاحب البيت نايم برا على الرصيف , لقيت بعضهم مستيقض يصلي على فراشه , صلحنا القهوه والشاي وتوجهنا الى حيث نريد بدون نقاش , حاولت ان انسى الموضوع وموقفهم السلبي .
لكن استيقظ الشعر بداخلي وقلت الابيات التاليه .

.........................................


بت ليلي يوم خلوني اخوياي . . واحسبنهم في الشدايد يفزعون
قلت من يمسي معي والليل جاي . . قالوا ابشر وانتظرت بدون عون
كل منهم ماسمع مبا حكاي . . يظهرون وينصحون ويختفون
مادروا اني في الشدايد لي مداي . . والله العالم وهم مايعلمون
في المواقف دايم تثبت خطاي . . واعرف اللي بالرخا لي يضحكون
ان رميت اصيب واراجع خطاي . . وادمح الزله عن اللي يعذرون
وعند كل الناس مابين خفاي . . كون شخص في المواقف لي يمون
والنجوم الساريه تملا سماي . . واترك العالم على مايشتهون
وقد سميت القصيده الفزعه الغايبه , وذلك الموقف اعتبره من المواقف اللي تبان فيه الرجال .

[عابر الموج]

ابو ماجد صح لسانك على القصيدة مر موقف مشابه لموقفك وقلت قصيدة من ابياتها
في مجلس الانذال عدي لحالي = والاش ماينفعك في كل الاوضاع
لو ترفعه بالجو فوق العوالي = مسكين ينزل من مراقيه للقاع
تقبل تحياتي

[(هزاع)]

يقولو اهل العرف ان السفر قطعه من نار
والنار تصهر المعادن
وبصهر المعاد يتحدد نوعه
والناس معادن
ياكثر ماتجري مشاكل على الناس == وياكثر ناس تنخدع في صورها

[لبيه يمنادي]

قلب ذيب

إنشهد أنك بفعلك هذا ذيب ولد ذيب ....

يقول المثل (( أتعرف الرجال .. قال نعم اعرفه .. قال خاويته في مطراش .. قال .. لا .. قال لعاد ماتعرفه..))

كثير من الناس تنخدع في شكله وكلامه وأسلوبه ... ولاكن ما يبين معدنه إلا لي صكت الحلقة البطان .. ساعتها

تتمنا انك في دار وهو في دار ..

بيض الله ويهك دنيا وآخرة وعسي ربي يوسع عليك مداخل الجنة أن شا لله مثل ما وسعت علي راعي البيت المسكين ..

لك كل الشكر والتقدير

[برزان1]

اخاف انك مزعلهم

[أبو أمين]

صح لسانك يا بو ماجد

وهالدنيا وغيرك معلم ياما بتشوف فيها من عجايب هالخلق

من الصديق الى اللي كنت تحسبه صديق و الايام كشفت جلده الحقيقي

لكن انا اقول ان الطيب مثلك وشرواك دايم عصامي الا ما تلقاه لحاله ولا عليه من احد

يعرف دربه ورايه يقديه .

لاهنت يابو ماجد

[قلب ذيب]

عابر الموج . هلا وغلا , فعلا الكثير منا مر بمثل تلك المواقف صح لسانك ابيات معبره .
هزاع . مرحبا فعلا بيت شعر معبر عن ذلك الواقع اثمن مرورك .
لبيه يامنادي . ماقلته هواساس الحقيقه , واكيد ان تجاربك اكثر منا في مثل تلك الحالات تقبل تقديري .
.
برزان 1 , يمكن تكون على حق الانسان غير معصوم من الخطا , مرورك يسعدني .
ابوامين . الله يحييك ماعليك زود وتلك هي حال الدنيا . شكرا لشخصك الغالي .

