من ينصفني من وكالة الجميح حسبي الله عليهم

[وادي الصفرا]

اخواني السلام عليكم ورحمة الله وبركاته
احبتي الله يمسيكم بكل خير لدي موضوع مهم جدا ابي شوركم فيه بعد توفيق الله
شرينا من الجميح تاهو فل كامل اسود مخزن اصفار على قولتهم وذلك قبل اربعة اشهر موديل 2012 ومن اول يوم اخذنا فيه الموتر ويبدا مسلسل الاحداث بداية من تحبيل في الكفرات لانها كانت على الجنط اثناء التخزين في المستودع وبعد تردد من الشركه في تبديلها تم الاتصال على الشركه في الامارات وايصال الشكوى وتم تغيير الكفرات ....
نجي للمشكله الثانيه عند الذهاب لشركة متخصصه في العوازل والتضليل لوضع عازل امامي عن الغبار والرمل اكتشف الفني ان وجه السياره مرشوش بويه وقام بتنبيهنا لذلك وعند مراجعة الشركه انكروا ذلك واتهموني انني انا من قام برشها :mad:
هنا بدأت الشراره بيننا ..... قلنا حسبنا الله ونعم الوكيل
المشكله الثالثه وهي الاهم : بعد تقريبا اسبوعين من الاسخدام ظهر صوت داخل الدركسون او الطاره وبشكل متقطع ومعه انقطعت بعض المفاتيح الموجوده فيه (مثل التحكم بالراديو ومثبت السرعه )عن العمل وعلى الفور ذهبت بها للوكاله واخبرته بالمشكله وقالوا ندخلها ونشوف وبعد اسبوع قالوا تعال خذ السياره كان فيها عطل بسيط وصلحناه واخذنا السياره على مضض لان السياره على الضمان ويفترض انها جديده كيف تطلع فيها عيوب ؟؟؟؟
المهم بعد ما اخذنا السياره اكتشفنا ان المشكله ما زالت موجوده واصبحت اسواء من قبل
حيث ان جميع ادوات التحكم في الطاره توقفت عن العمل ...
هنا اعدت السياره وقلت انا لن اركب هذه السياره مرة اخرى عطوني سياره جديده اواعيدوا دراهمي وتبدا المماطلات والمواعيد اللي تخليك تطفش من حياتك وفي البدايه كلام جميل ومنمق وتسويف وكذب وبنخاطب الشركه الام والشركه الاب ومش عارف ايه وانا اردد ياليل مطولك السياره عندهم وفلوسي عندهم وانا ابلط البحر وبعد الكلام الحلو اصبح الكلام جاف شوي وبدينا بالكلام اللي يرفع الضغط كل ما نسال عن المدير ماهو فيه مسافر في اجتماع وبعد ما طفح الكيل واثناء ما الموظفين يغطون على البيه المدير اللي يقول اذا جاكم هذا العميل صرفوه تم اقتحام المكتب واذا به موجود ولا عنده شغل ولاهو مسافر وبعد التحجير عليه قال والله ما عندنا لك سنع ولا حنا معطينك فلوسك ولا مغيرين الموتر واعلى ما في خيلك سوه .................
هاه يالربع انا مغبون وش السواة عطوني شوركم كيف اخذ حقي منهم
حسبي الله عليكم يا شركة الجميح ... حسبي الله عليكم يا شركة الجميح ...حسبي الله عليكم يا شركة الجميح ... اشتري سياره جديده وكاش ب190000 ريال وتطلع فيها عيوب مصنعيه وفنيه ويقولون مالك عندنا شي تبي نصلحها صلحناها ما تبي انقلع :mad::mad:

[ابوعمر1397]

شوف الرابط هذا والله يكون في عونك


http://www.mekshat.com/vb/showthread.php?t=336220


الموضوع يبيله طولة بال وانصحك تكلم شكاوى الغش التجاري على الرقم 8001241616

[قناص الحوى]

