ماذا اعمل

[الاعضاء واجد]

ياخوان عندي شيهانه تركيه طيبه وسبوق وتصيد لكن فيها عيب يتكسر ريشها ثلاث سنوات متواليه كل ماتطلع من المربط وعند اول كفخه تكسر وتعودت على التوسير دائم عند العويدي او المستشفى ودي اعرف خبرة اهل التجارب لعلي استفيد

[كلي فخامه]

هذي خلقه بعض الطيور ريشها قزاز على طول تنكسر

[الحرالباكي]

تقرب لميس هاذي نعومه مره عشان تركيه

[THE SNIPER H]

احتمال نقص فيتامينات اثناء القرنصه

[حزم الفيضه]

صباح الخير هذاء نقص فيتامين عطهاء زيت كبد الاحوت وكثر لهاء الافيتامين في الاعلف
مره في الاسبوع وسلامتك

[ابوسعدالقناص]

السلام عليكم ورحمه الله وبركاته
حسب علمي انه نقص فتامين اعطيها بيض يساعد علي تقوية الريش بعون الله والله يوفقك

[مودع الخلان]

عطها علف خفيف واحقن ابرة مملؤه بصفار البيض وعطها الطير بالاسبوع مره

[قنا النفود]

عطه قوانص دجاج مناسبه له

[شرمان99]

من باب التجربه عطها نقاع الحلبه مع الحبه السودا مع الماء وهي بالربطه وشف النتيجه

[قلب ذيب]

تكسر ريش الطير ينتج لقلة فيتامين الحديد فيه , ولكون الطير من النوع الخفاق .
عند نقلك للطير حاول ترشه بالماء علشان يركد , ولايفرع الا على يدك , وممكن تشكل الريش في بداية نقلة الطير اي تربط الموس مع الطوايل لفترة تدهيل الطير , فيتامين الحديد موجود لدى البيطري , وعدم التفريع بالطير في اول نقله من المربط يحافظ على ريشه . والله اعلم.

[جلاد الحباري]

بصراحه الاخوان ماقصرو كلن ادلى بدلوه والنتيجه بشكل عام الشاهين لازم يستصح مضبوط اكرمها بالعلف الطيب ولا تنسى الخلطه حلبه ورشاد او حلبه بس وعطها شي بسيط مع العلف لمدة اسبوعين وراح تشوف الشاهين متغير وان بغيت تواصل معها على طول بس تكون الكميه بسيطه ما عندك مشكله والامر المهم الطيره لازم تحرص على نقلتها لاصفت وتبتعد عن الزوايا ويكون معك بخاخ يركدها وحاول تعشيها على يدك على طول وتنقزها لين تركد وتزين الامور والله يوفقك

[خالد العطااوي]

لوصيك بالجرابيع والجرذي < ,, اذا رابطها عندك ,,

[فزاع العنزي]

اسعد الله اوقات الجميع بالخير.
حسب ماعرفت من اهل الخبرة وانتم ان شاء الله ادرى ان الطير وقت الربطه لازم يقلب علف الطير ببيض مخفوق من فتره لفتره يعني يكون العلف مدهون بالبيض علشان يتقوى ريش الطير.
تقبل مروري.