نظام شبك الوحوش ومشاكله

[zais]

نظام شبك الوحوش ومشاكله

بسم الله الرحمن الرحيم

الحمد لله وبه نستعين والصلاة على خير المرسلين نبينا محمد صلى الله عليه وسلم.


خلونا نوسع صدورنا بعلوم الطيور

مشاكل الشبك كثيره واولها مثل(يد وحده ماتصفق) اذا كنت لحالك وتلقى لك طير مع الأسف الشديد اذا شافه بعض القنوص انا اقول بعض ولا اعم على طول على العامه وبلغ وعاد حلها اذا اجتمعة عليك السيارات يروح طيرك وهو بشبكتك هذا اذا انت لحالك مالك الى تشوف لك احد وتخشره معك والا رايح رايح الله لا يعوق بشر وصارت معي كثير ماهو بمكان واحد من الشعيبه الى ضبا ومن الدبدبه الى رفحا ،
والطير الى ماحد يتدخل فيه يكون لهل العزب الى عندهم سيارات واجد يتجمعون على الطير ولا احد يتدخل فيه بالعكس يجونهم اهل العزبه الفلاني ويقولون تبون فزعه تبون نرد عنكم السيارات بدون خشر ،،،،،،هنا المشكله طيب انا قانص بسيارتي ولا حولي اخوييا مامعي الى ربي هو المعين ماشي اترزق الله لقيت لي طير اقول الحمد لله اول شي اتطلع حولي سيارات مافيه احد خلى بسم الله احذفله الي وجاهز هد بدا يمسح ويرتفع ويتنكس على الزريق للحين اقول في نفسي يارب ماحد يشوفني كني حرامي إلا يبي طيار عطيته طيار اخذها الحمد لله الكلام هذا خمس دقائق إلا السيارات وحده وراى وحده ويبدون يضايقونك بالحال هنا تبي تفك الطراد طلعة طيرك وبلجة عنه وطلب الوحش على طول ياسلام لحقه وارتفع معه ونشه فك الوحش العلف ولينه ماهو معلق تبدأ المشكله العضيمه انت محتار بين امرين اما تلحق الوحش الى مايبي الى طيار والى ترجع لطرادك اذا لحقته تعطيه طيار او ملقوف يعطيه طيار وتقوم المشكله واذا رجعة لطرادك جحيد وامراً بعيد ماهو طيرك توكل على الله ياناس وش الحل.

موضوع اطرحه للجميع ويشرفني انتقادكم وتعليقكم محبكم

zais

[راح الأمل]

صج مشكله لكن انا من رايي بهذي الظروف ان لقيت طير تهدله حمامه هدد بس تكون معك مناشبيه الدائريه اللي تكون من غير قفص زي احقت الجربوع اكيد عرفتها اللي تكون دائريه وفيها عيون المهم لاعطيته الحمامه هدد خل الطير لاهد وصادها خله ينتش منها وياكل شوي عقب رح وطيره وجهز مناشبيتك ولاطار من الحمامه بسرعه امسك الحمامه الميته اللي انت قطيتله وبحركه سريعه حط،الحمامه بوسط المناشبيه وربطها عدل ونتف من الحمامه شوي عشان يبين الريش المطاير وتغري الطير اكثر وخلها ومش بعد كيلو ونص كيلوين دبل لين انه يرجعلها وباذن الله تصيده لان 90 % انه يرجع لصيته ولا يخليها خاصه انه ذاق طعمها ونتش منها شوي هذي الطريقه اريح لك من انك تلاحق الطير والجيوب كلها وراك ومشاكل وحوسه انت بغنى عنها ، وتقبل مروري واسف عالاطاله.

[عواد الشمري2]

الطير ماتطرحه لحالك الا انه مقسوم لك قسمه وهي كل شي قسمه بس يعني نادر انك تقدر عليه لحالك

فاء امسك الجهاز اول ماتشوفه وزهم لك واحدن تعرفه منت قانص الا تعرف نس الشوابيك
ازههمه وخله يعونك عليه لن لاقدر الله بنشر ولا مغابش ولا ولا الا فيه فزعه
او انك تشوف حدا السيارات الي جتك وعرض المساعده وفزعه اما لحالك به صعوبه شوي
والله مقسم الرزاق شي مقسوم لك تبي تاخذه لو اجتمعت الناس عليه


وفالك الطير الي لا شفته من زود غتاره تقول غرنوق

[ذراع الذيب]

السلام عليكم ورحمة الله وبركاته

هلاااا والله وغلاااا

بأخوي zais

الحل وانا اخوك متى ماحصلت الطير اطلب الفزعه خصوصاً لاصرت لحالك لأن الديار معاد انها مثل اول ضاقت بالخطوط والشبوك

ولابد تثبت طيرك بالجهاز امكن لاسمح الله يطير وماتقدر تتبعه لحالك وتحدك عنه خطوط السيارات او الشبوك او غيره ونظامنا بالشعيبه وبمجيرمه نظام فزعه

وفيه محاوليين معروفين وناس مجتهده تحاول ترتب وتنظم المواتر ولاكن بالآونه الاخيره كثرت السيارات بشكل ماتتصور وتصير ربكة مواتر في أغلب الاحيان

وصارت الفزعه تغلب الرياجيل والله يزين الحال ويكرمك بالقرناس والله يسهل لك طرحه

[zais]

راح الأمل اسعدني مرورك لاكن وينك وين المناشبه الطيور بالنجوم...


عواد الشمري2 اسعدني مرورك الرزق من الله لاشك ولا ريب لاكن يقف بوجهك ويحلف ان الطير له...


مشرفنا الغالي ذراع الذيب اسعدني مرورك
المشكله قلت الفزعه والله اني لاقي حر الساعه 8 الصبح لا حولي احد ومعه سمانه وطار من تحت الصدام ماشفته وارتفع شوي وهدة عليه العقبان وحذفها وتبعته وهو ملاقط الين جاى بجنب جبل وحذفت له بثقاله وحد وماجابه الله ومر عليه قناص ماعرفه واشرة له بالنور وجاني قلتله الفزعه وتراك خشير الحر هذا هو قدامي وقالي ابشر بالفزعه وحذفناله طيار وغير محله وقلتله خلك مع الطير انا ابي اخذ الزريق الى بالارض وزهم على اخوياه وبعد اشوي الى عشرين سياره ولحقتهم ووقفوا في وجهي وقالوا طيرك راح وهذا غيره توكل على الله وانا لحالي وقعدة احسبها وقلت حسبي الله ونعم الوكيل والله العظيم اني ديورة مشيت الا خويي الاول يشرلي ويقول اخوياي غلطوا عليك ماعليش قلت له وين الطير قال هذاك هو حايم مع الغربان ورحت عنهم ولا انذكر نهائين.