فزة الموتر ثقيله

[4200]

السلام عليكم اسعد الله مشرفي واعضاء المكشات بالخير
يا أخواني من مواقع خبرتكم وتجاربكم حبيت استفسر عن ضعف في فزه الموتر نيسان باترول موديل 97 بخاخ علما أن البواجي جديده واسلاك البواجي جديده وفلتر البنزين جديد وفلتر الهواء رياضي نوع كي أن الامريكي وطرمبه البنزين ألمانيه حقت بي ام دبليو والديلكو موزون على 17 الا انه ضعيف في قومته او اذا جيت على طلعه سنود اتمنى من لديه خبره في حل هالمشكله ان لا يبخل علي .. الله لا يحرمكم الجنه ووالديكم ودمتم بخير

[كلاش الشمال]

والله ماعندي خبره في النيسان لكن مادام البواجي واسلاكها ميه ميه وكهربته تمام وين بتكون المشكله
أقرب مالها بتكون جلد بلوف أو حولها شف خبير في المكانيكا مضبوط يكون شغله وأبعد عن العليميه تراهم دمار سيارات .

والله يوفق الجميع

[كلاش2500]

هل الموتر يحن وقت ماتدعس ....اذا الجواب نعم الكلتش عندك ضعيف....يعنى يبغاله دزق وصحن جديد.....اما اذا الجواب لا ...تأكد اذا في دخان اسود او شميت ريحة بنزين معناه ان البنزين مايحترق يعنى بنزين زايد على الفاضى وهنا احتمال تكون طرمبة البى ام لان ضغطها عالى رجع طرمبتها الشد بلد......
اخيرا هل المشكلة ذى مبطية ولاتوها طالعة عندك...اذا مبطية احتمال كروناتك مد (يجوز راعى الموتر اللى قبلك مغيرها الى كرونات مد والمد يطيح عزم الموتر)....واذا انها توها طالعة راجع ماسبق ذكره من حلول.....
بالتوفيق.......

[حمد1ن]

هل الموتر يحن وقت ماتدعس ....اذا الجواب نعم الكلتش عندك ضعيف....يعنى يبغاله دزق وصحن جديد.....اما اذا الجواب لا ...تأكد اذا في دخان اسود او شميت ريحة بنزين معناه ان البنزين مايحترق يعنى بنزين زايد على الفاضى وهنا احتمال تكون طرمبة البى ام لان ضغطها عالى رجع طرمبتها الشد بلد......
اخيرا هل المشكلة ذى مبطية ولاتوها طالعة عندك...اذا مبطية احتمال كروناتك مد (يجوز راعى الموتر اللى قبلك مغيرها الى كرونات مد والمد يطيح عزم الموتر)....واذا انها توها طالعة راجع ماسبق ذكره من حلول.....
بالتوفيق.......

ولا ازيد على كلام اخوي كلاش مشاءالله عليك كفيت ووفيت

[4200]

بارك الله فيكم جميعا
بالنسبة للكرونات حقت وكالته لان الموتر معي من الوكاله ثانيا ما فيه حنه وقت التعشيق واغلب من رد علي في مواقع اخرى يقولون بلف قافل بس انا حبيت استفسر منكم طالت اعماركم عشان ما اروح اخلي هالعمال يتعلمون فيه ابي اروح وانا على بينه أكرر لكم شكري على تعاونكم لا حرمكم الله الجنه

[sgl2002]

اذا فيه تفتفه وهو واقف وهو يمشي


تفتفه قوية فمعناه بلف قافل

[SGL]

أخوي إذا البلف قافل المكينة ترتفع فيها الحرارة وتنتفظ مثل ماقالك أخوي sgl2002 وثاني شي ممكن يكون مقاس الكفرات كبير مثل البالون وغيرها وممكن يكون كلتش المروحة مجيم تأكد منه وشيك على الفرامل لايكون الكليبرات ماسكه في
الهوب وطريقة كشفها تجي ماشي بسرعة60وتفضي السيارة وتشوف السيارة تهدي على طول ولا تجلس تمشي الى أبعد حد وهي مرتاحة وممكن يكون طرمبة البنزين اللي إنت مركبها ضعيفه وأنصحك تركب فرار إذا مافيه فرار وتأكد أن البواجي حقت بخاخ وليس كربريتر وتحياتي لك

[المهاجر انا]

نعم الكلتش عندك ضعيف....يعنى يبغاله دزق وصحن جديد.مثل ماقال اخونا الله يحفظنا وايه

[4200]

بارك الله فيكم جميعا هذا ما كنت ابحث عنه هو اني اروح للورش وانا احدد الاشياء الي ابيهم يفحصونها ما يجلس يتخبط في موتري انا سجلت جميع الاحتمالات الي وضعتوها وأن شاء الله اني رايح اليوم للصناعيه , وراح اكتب سبب ضعف العزم بعد الاصلاح لتكون الفائده للجميع الله يجزاكم خير الجزاء

[sgl2002]

اذا تبي تفحص الكلتش


امش الين ٤٠ ومن ثم عطه الخامس وادعس ، ان شفته يحن ويرتفع عداد الضغط تقول في الفاضي فاعرف انه خربان الكلتش