المساعد الشخصي الرقمي

مشاهدة النسخة كاملة : *** صدم الغزال والحظ مال*** (مقناص طاروح وحظة العاثر)


حصريا001
19/05/2013, 08:24 AM
بِسْمِ اللهِ الرَّحْمنِ الرَّحِيمِ




السلام عليكم ورحمة الله وبركاته


اخواني اعضاء ومشرفين ووزوار


منتديات مكشات





اليوم حاب اشارككم بقصة حدثة أحداث هذي القصة قبل أربع سنوات وحنا قانصين في منغوليا




(ملاحظة: جميع الصور ماخوذة من النت)




في البداية يقول الله عز وجل في كتابة



بِسْمِ اللهِ الرَّحْمنِ الرَّحِيمِ



(فَخَرَجَ عَلَى قَوْمِهِ فِي زِينَتِهِ قَالَ الَّذِينَ يُرِيدُونَ الْحَيَاةَ الدُّنيَا يَا لَيْتَ لَنَا مِثْلَ مَا أُوتِيَ قَارُونُ إِنَّهُ لَذُو حَظٍّ عَظِيمٍ)



.....................



قدر الله وما شاء فعل والحمدلله على كل حال



...................



والحظ العاثر اظنه اختبار من الله عزوجل



.................................................. .........



بداية القصة



كنا مجموعة من الأصدقاء في رحلة لطرح الطيور وكنا في مخيم لحالنا



http://www.mekshat.com/pix/upload05/images253/mk248777_001..jpg





وكعادة العرب في بلاد الغربة نجتمع مع بعض وفي يوم من الأيام جاء الشخص صاحب القصة و اسمحولي بطلق علية لقب ( المنحوس )


المهم جانا وكان شخص خفيف الدم وراعي سوالف مضحكة واصرينا علية انة يجلس عندنا بالمخيم ويقنص وتم يقنص عندنا ولا توفق بالمقناص وحب انة يغير مكان المقناص


http://www.mekshat.com/pix/upload05/images253/mk248777_imagesca4f8rl6.jpg



وتوجه مع بعض الأخوة لمكان اخر يبعد ٧٠٠ كيلو , وبعد اسبوع رجع لنا للمخيم وكان متضايق وكانت هذي



http://www.mekshat.com/pix/upload05/images253/mk248777_imagescakh2rab.jpg




أول موقف: نحس له يقول المنحوس : حصلت طير طيب



http://www.mekshat.com/pix/upload05/images253/mk248777_04.jpg




وكان معي قطا وحمام وجاهز للطير , يقول كل مارميت زريق شالة عقاب ولا طير عادي وعلى هذا الحالة لين خلص الزريق الي معي وارتفع ضغطي والطير موكر قدامي يبي الزريق ولا فية حد من ربعي قريب مني ، يقول اخر المطاف ضاع الطير و قعدت افرك ايدي من الحسرة



يقول وانا راجع للمخيم قبل المغرب شفت عقاب موقع على حجر صغير يقول اول ماشفتة فرحت وقلت بنتقم منه هههههههه



http://www.mekshat.com/pix/upload05/images253/mk248777_004.jpg




يقول وانا ادوس على البنزين حتى تسرع السيارة ولا يكون له مجال للطيران وللهرب



http://www.mekshat.com/pix/upload05/images253/mk248777_05.jpg




يقول وفعلاً فرشتة مع الارض , بس الفرحة ما اكتملت صادف ان العقاب كان وراة صخرة أكبر منة سوداء ماشفتها



http://www.mekshat.com/pix/upload05/images253/mk248777_7.jpg




ولادريت بعمري الا السيارة طارة على جنب وكنت بتنقلب لكن ربك ستر يقول: وانزل من السيارة وانا ارتعش من الخوف واتفقد السيارة الا التاير(الكفر)



http://www.mekshat.com/pix/upload05/images253/mk248777_8.jpg




منشق والرنق (الجلنط) مكسور وصرت خاسر ثلاث اشياء الطير- والتاير- والرنق - يالله السلامة من قلة الحظ ورجعت لكم ،



