حرارة وبعدها تنفيظ !!!!

[بن شطيف]

السلام عليكم ورحمة الله وبركاته
اخواني أعضاء مكشات ابي مساعدته من لديه الخبرة أنا من كثر متابعتي له لهذا الموقع الجميل والاعضاء المميزين
لدي مشكلة بموتري لي اسبوع وموتري بالورشة حست إلين تعبت وقلت مالي إلّى المكشاتين بيحلونها لي
أنا عندي باترول موديل 90 كلبريتر بس المشكلة من كم أسبوع لاحظت الحرارة ترتفع ومدري ويش السبب ترتفع إلى الربع وهو واقف مع أنها ما كانت تتعدى الخط الأول ومع المكيف ترتفع إلى النص إذا مسكت خط تنزل وأنا خفت على الموتر ووديتة الورشة أول ما وديته قالي المهندس من المروحة تماتيكها خربات وقف التماتيك وركبة بس ما في فايده ورجعت له مرة ثانية
وقال من الباكن أو ) الصوفة ( مدر ويش تسمونها المهم لي يجي تحت راس المكينة المهم ركبة وطبق المكينة ورجع كل شي بس ما فيه فايدة مدري ويش السبب بس ألحين زادت مشكلة الموتر ينتفظ نفظ غير طبيعيي زود الريس من الكربريتر ما فيه فائدة بس لو أحد يساعدني باسرع وقت تكفون أبي أطلع الموتر قدلى أسبوع أمشى على رجولي

[ابوخليل200]

السلام عليكم.
بارك الله فيك .
ساذكر لك سبب ارتفاع الحراره وقد تكون واحد من هذي اﻻمور والعلم عند الله.
1.راس المكينه او وجه الراس.
2.طرمبه الماء.
3.المروحه اوتماتيك المروحه.
4.الرديتر يمكن متسدد .
5.غطاء الرديتر .
6.بلف الحراره.
7.طبات المكينه.
8.من الظروري تركيب مروحه للمكيف.
9.الماء الغير اصلي والمخصص للحراره.
10.عدم وزن بلوف المكينه.
11.قدم زيت المكينه.
واسف على اﻻطاله.
الله ييسر امورك وشكراً.

[بن شطيف]

ابوخليل200
شكراً على المرور وفي بعض الامور سويتها ما في فايدة مثل :
1. مروحة اتماتيك
2. غطاء الراديتر تم تغييرة
3. وزن البلوف
4. الزيت تم تغييرة
5. الماء عبيت ماء دبة ماء أخضر مع شويت ما عادي
6.من الظروري تركيب مروحه للمكيف.موجودة
ــــــــــــــــــــــــــــــــــــــــــــــــــ
وبعض الاشياء مأعرفها لاني قرييب مشتري السيارة ولا اعرف فيها كثير مثل :
1.طرمبه الماء. وين تجي
2. الرديتر يمكن متسدد .أعرفة بس ما جربت
3.بلف الحراره. وين يجي
4. طبات المكينه.وين تجي
ــــــــــــــــــــــــــــــــــــــــــــــــــ ـــــــــــــــ
أبشركم النفضة لي بالموتر راحت طلع ثلاثه البواجي الاخير ماتشتغل ضعيفة الشغلة كلها طلعت مت وزن البلوف كان مشدود زيادة عل كلام المهندس بس باقي الحرارة ربع وهو واقف انا شاك من الراديتر اجرب وشوف

[SGL]

هذي حركات كلتش المروحه بس إنت تقول غيرته بس مدري إنت ركبت أصلي ولا تجاري ثاني شي شيك على الهوايه اللي تجي حوالين المروحه لاتكون مكسوره وطايح منها جزء كبير لازم تكون كامله والكامل وجه الله وعندك الديلكو لازم يكون موزون صح ﻷن له دخل برتفاع الحرارة والطرمبة مكانها خلف كلتش المروحة اللي هو تماتيك المروحة أكشف عليها ممكن دفعها ضعيف وشوف الرديتر ممكن يحتاج تسيخ وتحياتي لك

