المساعد الشخصي الرقمي

مشاهدة النسخة كاملة : راعي العجرا والتفحيط والموقف المحرج


راعي العجراء
12/04/2013, 02:33 PM
السلام عليكم ورحمة الله وبركاته
اصعب موقف محرج لراع العجراء قبل اسبوع
كنت رايح للبيت تقريبا الساع عشر مساء يوم اقبلت على الاشاره وهي تولع حمراء ماتجملت معي
وخلتني امرق قبل ماتولع
المهم وقفت انا اول واحد عند الاشاره وطرت علي اني اذا ولعت الاشاره ابفحط بقوه ابي وليد الجن اللي بالارض يصرخ من الروعه ولام تسد اذانه يعني مراهق بالستين درجه اولى مع مع مرتبه الشرف
اشوي يوم ولعت الاشاره خضراء وان ادعس حتى بغت رجلي تدخل على المكينه ويمكن تاصل المروحه
والموتر ماصدق اني ابافحط ماكذب خبر نقز بسرعه تقل مقروص
والموتر اللي معي نشيط ويدور القلهي ويوم تحرك الا واشوف الموتر مقفاه تقول ذنب حصني ماغير يراوغ يمسافه يمكن ستين متر وانا ارفع رجلي وامشي مثل العاده ماني راعي سرعه بس شي بالخاطر
ونفذت رغبتي المطنوخه والطموحه
المهم هديت البيت قريب ماهو بعيد من الاشاره ويوم وصلت الملف اللي عند البيت وجيت ابغى الف الا والمرور السري وراي وهومولع الاشارات الي تخطف عيون الضب وهو يدق بوري ووقف طبعا انا عارف انه علشان التفحيط
نزلت من السياره وبفمي شابوره يابسه يغصبه البعير كسرته وحطيته بفمي كود تربص اشوي وتقواه
اسنوني اللي تقول شرف بيت طين طايح نصفه من الدهر
نزلت من السياره وانا والله اني خجلان على هالتصرف واشلون اتعذر للشرطي ووشلون اقدر اوجهه
المهم العسكري حول من سيارته قبلي شباب وخفيف حركه
وانا شايب يبيلي شوي اتزحزح من المرتبه وادور بعد المماسيك الي بالسياره وشابورتي بفمي مابعد ربصت زين
يوم حولت الا والعسكري الله يجزاه خير بالدنيا والاخره يوم شافني احول من السياره بهذا الوضع ومفحط وهو يضحك علي ومد يده يسلم وهويضحك ماهو مصدق اني مفحط حتى ماقدر يقول السلام عليكم من الضحك ماغير مد يده للسلام ويوم شافني وهو يرجع لسيارته ماقال اي كلمه غير انه يضحك علي
انا شفت ان الوضع طيب مع العسكري ولا قسيمه ولا شي ناديته قلت تعال ابسألك ليه وقفتني
وهو يضحك ولا رد علي
قلت علشاني مفحط وهو يضحك قلت ياخوي انا ماتعمد التفحيط بس كنت عند الاشاره ودعست بانزين
ابغى امشي وصار القير بالفاضي وعشقتت على دوسة البنزين وفحط غصب عني
ولا رد علي ماغير يضحك
قلت وبعدين ياحبيبي انتم ليه ماتعطون الشيبان فرصه يعيدون ذكرياتهم ويعبرون عن مشاعرهم
حتى ما يحسون انهم شيبان