قلنا لة: ابشر بالعوض واقنص عندنا والله بيرزقك ،


ــــــــــــــــــــــــــــــــــ



الموقف التالي: بعد ماقنص عندنا بيومين الا هو يصوت علينا الصبح بالجهاز (الاسلكي )




http://www.mekshat.com/pix/upload05/images253/mk248777_00010.jpg




يقول افزعولي تاير السيارة الامامي يمين انفك من محلة




http://www.mekshat.com/pix/upload05/images253/mk248777_09.jpg





وكلة من سبب العقاب , وبعثنا له سيارة حتى تساعدة في تصليح سيارتة وتحضر له قطع الغيار وتمت سيارتة يومين واقفة في مكانها وكلة من سبايب الصخرة والعقاب الي صدمة ههههههه.



ــــــــــــــــــــــــــــــــــ


الموقف الي بعده : يقول: المنحوس كنت قانص وارتفعت حرارة السيارة بدون اي سبب وتبين بعد هذا انة ما وضع شبك حماية من البلاستيك على رديتر السيارة



http://www.mekshat.com/pix/upload05/images253/mk248777_0011.jpg




ودش الحشيش والغبار في الرديتر ولابد من تنظيف الرديتر في اقرب ورشة يقول: المنحوس توجهة لاقرب ورشة بالعاصمة يقول ياخواني تعجبت من كمبريسور الهواء القوي عندهم




http://www.mekshat.com/pix/upload05/images253/mk248777_0012.jpg




وهو ينفخ ينظف الرديتر وقلت لازم اشوف حجم الكمبريسور يقول في اثناء تفحصي لحجم الكمبريسور يقول المنحوس: نسيت نفسي من كبر حجم الكمبريسور وبدون لا اشعر كنت لابس شماغ




http://www.mekshat.com/pix/upload05/images253/mk248777_0013.jpg





ولافها على رقبتي وطرف الشماغ سحبتة مروحة الكمبريسور ونخنقت حتى ماقدرت اطلع صوت والله رزقني بالعامل انة كان قريب وشافني ولا رحت قتيل الكمبريسور هههههههه ,



بعد ماردت فيني الروح الا مدير الورشة يطالبني بمبلغ لصيانة الكمبريسور بسبب الشماغ الي لف وتقطع على المروحة وصرت خاسر الشماغ تقطع – ودافع مبلغ اضافي لصيانة الكمبريسور ياجعلة معاد يشتغل ههههههه


ــــــــــــــــــــــــــــــــــ


الموقف التالي : يقول: المنحوس: وانا راجع من العاصمة قبل المغرب بعد ما صلحت الرديتر وقبل ما اوصل للمخيم شفت غزال قاطع قدامي





http://www.mekshat.com/pix/upload05/images253/mk248777_0015.jpg




يقول: قلت في نفسي يالله يالمنحوس تعبت ربعك وغثيتهم كل يوم بمصيبة جديدة ، ولا طرحت طير يالله بيض وجهك وجب لهم هذا التيس عشاء لهم يقول: واسوق السيارة



http://www.mekshat.com/pix/upload05/images253/mk248777_0016.jpg





واصدم الغزال الا هو طايح و داش تحت السيارة وانا انبسط وارجع له وافتح باب السيارة واخذ السكين وانزل وانا متنومس الا الرديتر يصب ماي



وانزل تحت السيارة الا قرن الغزال ضارب الرديتر وشاقة




http://www.mekshat.com/pix/upload05/images253/mk248777_18.jpg




واجلس عند الغزال الوم نفسي اقول كل ما اضربها عوجا توني ماتهنيت برديتر ههههههههه.
............