[sgl2002]

اذا الرديتر قديم ارمه وركب رديتر اردني ب٤٠٠ ريال

وتماتيك المروحه لازم لازم تاخذه من الوكاله لان الباقين كذابين وسعره ٨٠٠

[sgl2002]

وطرمبة الماء انت اختبرها بنفسك

افتح غطاء الرديتر وادعس بقوة

اذا تحرك الماء وانشفط داخل فمعناها سليمه

ولاتنسى تركب بلف حرارة

[بن شطيف]

الاخ
sgl
و الاخ
sgl2002
مشكورين على المرور والافادة
كلتش المروحة التماتيك ماخذه تجاري أن الكلتش الاولّي
كنت ماشي وماسك خط إلا وسمع الصوت تغير مثل الونّة
صوت المكينه تغير ونه قالولي من تماتيك المروحة الكلتش
أخذت من التجاري وركبتة مافيه فائدة وخليتة على التجاري
إلى الان وصوت الونة مازال
ــــــــــــــــــــــــــــــــــــــــــــــــــ ــــــ
ولاتنسى تركب بلف حرارة ممكن اعرفة بس المسميات تختلف ويين يجي مكانه
مثل طرمبة الموية أعرفها بس بأسم ثاني نسميها( بمّب )

[فتاح الجواد]

طرمبة الماء سلمك الله خلف المروحة الاساسية
وبلف الحرارة في الكوع اي داخله، الي طالع منه لي عريض للراديتر ولي صغير
تحصلة عند عند غطاء الراديتر

[فتاح الجواد]

لكن ودي اسألك عن الرجة الي طلعت
لان عندي رجة تطلع اذا سخن الموتر
وهي انه ينتفض كأنه ينتع فقط اول ما امشي
ثم تختفي المشكلة

[فتاح الجواد]

موتري فيه نفس المشكلة من العام الماضي
ومع الاسف لم اجد لها حل ونسمع راي الشباب

[SGL]

الاخ
sgl
و الاخ
sgl2002
مشكورين على المرور والافادة
كلتش المروحة التماتيك ماخذه تجاري أن الكلتش الاولّي
كنت ماشي وماسك خط إلا وسمع الصوت تغير مثل الونّة
صوت المكينه تغير ونه قالولي من تماتيك المروحة الكلتش
أخذت من التجاري وركبتة مافيه فائدة وخليتة على التجاري
إلى الان وصوت الونة مازال
ــــــــــــــــــــــــــــــــــــــــــــــــــ ــــــ
ولاتنسى تركب بلف حرارة ممكن اعرفة بس المسميات تختلف ويين يجي مكانه
مثل طرمبة الموية أعرفها بس بأسم ثاني نسميها( بمّب )

مركب كلتش تجاري وتقول ليش الحرارة ترتفع ونا واقف أنصحك تغيره بسرعه قبل لايضر بلاوي ثانيه البلا منه يعني الرديتر مافيه شي

[SGL]

لكن ودي اسألك عن الرجة الي طلعت
لان عندي رجة تطلع اذا سخن الموتر
وهي انه ينتفض كأنه ينتع فقط اول ما امشي
ثم تختفي المشكلة

شيك على كراسي القير والمكينة وعلى الصحن والدسك

[فتاح الجواد]

الكراسي مغيرهم قبل فترة
والمشكلة ماتطلع الا مرات قليلة واذا ارتفعت
الحرارة وابطت السيارة واقفه
مع العلم اني مركب مراوح سوبارو

[بن شطيف]

فتاح الجواد
انا النفضة لي كانت عندي بسبب لما فكوا المكينة ما وزنوا البلوف تمام لان بعض البواجي ماشتغلت ضعيفة
انت تاكد من البواجي جميعها والبلاتين