ومازال الرجل يضحك واعطاني ضهره وراح يركب سيارته وهو مقفي قلت له تخيل انك تركبني بالسياره وتوديني للمرور وتقول لقيت الشايب مفحط والله يابصير اضحوكه من جديد
وانا بعد من زين حظي مافحطت الا والشرطه عندي
مشى العسكري ورحت لسيارتي وتذكرت الشابوره اللي بفمي ولاها يابسة ٍ زود ناشف ريقي من الموقف عاد وين الريق اللي يربص الشابوره من جديد
يالربع هذي السالفه ماهي من اسبوع والله انها ماكملت الاسبوع وحبيت اطرحها لكم وابغى ردودكم عليها وياليت معنا طبيب نفسي يفسر حالتي اخاف اصير مدمن تفحيط بعد هالسنين
انتهت سالفتي والله يحفظ الجميع
وبالختام سبحانك اللهم وبحمدك لااله الاانت استغفرك اللهم واتوب اليك وان شاءالله ماعاد اتعوده
دمت بخير ومحبه
محمد الظاهري
12/04/2013, 02:49 PM
هههههههههههههه
هاذي الله يسلمك مراهقه متأخره
اجل وش خليت للشباب الي مثلي
والله ما يلام العسكري يوم انه يظحك الظحك هاذا
والله يوسع صدرك مثل ما وسعت صدورنا بالسالفه الطيبه
تحياتي
يكفيني نظرة
12/04/2013, 02:53 PM
ههههههههههههههههههههههه الله يونسك ..
ولو شكل القراده ماودها تتركك...
النباع
12/04/2013, 09:38 PM
الله يضحك سنك في الجنة امين يارب امين ضحكت من قلبي وعلى فكرة ترى شرف البيت تقدر تصلحه مااطيب نفسك وما اخفها اتمنى لك طولة العمر مع العمل الصالح
أبوعابد 22
12/04/2013, 11:33 PM
اررررحب يا راعي العجراء ههههههههه
هذي يسمونها مرهقه متأخره بس العسكري رجال
اجودي ماقل شي وتفهم الوضع
تلميذ
13/04/2013, 01:24 AM
ربما انهاصرخه تحاول ان تخرج فيهاكل ماالم بك من غضب عبر السنين
وربماهوفراغ عاطفي ..

عوده لنبلغك السلام
خالص احترامي وتقديري
قوافي ( أم نهار )
13/04/2013, 01:38 AM
عليكم السلام ورحمة الله وبركاته
أحيانن،، من نفس الواحد يحوس شوي من غير ما يُعاتب،، ويفحط شوي من غير ما يوقف ..
شكل العسكري وسيع صدر او انه ما صدق انك تفحط واعتبرها غلطه..
قلت وبعدين ياحبيبي انتم ليه ماتعطون الشيبان فرصه يعيدون ذكرياتهم ويعبرون عن مشاعرهم
حتى ما يحسون انهم شيبان


مابي اقول شي ،،وموب انا اللي قايله(ألا ليت الشبابَ يعودُ يوما..فأخبرهُ بما فعل المشيبُ)..
اسعدك ربي وابعد عنك وعنا والمسلمين كل شر..
دمت بحفظ الله
تحياتي وتقديري واحترامي
..قوافي..
وحيد قلاسكو
13/04/2013, 06:11 AM
هههههههههههههههه صراحه انك فنان ..........مايمنع احيانا نكسر الروتين بطلعه مثل طلعاتك :D
بن دوخي
13/04/2013, 12:42 PM
راعي العجراء .. الله يونسك بالعافيه ههههههه

هذي الله يسلمك يسمونها في علم النفس (التفحيطيشن) حاله يمر بها كبار السن سواء في الحوش والا عند الاشارة .. الله يعديك شرها يا رب .. هههههههههههههههههههههههههههههه
راعي العجراء
13/04/2013, 01:00 PM
هههههههههههههه
هاذي الله يسلمك مراهقه متأخره
اجل وش خليت للشباب الي مثلي
والله ما يلام العسكري يوم انه يظحك الظحك هاذا
والله يوسع صدرك مثل ما وسعت صدورنا بالسالفه الطيبه
تحياتي


هلابك يياخي الفضل محمد الظاهري
هالمراهقه المتاخره وشهي من لحيه انا ماعرفتها يوم عمري عشرين وش ابي فيها الحين
يقولون لاجت على الشايب هبلته ويصير شايب في مكينه شباب سته اسلندر مكينه سدرك
ويقولون بعد يبدا الشايب يلبس كبك ويترزز بالعير
الله يعين عليها بخير
راعي العجراء
13/04/2013, 01:07 PM
ههههههههههههههههههههههه الله يونسك ..
ولو شكل القراده ماودها تتركك...