ارجو عدم الرد حتي اكتمال الموضوع
حصريا001
19/05/2013, 08:37 AM
الموقف التالي : تاخر علينا المنحوس ذاك اليوم ولا جانا الى مع صلاة العشاء
وكان حالتة تعبان ويوون ويشتكي من عظامة وسئلناه عن القصة ،
يقول المنحوس كنت جالس عند بير ماء



http://www.mekshat.com/pix/upload05/images253/mk248777_0019.jpg




مضبط العزبة واسوي شاي وقهوة والمنغولي المساعد لي يغسل هدومي



http://www.mekshat.com/pix/upload05/images253/mk248777_0020.jpg




الا راعي حصان منغولي محول علي




http://www.mekshat.com/pix/upload05/images253/mk248777_0021.jpg




يقول صبيت له بيالة شاي وجلس يشرب ويقولي انتو يالعرب مشهودين بالفروسية
اركب الحصان المنغولي خلنا نشوف يقول المنحوس: كنت خايف اتفشل فيهم بعدين شفتهم يتكلمون بين بعض
وحسيت من كلامهم انهم يقولون هذا عربي خايف يقول قلت: في نفسي افا عليك (يالمنحوس) تركب الخيل الاصايل وتخاف من هذا الكديش هههههههه



يقول: وتحزم بثوبي واحذف نفسي فوق الحصان يقول والله من استويت على ظهره
ماشفت الا السماء والغيم في وجهي اتاري الحصان مستنكر شكلي بالثوب ووقف على رجيلة
وايدية في السماء




http://www.mekshat.com/pix/upload05/images253/mk248777_0022.jpg





واطير من ظهرة الا انا طايح على ظهري والغبار مثل الغيمة فوقي
وشماغي طايرة مترين وراي وانا اون واستقعد




http://www.mekshat.com/pix/upload05/images253/mk248777_00023.jpg




وما استقعدة واستويت الا الحصان جاي صوبي وهو ينفخ هواء
مع مناخرة وانا ازحف وراي خايف منة ويقوم يعض طرف ثوبي
ويلوح بي الا انا طايح على وجهي واون هههههههههه



ـــــــــــــــــــــــــــــــــــــــ



الموقف التالي : رجع لنا ذلك اليوم مبسوط ومستانس قلنا بشر يالمنحوس انشوفك مستانس
بشر عسى طرحت طير قال المنحوس ابشركم طرحت طير ابيض
وصافي ظهر وممسوح العمد وقياسة 18*18 ومنخرة وسيع ................. الخ
وصار يمدح في الطير وقلنا وينة قال المنحوس : فكيتة
قلنا ولييش تفك الطير قال قايلكم انا منحوس بعد ماضفيتة في يدي





http://www.mekshat.com/pix/upload05/images253/mk248777_0025.jpg





الا اشوف اصبعة العالف مقطوع من اخرة




http://www.mekshat.com/pix/upload05/images253/mk248777_0026.jpg


يالله سترك من قلة الحظ ههههههههههههه


ـــــــــــــــــــــــــــــــــــ



الموقف التالي : في يوم من الايام جانا واحد من ربعنا الخليجيين للمخيم وسئلنا عن المنحوس
وقال: مادري هو حصل طيرة ولا لا



قلنا له: اي طير تتكلم عنة قال رفيقنا الخليجي ليش هو ماعلمكم بسالفة الطير
قلنا له ماقال: لنا شي ابد تم يضحك



قال الخليجي: ياهي سالفة كنت قانص الا هو مار علي بسيارتة بعد ماشافني
وعرف سيارتي لحقني بسيارتة وهو مولع اليت السيارة الامامي



http://www.mekshat.com/pix/upload05/images253/mk248777_0027.jpg





ووقفت السيارة وكان علينا هواء شمالي صلف شوي يقول :نزل المنحوس وهو مبتسم وشايل في يدة طير ممهود
وقالي بارك لي بطير يقول: قلت مبروك ان شاء الله قال :المنحوس لحظة
بلبس الطير سبوق يقول فك مهاد الطير