[راعي لادن]

صح السانك أبيان جزله يستاهلون ايقول بن حركان الله يذكره با الخير الحظري يفرح لاشاف البيوت والبلاد والبدوي ونا سته في البر الله يعطيك العافيه يا بو ماجد

[قيصوم الشمال]

ان رميت اصيب واراجع خطاي . . وادمح الزله عن اللي يعذرون


صح لسانك
اختصرت الكثير في هذا البيت ..... ونعم الاخلاق


بينت فيه انك لديك فراسة في معرفة الناس وانك بشر تخطئ وتصيب وتراجع اخطائك
وانك ممن يسامح رفيقه بالزله اذا صدرت من اللي تهقا فيهم الطيب


ومثل ماقال اخونا الفاضل لبيه يامنادي خوة الرجال تبين معادنها


تقبل مروري وتقديري.

[نجم404]

صح لسانگ يابو ماجد

[الوريمان]

الله لاهينك على موقفك الطيب
وصح لسانك على هالقصيده
الطيبه ×

[أهم 1]

والله يابن الحلال ربعك مايستاهلون انك تقسو عليهم بهذه القصيده على شان مارقدو معك بالبر
والدعوه سهله وانا اخوك
((( الصديق يدمح زلة رفيقه )))

[جير دبي]

والنجوم الساريه تملا سماي . . واترك العالم على مايشتهون
صح السانك يابوماجد على الابيات
الي تعبر عن معناةالشاعر
طرح طيب من طيب
تحياتي لك

[توكار]

ياسلام انشهد انك من ناس وافيين عارفيين المواجيب

الله يستر عليك وعلى كل مسلم

[قلب ذيب]

راعي لادن . الله يحييك والله يذكر بن حركان بالخير كان المقناص معه وناسه .
قيصوم الشمال . يسعدني تواجدك وتحليلك وفراسة عقلك وصدق تواصلك .
نجم . 404 صح بدنك حضورك يسعدني .
الوريمان . الله لايهينك على حضورك الجزل .
اهم 1 . احترم وجهة نظرك , ولكل موقف ظروف , انا لوقسيت عليهم كان تركتهم .
جير دبي . هلا وغلا يسعدني تواجدك ياالغالي .
توكار . وانت من ناس محترمين يسعدني تواصلك الاخوي الصادق .

[راح الأمل]

اسمحلي اخوي سراحه خوياك مافيهم خير واهديك هالبيت من شعري المتواظع
الخوي لا صار ما ياوي لخويه ،،، اتركه وفارقه قبل ماجيك منه الاذيه
والحمد لله انت ماجتك منهم الاذيه اللي تذكر ولكن اكيد ان هالموقف اللي مريت فيه عرفت معدن كل واحد فيهم وعلى قولت القايل ( لا يغرك الطير في صفة الريش ) يعني يغرك بزوله ولسانه وتقول حر ووقت الشدايد يصير تقول جخاخه.
واسف عالاطاله وتقبل مروري.

[راشد الهاجري999]

صح لسانك يابو فهد واشهد انك كويتهم كي ينجح

[قلب ذيب]

ارحب يابوسنيده والله يحييك .
مواقف لابد منها .
تقبل تقديري .

[راح الأمل]

اسمحلي اخوي سراحه خوياك مافيهم خير واهديك هالبيت من شعري المتواظع
الخوي لا صار ما ياوي لخويه ،،، اتركه وفارقه قبل ماجيك منه الاذيه
والحمد لله انت ماجتك منهم الاذيه اللي تذكر ولكن اكيد ان هالموقف اللي مريت فيه عرفت معدن كل واحد فيهم وعلى قولت القايل ( لا يغرك الطير في صفة الريش ) يعني يغرك بزوله ولسانه وتقول حر ووقت الشدايد يصير تقول جخاخه.
واسف عالاطاله وتقبل مروري.
تعديل للبيت
الخوي لاصار ماياوي لخويه ،،، اتركه قبل ماتجيك منه الأذيه.

[قلب ذيب]

الخوي لاصار ماياوي لخويه ،،، اتركه قبل ماتجيك منه الأذيه.
شكرا لك على الحضور بيت شعر معبر وصادق , وتلك مواقف الحياه يمر به الانسان ويتعض بها .
وبيت الشعر اعلاه قريب من قول الشاعر .
الخوي لابد مايذكر خويه ... في الرخا والا العلوم الغانماتي . تحياتي .