ياهلا وغلا يكفيني نظره
بالصراحه يكفيك نظره لو شفتني افحط والمرور ماسكني
وين اللي يصورون ويحطونها بالكافيشوب ويتناقلونها بالفكس اب
اما عن القراده مدري هي اللي تدورني والا انا ادور عليها
يعني
مدري عن الصدفه بدربي تجيبه .. مدري انا اللي في دروبه تحريت
دمت بود
راعي العجراء
13/04/2013, 01:11 PM
الله يضحك سنك في الجنة امين يارب امين ضحكت من قلبي وعلى فكرة ترى شرف البيت تقدر تصلحه مااطيب نفسك وما اخفها اتمنى لك طولة العمر مع العمل الصالح


وهل يصلح الخباز مافسد الدهر
وش اصلح وش خلي
يااخوك مامن سنون لو تشوف لثتي تقول على الجنط
تقل كفرات بالون ناقص هواها صاحبها بيدخل النفود ومنقص الهواء
دمت بخير يااخي الفاضل التباع
مع السلامه
راعي العجراء
13/04/2013, 01:49 PM
اررررحب يا راعي العجراء ههههههههه
هذي يسمونها مرهقه متأخره بس العسكري رجال
اجودي ماقل شي وتفهم الوضع


هلا وغلا يابوعابد
يالله حيوه
اما العسكري بالصراحه طيب بالحيل ونعم فيه ونعم في اهله وقبيلته
الله يكثر من امثاله اللي يقدر الشيبان يبشر بالخير
مع السلامه
راعي العجراء
13/04/2013, 01:54 PM
ربما انهاصرخه تحاول ان تخرج فيهاكل ماالم بك من غضب عبر السنين
وربماهوفراغ عاطفي ..

عوده لنبلغك السلام
خالص احترامي وتقديري



هلابك ياعم تلميذ يالله حيوه
بشر عنك وين الناس والله لك وحشه
اما فراغ عاطفي هذا بلا ابوك ولكن ابسألك هو الفراغ العاطفي يذبح الشيبان
تكفى افتني بذلك
بن حليمه
13/04/2013, 02:10 PM
السلام عليكم
الوضع عادي تمر معي وانا عمري 46 احيانا
حسن ابو طالب
13/04/2013, 02:22 PM
هلابك ياراعي العجراء
عاد حضك ان هالايام حملات قوية على التفحيط
يعني زين الي موداك القسم معه ..
تصدق عندي عم لي مره جاي من المزرعه للبيت
وماشيبسرعة مو طبيعية .. لحقت عليه مستغرب وش فيه
لايكون صاير معه شي في البيت .. يوم وصلت قلت له وش
فيك عسلى ماشر رد علي ببرود وقالي لا ابد كهرباء زايده عندي
وقلت افرغها بالسرعه.. ههههههههههههههههه
وانت ابد شكلها الكهرباء زادت عندك ولقيتها فرصة تفحط
الله يسعدك ياشيخ سواليفك تسر الخاطر ..
escape_man
13/04/2013, 02:31 PM
ملكتني واقفيت ربي حسيـــــــبك ما تعرف الرحمة بقلبب تولــيـــت

انت ياراعي العشراء عليك خطر عظيم

وشكل قلبك باقي فيه غصينات خضر .. يبيلك مسيار يابعد حيي وميتي

والي تبيها خبري بها موجودة وعندها مسكن ..

ولا تخاف ..

عيالها من اكبرهم للقعدة معرسين ومعيلين وبعضهم صار جد ..
راعي العجراء
13/04/2013, 05:39 PM
عليكم السلام ورحمة الله وبركاته
أحيانن،، من نفس الواحد يحوس شوي من غير ما يُعاتب،، ويفحط شوي من غير ما يوقف ..
شكل العسكري وسيع صدر او انه ما صدق انك تفحط واعتبرها غلطه..
قلت وبعدين ياحبيبي انتم ليه ماتعطون الشيبان فرصه يعيدون ذكرياتهم ويعبرون عن مشاعرهم
حتى ما يحسون انهم شيبان


مابي اقول شي ،،وموب انا اللي قايله(ألا ليت الشبابَ يعودُ يوما..فأخبرهُ بما فعل المشيبُ)..
اسعدك ربي وابعد عنك وعنا والمسلمين كل شر..
دمت بحفظ الله
تحياتي وتقديري واحترامي
..قوافي..