http://www.mekshat.com/pix/upload05/images253/mk248777_0028.jpg





ويفرط الطير من يدة بالبرقع




http://www.mekshat.com/pix/upload05/images253/mk248777_0029.jpg




ويزفة الهواء ويعتنز الطير




http://www.mekshat.com/pix/upload05/images253/mk248777_0030.jpg




وارتفع الطير




http://www.mekshat.com/pix/upload05/images253/mk248777_0031.jpg




يقول ركب المنحوس في سيارتة وراح يطرد الطير في ذيك الضلعان




http://www.mekshat.com/pix/upload05/images253/mk248777_0032.jpg





ولا ادري وش سوى معه مع اني اتلا العهد بطير مرتفع
فووق ولا ظنتي عادة بيوقع الا بالصين ههههههههه




http://www.mekshat.com/pix/upload05/images253/mk248777_00033.jpg




وهذي اخر قصصة قبل لا ينوي للرجوع لبلادة الله يذكرة بالخير
وكانت هذي اول رحلة له واخر رحلة في منغوليا
معاد حد ذكرة لنا في منغوليا من اربع سنوات.
عآشق الbaikal
19/05/2013, 09:00 AM
هههههههههههههههه انشهد هذا والله النحس

الله يسعدك مثل ما اسعدتنا
قصص طيبه وانت اطيب يابعدي
تحياتي
ابرق الحرار
19/05/2013, 09:03 AM
صباح الخير اخوي حصريا001 عزالله انه منحوس وبقوه ولكن سوالف طريفة الله يعطيك العافيه وشوقتنا في نفس الوقت بالطرح والى الامام وبالنسبة للمنحوس يبطل مقناص في حياته
ذراع الذيب
19/05/2013, 09:03 AM
السلام عليكم ورحمة الله وبركاته


هلاااا والله وغلاااا


بأخوي حصريا


تسلم يمينك على هالتقرير الرائع والفريد من نوعه وابدعت في سرد القصه بوضعك لهالصور التشبيهيه وفعلاً ابدعت


واقول لخوينا المنحوس عسا ان تكرهوا شيئاً وهو خيراً لكم وكما ان قتله للعقاب هو ذنب عظيم !!!!!! الله يغفر لك


ومشكور على التقرير الطيب وسيتم التثبيت بـ(فنجال وعلوم رجال) ويستحق التقييم الاعلى


وسيتم النشر عبر تويتر مكشات وجوال مكشات


ومشكور يالنشمي
لبيه يمنادي
19/05/2013, 11:27 AM
السلام عليكم ورحمة الله وبركاته

مشا الله .. مشا الله

تبارك الله ايخوي حصريا ... عيني عليكم باردة ... وتسلم يمناك علي هالتقرير الطيب ..

ترا حلاة الرحله في الموافق الطريفة والمواقف الصعبه ... والنحاسة ترا لها موجات علي الواحد ..

تقبل تحيااتي

اخوك / بو مرشد
@السيف@
19/05/2013, 11:46 AM
ههههه اضحك الله سنك والله تستاهل تميز صراحه
المسكين اموره معكسه الله يرزقه بالنادر اللي يعوضه خسايره
كلي فخامه
19/05/2013, 12:05 PM
ماشاءالله عليك وعلى ترتيبك وعلى سردك للموضوع ... والله يسعدك ويوفقك .
وان شاءالله مايكون حظك مثل حظ المنحوووس
THE SNIPER H
19/05/2013, 03:14 PM
هههههههههههههالله يرزقه حظه في الجنه
بس طريقه سردك للمواقف مشوقه
ابو وافي00
19/05/2013, 03:32 PM
السلام عليكم ورحمة الله وبركاته
صراحة امتعتنا بالقصه
الله يعينه علئ حظه الأقشر ويعوضه الجنه


تحياتي:
أبو وافي..
أبو لافي العصيمي
19/05/2013, 03:34 PM
صراحة دخلت جو مع قصصكـ الطريفه

وخوت خويكـم والله انها وناسه وفي نفس الوقت نحاسه

والله يعوضه بالحظ الزيــن فالجنه

مشكوور اخوي على سردك الرائع للقصه

بالتوفيق

اخوكـ:-

*(أبو لافي العصيمي)*
سلطان 1
19/05/2013, 03:40 PM
ههخههههههههههههههه

هذا والله اللي حضه منسدح ومتجود في الارض.
والله لا يلومه اللي معاد قنص منغوليا زين انه ساااالم
الامور اللي صارت له كوووووووم
وسالفه الشماااااغ كووووووم.
لاهنت اخوي حصريا علي
هالسالفه.
؛ابوطلال؛
19/05/2013, 03:55 PM
والله كلمت منحوس شويه معه
الله يرزقه بالحظ الطيب والتوفيق ويرقنا وجميع الأعضاء