الله يكون في عونك

حاس بمعاناتك حسبي الله ونعم الوكيل عليهم الله يزيلهم من الوجود ويمحقهم ويهلكهم ويصب عليهم سوطاً من العذاب وينتقم منهم ويجعلهم عبرة لغيرهم ويشفي منهم صدور قوماً مؤمنين ويجعل الدوائر تدور عليهم ويسلط عليهم من لايرحمهم ويعجل بزوالهم وهلاكهم ياسميع يامجيب

[مخ مصدي]

هذي ضريبة المخزن


يالربع المخزن هو وقوف السياره بشكل مستمر

انصحك باجتهاد شخصي تراسل الشركة الام بنفسك وترجم كلامك ودعمه بصور ووقائع ..

[خالد الحفر]

السلام عليكم ورحمة الله وبركاته

اخوي عندك شركة الام بدبي اتصل فيهم ولا تتهاون حاول تشد عليهم باللي يطلع معاك

اول شغله ارسل لهم ايميل بهالنموذج مع رقم هيكل سيارتك
http://www.globalbuypower.com/action/csContactSectorAction?action=GM&NampltCd=999GMAR&cntryCd=ME

ثاني شي اتصل على هالرقم وحاول ماتسكت على طول تكلم
هذا رقم الشكاوي 0097144290350

اليوم تجاوبو معاي خلال دقايق اتصلو فيني الوكاله يقولون تعال




الله يعينك اخوي وان شاء الله لو تتواصل هلحين معاهم يعني بعد صلاة الظهر ع 1 يدقون عليك الوكاله يقولون تعال للفرع

[ابوو عبدالله]

الله يكون في عونك اخوي ويردلك حلالك
لكن ما اضن بينفعك بعد الله
الا الاماره
والله لا يوفق من غش المسلمين

[وادي الصفرا]

اشكر لكم اخواني تفاعلكم ولكم مني الدعاء ...... واليوم كان فيه اجتماع بعد المطالبات حضر اثنان من دبي من شركة GM واستدعوني ولما حضرت كانوا في انتظاري وطابخين الموضوع مع مدير التسويق وجلسنا قرابة الساعه وحاولوا اقناعي باستلام السياره وقلت لهم استلم السياره بشرط ان تتعهد لي الشركه في حال عودة المشكله لها ترجع فلوسي او تبدل السياره ورفضوا وقالوا احنا علينا كل ما تخرب جيبها ونصلحها وانهينا الاجتماع بدون التوصل لحل مقنع وبخصوص الشكوى يقولون اشتكي هذا من حقك مثل اللي يقول ماعلينا من شكواك
حسبنا الله ونعم الوكيل
حسبنا الله ونعم الوكيل
حسبنا الله ونعم الوكيل

[رِجم]

يابن الحلال اشتكهم على وزارة التجارة الوزير الجديد ما شاء الله عليه

ويمدحون وكيل وزارة التجارة لحماية المستهلك فهد الجلال اعرف واحد راح له يقول طلعت من عنده ومعطيني رقم الجوال ادق عليه اعلمه يقول نسيت والله انه داق علي يسألني

[ابو فارس66]

شف وانا اخوك البلد مليان محامين ،، وكل محامي لو ياخذ نص قيمة السيارة (مع انه من المستحيل ) وشف وش راح يسوي لهم
المحامي يعرف مواطن الضعف ومواطن القوة وصدقني راح يقولون لك تعال خذ الي تبي بس يبي لها طولت بال

[2008تاهو]

حبيبي بالنظام والله ماتاخذ حقك في البلد هذي اسال مج ب
مالك الا حل واحد ادخل على مدير الصيانه وادبغ ابو جده
خليها تكبر والله ليتعوذون من الشيطان
خلك ذيب وخذ حقك بذراعك ترى الدعوه فوضى

[وادي الصفرا]

تحياتي لكم واشكر لكم حبايبي نصايحكم الظاهر ان الشركه اتخذت الطريق الاصعب والله يقويني عليهم والله ما راح اخليهم ....بافضحهم في الجرائد والمنتديات والصحف الالكترونيه وبجرجرهم فالمحاكم ما وراي شي الا القهر ما احد يرضى به ادعولي الله ينصرني عليهم

