المساعد الشخصي الرقمي

مشاهدة النسخة كاملة : استفسار بسيط عن التأمين


ابوفايز1000
05/05/2013, 07:08 PM
السلام عليكم ورحمة الله وبركاته
حمانا الله واياكم من الحوادث ومن كل شر ياحي ياقيوم
عندي استفسار بسيط يا اخوان
صدمني شخص الله يهدينا واياه وهو قاطع اشارة والخطا عليه 100/100 حسب تقدير شركة نجم
المهم معه تأمين ضد الغير
وطلبوا مني تسعير السياره عند ثلاث معارض شيخ المعارض واثنين غيره
والتسعير عند ثلاث ورش وقطع غيار واحد
تسعير شيخ المعارض طلع فرق السعر 15000

السؤال
هل التأمين ياخذون تسعير شيخ المعارض او الورش
بوعبدالعزيز84
06/05/2013, 07:57 AM
وعليكم السلام ورحمة الله وبركاته
الحمدلله على سلامتك
انا مستغرب ليش طلبو تسعيرات من جهتين الورش والمعارض العادة يطلبون تسعيرة من الورش واذا اعترض خصمك حولوك على شيخ المعارض وهو اللي يفصل بالموضوع تأكد يمكن في غلط من الموظف
ابوفايز1000
06/05/2013, 12:12 PM
الله يسلمك اخوي بوعبدالعزيز
الموظف حق شركة نجم هو اللي طلب مني ذلك
اني اسعر عند ثلاث معارض وثلاث ورش ومحل قطع غيار واحد
وشركة التأمين حولو لي ٩٠٠٠ فقط لان تسعيره قطع الغيار والورش حول المبلغ هذا الظاهر انهم اخذوا تسعيره الورش
وهذا قمة الظلم اللحين لو صلحت سيارتي وجيت ابي ابيعه يبي يطيح من قيمتة مبلغ كبير حول ال١٥٠٠٠ بالله من يتحمل الخساره هذي اكيد انا والله حرام
You Like Me
06/05/2013, 06:43 PM
وعليكم السلام ورحمه الله


والله يالغالي التأمين وما ادراك ما التأمين
عجزنا نعرف لهم ومافي اي آليه متبعه او معروفه
الكل له نظام خاص فيه


لكن الاكيد يا ابو عبدالعزيز
اذا التكلفه أقل من 5000 ريال يكفي تقديرات الورش فقط
اما اذا اكثر من 5000 ريال لابد تقديرات شيخ المعارض


لكن للأمانه ماتعرف من خصمك
هل هو اللي اخطأ وصار بينك وبينه الحادث
او شركه تأمينه او شركه تأمينك انت


انا قبل سنه تقريباً صار لي حادث وشيخ المعارض قدر التكلفه بـ 27000


وعليها والسياره سعرها فالسوق بعد الحادث بـ 100,000
طبعاً تأميني شامل تكافل الراجحي
بعد الحوسه والمراجعات التأمين سألني وين تبي تصلحها اكيد بطلب الوكاله
السياره 2011 وما مشت 60 الف .
المهم جت تسعيره الوكاله التكلفه حول 70 الف والتأمين اتلف السياره
واعتمدوا كلام الوكاله .. وبعد ما طلع مندوبهم وشاف السياره
كتب انه تسوى بعد الحادث 80 الف
وخلاص انتهوا بكذا اتلفوا السياره وقالوا مالك الا 80 الف
طيب افادات شيخ المعارض والورش وين راحت وليه تطلبونها وتضيعون وقتي على اي اساس .. قالي موظف التأمين هذي تعتبر كماليات
مفروضه علينا يقصد شيخ المعارض والورش ويقول اصلاً إحنا موجود عندنا مندوبين وظيفته يقرر كم تسوى قبل وبعد ....


واحد يتكلم بهذا الاسلوب تتوقع انه محاسب على كلامه
زي اللي يقول رح اشتك واذا فيك خير تآخذ حقك
لو يدري فيه احد يحاسبهم ما شفتنا في هذه الحيره


بصراحه كل شركه لها نظام وبنود غير الشركه الاخرى
بس جميع الشركات يتفقون بأن جميع البنود اللي في العقود
يلتزم الطرف الثاني ويلتزم الطرف الثاني اللي هو انت المستهلك
لكن الطرف الاول اللي هو الشركه ما عليها اي إلتزام بتاتاً


آسف طولت في موضوعك يـ ابو فايز
وشركه التأمين اعتمدوا ارخص شي زي ما ذكرت انت الورش
ابن فهدالشمري
06/05/2013, 07:13 PM
باختصار

شركات التامين تعتمد على ارخص تسعيره

والضحيه انا وإياك

حسبنا الله ونعم الوكيل
ابوفايز1000
06/05/2013, 10:09 PM
الف شكر للأخوه اللي ردو
لا اراكم الله مكروه
فعلا يا اخوان شركات التأمين يجي منهم ظلم بين حسبي الله عليهم ونعم الوكيل
لانهم واثقين من ان المواطن الضعيف يأس من المطالبه بحقوقه
والله ثم والله ان المفروض يجيك حقك وانت جالس ببيتك
لكن مانقول الا
حسبنا الله ﺳﻴﺆﺗﻴﻨﺎ الله من فضله اناالى الله راغبون