بيني وبينك لا شفته إنحش:redcar::D
(هزاع)
19/05/2013, 04:07 PM
حياك الله اخوي حصريا ..
قصه جميله وسرد ممتع ..
نسأل الله العفو والعافيه عز الله انه منحوس صحيح ..
بعض العرب ماودك تخاويه نكبه مايمسك شي ويتبارك ينكب الرحله ..
وبعض العرب مثل الفال الطيب من وين ماوجهت به الخير واجهكم ..
مشكور وفقك الله لما يحبه ويرضاه
غازي السهلي
19/05/2013, 04:56 PM
هذا مهوب بعيد من خليف ومعزبه ههههههههههههههه
الله يسعدك ياراعي القصه
بن قنور
19/05/2013, 05:24 PM
مبدع اخي العزيز حصريا
سرد قصصي رائع والله مايطق بالعصا
نحسه كله من ورا العقاب يوم فرشه الموتر واخذ جزاه
جزيل الشكر ابو فيصل
أبو أمين
19/05/2013, 06:00 PM
من هنا جاء المثل : اعطني حظا وارمني فالبحر

والظاهر خوينا من يوم ما نرميه فالبحر بيلهطه قرش هههههههه

تحياتي
قلب ذيب
20/05/2013, 01:20 PM
مواقف عجيبه
فيها عبره وتجربه
شكرا لك .
حصريا001
20/05/2013, 01:27 PM
هههههههههههههههه انشهد هذا والله النحس

الله يسعدك مثل ما اسعدتنا
قصص طيبه وانت اطيب يابعدي
تحياتي
حياك الله اخوي ....... عاشق ال baikal ..... الله يديم عليك السعادة يارب قصة فيها عبرة , الطيب منك وفيك طال عمرك ....... اسعدني تواصلك
حصريا001
20/05/2013, 01:29 PM
صباح الخير اخوي حصريا001 عزالله انه منحوس وبقوه ولكن سوالف طريفة الله يعطيك العافيه وشوقتنا في نفس الوقت بالطرح والى الامام وبالنسبة للمنحوس يبطل مقناص في حياته

حياك الله اخوي ....... ابرق الحرار ..... هههههههههه والله كل يوم كنا ننتظر نهاية اليوم حتى نسمع الاحداث الي صارت معه في مقناصة , اعتقد بطل مقناص والدليل له 4 سنوات ماشفناه ....... اسعدني تواصلك
صقرالحروب
20/05/2013, 01:32 PM
هههههههههههه عز الله انه منحوس والله يكينا شر خوتهم الله يسلمك ويعطيك العافية على هالتقرير المميز
حصريا001
20/05/2013, 01:33 PM
السلام عليكم ورحمة الله وبركاته



هلاااا والله وغلاااا


بأخوي حصريا


تسلم يمينك على هالتقرير الرائع والفريد من نوعه وابدعت في سرد القصه بوضعك لهالصور التشبيهيه وفعلاً ابدعت


واقول لخوينا المنحوس عسا ان تكرهوا شيئاً وهو خيراً لكم وكما ان قتله للعقاب هو ذنب عظيم !!!!!! الله يغفر لك


ومشكور على التقرير الطيب وسيتم التثبيت بـ(فنجال وعلوم رجال) ويستحق التقييم الاعلى


وسيتم النشر عبر تويتر مكشات وجوال مكشات



ومشكور يالنشمي

حياك الله اخوي ....... ذراع الذيب ..... وتستاهلون كل جديد مني او من اخواني الاعضاء , اما الابداع فهو تعليقاتكم وتوجيهاتكم لنا كاعضاء وياليت نوصل في مستواكم او مستوى الاعضاء البارزين في هذا المنتدى , واعتقد قلة الحظ مع خوينا بسبب العقاب الي قتلة بدون اي ذنب يذكر , ....... اسعدني تواصلك
حصريا001
20/05/2013, 01:36 PM
السلام عليكم ورحمة الله وبركاته



مشا الله .. مشا الله


تبارك الله ايخوي حصريا ... عيني عليكم باردة ... وتسلم يمناك علي هالتقرير الطيب ..


