كيف انظم مفضلة قارمن760 حسب الاقرب لمكان السكن

[jeep2055]

سؤال لكل خبراء القارمن
قمت بادخال جميع احداثياتي المرغوبة في اوروبا للقارمن 760 في المفضله وسؤالي هو كيف انظم تسلسل هذه الاحداثيات الاقرب فالاقرب انطلاقا من الفندق او الشقه التي اسكنها في مدينة ما
يعني ابي اسلسل الاماكن (الاحداثيات) حسب الاقرب لمكان سكني في كل مدينة

لا تبخلون علينا بسرعة التجاوب مشكورين

[Gassimy]

اخوي هو من حاله يرتب الاقرب فالاقرب من مكانك الي انت فيه لكن لو حبيت تفتح مجلدات داخل الاحدثيه مثل تحط الطلعات في مجلد اماكن الترفيه في مجلد فهذا باب اخر

[برق الشتاء]

السلام عليكم ورحمة الله وبركاته :

أخي الكريم
أولا : تنظيم المفضلة غير ممكن في النوفي فئة 700 بل ممكن التنظيم في فئة 200 وهذا موضوع لي شرحت فيه كيفية تنظيم المفضلة في فئة 200
http://web1.mekshat.com/vb/showthread.php?t=348558

ثانيا : لو اردت معرفة الاقرب فالأقرب من مكان سكنك وانت بعيد عن السكن يمكنك ذلك من خلال تشغيل الوضع المحاكي ووضع المؤشر ي موقع السكن حينها ستجد المفضلة مرتبة الاقرب فالأقرب لموقع السكن


تحياتي لك ولجميع الزملاء

وفق الله الجميع للخير

[jeep2055]

شكرا لسرعة تجاوبكما
الاخ Gassimy ولكن ممكن تشرح لي بالتفصيل فكرتك للمجلدات لكل احداثية لاني لم استوعبها بشكل جيد للمعلومية انا استخدم جهازي بالانجليزي لتعودي على اللغه ولا مآخذه

انا دخلت كل احداثياتي في مدينه معينه وهو يعطيني بعد المسافة لكل احداثية بس اللي انا ابيه انه يحسب لي من مكاني اللي ساكن فيه المسافه عن اقرب احداثيه في المفضلة في المدينة الواحده وهكذا

[jeep2055]

عذرا على سؤالي لاني والله ولا مؤخذه متعود على الانجليزي
ابي اعرف معنى الوضع المحاكي بالانقليزي علشان اجرب طريقتك واشوف

[Gassimy]

شوف اخوي انت عندك عدت اماكن في المفضله. وحاب زي ما قلت لك تسوي تصنيف او خلينا نقول مجموعات. طيب. تدخل على المفضله وتختار اول موقع وحاب تحطه تحت مسمى الرحلات بعد ما تختار الاموقع يعيطيك خيارات في اسفل الشاشه. منها تعديل تاخذ تعديل بينقلك الى خيارات منها التصنيف. لما تختاره يطلب من التسميه تقوم تسميه الرحلات وهكذا. تصير لما تدخل المفضله يصير مث المجلدات الرحلات الترفيه الطلعات. اما عن قولتك المحاكات تدخل على ادوات بعدين اعدادات النظام اخترالمحاكات gps اعلى يمين وضعه على شغال اخرج يكون اختفى مؤشر الجيبي اس اذهب الى المفضله واختر شقتك لا تضغط اذهب اضغط الخريطه بعدين ينقلك للخريطه مع وجود خيارات اضغط المكان بتحصل مؤشر السياره وقف على مكان الشقه اذاهب للمفضله وشوف وش اقرب مكان لك لوانت ان شاء الله ببريده بتعرف اذا ما فهمت اسال الله لا يهينك

[jeep2055]

الصراحة انك اخوي منتب قصيمي انت سويسري (ترا امدحك) فكرتك بوضع علامة على موقع السكن رائعه بس مدري اذا عندي في كل مدينة او منطقة شقه يعني مثلا ابسكن الرياض بعدين ابسافر القصيم لشقتي الثانية ثم ابروح المدينه لشقتي الثالثه وهكذا هل يمكن ان اسوي نفس طريقتك واحدد علامة لكل شقة في كل مدينة قبل ان اسافر فعلا

واما طريقتك الاولي المجلدات يعني اشوفها اصعب شوي من الثانية والحين طرت لي فكرة حلوة وهي هل اقدر استعرض كامل الطريق من شقة مثلا أ بالرياض لمسافة سفر 300كيلو الى ان يوصلني للشقه ب في القصيم مثلا وهل يمكن لي تغيير الطريق في الجهاز اذا كان هناك اكثر من طريق واذا كان عليه محطات بنزين ومطاعم وفنادق ووو ومدى السرعة عليه
ولا تنسى اني ابسافر اوروبا انشاء الله والقارمن حقي 760 نوفي

