ياحسبي الله على النحم وساعتها!!!!!!!!

[ابو وافي00]

بسم الله الرحمن الرحيم
(سوالف قيض)
اتمنئ تعجبكم


هذي سالفه صارت معنا العام الماضي في منطقه غرب الرياض وكان معنا طيرين مثلوث اشقر وفرخ شياهين وحصلنا كراوين وهدينا
وانبسطنا و حصلنا بطه ( نحم) وصراحه اول مره اشوف بطه بهذي السرعه المهم ونهد قراش الملوث وكان فيه ريشه ويطردها
مسافة كيلوين ونص اوثلاثه ونضيعه وكانت الارض مشجار ولاتقدر تميز الطير بسهوله ونشغل الجهاز ويعطينا نغمه بعيده وكانت الشمس على
وشك تغيب وحزة وصلنا الطير الا الطير طارحها وينسر منها ويتلفت كن وده يطير وينزل عليه واحد من الشباب ويطير الحين كان فيك خير ادعه
الشمس غايبه والطير شبعان المهم شار عينا واحد انخليه عشان مايبعد ومن اصبح افلح والليل برد والطير بيصرف والصباح نفك له حمامه
وندعيه او نهد الشيهانه ونعلفها واذا شافها راح يجي _ راعي الطير ذيك الليله مانام ساعه يهوجس وساعه يقصد واذكر من الابيات
ياحسبي الله على النحم وساعتها * * * * قفت بقراش تالي عصير واخفيته
يروع قلبي يابوسرحان سرعتها* * * * روح وراها صاد وشبع ماجيته
رحنا ندور الى جينا لحروتها * * * * طار وتنكر ياليت الفرخ هديته
وكان يقصد فرخ الشياهين
وفي الصباح شغلنا الجهاز ودعيناه وكان ممرح على شبك وطرحناه وكانت فرحت خوينا لاتوصف وكان واعدنا اذا رجع طيره يغدينا ذبيحه





تحياتي
ابو وافي00
منقول

[قلب ذيب]

موقف طيب ويصير مع الكثير من القوانيص
والحمد لله على عقلان طيركم
تقبل تقديري .

[قنا النفود]

لاتنسونا من نصيب الذبيحه والحمدللله على لقيته

[ابرق الحرار]

اهم شي ان الله عقله هذي اكبر فرحة عند القناص

[رعد البوادي]

الحمد لله يوم الله عقل الطير
وانتو تستاهلون الذبيحه

[سم الصيد]

ما شاء الله

الحمد لله .. واكيد الفرحه كبيره ولا نلومه


والابيات جميله والقصه اجمل

جعل ايامك كلها سعاده

[جلاد الحباري]

هنيالكم بالعقلان

[؛ابوطلال؛]

[SIZE="5"]الحمد لله على العقلان/SIZE]

[برق المغيب]

الحمد لله على العقلان وراعي الطير ماينلام ليا فقد طيره

[حصريا001]

تستاهل العقلان