ترا حلاة الرحله في الموافق الطريفة والمواقف الصعبه ... والنحاسة ترا لها موجات علي الواحد ..


تقبل تحيااتي



اخوك / بو مرشد

حياك الله اخوي ....... لبيه يمنادي ..... انشهد انك صادق بعض المرات الواحد منا تلزمة النحاسة فترة من الوقت ولا يعرف وشهو السبب الله يبعد عنا وعنكم وعن كل مسلم باب قلة الحظ , امين يارب ....... اسعدني تواصلك
حصريا001
20/05/2013, 01:38 PM
ههههه اضحك الله سنك والله تستاهل تميز صراحه

المسكين اموره معكسه الله يرزقه بالنادر اللي يعوضه خسايره

حياك الله اخوي ....... @ السيف@..... والله انك صادق وين مالقى وجهه المسكين الحظ مخالفة ههههههههههه امين يارب يرزقة بطير النادر يارب في منغوليا ولا في بلادة ....... اسعدني تواصلك
حصريا001
20/05/2013, 01:41 PM
ماشاءالله عليك وعلى ترتيبك وعلى سردك للموضوع ... والله يسعدك ويوفقك .


وان شاءالله مايكون حظك مثل حظ المنحوووس

حياك الله اخوي ....... كلي فخامة ..... ابشرك حظي طيب مثل حظك ههههههههههههه , انتو بمثابة الاساتذة علينا تعلمنا منكم طرق السرد للمواضيع ....... اسعدني تواصلك
حصريا001
20/05/2013, 01:43 PM
هههههههههههههالله يرزقه حظه في الجنه
بس طريقه سردك للمواقف مشوقه
حياك الله اخوي ....... THE SNIPER H..... الله يرزقة في الدنيا وفي الجنة يارب , حتى نوصل الى اذواقكم العالية لابد من بذل كل مجهود لدينا ....... اسعدني تواصلك
قلب صافي
20/05/2013, 01:44 PM
هذي والله ردات الحظ منحوس بقوه ولا فيه حيله نصيحة لاعمره يروح معكم

تقبل مروري والله يعطيك العافيه
حصريا001
20/05/2013, 01:47 PM
السلام عليكم ورحمة الله وبركاته

صراحة امتعتنا بالقصه
الله يعينه علئ حظه الأقشر ويعوضه الجنه



تحياتي:
أبو وافي..


حياك الله اخوي ....... ابو وافي ..... امين يارب يعوضة الجنة , المسكين والله مارجع من رحلتة غير بقيمة سيارتة الي باعها بخسارة وحجز ورجع لبلادة ....... اسعدني تواصلك
حصريا001
20/05/2013, 01:49 PM
صراحة دخلت جو مع قصصكـ الطريفه



وخوت خويكـم والله انها وناسه وفي نفس الوقت نحاسه


والله يعوضه بالحظ الزيــن فالجنه


مشكوور اخوي على سردك الرائع للقصه


بالتوفيق


اخوكـ:-



*(أبو لافي العصيمي)*

حياك الله اخوي ....... أبو لافي العصيمي ..... عزالله انك صادق المسكين متغرب من بلادة ويبي الربح بس كل مايضربها عوجا الله يعوضة بالجنة ....... اسعدني تواصلك
حصريا001
20/05/2013, 01:52 PM
ههخههههههههههههههه



هذا والله اللي حضه منسدح ومتجود في الارض.
والله لا يلومه اللي معاد قنص منغوليا زين انه ساااالم
الامور اللي صارت له كوووووووم
وسالفه الشماااااغ كووووووم.
لاهنت اخوي حصريا علي

هالسالفه.