[بن شطيف]

طرمبة الماء سلمك الله خلف المروحة الاساسية
وبلف الحرارة في الكوع اي داخله، الي طالع منه لي عريض للراديتر ولي صغير
تحصلة عند عند غطاء الراديتر

مشكور أخوي هذي كلها أعرفها بس بأسماء غير

[مركز حراره]

اخوي بنسبه للحراره ركب مراوح سوبارو وعلى الضمان

[بن شطيف]

يااخوان كلتش المروحة غيرناه والحساس وبدلناه والحراره عيت تنزل ويش باقي
هل تنصحوني بتركيب مراوح كهرب او ويش اخرتها
انا حرارتي طلعت فل على الموتر شكلي با ولع فيه من مرة
افتوني قبل لا اسوي لي براسي

[sgl2002]

الراس لازم يتغير لانك مسحته ولحمته

الراس هو سبب الحرارة


خذ لك راس تشليح

[sgl2002]

لاتركب مراوح سوبارو حتى تعالج الحرارة من اصل

[بن شطيف]

من قال إني مسحت الراس ولحمتة
كانت مابة حرارة بس من كم يوم ارتفعت وقال المهندس من الوجة لي يجي تحت الراس
وبدله بس الحرارة ما زالت ترتفع

[sgl2002]

معليش وانا اخوك

لخبطت بين موضوعك وموضوع اخر


فيه نقطه نسيت اقولك


اوزن الديلكو لانه بعد فك المكينة اكيد تغيرت الوزنية

[SGL]

أخوي أبيك تركب رديتر ثاني تدبره من أي أحد وتجرب بديت أشك فيه أو تصيخه وجرب والبلوف هل وزنتها بعد فك الراس أبيك اللحين تقعد للرديتر قعده مظبوطه وعلمنا وش يصير

[بن شطيف]

الديلكو فحصة الممهندس يقول موزوون
أنا اليوم خليت الموتر شغال ودرت به 10 دقايق
وبعدين وقفت والموتر شغال ورشيت ماء من قدام ونزلت الحرارة تحت الربع
بس خليتة شوي وطلعت مدري من الاديتر

[بن شطيف]

sgl
مشكور أخوي
بكرة إن شاء الله اجرب ورد خبر
لأني كنت مستبعدة جدأ لكن هو أخر حل

[SGL]

والله ياأخوي الحرارة دايم تحير الواحد ومايعرف وش سببها ونا أحاول دايم ماأخسر الواحد ودايم أقوله شيك وليس غير بس أبي اللي يشيك يكون فاهم ونبيه خرابك هذا صار نفسه مع أخوي زمان بكريسيدا وتبهذل مثلك ماخلى شي ماغيره طبعآ يخسر قيمة القطع لاكن التركيب عندي وكنت أقوله صيخ الرديتر لاكن يطنش لاكن يوم راح صيخه رغم محل الرديترات يقوله الرديتر سليم وبعد التصيخ مازالت الحراره وبعدين جبتله رديتر فكيناه من سيارة بورشة صاحبي أغلب وقتي أجلس عنده وشتغل معه بعض الأحيان المهم ركبنا الرديتر والحراره صارت طايحه وتمام التمام فكينا الرديتر ورديناه لراعيه وأخذنا رديتر جديد وركبته وجلست السيارة سنتين وهي ولا أحلى وبعدين باعها وإن شاء الله يكون خرابك من الرديتر

[بن شطيف]

الله يسمع منك إن شاء الله تكون من الراديتر

لاني صحيح تبهذلت وغثيت راعي الورشة كل يوم أغير شي
وخسرت الكثير وباقي معي حق الراديتر بس وبعدها اشوف

[sgl2002]

خذ رديتر اردني جديد لك ولاهي بخسارة في موترك

[SGL]