[العودالازرق]

عليك بجريدة سبق وههم يعرفوان ثمن الدعاية

[خالد بن سعود]

اخوي لو سمحت ابغى اسماء الاشخاص الي تعاملت معهم بالجميح

لان انا عندي مشكله معهم ومانحلت للحين

[ريف النشاما]

شب عليهم ولا تسكت

وشب على الشركة الأم

وخلك كل يوم مقلقلهم ولا تخلي وزارة ولا مسؤل

[هاوي بستنه]

اخي الكريم وادي الصفرا
ما اقول اللا حسبي الله على االظالم ، الله يحاسبهم
عندي فكره لكن ما ادري هل لها تاثير ايجابي ام لا ؟
الفكره تاخذ استمارة السياره وتروح المرور ، ولو تعرف احد في المرور او صديق يعرف احد
وتطلب برنت للسياره ، وتتاكد من وجود ترخيص لرشة البويه اللي اكتشفتوها في وجه السياره
واذا لم يوجد شئ يثبت انه تم اخذ الترخيص لرش البويه ، وانت متأكد ان السياره فعلا مرشوشه
تطلع للمسئول ، وتشرحله انك اخذت السياره من الشركه واكتشفت انها مرشوشه ، وقله انا
خايف يكون السياره عاملين بها حادث في الشركه او برا الشركه ، وابغاكم تكشفون على السياره
وتاكدون لي كيف تم رش السياره ، طبعا شدد على انك خايف من انه يمكن يكون ارتكب بها حادث
وبالتأكيد المرور سوف يبعث باستفسار من الشركه عن رشة السياره ، النتيجه لو تمت هذا الأجراء
في امكانك ان تاخذ صوره من رد الشركه كدليل يدينهم برش السياره وهو هنا يصبح عندك دليل غش
تجاري تستند عليه في شكوى تتقدم بها لوزارة التجاره ..
طولت عليكم الموضوع ، ولكنها فكره عششت في راسي حبيت انبهك لها لعل وعسى انها تفيد..
ابو وائل

[وادي الصفرا]

ابشر اخوي خالد بجيب لك اسماء كل اللي قابلتهم في الشركه
ريف النشاما تسلم اخوي على اهتمامك
هاوي بستنه فكره ممتازه الله ينور عليك وما خطرت في بالي والله يسعدك دنيا واخره

[هاوي بستنه]

الله معك ربي ياخذ لك حقك منهم غصب عنهم باذن واحد احد ..
ابو وائل

[وطن العزة]

الله ييسر لك أمرك وينصرك على من ظلمك

مدري وش أقول أكتب ثم أمسح على هالموال الين استقريت على الدعوه اللي فوق

وللأسف هذا حالنا " نحن أجانب في بلدنا "

[عامر يوسف]

اخوي انا عندي وجهة نظر ..لو تمر علي الشيخ الجمييح اللي مكتبه في طريق الملك عبدالعزيز
مكتبه بالضبط شمال فندق راديسون ساس ..وموجود بعد الظهر مباشرة...الظاهر اسمه محمد
بتلقي السكرتير عرفه بنفسك ..وقل له ابسلم علي الشيخ ..وانا مامشت او شفته بيصرف
قل له ان مقدم شكوي علي وزارة التجارة بس حبيت اخذ راي الشيخ قبل ماروح للوزارة لان عندي موعد معهم
رجال حبيب وطيب وراعي معروف ..واذا تفهم الموضوع بيرسلك الي اي احد يحل موضوعك بسرعه
انا اقولك هالشي من واقع تجربة زميل لي قريب من مشكلتك ....وبحكم معرفتي لاصدقاء الشيخ والقريبين منه ..
والله يوفقك ويسهل لك الامور ..