حياك الله اخوي ....... سلطان 1..... والله ياخوي لو تسمعه بنفسة يسوالف انك تسوي مثلة وتنسدح على ظهرك من كثر الظحك , الله عطاه حلاوة سوالفة وخذا منة الحظ الطيب الله يرزقة الجنة يارب ....... اسعدني تواصلك
حصريا001
20/05/2013, 01:53 PM
والله كلمت منحوس شويه معه
الله يرزقه بالحظ الطيب والتوفيق ويرقنا وجميع الأعضاء

بيني وبينك لا شفته إنحش:redcar::D
حياك الله اخوي ....... ابو طلال ..... امين يارب يسمع منك الدعاء , انحشنا منة لنا 4 سنوات ههههههههه ....... اسعدني تواصلك
حصريا001
20/05/2013, 01:57 PM
حياك الله اخوي حصريا ..

قصه جميله وسرد ممتع ..
نسأل الله العفو والعافيه عز الله انه منحوس صحيح ..
بعض العرب ماودك تخاويه نكبه مايمسك شي ويتبارك ينكب الرحله ..
وبعض العرب مثل الفال الطيب من وين ماوجهت به الخير واجهكم ..

مشكور وفقك الله لما يحبه ويرضاه

حياك الله اخوي ....... (هزاع) ..... انشهد ان النحس معقود بين عيونة , بس الزين ياخوي انه طوال تواجدة معنا في المخيم لمدة شهر ونص كان حظنا طيب وطرحنا طيور طيبة , يمكن رب العالمين اخذ منة وعطانا الله واعلم , وكنا كل يوم ندعي له بتوفيق بس ماربي قبل دعائنا يمكن الله احتفظ له بالجنة في الاخرة اللهم امين ....... اسعدني تواصلك
حصريا001
20/05/2013, 01:58 PM
هذا مهوب بعيد من خليف ومعزبه ههههههههههههههه
الله يسعدك ياراعي القصه
حياك الله اخوي ....... غازي السهلي ..... الظاهر انة خليف بعينة ههههههههههه ....... اسعدني تواصلك
توكار
20/05/2013, 04:27 PM
لاحول ولاقوة الا بالله

ياشين المنحوس لكن تتوقع انه قليل الأستغفار ولا لا
راعي شلهوب
21/05/2013, 02:06 AM
يامرحبا اخوي حصريآ
قصه جميله وسرد ممتع وأبدعت يالسنافي
اما المنحوس ماله حل هههههههه الله يقوم حظه ويعوضه ومن يقرا
تقبل مروري
عبدالرحمن بن ذياب
21/05/2013, 03:32 AM
الله يرزقه بالنادر اللي يفك هالنحس منه
لا هنت على السرد الممتع
حصريا001
22/05/2013, 01:40 PM
مبدع اخي العزيز حصريا



سرد قصصي رائع والله مايطق بالعصا
نحسه كله من ورا العقاب يوم فرشه الموتر واخذ جزاه
جزيل الشكر ابو فيصل

حياك الله اخوي الكبير ....... بن قنور ..... والله بدون مجاملة كل ماتنزل موضوع عن مقانيصكم القديمة احس بغصة , واتذكر جيلنا القديم ومقانيصهم وجمعتهم الطيبة , والحين صار المقناص تعب وشقى وخساير اكثر منة وناسة بس وش نسوي مع حال الدنيا ,
اما بخصوص صاحب القصة المنحوس صدقت كل هذا اعتقد من سواياه في العقاب واخذ جزاه والله يعوضة بربح في الجنة ان شاء الله ....... اسعدني تواصلك
حصريا001
22/05/2013, 01:42 PM
من هنا جاء المثل : اعطني حظا وارمني فالبحر

والظاهر خوينا من يوم ما نرميه فالبحر بيلهطه قرش هههههههه

تحياتي
حياك الله اخوي ....... أبو أمين ..... هههههههه بعد سوالفة هذي اعتقد مثل ماقلت بيلهطة قرش في البحر والقرش بيصيدة صياد والصياد بيقطع لحمة وبيوزعة في علب يالله بحسن الخاتمة ....... اسعدني تواصلك
حصريا001
22/05/2013, 01:46 PM
مواقف عجيبه

فيها عبره وتجربه

شكرا لك .