هلا ياقوافي الحرف والابداع
بالصراحه ماجا التفحيط من مواليد الصدفه بل بعد تفكير ودراسة جدوى عقلانيه
لمدة دقيقتين حتى عزمت على التفحيط بكل اريحيه
ولكن المقرود مقرود وقت ماكان مناسب لتواجد سيارة المرور السري بجنبي وانا ادربي الدميجه
بس خايف اعيد دراسة الجدوى من جديد وانجح بهذا المشروع واكون من اكبر رجال الاعمال في مجال التفحيط بالشرق الاوسط وعارضي كله شيب وبراسي صلعه تقول تندة جمس بهبهاني
مع السلامه
راعي العجراء
14/04/2013, 06:31 AM
هههههههههههههههه صراحه انك فنان ..........مايمنع احيانا نكسر الروتين بطلعه مثل طلعاتك :D


هلابك ياوحيد قلاسكو
ياخوي لاطلعه ولادحديرا انا لاشفت اللي يفحطون يغماء علي من الخوف
واكره ماشوف التفحيط
قلت ابفحط يمكن تروح مني عقدة التفحيط ومسكني المرور عند اول محاوله لكسر حاجز الصوت مدري الخوف والقراده تدور اهلها
النبهاني
14/04/2013, 08:43 PM
وعليكم السلام ورحمة الله وبركاته
ياحيا الله ابو جلنبو والا جلمبو
المهم ياراعي العجراء لايهمك اللي براسك سووه
فحط وجدّع وقبل هذا مر علي على شان اركب معك واطلع مع الدريشه
سو اللي تبي ترا اللي يشرهون وينقدون راحوا
ماعاد به اشاره حمرا ولا صفرا
http://t3.gstatic.com/images?q=tbn:ANd9GcRD7-cXZpnPbLduwJBmEWMN6ik0pwRTBfr3d3AdW3-s3bN_7VQP9gSY_6M (http://www.google.com.sa/imgres?imgurl=http://1.bp.blogspot.com/_y4aUjTheqo4/TCK6X3AJ7YI/AAAAAAAAAJw/bPM4iCrM8Hw/s1600/green%252520traffic%252520light.jpg&imgrefurl=http://www.abomshary.com/2010/09/blog-post_21.html&usg=__neJzXjILLO2pdiwYMLZGTnOQVuQ=&h=400&w=300&sz=15&hl=ar&start=72&zoom=1&tbnid=x-G3A3BxYZdgBM:&tbnh=124&tbnw=93&ei=3uhqUcSwNIHZtQbLnYGoDA&prev=/search%3Fq%3D%25D8%25A7%25D8%25B4%25D8%25A7%25D8%2 5B1%25D9%2587%2B%25D9%2585%25D8%25B1%25D9%2588%25D 8%25B1%25D9%258A%25D9%2587%2B%25D8%25AE%25D8%25B6% 25D8%25B1%25D8%25A7%25D8%25A1%26start%3D60%26safe% 3Dactive%26sa%3DN%26hl%3Dar%26tbm%3Disch&itbs=1&sa=X&ved=0CEAQrQMwCzg8)


اليوم يقولون خصوصيات ماتشوف الشباب يسوون شي اليوم مانسوي ولا عُشْره بوقتنا
سلمت ياراعي العجراء
ابوو عبدالله
14/04/2013, 09:13 PM
ههههههههههههههههههههههههه
ياراع العجراء تصير مع الكل بس بالخلاء تطعيس وتفحيط بس ماعندنا احد هههههه