[vix]

حصلت لي حادثة معهم بفرع الشرقية .. طلع المسئول برا المعرض وأشر على الغرفة التجارية ويقول أعلى مافي خيلك أركبه ... وبالفعل لأنه ماحولك أحد .. حسبي الله ونعم الوكيل على اللي ساكت عليهم من فوق .. هو غريمي يوم الحساب

[العابر2222]

يمكن هذا الخبر يفيدك الحق قدم شكوى مع الريجيل

"التجارة" تحقِّق مع "الجميح" في بيع 550 سيارة بعد إصلاحها http://wap.sabq.org/SgMfde

[أبو مروة...]

في طريقة احتمال ضعيف جدًا انها تنجح
راسل الشركة الأصلية في أمريكا بالمشكلة و ان شاء الله يتجاوبو معك
الله يعينك و يصبرك

[أبن ثعلي]

اعانك الله


اخوي الله يوفقنا واياك راسل صحيفة سبق واكتب لهم القصة على صيغة خبر وهذا يرفع من معدل مصداقية سبق

وهي احرص منك على نشر الخبر بس لازم يتحققون منه اول يرسلون معك واحد يشوف الموضوع كامل واول ما يتأكدون راح ينزلون الخبر

حسب جدولة معينه


اسال الله ان يكتب لك التوفيق والسداد ..

[سوالف]

اخوي الله يكون في عونك

والمفروض انك.... تسوي لك هاشتاق في تويتر ...وتفضحهم
وباللغتين العربيه والاانجليزيه

وفي حال سويت الهاشتاق وباللغتين ارسله الى مكتبهم الاقليمي والشركة الاهم
وبإذن الله بيردون لك فلووووووووووووووووسك

وحسبي الله عليهم

[_TOYOTA_]

الشركات الامريكيه في هالوقت ما همهم الا زيادة المبيعات والشكاوي اذن من طين ومكتفين بالوكيل المحلي
لكن اذا كانت وزارة التجاره وحماية المستهلك قويه وتنصف الزبون فهم يضبطون اما اذا كانت الدرعا ترعا
لا تدور حق ولا باطل

[abosaad777]

اخي العزيز المشكله عويصه. ولاكن كل مشكله ولها حل
تعال نشوف الحلول
?-مخاطبه الشركه الام
? - وزاره التجاره
?-حمايه المستهلك
?-الاماره
?- الاعلان بالوسايل الاعلاميه(سبق)وغيرها
?-ايقاف السياره علا الشارع العام وكتابه لافته عريضه باللغتين وتصويرها مع. علامه جي ام وارسالها للشركه الام
?-نشر الصور بالمنتديات العربيه والاجنبيه. وهذي خلها علينا انت بس ارفق لنا صور بالمنتدى والشباب. والله مايقصرون
واذا نسيت شي. فذكروني


تم الإرسال بواسطة iPhone بإستخدام Tapatalk

[متابع سحاب14]

كل مشكله ولها حل باذن الله بيتحسن الوضع ونا مع راي اخوي ابو وائل

[ابو خا لد]

اخي العزيز المشكله عويصه. ولاكن كل مشكله ولها حل
تعال نشوف الحلول
?-مخاطبه الشركه الام
? - وزاره التجاره
?-حمايه المستهلك
?-الاماره
?- الاعلان بالوسايل الاعلاميه(سبق)وغيرها
?-ايقاف السياره علا الشارع العام وكتابه لافته عريضه باللغتين وتصويرها مع. علامه جي ام وارسالها للشركه الام
?-نشر الصور بالمنتديات العربيه والاجنبيه. وهذي خلها علينا انت بس ارفق لنا صور بالمنتدى والشباب. والله مايقصرون
واذا نسيت شي. فذكروني


تم الإرسال بواسطة iPhone بإستخدام Tapatalk

:f عز الله هذا الحل .. ماقصر ابوسعد

[ابو خالد 111]

حسبنا الله ونعم الوكيل

اخوي نصيحه قدم شكواك على الاماره

وثاني شي نصيحه لاتحط لافته لان فيه اثنين حطو لافته وتم سجنهم

مالك الا الدعاء اخر الليل

والله يعوضك خير ان شاء الله

[القرناس 97]