[راح الأمل]

تحياتي لك وانا والله من سالفتك كتبت هالبيت لانه طالع من قلبي حقيقتا" لان الخوي اللي مايراعي خويه ولايحس به ويبدي نفسه على خويه هذا تركه انفع لك من مخاواه وكنت اقصد ان هالنوعيه من الاخويه لاصار هذي علومه ويبدي نفسه على خويه كنت اقصد ان تركه ابرك لان هالنوعيه من البشر ماوراه الا الاذيه وهذا شرح للبيت اللي ذكرته
( الخوي لاصار ماياوي لخويه ،،، اتركه قبل ماتجيك منه الاذيه )

[عبدالرحمن بن ذياب]

صح الله لسانك يبو ماجد
و عز الله انهم مخطين دامكم اتفقتوا و رجعوا بكلامهم
و لا تددق وأنا أخوك ادمح ترا دمح الخطا فيه راحه
تحياتي لك

[ابوالبراري]

الى اقديت فيهم ويستاهلون اكثر من كذا
عموماُ اذا انت أميرهم في المقناص وخالفوك بعد تشاور وتفاق نصيحتي لك ولغيرك ما يستاهلون من يخاويهم وفرقاهم غنيمة .
وخذ من هذا البيت :
بعض العرب ماودك تخاويه .... ودك في خبة تجدعة وتخليه


وتقبل تحياتي ....,

[ريان الخلف]

كل منهم ماسمع مبا حكاي . . يظهرون وينصحون ويختفون
مادروا اني في الشدايد لي مداي . . والله العالم وهم مايعلمون
في المواقف دايم تثبت خطاي . . واعرف اللي بالرخا لي يضحكون

صح الله لسانك

ابيات في قمة الروعه

تحياتي وتقديري

سطور (http://www.s6or.net) - صور 2014 (http://vb.s6or.net/forumdisplay.php?f=35) - نكت 2014 (http://vb.s6or.net/forumdisplay.php?f=23) - فساتين اليسا (http://vb.s6or.net/showthread.php?t=6545) - فساتين ناعمه (http://vb.s6or.net/vb.s6or.net/forumdisplay.php?f=57) - تسريحات 2014 (http://vb.s6or.net/vb.s6or.net/forumdisplay.php?f=58) - فساتين يارا (http://vb.s6or.net/showthread.php?t=6783) - رمزيات بي بي (http://vb.s6or.net/forumdisplay.php?f=79) - برودكاست بلاك بيري (http://vb.s6or.net/forumdisplay.php?f=78) - قصات شعر 2014 (http://vb.s6or.net/forumdisplay.php?f=84) - ثيمات بلاك بيري 9900 (http://vb.s6or.net/showthread.php?t=6587)- ديكورات 2014 (http://vb.s6or.net/forumdisplay.php?f=32) - غرف نوم اطفال 2014 (http://vb.s6or.net/forumdisplay.php?f=46) -منتدى الواتس اب (http://vb.s6or.net/forumdisplay.php?f=92) - منتدى سيدتي (http://vb.s6or.net/forumdisplay.php?f=30) - منتدى رجيم (http://vb.s6or.net/forumdisplay.php?f=95) - سيارات 2014 (http://vb.s6or.net/forumdisplay.php?f=104) - منتديات سطور (http://vb.s6or.net/index.php) - سلطات مختلفه (http://vb.s6or.net/forumdisplay.php?f=98) - منتديات خواطر (http://vb.s6or.net/forumdisplay.php?f=15) - منتديات ثيمات بلاك بيري (http://vb.s6or.net/forumdisplay.php?f=77)

[قلب ذيب]

عبدالرحمن بن ذياب ... اثمن حضورك , والله يسامحهم .
ابو البراري .الله يحييك مواقف تصحل في المقناص حتى لوكان خوياك اخوانك .
ريان الخلف . هلا وغلا صح بدنك يشرفني حضورك .