[Gassimy]

اخوي اشكر لك أدبك .. لكن شكلك تقول بسافر شقتي الثانية في القصيم (( لا يصير مسيار:director: )) هههههه
الحاصل أخوي ممكن يعني الحين أنت موجود في بريده أو أن شاء الله في أوربا مثلاً وحاب تعرف المسافة من شقتك في الرياض مروراً بشقتك في بريده وصولاً إلى شقتك في المدينة وهذه الأماكن كلها محفوظة في المفضلة في شي أسمه مسار الرحلة ((Flight Path)) ومن خلال هذا الخيار تستطيع معرفه تخطيط لمسار رحلتك ومعرفه المسافات والوقت اللازم لمسار الرحلة ادخل عليه .. بعدين اختار نقطة البداية .. ومن خلال المفضلة حدد شقتك في الرياض بعدين في علامة زايد على اليسار .. إذا حاب تضيف أكثر من مكان مثلاً شقة المسيار .. بعدين فيه نقطة الوصول بعدي اضغط على التالي بيعطيك المسافة ووقت الرحلة

[jeep2055]

ترى ادور مسيار سري ولك سعي بس شي يسوى صدق تطقني النفاضة قدام ام العيال
حطيب نقطة البداية بس طيب وشلون احدد نقطة النهاية المحفوظة ايضا في المفضله


واخيرا ابي اشوف وين افضل طريق من بدايته الى نهايته لكل رحلة من حيث وجود فنادق ومطاعم (ومسجد) ومناظر واختار الافضل فهل اقدر

فيه موضوع مختلف ابي اشوف رايك فيه ابوقف سيارتي يوكن اسود لمدة شهر في مواقف مكشوفة تحت الشمس في الدمام واغطيها بشراع بلاستك ازرق حق الاسمنت فهل يضر على البوية ؟

[Gassimy]

وأخيرا أبي أشوف وين أفضل طريق من بدايته إلى نهايته لكل رحلة من حيث وجود فنادق ومطاعم ومسجد

ولا تبي بعد واحد يسولف عليك .. هههههههه

أخوي ممكن لكن العملية يدوية راح اشرح لك ماتيسر

أولا لتعلم بأنه يوجد خيرين في قارمن هم الأهم الأول الأسرع مع طول المسافة والثاني الأقصر مع مروره بشوارع صغيره وعلى حسب تحديك لنوع الملاحة بيقودك الGPS

فأنت مخير بين أمرين الأول معرفتك بالطريق أو إنك تفصل الGPS وتتجه عند شقتك وتعمل بعث عن الأقرب في الخدمات وتحاول تمشي السهم على نفس مسار الريق وتبحث عن الخدمات مره أخر وهكذا...

أم سؤالك عن الشراع الأزرق ففي تقديري مضر أكثر مما هو متوقع منه حيث اختراق الحرارة سهل ويسبب احتباس حراري ولو أنت في الرياض الأمر أيسر حطه في مواقفنا لو تبي مو شهراشهر ظل وكبيره جدا لعدد كثير من السيارات

[jeep2055]

عز الله انك منتب قصيمي انت سويسري كما قلت لك
وش البديل لشراع البلاستك ؟ بشرط يكون رخيص وسريع التركيب لاني بغطي السيارة صباح مبكر وبسرعه بروح للمطار

طيب والمسيار السري ما اشوفك قلت شي عنه والا موبدها لك ....هههههه

[ابوسعيد 11]

السلام عليكم ورحمة الله وبركاته

لو سمحت اخوي من تجربتك للجهاز تنصحني فيه؟؟

لانه معروض على قارمن 760 مستخدم معاه جميع اغراضه من كرتون و اسلاكه وقاعدة اللي تحطها في الزجاج نظيف جدا

بسعر 450 ريال

هل يستاهل؟؟

اسف على المداخلة..

[Gassimy]

السلام عليكم ورحمة الله وبركاته

لو سمحت اخوي من تجربتك للجهاز تنصحني فيه؟؟

لانه معروض على قارمن 760 مستخدم معاه جميع اغراضه من كرتون و اسلاكه وقاعدة اللي تحطها في الزجاج نظيف جدا

بسعر 450 ريال

هل يستاهل؟؟

اسف على المداخلة..

عذرا أخي الكريم .. الجهاز خذه وأن مغمض عز الله جهاز طيب واترك قولت 50 -- 40 هاذولي لم تشتري ببسي ولا عند الهندي نص يعطيك واحد

[Gassimy]

عزيزي .. مالك الى الطربال .. بس يكون من سماكة 26 فما فوق .. لكن المشكلة هذاولي لا زم تفصيل ...والمشكلة إنك بتروح غدا إن شاء الله لكن لو بتوقفه احرص إنه يكون على شارع جنوبي أو شرقي اياك من الغربي أو الشمالي ...