حسبنا الله ونعم الوكيل
اخواني بعد الاطلاع على هذا الموضوع و مواضيع اخرى
( هل تنصحوني بعدم التعامل مع شركة الجميح حيث اني ارغب في شراء تاهو LT 2014 ، وايهما الافضل من حيث الصيانة شركة الجميح او التوكيلات العالمية ):confused:

[Yazed Alzahr]

الله يكون في عونك اخوي

[الصوت البعيد]

بتتسهل اخوي
شد حيلك والله معك

والمؤمن القوي خير عند الله من المؤمن الضعيف
وفي كل ٍ خير ،،

[سامر عبدالله]

اسوء وكيل سيارات في العالم قبل الشراء الموضفين متعنطزين وبعد الشراء يلطعون عيونك علشان يفحصون لك السيارة بعد الخمس الاف

عام 2009 رحت لهم ابي اشري يوكن 2009
يقولى الموظف هذي السيارة الوحيدة عندنا في العرض تبيها خذها ماتبيها كيفك هذا في المدينة
والله واقوم من الكرسي وعلى طول واروح جدة للتوكيلات العالمية استقبال محترم وتعامل راقي حتى لما خلصت اوراق السيارة اتصل علي الموظف وقال لي تعال استلمها قلت بكرة اجيكم بالطيارة يوم وصلت المطار الا ويتصل علي الموظف ويقولي انا عند بوابة المطار انتظرك ورحت معاه واستلمت السيارة
وكل شهر في اول سنة يتصلون علي ويسألوني عن السيارة وصيانتهم بعد الخمس الاف ياسلام عليهم جيتهم الصباح قالوا لي عندنا زحمة تطلع السيارة العصر لكن ان كنت محتاج السيارة روح وتعال العصر وتستلمها المغرب
ليست دعاية لهم لكم تعاملهم راقي

[بيق مان]

حسبنا الله ونعم الوكيل
اخواني بعد الاطلاع على هذا الموضوع و مواضيع اخرى
( هل تنصحوني بعدم التعامل مع شركة الجميح حيث اني ارغب في شراء تاهو LT 2014 ، وايهما الافضل من حيث الصيانة شركة الجميح او التوكيلات العالمية ):confused:

الحقيقة تعاملهم سيء وغطرسة ما لها حد، ناهيك عن التأخير في التسليم والصيانة وهضم حق العميل في العيوب الفنية المصنعية الواضحة والغش في تسويق السيارات المتضررة من النقل وسوء التخزين على أنها جديدة بعد إصلاحها .. لي تجربة قديمة معهم وتجربة جديدة ايضاً وللاسف لم اتعض من الأولى وتوقعت أن أمورهم تحسنت الا أني اكتشفت بعد التجربة الثانية انها اصبحت اسوأ.. اذا عندك خيارات أخرى فأبتعد عنهم.. بالتوفيق.

[صيهد]

اخوي صارت له نفس القصه
مطلع اليوكن من حوش الجميح الله لا يسامح و لا يغفر له ان كان يدري بلي يصير في شركته
المهم استخدمها سنه و فكر يبيعها و يوم دخل بها المعارض الا يجيه ذاك الشريطي و معه جهاز فحص قاله الباب مرشوش و انت تقول انها سليمه و بغت تصير هوشه قاله الشريطي ترى منت اول واحد كثير مطلعينها من الوكاله و اذا جى يبيع بعد كم سنه اكتشف انها كانت مرشوشه.
المهم ما نقول الا حسبي الله و نعم الوكيل
نصيحة قبل لا تطلع السيارة اتفق مع واحد من الشريطية يجيب جهازة معه و يفحص السيارة و عطه قاسمت الله
و للعلم و كيل دوج قبل فترة التجارة مقفله محله لانه يسوي نفس الشي يصلح السيارة و يبيعها على انها سليمه
الرابط
http://sabq.org/8Vhgde

وشكرا