اما انت كان ودي ان العسكري طلع من جيرانك بعد علشان تكمل
هههههههههههه
الله يوسع صدرك مثل ماوسعت صدورنا
راعي العجراء
15/04/2013, 12:38 PM
راعي العجراء .. الله يونسك بالعافيه ههههههه

هذي الله يسلمك يسمونها في علم النفس (التفحيطيشن) حاله يمر بها كبار السن سواء في الحوش والا عند الاشارة .. الله يعديك شرها يا رب .. هههههههههههههههههههههههههههههه


ياهلا ومليون غلا في ابن دوخي
الله يعافيك
التفحيطيشن هي من جماعة الهدرولبكيشن وش تاثيرها على الشيبان
يااخي انا اشوف بعض الشيبان يقعدون بالعاير وتشوف واحد يسوق فيهم كنهم في سياره
واحد مع صحن كنه دركسون والشيبان كل واحد يقلد صوت
واحد صوت الشكمان واحد يقلد صوت الكفرات واحد يقلد صوت القير
واليا طلع صوت قرت القير يقول واحد من الشيبان سقطه سقط قلبك انت وياه
هل هذا التاثير من التفحيطيشن
مع السلامه
راعي العجراء
15/04/2013, 12:41 PM
السلام عليكم
الوضع عادي تمر معي وانا عمري 46 احيانا


هلابك يابن حليمه
46 ماهي مثل 60 ياليت من يرجع الى الخمسين وافحط بسيكل ابو ثلاث مع طلعت الجديه والا ديراب
مع السلامه
راعي العجراء
15/04/2013, 12:45 PM
هلابك ياراعي العجراء
عاد حضك ان هالايام حملات قوية على التفحيط
يعني زين الي موداك القسم معه ..
تصدق عندي عم لي مره جاي من المزرعه للبيت
وماشيبسرعة مو طبيعية .. لحقت عليه مستغرب وش فيه
لايكون صاير معه شي في البيت .. يوم وصلت قلت له وش
فيك عسلى ماشر رد علي ببرود وقالي لا ابد كهرباء زايده عندي
وقلت افرغها بالسرعه.. ههههههههههههههههه
وانت ابد شكلها الكهرباء زادت عندك ولقيتها فرصة تفحط
الله يسعدك ياشيخ سواليفك تسر الخاطر ..


هلابك ياخوي حسن بن طالب
ياخوي منين تجي الكهرب وانا ماعندي بطاريه
ولو ادري ان فيه كهرب بالجسم كان شبكتها بالبيت وافتكيت من الفواتير
مع السلامه
راعي العجراء
15/04/2013, 12:49 PM
ملكتني واقفيت ربي حسيـــــــبك ما تعرف الرحمة بقلبب تولــيـــت

انت ياراعي العشراء عليك خطر عظيم

وشكل قلبك باقي فيه غصينات خضر .. يبيلك مسيار يابعد حيي وميتي

والي تبيها خبري بها موجودة وعندها مسكن ..

ولا تخاف ..

عيالها من اكبرهم للقعدة معرسين ومعيلين وبعضهم صار جد ..