حياك الله اخوي ....... قلب ذيب ..... صدقت اخوي الحياة سجل وتاريخ نستفيد من كل تجربة في حياتنا ....... اسعدني تواصلك
حصريا001
22/05/2013, 01:48 PM
هههههههههههه عز الله انه منحوس والله يكينا شر خوتهم الله يسلمك ويعطيك العافية على هالتقرير المميز
حياك الله اخوي ....... صقر الحروب .... ههههههههه انشهد انه منحوس عسى توفيقة في السنين المقبلة يارب ....... اسعدني تواصلك
حصريا001
22/05/2013, 01:49 PM
هذي والله ردات الحظ منحوس بقوه ولا فيه حيله نصيحة لاعمره يروح معكم

تقبل مروري والله يعطيك العافيه
حياك الله اخوي ....... قلب صافي ..... ابشر ان شاء الله , معاد شفناه ولا حد ذكرة لنا يمكن انة بطل ترك المقناص الله واعلم هههههههه ....... اسعدني تواصلك
حصريا001
22/05/2013, 01:52 PM
لاحول ولاقوة الا بالله

ياشين المنحوس لكن تتوقع انه قليل الأستغفار ولا لا
حياك الله اخوي ....... توكار ..... اي والله المنحوس فالة ردي , اما بخصوص الرجال كان اخلاقة عالية ويصلي ويذكر ربة والله عالم بما في الصدور ....... اسعدني تواصلك
قناص الحوى
22/05/2013, 04:40 PM
هذا الحظ الردي
حمد لعنزي
22/05/2013, 10:11 PM
سؤالف طيبه ؤتقريرطيب ؤمتعؤب عليه الله يعطيك العافيه ؤيسعدك ؤيجمعك بخؤيك المنحؤس ؤيزين حظه ؤحظ جميع المسلمين
حصريا001
28/05/2013, 02:06 PM
يامرحبا اخوي حصريآ
قصه جميله وسرد ممتع وأبدعت يالسنافي
اما المنحوس ماله حل هههههههه الله يقوم حظه ويعوضه ومن يقرا
تقبل مروري
حياك الله اخوي ....... راعي شلهوب ..... هههههههه الله يرزقة الجنة و حسن الخاتمة ....... اسعدني تواصلك
حصريا001
28/05/2013, 02:08 PM
الله يرزقه بالنادر اللي يفك هالنحس منه


لا هنت على السرد الممتع

حياك الله اخوي ....... عبدالرحمن بن ذياب ..... امين يارب.... والله انه مسكين وتعب بس مالله راد له رزق هاك السنة ....... اسعدني تواصلك
حصريا001
28/05/2013, 02:09 PM
هذا الحظ الردي

حياك الله اخوي ....... قناص الحوى ..... هههههههه انشهد المسكين وين مايضربها عوجا ....... اسعدني تواصلك
الشام
29/05/2013, 12:43 PM
يا مكثر هالاشكال يالربع يا خواينا اخص الشباكة واللي متعبين انفسهم اللي ما طرح خلال العشر السنين الاخيرة لا عاد يقنص ترى حضه مثل هالمنحوس
حصريا001
03/06/2013, 01:06 PM
يا مكثر هالاشكال يالربع يا خواينا اخص الشباكة واللي متعبين انفسهم اللي ما طرح خلال العشر السنين الاخيرة لا عاد يقنص ترى حضه مثل هالمنحوس
حياك الله اخوي ....... الشام ..... هههههههه انشهد اخاف تنتقل العدوى ....... اسعدني تواصلك
حصريا001
03/06/2013, 01:06 PM
الله يكفينا شره


اعوذ بالله من النحس

حياك الله اخوي ....... الناقد الاول ..... امين يارب ....... اسعدني تواصلك