[jeep2055]

جهاز رائع وسعره اذا نظيف ومضمون بلاش علما بانه يخدمك في الشرق الاوسط كله واوربا وتقدر تحمل خرايط امريكا والبر عليه بفلوس طبعا

[jeep2055]

شكلك فاهم غلط انا سفرتي بعد الاختبارات على طول انشاءالله وبوقف سيارتي بمطار البحرين بدون مظلات ولا غيره ومخطط باذن الله اكون بعد الفجر في المطار لان رحلتي 7 صباحا ولذلك ابي شي اغطي به السيارة بسرعه وامشي للصاله

[Gassimy]

طيب حبيبي .. سو زي ما قلت لك ..تفصيل .. شراع .. مقاس من 26 الى 30 . عندكم ما أدري وين لأن عندنا محلات محترفه السنيدي المطرودي وغيرهم

[jeep2055]

انا بالرياض وادور لي شي سريع التركيب خلال 5 دقايق ورخيص عندك علم وين القى

[jeep2055]

اخ قصيمي
فيه امر محير لي وهو عند مقارنة الطريق وطوله من مدينة salzburg الى قرب مدينة bern في قوقل ومشلان كانت المسافة تقريبا 600كيلو على طرق اكثرها سريعه بينما في قارمن 760 حقي اظهر المسافة فقط 430 كيلو على اعدادات الطريق الاسرع وهذا الفرق الكبير غير معقول ابدا فما هو الصحيح الذي اعتمد عليه ولماذا هذا الفرق

ارجو ان تجيبني بالتفصيل او تشاور احد ثاني طلبا للافادة مشكوووووورررررر

[Gassimy]

ولا يهون قوقل ومشلان . قارمن هو رائد الخدمة والمتخصص في هذا المجال ، بأعطيك مثال لو رحت لأفخر مطعم عندنا في الرياض وخلينا نقول النافورة وقالك عندي مندي أنت في تقديرك هو أحسن وإلا مندي المكي أو الرومنسيه أكيد شتان لأن الشغله عند قوقل ثانوية وليست أصل

[jeep2055]

الشغلة بسيطة انك تحسب المسافة من نقطة الى اخرى على الخريطة بس ابي اعرف سبب علمي مقنع ليش هالفرق بين قارمن وقوقل ومشلان لان الخريطة وحدة والطرق معظمها سريعه
هذه ليست المرة الاولى استخدمه في اوروبا ولكني اخاف ان قارمن بيوديني مع دواعيس لذلك تصير المسافه اقل من قوقل ومشلان مع اني محدد للقارمن الطريق الاسرع في الاعدادات

[Gassimy]

طيب انا عندي لك أقتراح .. حنا فيها حدد اي مكان عن طريق قوقل .. او مشلان وشوف المسافه وراقب خط السير . بعدين حدد نفس المسافه بقارمن وعطنا الخبر

[jeep2055]

هذا اللي اقولك الحين الفرق كبير حوالي 200كيلو القارمن اقل من قوقل ماهو معقول اكيد فيه سبب معين وزي ما قلت لك يمكن قارمن يوديني مع حواري ودعاسيق وهذا ما ابيه لاني معلمه يروح بي مع السريع بس

[Gassimy]

يا أخيي فاهم عليك وإنك تقول فرق أقول الحين حدد اي مكان في الرياض دامك هنا وشف الفرق وشف خط السر اوحد مثل ( بريده :good2:) وشف كم في قارمن وكم بقوقل الا اذا قارمن بيستهبل ويعطيك مسافه اقل ويسوي نفسه احسن بالله عليك وين بيودي 200 كيلو بيشغل لك المسجل ويناقزبك ويلهيك لمين يوصلك

[jeep2055]

جرب ادخل العنوان التالي في جهازك وشف قارمن وش يعطيك المسافة وقارنه بما يعطيك قوقل ماب وعلمن تعليقك
من Bründlweg 265, 5440 Golling an der Salzach, Hallein, Salzburg, Austria
مرورا ب Innsbruck, Austria
انتهاءا ب Bernstrasse 5, 3308 Grafenried, Bern, Switzerland

[Gassimy]

السلام عليكم .. اخوي المشكله جهاز فقط عليه الشرق الأوسط

[jeep2055]

تقصد ان جهازك ما عليه خرائط اوروبا ، طيب العب على الجهاز وجرب الاحداثيات التالية لنفس العناوين المشار لها وهي
N47.59638
E013.17701

الى نقطة الوصول وهي
N47.07976
E007.44754