هلابك يابن غيتات ومرحبا مليون
اما عن قلبي حدث ولا حرج
فيه جذوع خضر وغصون بنفسجيه وورديه وموف
والعروق رطبه باللون البيج
ويابوي شاب الراس والنفس مغرات
مع السلامه
راعي العجراء
15/04/2013, 12:54 PM
وعليكم السلام ورحمة الله وبركاته
ياحيا الله ابو جلنبو والا جلمبو
المهم ياراعي العجراء لايهمك اللي براسك سووه
فحط وجدّع وقبل هذا مر علي على شان اركب معك واطلع مع الدريشه
سو اللي تبي ترا اللي يشرهون وينقدون راحوا
ماعاد به اشاره حمرا ولا صفرا
http://t3.gstatic.com/images?q=tbn:ANd9GcRD7-cXZpnPbLduwJBmEWMN6ik0pwRTBfr3d3AdW3-s3bN_7VQP9gSY_6M (http://www.google.com.sa/imgres?imgurl=http://1.bp.blogspot.com/_y4aUjTheqo4/TCK6X3AJ7YI/AAAAAAAAAJw/bPM4iCrM8Hw/s1600/green%252520traffic%252520light.jpg&imgrefurl=http://www.abomshary.com/2010/09/blog-post_21.html&usg=__neJzXjILLO2pdiwYMLZGTnOQVuQ=&h=400&w=300&sz=15&hl=ar&start=72&zoom=1&tbnid=x-G3A3BxYZdgBM:&tbnh=124&tbnw=93&ei=3uhqUcSwNIHZtQbLnYGoDA&prev=/search%3Fq%3D%25D8%25A7%25D8%25B4%25D8%25A7%25D8%2 5B1%25D9%2587%2B%25D9%2585%25D8%25B1%25D9%2588%25D 8%25B1%25D9%258A%25D9%2587%2B%25D8%25AE%25D8%25B6% 25D8%25B1%25D8%25A7%25D8%25A1%26start%3D60%26safe% 3Dactive%26sa%3DN%26hl%3Dar%26tbm%3Disch&itbs=1&sa=X&ved=0CEAQrQMwCzg8)


اليوم يقولون خصوصيات ماتشوف الشباب يسوون شي اليوم مانسوي ولا عُشْره بوقتنا
سلمت ياراعي العجراء


هلا يابو سالم يالله حيوه
يعني فحط وجدع على ماتشتهي = النفس خضراء والتفحيطه تنجلي
وانت توصيني على التفحيط ...... ياعم ابوسالم .... قال لاتبيع رخيص قال لاتوصي حريص
بس مسكني المرور عند اول محاوله
يعني فرحتي اني اعرف افحط ماتت بأول يوم من المحاوله
وماحصلت الا الفشيله
مع السلامه
راعي العجراء
15/04/2013, 12:58 PM
ههههههههههههههههههههههههه
ياراع العجراء تصير مع الكل بس بالخلاء تطعيس وتفحيط بس ماعندنا احد هههههه

اما انت كان ودي ان العسكري طلع من جيرانك بعد علشان تكمل
هههههههههههه
الله يوسع صدرك مثل ماوسعت صدورنا


هلابك يابو عبدالله يالله حيوه
اما لو العسكري من جيراني كان حبس المرور اهون من ان احبس نفسي بالبيت حبس انفرادي مع الاعمال الشاقه
راعي-الباث
15/04/2013, 09:40 PM
هههههههههه
الربذي
16/04/2013, 06:10 AM
هالشرطي محظوظ انه طاح براعي العجراء وسمع النكت منك مباشرة
تصدق عاد ياراع العجراء اني ودي اقابلك يارجل انت نكته تمشي على الارض ماشاء الله عليك رفيقك مايضيق صدره
راعي العجراء
16/04/2013, 09:56 AM
هههههههه
والله اني ضحكت من كل قلبي
احياناتجي الواحد هفات ينقد على نفسه
بس علميا داخل كل انسان طفل بس انت الظاهر داخلك مراهق توه بيطلع
اضحك الله سنك واطال عمرك


هلا يانجد ديرتي
بس بااخي انا هقاتي قراده نخب اول
وانا اللي بداخلي ماهو طفل ولا هو مراهق الا خبل مطفوق وطق بعصا
وهالخبل هو بكر امه وهو القعده حتى صار خبل ومدلع
مع السلامه
راعي العجراء
16/04/2013, 09:58 AM
هههههههههه


لك حق تضحك ولك حق نرضيك
راعي العجراء
16/04/2013, 10:04 AM
هالشرطي محظوظ انه طاح براعي العجراء وسمع النكت منك مباشرة
تصدق عاد ياراع العجراء اني ودي اقابلك يارجل انت نكته تمشي على الارض ماشاء الله عليك رفيقك مايضيق صدره