أخوي قبل تسيخ الرديتر أو قبل تغيره أبيك تشيك على الكزوز هل فيها تنسيم وعلى الشكمان الدبه الكبيره هل هي جديده أو قديمه إذا قديمه أبيك تفصل الماصوره الي تجي من الكزوز وتركب في الدبه كلها مسمارين تحصلها تحت باب السايق قريبه من القير أو عند أقمشة البريك روح محل شكمانات وخله بس يفك المسامير ويبعد الماصورة عن الدبه وجرب أحيان تكون منها ممكن تكون مسدوده والكزوز لاصار فيه تنسيم يزيد الحراره طبعآ ذحين حيرتك ﻷني قلتلك رديتر واللحين أقولك شكمان ههههه بس ماعليك شغلتها سهله وماتكلف أهم شي نطلع الخراب قبل الخساير رغم إنك خسرت ومابقى شي لاكن الله يعوضك ﻷنها راحت عن بالي وتوي تذكرتها الكزوز أتوقع إنك غيرتله وجه دامك فكيت الراس بس شيك أبتعبك ههههههه

[بن شطيف]

أخوي عندما فكوا الراس فكو الكزوز من الثلاثة المسامير لي تجي قرب الراس وصحيح احس تنسيم وشفت كربون من بين الفكتين وضعف بالموتر وأحسة متراخي أول ماتشغلة وهو واقف مثل التفتفة البسيطة جداً واحس بان الموتر يبي ينطفي بس الحرارة عندي من قبل مانفك الراس

[بن شطيف]

يأخوان اليوم غيرت طرمبة الماء وغطاء الراديتر وهم ماكو فايدة

[SGL]

الله يعينك طيب أخوي وش سويت في الرديتر وأبيك تجرب تغير البطارية لاتشتري بطرية خساير زايده مانبي أبيك تدبر بطارية من أي سيارة وتركبها وشوف الحرارة تفرق

[هاوي قناصه]

هههههههههههههههههههههههههههههه
sgl
ياحبني لك انا متابع الموضوع من يدايته لاكن انت تكلم عن اديتر ولا عن بطاريه

[ابوشاهه]

الله يعينك طيب أخوي وش سويت في الرديتر وأبيك تجرب تغير البطارية لاتشتري بطرية خساير زايده مانبي أبيك تدبر بطارية من أي سيارة وتركبها وشوف الحرارة تفرق
عجيب اول مره اعرف ان البطاريه من اسباب ارتفاع حرارة المحرك !!!!!!

[SGL]

ههههههههههههه معقوله
أنا أكلمه على الأثنين الرديتر والبطارية وسبق وكلمته على الرديتر بس مدري ليش طنشه وراح غير الطرمبه أخوي إذا جيت تسيخ الرديتر أو تغيره سوي مره وحده غسيل لمجاري الماء في المكينة بس وقت الغسيل فك بلف الحرارة
أما بخصوص البطارية أحيان يكون فيها إلتماس ويصير عداد الحرارة يرتفع لاكن السيارة مافيها حرارة بس عداد الحرارة يؤثر عليه أي شي والدليل أحيان يكون سلك السالب مرتخي يصير عداد الحرارة يلعب وصلت المعلومه ههههههههههه طبعآ ماأجيب شي من عندي أغلب ردودي عن خربات صارت قبل وقدام عيني أي أستفسارت حبايبي بس تكون في موضوع جديد خارج موضوع الرجال ﻷنه جالس يدور حل للحرارة في موتره تحياتي لكم:D

[بن شطيف]

أخ sgl ياحبني لك عجيب ومدع وفكاهي بنفس الوقت

وعلى فكرة حتى البطارية غيرتها
اما الراديتر قالوا مافية شي وانا مالقيت احد يتبرع لي على شان اجرب وردة لة الكل يعتذر
بس أشوف وأحد اليوم ممكن يتجاوب معي ورد لكم خبر

أما عن الطرمبة لقيتها تهرب ماء وغيرتها