هلابك يالربدي يالله حيوه

سرني تواجدك

الا انا المحظوظ اللي طحت بشرطي حبيب وفاهم الوضع

اي نكته يارجال

الا قراده مامشت على الارض ولاطارت بالسماء

ورفيقي دائم ضايق صدره وحذر يخاف يجيه شي من قرادة راعي العجرا

مع السلامه
عابر سبيل 1
16/04/2013, 12:02 PM
حياك الله ياراعي العجراء ...
أعتقد أنك مراهق في الستين ولا تنلام على اللي تسويه والعسكري أضنه أحد أعضاء المنتدى ومن المتابعين لسوالفيك وعرفك وتركك ...
تحياتي
راعي العجراء
17/04/2013, 10:28 AM
هلا وغلا ياعم عابر سبيل يالله حيوه

ياخوي ماراهقت بالعشرين ولا بالثلاثين ولا بالاربعين غبيتهن كلهن حتى وصلت ستين قلت مايمدينا نراهق تالي العمر

اما لو العسكري من الاعضاء ماهو فاكني بالسهوله بياخذني للقسم حتى يضحك علي وانا اتحسر من الفشيله

واصير مثل اللي يقول


كعصفورة بيد طفلا يزمها .... تعانق حياض الموت والطفل يلعب

فلا للطفل عقل يرق لمابها .... ولا للطير ريش يطيرو ويهربوا
خوي مخباته
18/04/2013, 08:49 PM
هلا...و... مليار .... ســــــــــــــــهلا..... بالغالي ابوالعجاري { راعي العجراء } الله يديـــــــــــــم عليك الصحه والعافـــــــــيه
قضينا من السلام والترحاب ؟ ندخل في صلب الموضووع وتحليل شخصيت المفحط العود !!! التفحيط شهوة وفيها العافية ... ترى الواحد تجيـــــــــــه خمَــــــــه لابــــــــــــــــــــــد ان يرضيها وترى الخمًـــــــــــه مثل نقص الفيتامًين لابــــــــــــد منها او
اخذً الجرعه توازيها والحمـــــــــــدالله السيارة موجودة و بسمك وحلال والكفرات جديدة الي اخطيت فيها وحده لوك فحطت في مخطط ماعندك احد كان نقول شهووة وفيها العافـــــــــــــية صح ؟ لكن وش نقووول الخمه قششششرا تجي على فجئه
ماتشاورررر !
......................... تحياتي وتقديري واحتراماتي لشاعرنا الكبـــيـــــــــر{ راعي العجراء } ..........................
عابر الموج
19/04/2013, 11:28 AM
الله يعطيك العافيه واخالف الزملاء بردي عليك بهذا البيت

من كمل الستين لايرجي الزود = غير السجود وقول يارب تبنا
تقبل تحياتي
هاوي عبث
20/04/2013, 11:54 AM
خخخخخخخخ
آه يابطني بطناه ليت من شايفك انت وشابورتك مالومه والله
لو ضحك يبي ياخد اسبوع وجنوبه تعوره
يامراهق الله يستر ماحصلك مع الدرباويه بعد كم يوم
تدري عاد مهيب شينه ها الافكار العابره تونس وشرايك نسوي
لنا شله ونسميها درب الخطر فوق الخمسين
بشرط اغلب اعضاؤها ناخذهم من اخوان اللي يشتغلون بالشرطة السريه
تخبر الواسطه زينه
ابو صفوق
23/04/2013, 05:03 PM
ههههههههههههههه تفحط وراك ما علمتني اروح معك نفحط
تدري عاد هذي امنية حياتي افحط واسوي خمسات اويلاه
الله يسعدك واشكرك ياغالي
ابو صفوق
راعي العجراء
24/04/2013, 07:44 AM
هلا...و... مليار .... ســــــــــــــــهلا..... بالغالي ابوالعجاري { راعي العجراء } الله يديـــــــــــــم عليك الصحه والعافـــــــــيه
قضينا من السلام والترحاب ؟ ندخل في صلب الموضووع وتحليل شخصيت المفحط العود !!! التفحيط شهوة وفيها العافية ... ترى الواحد تجيـــــــــــه خمَــــــــه لابــــــــــــــــــــــد ان يرضيها وترى الخمًـــــــــــه مثل نقص الفيتامًين لابــــــــــــد منها او
اخذً الجرعه توازيها والحمـــــــــــدالله السيارة موجودة و بسمك وحلال والكفرات جديدة الي اخطيت فيها وحده لوك فحطت في مخطط ماعندك احد كان نقول شهووة وفيها العافـــــــــــــية صح ؟ لكن وش نقووول الخمه قششششرا تجي على فجئه
ماتشاورررر !
......................... تحياتي وتقديري واحتراماتي لشاعرنا الكبـــيـــــــــر{ راعي العجراء } ..........................


هلا يااخي الفاضل خوي مخباته
حضورك في هذه السالفه زادها بريقا وتالقا مثل مايقولون معلقين المباريات
اليك السبب الرئسي بتفحيط الشيبان
بعد دراسه جيلوجيه قام بها اخيك راعي العجرا واثبتتها منظمة العفو الدوليه
والهئيه العليا لحماية الشيبان من الانقراض المقامه في مدينة سان برنسسكو بواشطن ستي الامريكيه بالهند بولاية مداغشقر
الشايب اذا فحط ترى فيه عرق شبابي في المخيخ الايسر والمالتوي مع القدم اليمنى يعطي اشاره للرجل
على الدعس على البانزيم تحت قوه غير اراديه ناتجه من التشنج العصبي المعمول به في اكثر مخابز التميس بالعالم مما يسبب اهتزاز على الطبقه السفلى من القادم والدليل حقين المخابز البنغاليه يعجنون الدقيق برجولهم بدل مكائن العجن لنبثاق درجه حراريه عاليه مما يساعد على التفحيط على الدقيق عند العجن وهذه ظاهره غير جيده ولاحتى صحيه حيث يكون التحلل من شطوب الرجلين بعد خمسين عام شمسي بمضخات عاليه الجود
ارجو ان اكون وفقت في ايصال المعلومه بالشكل المطلوب
والله يحفظك
مع السلامه
ناصر العلي
27/04/2013, 06:04 PM
وعليكم السلام ورحمة الله وبركاته
حياك ربي يالغالي
وأسعد الله مساك
أخ منك يامراهق
وتقول بعد مقرود.....إلا حضيض
طحت لك بواحد حبيب ويقدر....شاف هالشابورة بيدك مار تقطع قلبه....أنا من اليوم بحط لي كسرة شابورة بدرج الموتر يمكن تنفعنا بعد الله بهيك مواقف...حلوة هيك:D
يالله عاد تخيل لومعطيك قسيمة ونوع المخالفة تفحيط بمكان عام....قسم بالله إن تكتب عنه الجرايد:D وتبئي فضيحتك بجلاجل
أتمنى لك دوام الصحة وطولة العمر
تحياتي وتقديري
مع السلامة
حمد69
28/04/2013, 07:20 AM
وعليكم السلام ورحمة الله وبركاته
حياك الله ياراعي العجراء
ما شاء الله ... مواهب شعر، وقصة، وبعد إحترافية تفحيط لالا كنت شاك إنك في ال60 بس الآن تيقنت إنك في ال و20 ....
سالفة التفحيط ولا الردود كلها ضحك.. إلا البنجاليه يعجنون الطحين برجولهم وفيها شطوب بعد... لا هذا خبز الطابون بالحطب ما يتفوت..:p
دمت في حفظ الله.. :good2:
راعي العجراء
29/04/2013, 06:06 PM
الله يعطيك العافيه واخالف الزملاء بردي عليك بهذا البيت

من كمل الستين لايرجي الزود = غير السجود وقول يارب تبنا
تقبل تحياتي


هلا ياعابر الموج
واشكرك على هذه النصيحة الطيبه
يااخي شي بالنفس وان زاحت وان شاءالله ماتعودها عقب هالنوبه
ادور على شغله ثانيه لجتني هالحاله تكون اسهل من التفحيط وتكون عكسيه عن التفحيط
وشرائك احط مسامير للي يفحطون بشارعنا
مع السلامه